Matthew 5:7 - Yak'usda Ooghuni

⁷ ꞋUyoonne gha tꞌeninzunne, ꞌenne Yakꞌusda cha bugha teꞌuntazeh, ꞌenne ꞌukꞌenus hoonzoo-un bughá whultsꞌut.

Matthew 5:7 Iomraidhean Croise

Mark 11:25

ꞋInkꞌez sahyin whe tenadahdli de, ꞌuyoonne tsꞌun nohba dzoh de buba nꞌún whutulhdilh ꞌet la nohBá, yakꞌuz úsda-un, nohni cha nohlubeshi nohba ꞌun yutoolhdilh.

Luke 6:35

ꞋEt hoontsꞌi nohchꞌaz ditnine bukꞌeoohsiꞌ, ꞌinkꞌez soo neꞌboolhꞌen. Bughe ꞌoolhlaꞌ ꞌinkꞌez hoonli nohtlꞌunátiltsꞌulh hukwa tse hólhleꞌ junih. ꞋInkꞌez hooncha whe nohba kꞌelha whutaleh. ꞋEt mbe la yakꞌuz soo ꞌudedo ꞌuntꞌoh-un, ꞌen ooyeꞌke tihleh. ꞋAlhaꞌ mbene la musi lhdusnine ꞌinkꞌez ntsiꞌne cha, tsꞌiyawh butsꞌun unzoo.

Romans 11:30

ꞋEt nohni ꞌudun yun kꞌut whutꞌenne niz de haóodanzut-un Yakꞌusda ꞌaw ookꞌú nulheꞌzuhtꞌen. ꞋEt hoontsꞌi ꞌandit dzin whutsꞌun ꞌet Lizwifne, ꞌenne Yakꞌusda ꞌaw híkꞌunulhéꞌustꞌen. ꞋEt huwa lubeshi ꞌulhꞌen-un nohba ꞌún whutilhdulh-un nohghá whultsꞌut.

1 Corinthians 7:25

ꞋEt mbe la ꞌaw dune kꞌus tsꞌeke tꞌelhnusze-un, ꞌenne bughun nohbulh yatisduk. ꞋEnne bughun neMoodihti ꞌaw khuni stlꞌalhdiꞌal ꞌet hoontsꞌi neMoodihti sgha teꞌninzun whe stꞌa ninintan-un ooba whutisdleh ꞌet huwa ndiz unꞌa nohbulh yatisduk.

2 Corinthians 4:1

ꞋEt huwa ndi ꞌandit netsꞌu hoozi-un, ꞌet huba Yakꞌusda ba neꞌútꞌenne tsinli. ꞋEt Yakꞌusda ye teꞌ ninzun-i neghaltsꞌut, ꞌet whe ꞌaw ꞌetsul ꞌutsꞌooneh ꞌaitꞌoh.

Ephesians 4:32

ꞋInkꞌez tsꞌiyawh lhtsꞌu ꞌoóhzooꞌ, ꞌinkꞌez tsꞌiyantsuk whe nohdzi óolhdzooꞌ whe lhgha teꞌuntihdzin, ꞌinkꞌez ntsꞌenꞌa Christ, ꞌen be Yakꞌusda nohlubeshi nohba yunaꞌalhde, ꞌet nohni cha whuz unꞌa za ꞌilhone ꞌahli whe lhba ꞌun whutoolhdilh.

Colossians 3:12

Yakꞌusda ꞌutahanóhanla ꞌet whe oochꞌeꞌ ꞌahli, ꞌinkꞌez nohkꞌensiꞌ. ꞋEt huwa ndiz unꞌa oohtꞌeꞌ. ꞋUyoonne gha teꞌnoohzin, ꞌuyoonne tsꞌun oohzooꞌ, yo ꞌududólhdzin, ꞌinkꞌez ꞌuyoonne nanilhtsulyaz neꞌboolhꞌen. ꞋInkꞌez tsꞌiyantsuk saꞌ whe dzoh nutihzut-un whulh oohyin.

1 Timothy 1:13

Niz de ha oodanzut Yakꞌusda chꞌaz dasni ꞌinkꞌez ooba ꞌalha ꞌuhoontꞌohne, dzoh nubuzusde. Tsꞌiyanne ba dzoh ꞌudusni inleꞌ. ꞋEt hoontsꞌi ꞌaw tꞌeoonuzuszun-un, sba ꞌalhaꞌ lheꞌhootꞌoh ꞌet huwa ꞌistꞌen, ꞌet hoontsꞌi sgha teꞌduninzin.

1 Timothy 1:16

ꞋEt hoontsꞌi Jesus Christ, ꞌen sgha teꞌninzin. ꞋEt ꞌinkꞌez ꞌen ba ꞌudechoo ꞌoh te neꞌustꞌen-un oosdleꞌ. ꞋEt huwa sgha teꞌninzin. Ndunne ꞌawet nilhdukw buba ꞌalhaꞌ yintꞌoh whe ꞌilhiz huhutinalh-un hotitꞌelh, ꞌenne whubunilhtan-un usdli.

Hebrews 4:16

ꞋEt huwa Yakꞌusda ookwꞌutsꞌuzda cho diztiꞌ-i whuz de ye únzoo-i negha yúꞌaih. ꞋEt huwa ꞌaw whelhtsꞌuniljut whe whuz uztooyaꞌ. ꞋEt whuz de negha teꞌninzun, ꞌinkꞌez whé netsꞌun unzoo-un, ꞌet nduwhulcho whe tsꞌuhootálhchulh. ꞋEt whuz unꞌa la ꞌen ba ndi yun kꞌut uzdilhtsꞌi-un, ndet la whe nela ꞌeꞌ whudutánelh ꞌet negha óotaltsꞌulh.

Hebrews 6:10

Yakꞌusda oochꞌeꞌne, ꞌenne nohni ooba neꞌútꞌenne ꞌahli ínleꞌ, ꞌinkꞌez ꞌawhuz ꞌet za nduhtꞌen. Nohꞌeꞌutꞌen ꞌinkꞌez Yakꞌusda ookꞌehsiꞌ whe ꞌahtꞌen, ꞌet tsꞌiyawh Yakꞌusda whunilhꞌen. Yakꞌusda tsꞌihꞌun unꞌa ꞌuntꞌoh, ꞌet huwa ꞌaw whunaoodoolnoh ꞌaitꞌoh.

James 2:13

ꞋInka ndet dzin suba neba nahutideh-un whusaóotiltsꞌulh, mbene lhgha tꞌelhenízun-un, ꞌen oogha telheꞌwhunídzun whe Yakꞌusda buba nahutiyeh. ꞋEt mbe ꞌuyoon gha téꞌ ninzun-un, ꞌen Yakꞌusda yugha teꞌuntazeh whe yuba nahutiyeh.

James 3:17

ꞋEt hoontsꞌi ndus de be whutnih-i, ꞌudechoo-i netsun hooloh neilhꞌi, ꞌinkꞌez nedzi dizghel cha yulhtsi, ꞌinkꞌez nánilhtsulyaz néꞌtsꞌutꞌen. ꞋEt whe ꞌuyoonne hukwaꞌ huninzun kꞌunꞌa bugha tsꞌúwhunle. Be teꞌ nudzun-i, cha ꞌuztitꞌelh, ꞌinkꞌez ꞌuyoonne ba cha ꞌutꞌen unzoo-i ꞌutsꞌoolhꞌen. ꞋInkꞌez tsꞌiyanne lhgha za nebutsꞌoolhꞌen, ꞌinkꞌez ꞌaw nawh lheꞌtsꞌunizun whe neꞌtsꞌootꞌen.

1 Peter 2:10

ꞋUdaꞌ Yakꞌusda ooduneꞌ lháhloh inleꞌ. ꞋEt ꞌandit Yakꞌusda ooduneꞌ suhliꞌ. ꞋUdaꞌ ꞌaw bé nohgha teꞌwhunizeh-i lhulhchulh inleꞌ. ꞋAndit ꞌawet bé nohgha teꞌwhunizeh-i nohghantꞌai.