Matthew 16:27 - Yak'usda Ooghuni

²⁷ Yinka Dune Yeꞌ whusatiyalh, ooBá ye diztiꞌ-i ꞌinkꞌez oolizas, bubulh, whusatiyalh whe tsꞌiyanne dahitꞌen, whuz unꞌa ꞌilhone whe buba kꞌelha whutilhtselh.

Matthew 16:27 Iomraidhean Croise

Matthew 13:41

Yinka Dune Yeꞌ, dulizas whuz de ꞌubutilhꞌalh whulerwe unli-un, mbene hukwaya hoonli tuneꞌ ꞌústꞌenne, ꞌinkꞌez yukꞌunulheꞌustꞌenne, tsꞌiyawh ꞌilhubohotálelh.

Matthew 13:49

ꞋEt ꞌawet ntsꞌoya hoozulh whe buba neóoninꞌai-un, ꞌet buba whusahóoltsꞌut de, ꞌet hukwꞌunꞌa za ꞌuwhutánelh. Lizas whusahutidulh, unzoone dune ꞌinkꞌez ntsiꞌne dune lhtahábotilelh.

Matthew 24:30

ꞋEt de la tsꞌiyanne dune yunoolhꞌen ha Yinka Dune Yeꞌ yakꞌuz tsꞌe be hóodutaltsilh. ꞋEt ꞌoh whuya hoozulh de, dune ndi yun kꞌut ndulcho whe tso yahutilhduk. ꞋEt Yinka Dune Yeꞌ whuz de uyalh whe huyuntilhꞌelh. Kwꞌus kꞌut yakꞌuz tsꞌe ha tíyalh. Ye diztiꞌ-i ꞌinkꞌez ye ulhtus-i, ꞌi be tinelh.

Matthew 25:31

“ꞋEt Yinka Dune Yeꞌ nkede ootsꞌu haꞌ ꞌánduz whe whusanátidalh, lizas lubeshi ooghu hoolohne, tsꞌiyawh huyulh whusanátidulh. ꞋOh de de, ookwꞌutsꞌuzda cho diztiꞌ-i, ꞌi kꞌut nanátlꞌa dutidalh.

Matthew 26:64

ꞋEt Jesus ndúyulhni, “Nyunchꞌoh ꞌet ꞌúdini. Njan huwun nohbulh yasduk, kꞌat le de Yinka Dune Yeꞌ, ꞌen ulhtus-un, ꞌen nailhni tsꞌunkꞌus yughu usda, ꞌet whutihꞌelh. ꞋInkꞌez kwꞌus kꞌut ndus de ha tiyalh, ꞌet cha whutihꞌelh.”

Matthew 8:20

Jesus ꞌuyulhni, “Nanguz ꞌi cha ꞌan whutꞌi wheꞌ ꞌuntꞌoh ꞌinkꞌez dutꞌaiyaz cha tꞌo ꞌutꞌi. ꞋEt hoontsꞌi Yinka Dune Yeꞌ, ꞌaw hukwꞌut tsén talꞌalh-un hoontsꞌi lhuhóotꞌiꞌ.”

Mark 14:62

Jesus uyúlhni, “A, ꞌen ꞌustꞌoh, ꞌinkꞌez nohni tsꞌiyawh si, Yinka Dune Yeꞌ, huyuntilhꞌelh Yakꞌusda ooghu nailhni tsꞌunkꞌus usda whe ndus de kwꞌus toh ha nátidalh.”

Mark 8:38

ꞋAndit yukꞌedinzutne lubeshi ꞌuhutꞌen ꞌinkꞌez dune tsꞌeke bulh nintaꞌhutꞌih hinli, ꞌet hoontsꞌi mbe la si ꞌinkꞌez sughuni cha yukaya unli de, Yinka Dune Yeꞌ, ꞌen cha yukaya tileh, lizas bulh ooBá ootsꞌu ha yánduz-i toh whusanája de.”

Luke 21:27

ꞋOh de de, Yinka Dune Yeꞌ kwꞌus toh ye ulhtus-i be ꞌinkꞌez ootsꞌu ha yánduz-i cha, whuz unꞌa huyuntilhꞌelh whe whusatíyalh.

Luke 22:69

ꞋAndit whutsꞌun Yinka Dune Yeꞌ nailhni tsꞌe Yakꞌusda whelhtus-un tidalh.”

Luke 9:26

ꞋEt mbene la dune si cha ꞌinkꞌez sghuni cha yukayá unli-un, ꞌet de Yinka Dune Yeꞌ, ntsꞌo de dichꞌoh ye diztiꞌ-i cha, ooBá ye diztiꞌ-i cha, ꞌinkꞌez Yakꞌusda oolizas hiye diztiꞌ-i cha, whuz unꞌa whusanaja de, ꞌoh de bukayátileh.

John 21:22

ꞋEt Jesus uyúlhni, “Whusanátisdalh whutsꞌun ꞌet hoonaꞌ hukwaꞌ nuszun de, nyun mba lheꞌhootꞌoh. ꞋEt nyun sunanyalh.”

John 21:23

Mbene la lhulhutsinke suliꞌne ꞌet ndi khuni Jesus ye yátilhduk-i tsꞌiyawh butoh nídilhtsꞌut, nyoon Jesus yukꞌentsiꞌ-un ꞌaw dálhtisa. ꞋEt hoontsꞌi Jesus Peter ꞌaw lhidínel ndun ꞌen ꞌaw dálhtisa. ꞋAntsꞌi yúlhni, “Whusanátisdalh whutsꞌun ꞌet ꞌen hoonaꞌ hukwaꞌ nuszun de, nyun mba lheꞌhootꞌoh?”

Acts 1:11

“Galilee whutꞌenne, di ha ꞌet núdulhya ꞌinkꞌez ndo yat tsꞌe whunulhꞌen? Ndun Jesus ndo yakꞌuz tsꞌe nohghu whenája-un ꞌandit nulhꞌen ndo yakꞌuz whenája, whuz unꞌa za whusanátidalh,” ꞌubuhútni.

Romans 14:12

ꞋEt huwa ꞌilhoghun tsꞌinli whe datsꞌitꞌen-un, ꞌet Yakꞌusda uzdutánelh.

Romans 2:6

ꞌet whe ꞌilhone uhli whe nohꞌeꞌutꞌen gha Yakꞌusda nohba ꞌukꞌelha whutilhtselh.

1 Corinthians 15:23

ꞋEt hoontsꞌi ꞌilhoghun hinli whe ntsꞌoya buba hoozulh whe bugha óoninꞌai, ꞌet whuz unꞌa ꞌuhutitꞌelh. Christ ꞌen ꞌudechoo-un suliꞌ. ꞋEt hukwꞌelhꞌaz mbene la Christ oochꞌeꞌne hinli whe buba whusanátidalh, ꞌet de ꞌenne cha dunahudutádulh ꞌinkꞌez nahuhitátnaih.

1 Corinthians 3:13

ꞌet ndet dzin whusahooltsꞌut de, ꞌet tsꞌiyawh ꞌilho ꞌutꞌen kwun be tꞌentidzeh. Ndi be ꞌuhoolya-i kwun be tꞌenidzin hukwꞌunꞌa.

1 Corinthians 8:8

ꞋEt hoontsꞌi ꞌantsꞌi ꞌutꞌalh-i ꞌaw ꞌi be Yakꞌusda nalh unzoone lhtsꞌíloh. Tsꞌanꞌal de, ꞌet whe ꞌaw ꞌon nus tsꞌinzooꞌ tsꞌooleꞌ ꞌaitꞌoh. ꞋEt ꞌaw lhtsꞌiꞌulh de, ꞌet whe ꞌaw ꞌon nus neba hoontsiꞌ le lheꞌtsꞌitꞌoh.

2 Corinthians 5:10

ꞋEt ꞌilhone tsinli whe Christ ꞌen nahiyilh-un oobut néztiyalh. ꞋEt huwa ndi yun kꞌut datsꞌúltsiꞌ, kꞌus datsꞌúldzooꞌ la, ꞌet whuz unꞌa neba ꞌukꞌelha whutaleh.

Ephesians 6:8

ꞋEt tsꞌiyawh tꞌeoonáhzun, dune ꞌulhnane kꞌus ꞌulhnane bula nahuditnine hoontsꞌi, ꞌutꞌen unzoo-i ꞌahla, ꞌet whuz unꞌa neMoodihti tsꞌun nohba ꞌukꞌelha whutilhtselh.

Colossians 3:25

ꞋEt hoontsꞌi tankꞌus ítꞌelhne, ꞌenne whuz unꞌa buba ꞌukꞌelha whutaleh. ꞋInkꞌez neBá nalh tsꞌiyawh lhgha za ꞌutsꞌintꞌoh ꞌet huwa.

1 Thessalonians 1:10

ꞋInkꞌez ooYeꞌ, yakꞌuz tsꞌu hainya-un, ꞌen cha ooba sulhꞌi. Jesus ꞌen ꞌuntꞌoh. ꞋEn yaidlane butoh dunaidilhti ꞌinkꞌez Yakꞌusda ye nebulh hunilchꞌe-i negha tikulh-i, ꞌi chꞌa neulhyis-un, ꞌen ꞌuntꞌoh.

1 Thessalonians 4:16

ꞋEt neMoodihti dichꞌoh soo ꞌultus-un hutiyih, ꞌinkꞌez lizas ꞌukꞌenus diztiꞌ-un, ꞌen cha dutinelh, ꞌinkꞌez Yakꞌusda ba be tsꞌujih-i, ꞌi cha ꞌudutinelh. ꞋEt whuz unꞌa Jesus Christ yakꞌuz tsꞌe whusanatidalh. ꞋInkꞌez ndunne Jesus Christ ooba ꞌalhaꞌ yintꞌohne, ꞌet whuz unꞌa yaidlane, ꞌenne cho dunahudutádulh.

James 5:7

ꞋInka sulhutsinke neMoodihti whusanátidalh whutsꞌun, ꞌet huba sulhꞌih. Dune ha níyeh ꞌulhꞌen-un, ndi haínulhyeh-i, ꞌi soo ꞌúlcho tileh whutsꞌun, saꞌ whe yuba sulhꞌi. ꞋOlulh ꞌinkꞌez dakꞌet naootilhtelh-un, ꞌet huba sulhꞌi.

1 Peter 1:17

ꞋIlhoghun tsinli whe ntsꞌenꞌa la datsꞌitꞌen-un, neBá ꞌaw lhdítni whe neba nahutiyeh. ꞋInka ꞌen tsꞌun za tenadahdli de, soo cho khahdli. ꞋEn be nulhjut whe ndi yun kꞌut ꞌoh whuya lhóhdilh.

1 John 2:28

Suzkehkeyaz ndun ꞌen za bulh óohtꞌeꞌ. ꞋEt whe la nohnalhtsꞌet hainya de, ꞌinkꞌez whusanája de, nedzi ulhtus unli ꞌinkꞌez ꞌaw hoonli hukwaya lhtsꞌiloh whe la oobut núzdolyaꞌ.

Jude 1:14

ꞋEt Enoch ꞌen whulh lhtakꞌantꞌit Adam tsꞌu hainzut-un ꞌuntꞌoh, ꞌen ndunne dune, ꞌenne bughu nus hónꞌen whe ndutni, “Whunulhꞌen neMoodihti ꞌawet whusáinya! Ooduneꞌne, ꞌenne tsꞌiyawh oochꞌeꞌne, lhane kꞌet ꞌaw ꞌubutsꞌolhto ꞌaitꞌoh, ꞌenne bubulh whusatiyalh.

Revelation 1:7

Whunulhꞌen! Kwꞌus toh whuz de tiyalh. Tsꞌiyanne hitiꞌelh. Mbene oola ꞌinkꞌez ooke lugloo cho hikunúnilhtꞌone, ꞌenne cha hiyutilhꞌelh. ꞋInkꞌez ndi yun kꞌut lhelhdoh didowhne, ꞌen gha khuna hutitso. ꞋEt ndó tanelh, ꞌet ndó honeh.

Revelation 2:23

ꞋInkꞌez ndun tsꞌeke buzkeh cha ubutisghan. ꞋInkꞌez Yakꞌusda ba ꞌilhunaoodulhne, tsꞌiyawh tꞌehontázin, si ꞌustꞌoh dune bubeni toh ꞌinkꞌez budzi bet cha hoonli hukwꞌu nústa. ꞋInkꞌez ꞌilhughun ꞌahli whe nohꞌeꞌutꞌen kꞌoh huwa nohba ꞌukꞌelha whutiselh.

Revelation 20:12

ꞋInkꞌez yaidlane ntsoolne, nchane cha Yakꞌusda but nuhúdilhya hubutísꞌen. ꞋInkꞌez ꞌudustlꞌus lhai ookꞌu neꞌúsguz-i, ꞌi lhkꞌenankat. ꞋInkꞌez ꞌuyoo ꞌudustlꞌus ookꞌu neꞌúsguz-i, ꞌi tsꞌukhuna wheꞌ ꞌudustlꞌus, ꞌi cha lhkꞌenankat. ꞋInkꞌez yaidlane bube ꞌutꞌen kꞌoh huwa ndi ꞌudustlꞌus lhai ꞌukꞌu husguz-un, ꞌi gha buba nahisda.