Mark 4:20 - Yak'usda Ooghuni

²⁰ ꞋEt whulohne yun unzoo-i kꞌut nanánkat ꞌi unduhúltꞌoh Yakꞌusda ooghuni hiditsꞌo, huyílhchuk, ꞌinkꞌez dudzi yo nehídiꞌaih, ꞌet oomaiꞌ whulih. Whulohne tat whunizyai (30), whulohne lhkꞌu tat whunizyai (60), ꞌinkꞌez whulohne cha whunizyat whunizyai (100).”

Mark 4:20 Iomraidhean Croise

Colossians 1:10

ꞋEt neMoodihti ꞌen ba tsꞌihꞌun unꞌa ndi yun kꞌut dúlhtsꞌi. Ndai ꞌulhꞌen-i tsꞌiyawh yé hotꞌeꞌ. ꞋUtꞌen unzoo-i ꞌi ootsꞌu ha yóokat, ꞌinkꞌez Yakꞌusda ꞌon nus tꞌentihzeh.

Luke 8:15

ꞋEt hoontsꞌi ndai la yun unzoo-i kꞌut nanánkat-i, ꞌenne huhóontꞌiꞌ whe khuni hidantsꞌo ꞌinkꞌez budzi unzoo whe huyoontun. Ntsꞌoh dahoontꞌoh hoontsꞌi ꞌilhiz huyilhchuk. ꞋEt whuz unꞌa bumaiꞌ whulaih.”

Mark 4:8

ꞋEt hoontsꞌi ꞌonghoh-i yun unzoo-i kꞌut nanánkat whe soo ha nanyai ꞌinkꞌez oomaiꞌ whulukhi tat whunizyai (30) oomaiꞌ suliꞌ, whulukhi lhkꞌu tat whunizyai (60) oomaiꞌ suliꞌ, ꞌinkꞌez whulukhi whunizyat whunizyai (100) oomaiꞌ suliꞌ.”

Matthew 13:23

ꞋEt hoontsꞌi yun unzoo-i kꞌéninkat-i leꞌ ꞌuntꞌohne. Yakꞌusda ooghuni hiditsꞌo-i, tꞌehinuzih te daja ni whe ꞌutni. ꞋEt bumaiꞌ lhai lhih leꞌ hintꞌoh. Whulukhun whunizyat whunizyai (100) ꞌulhih. Whulukhun lhkꞌu tat whunizyai (60) ꞌulhih. Whulukhun tat whunizyai (30) ꞌulhih.”

2 Peter 1:8

Ndowhi tsꞌiyawh be ndahtꞌen de, ꞌinkꞌez ꞌi be ꞌon nus ulhtus lheh de, ꞌet sih ndi neMoodihti Jesus Christ ꞌen ooghun tꞌeoonihzin-un, ꞌi be ꞌon nus soo nóohyeh, ꞌinkꞌez nohꞌeꞌutꞌen soo tsꞌihꞌun unꞌa ootꞌeꞌ.

Genesis 26:12

ꞋEt Isaac nyo yun kꞌut ꞌaꞌ nanla ꞌinkꞌez yus kꞌut haꞌ nanla. Lhai haꞌ nanla, 100 ꞌet ꞌuwhultsuk, ꞌinkꞌez Moodihti (Yahweh) soo hoonzoo-un yuba whulhtsi.

Romans 7:4

Sulhutsinke ndet la whunoh hodisꞌeꞌ-un ꞌet huwa tꞌeoonáhzun ntsꞌenꞌa la Jesus Christ kꞌúneꞌ ꞌuhtꞌenne ulhi. Nohni ꞌantsꞌi Christ bulh dasáhtsai léꞌuhtꞌoh ínleꞌ. ꞋEt huwa ꞌaw ꞌon ꞌun Moses be ꞌudustlꞌus ootꞌa nínoohtan-un huba lheꞌhóotꞌoh. Christ bulh datsꞌuzsai, ꞌet huwa Moses be ꞌudustlꞌus yuchꞌa naneuzdla. ꞋEt ꞌalhaꞌ ꞌandit mbe la dazsai ꞌinkꞌez dunadija-un, ꞌen bulh ꞌilhoghun tihleh.

John 15:16

ꞋAw nohni ꞌutahalhúsulhtel. Si ꞌutáhanóhisdla toohdilh ꞌinkꞌez mai ha nóolhyeh ꞌinkꞌez nohmaiꞌ ꞌilhiz wheni ootꞌeꞌ, ꞌet hukwa ꞌet nenóhnusdla. ꞋEt huwa la sBá ndai la si sooziꞌ gha ootsꞌo hukwa dahni-i, ꞌi la nohgha íyoꞌalh.

1 Thessalonians 4:1

ꞋEt huwa neulhutsinke, ndi ꞌudekꞌez khuni be nohbulh yátsꞌulhduk-i, neghuni úlhchoot whe Yakꞌusda hótꞌeꞌ ha tóohdilh nohtsꞌútni inleꞌ. ꞋEt doo cha za whuz unꞌa za Jesus neMoodihti, ꞌen be khuni ulhtus-i be nohtsꞌutni, tube cho lhanꞌun te oohzooꞌ, ꞌinkꞌez whuz unꞌa oohtꞌeꞌ.

Philippians 1:11

ꞋInkꞌez Jesus Christ ꞌen gha ꞌutꞌen tsꞌihꞌun ꞌuntꞌoh-i, ꞌet ndutihtꞌelh. ꞋEt whuz unꞌa Yakꞌusda ba tsꞌodólhtiꞌ ꞌinkꞌez ꞌon nus uzdólhtiꞌ.

Matthew 13:8

ꞋOnghoh-i yun unzoo-i kꞌut nanánkat whe soo ha nanyai. Oomaiꞌ whulokhi whunizyat whunizyai (100) oomaiꞌ suliꞌ, whulukhi lhkꞌu tat whunizyai (60) oomaiꞌ suliꞌ, whulokhi tat whunizyai (30) oomaiꞌ suliꞌ.

John 15:2

Mbene la si sgha ꞌuzuschum unline, bumaiꞌ hooloh de, ꞌi ꞌuzooschum butsꞌu haídule. ꞋInkꞌez mbene la bumaiꞌ lhai de, ndai la ꞌutsiꞌ-i bughu wheyoonli-i, ꞌi ꞌet de la ꞌon nus bumaiꞌ lhai ooleꞌ.