James 1:25 - Yak'usda Ooghuni

²⁵ ꞋEt hoontsꞌi Yakꞌusda ooghuni lhaidinla-i, ꞌi be lubeshi chꞌa naneulhti, soo cho hikꞌu yalhduk ꞌinkꞌez whunalhuhodulhnoh, ꞌinkꞌez daja ni ꞌahoolhyiz hukwꞌú neꞌhutꞌen de, ndutꞌenne, whuz unꞌa dude ꞌutꞌen kꞌoh huwa ꞌukꞌenus hoonzoo-un bugha whutaltsꞌulh.

James 1:25 Iomraidhean Croise

Luke 11:28

ꞋEt hoontsꞌi Jesus ꞌuyulhni, “ꞋEt ꞌon nus hooncha-un ꞌuhoontꞌoh, mbe Yakꞌusda ooghuni yuditsꞌone ꞌinkꞌez yoontunne, ꞌukꞌenus hoonzoo-un bubulh ꞌuhooja!”

John 13:17

ꞋEt noheni be tꞌéwhunáhzun de daja nohdásniꞌ, ꞌinkꞌez danóhusdla la, ꞌet nohni cha whuz unꞌa ꞌahtꞌen de, ꞌet de tube hootáhtꞌeꞌ.

John 8:36

ꞋEt huwa ooYeꞌ lubeshi chꞌa nohlanaditni de, ꞌet de tsꞌihꞌun unꞌa ꞌaw ꞌon ꞌun ꞌulhna oohleꞌ ꞌaítꞌoh.

Acts 13:43

ꞋEt yanahadil hukwꞌelhꞌaz Paul Barnabas bulh nahutistꞌaz whe Lizwifne ꞌinkꞌez ꞌudun yun kꞌut whutꞌenne, Lizwif tsꞌu nálhyane, bubontizdil ꞌinka Paul Barnabas bulh bubulh yáhulhduk whe, “Yakꞌusda nohtsꞌun yé unzoo-i, ꞌi za gha yinka dólhtsꞌiꞌ,” ꞌubuhútni. ꞋEt whe budzi ulhtus ubuhulhtsi.

Acts 2:42

ꞋAhoolhyiz ꞌilhuhodulh, ꞌinkꞌez whelꞌaꞌne whubuhodulhꞌeh. Tsꞌiyawh ꞌalhgoh lhulh ꞌuhutꞌen. ꞋInkꞌez ꞌudekꞌelhaz hulhgha naꞌhitꞌal-un whe whunahulnih ha lhlaꞌ hutꞌalh ꞌinkꞌez ꞌalhgoh tenahududli.

Acts 26:22

ꞋEt ꞌoh daꞌ ꞌandit dzin whutsꞌun Yakꞌusda sla ꞌítꞌen. ꞋInkꞌez ꞌandit njan nohbut susyin tsꞌiyanne dósniꞌ ha, telꞌenne cha ꞌinkꞌez díztiꞌne cha. ꞋInkꞌez daja dusni-un Yakꞌusda be nus hóoꞌenne ꞌinkꞌez Moses cha daóotanelh hutni-un, ꞌet za ꞌuwhudúsni.

Romans 11:22

ꞋEt huwa whudáhtsꞌo-un ꞌet hodulhꞌeꞌ, Yakꞌusda dalcho-i be netsꞌun únzoo ꞌinkꞌez ꞌuyoonne dálcho-i be bubúlh huske. Mbene la Yakꞌusda ooghuni lhahuyílhchulhne, ꞌi be nahíltsꞌut, ꞌenne butsꞌun ooghuni tube dutsꞌun whe ꞌuntꞌoh. ꞋEt nohni ꞌudun yun kꞌut whutꞌenne ooghuni úlhchoot, ꞌet Yakꞌusda ye únzoo-i be whuz unꞌa za ꞌahtꞌoh de, ꞌet huwa ꞌuntꞌoh nohtsꞌun únzoo. ꞋEt Yakꞌusda ookꞌunꞌa ꞌaw hukwa lheꞌnúszun de, nohni cha kꞌúnudútihtuk, ꞌuzooschum kꞌunꞌa.

Romans 2:13

Mbene la Moses be ꞌudustlꞌus ꞌantsꞌet yoozílhtsꞌaine, ꞌaw Yakꞌusda ba tsꞌihꞌun lheꞌhítꞌoh. ꞋEt hoontsꞌi mbene la Moses be ꞌudustlꞌus hikꞌúneꞌ ꞌustꞌenne, ꞌenne nintaꞌhuntꞌen-un Yakꞌusda buba gak whutilhtselh.

Romans 7:12

ꞋEt huwa Moses be ꞌudustlꞌus lubeshi ooghu hooloh, ꞌinkꞌez nankiltꞌoh ꞌuyoo khuni netlꞌa ídanꞌai-i, ꞌi cha lubeshi ooghu hooloh tsꞌihꞌun unꞌa ꞌinkꞌez unzoo whe ꞌuntꞌoh.

Romans 8:15

ꞋEt Ndoni nohyudíltsꞌut whe ꞌaw Yakꞌusda be ntilhjut wheni ꞌulhna lhunohílhtsel. ꞋEt nohyudíltsꞌut whe Yakꞌusda ooduneꞌ nohulhtsi. ꞋEt huwa whélhtsꞌuniljut whe bulh yátsꞌulhduk ꞌinkꞌez, “Abba, ꞌuBá,” tsꞌutni.

Romans 8:2

Ndoni gha ꞌilhiz hutisnalh whe Christ bulh ꞌilho usli, ꞌinkꞌez Ndoni ookꞌoh tsꞌe ookꞌuneꞌ ꞌustꞌen-un ꞌi be lubeshi chꞌa nasulhti. ꞋEt huwa ꞌaw dalhtuzisa.

1 Corinthians 15:58

ꞋEt huwa sulhutsinke, ulhtusne oohleꞌ. Khun nahóohtnah junih! ꞋAhoolhyiz neMoodihti be ꞌutꞌen kꞌoh soo cho ꞌuwhulhꞌen. Tꞌeóonúhzun neMoodihti ba ꞌahtꞌen, ꞌaw ꞌantsꞌet iloh ꞌahtꞌen wheꞌ hoontꞌoh.

2 Corinthians 13:5

Naꞌooduzúlhdzih! Ndi bé ꞌalha ꞌuhoontꞌoh-i, ꞌi bulh ꞌáhtꞌoh tilah, nohnichꞌoh naꞌdunulhꞌen. Jesus Christ nohyó ꞌuntꞌoh, ꞌaw tꞌéoonuzáhzun eh? ꞋAw soo cho tꞌéoonuzáhzun de, ꞌet de ꞌet tilah nꞌún tizkatne ꞌahli.

Galatians 2:4

Whulohne neulhutsinke naꞌhududilꞌi. ꞋEnne bugha ꞌuhooja nunútꞌiꞌ be netabonínla. Neghu hooleꞌ ha datsꞌintꞌoh whe dune tsinli. Christ Jesus ꞌantsꞌi nekꞌunaꞌanꞌoh neꞌleꞌneyinla. Wheni doo cha Moses be ꞌudustlꞌus kꞌut ꞌi be ꞌulhnane nehoolhtselh hukwaꞌ hutꞌen.

Galatians 5:1

ꞋEt huwa ndi Christ ye nékꞌunꞌa ꞌanꞌoh-i, ꞌi be ꞌet whuz unꞌa nelanaditnih. ꞋEt soo cho whulh núdolhyaꞌ. ꞋAw ꞌon ꞌat ꞌulhnane kꞌunꞌa oolhghel junih.

Galatians 6:2

ꞋIlhone ꞌahli ndet la nohba howa whulnaꞌ hoontsꞌi lhla oohtꞌen. ꞋEt de la Christ, ooghuni netlꞌa díltsꞌut-i, ookꞌuneꞌ tihtꞌen wheꞌ hoontꞌoh.

Colossians 1:23

Be nohba ꞌalha ꞌuhoontꞌoh-i, soo dutsꞌo-i whe oohtun. ꞋInkꞌez whudutsꞌo-un yoh ookꞌu whuzꞌai-i leꞌ ꞌahtꞌoh. ꞋInkꞌez khuni unzoo-i bulh ꞌudahtsꞌo-un, ndi khuni ooka tse hóohli khun oola doohtnih junih. Ndi yun kꞌut ndulcho whe ndi khuni unzoo-i bugha ídiltsꞌut. ꞋEt huba si, Paul, Christ ba neꞌutꞌen-un susdliꞌ.

1 Timothy 2:15

ꞋEt hoontsꞌi tsꞌekoo tsꞌihꞌun unꞌa dudeni be khuhudli whe be ꞌalha ꞌuhoontꞌoh-i hutꞌi, Yakꞌusda kꞌehinsiꞌ, ꞌinkꞌez buyustꞌe lubeshi ooghu hooloh de, ꞌet ndihintꞌoh de, buyaz whulhih te hudutijih.

1 Timothy 4:16

Nyunchꞌoh soo cho khindli ꞌinkꞌez khuni be whutsꞌodulꞌeh-i cha. ꞋI be bulh za ꞌontꞌeꞌ. ꞋEt ndintꞌoh de, ꞌet de nyunchꞌoh ꞌuduzilyih ꞌinkꞌez ndunne nyuditsꞌone, ꞌenne cha ubalhyiz whe ꞌintꞌoh.

Hebrews 12:15

Soo cho nohtoh nohnichꞌoh nohulhutsinke bughohleꞌ! Doo ka si Yakꞌusda ye unzoo-i hiye nghoyaꞌ. ꞋEt de la whulohne nohtoh nukꞌoz hudooleꞌ ꞌaitꞌoh. Ndihíntꞌoh de, ꞌet ꞌenne bugha lhane ꞌi be hintsiꞌ hulih wheꞌ hoontꞌoh.

James 2:12

Yaooduk ꞌinkꞌez whuz unꞌa za neꞌoohte khuni Yakꞌusda nohtlꞌadanꞌai-i be nohba nahutde ꞌi nela nahutitnih-i ꞌuntꞌoh.

1 Peter 2:16

Jesus gha lubeshi chꞌa nasdilne ꞌahtꞌoh. ꞋEt hoontsꞌi ꞌet whutꞌanínahtan whe nohba ꞌantsꞌi hoonli whe lubeshi oolhꞌen junih! ꞋEt kꞌus Yakꞌusda be ꞌulhnane kꞌunꞌa yinka dólhtsꞌiꞌ.

1 John 2:24

ꞋEt huwa ꞌudechoo whutsꞌun whudáhtsꞌo-un ꞌilhiz wheni ꞌóohtun. ꞋEt ꞌudechoo whutsꞌun whudáhtsꞌo-un nohbulh ꞌúhoontꞌoh de, ꞌet sih neBá ꞌinkꞌez ooYeꞌ cha bubulh ꞌútihtꞌelh.

Revelation 14:13

ꞋEt ndo yakꞌuz tsꞌe ꞌusuhútni, “Ndi ꞌukꞌinges, ꞌandit whutsꞌun mbene neMoodihti tꞌeinínzun whe yahadlane, ꞌenne ꞌukꞌenus hoonzoo-un bubulh ꞌúhooja.” Ndoni, “A,” ni. “ꞋUtꞌen ꞌuhalhꞌen-un, ꞌinka nahutilyis. ꞋInkꞌez dahítꞌen-un bube ꞌutꞌen unzoo-i bubulh yutikulh.”

Revelation 22:14

Mbene la yughuni kꞌuneꞌ ꞌutꞌenne, ꞌenne ꞌukꞌenus hoonzoo-un bugha whútaltsꞌulh. Ndi duchun oogha khútna-i, ꞌinkꞌez njan keyoh whuti whudati-un dahútidulh-un, ꞌenne za bughá whuntꞌai wheꞌ hoontꞌoh.