Genesis 17:1 - Yak'usda Ooghuni

¹ ꞋEt Abram ꞌen ꞌilho hooloh whunizyai ꞌon ꞌat ꞌilho hooloh (99) nawhudizut whe, Moodihti (Yahweh) yunalhtsꞌet hainya ꞌinkꞌez ꞌuyulhni, “Yakꞌusda ꞋUkꞌenus ꞋUltus-un (El Shaddai) ꞌustꞌoh, stso inyalh ꞌinkꞌez ꞌaw hoonli nkꞌelhuholhtsꞌit.

Genesis 17:1 Iomraidhean Croise

Genesis 12:1

ꞋEt Moodihti (Yahweh) Abram ꞌulhni, “Nkeyoh cha whuchꞌa sinyaiꞌ, nyunatneke cha whuchꞌa sinyaiꞌ, ꞌinkꞌez mbá ooyoh cha teninyaiꞌ, ꞌinkꞌez yun whununtistun-un hoonli.

Genesis 12:7

ꞋEt Moodihti (Yahweh) Abram yunalhtsꞌet hainya ꞌinkꞌez ꞌuyulhni, “Mbene la ntsꞌu haindene ꞌenne ndi yun bugha ítasꞌalh.” ꞋEt Moodihti (Yahweh) yunalhtsꞌet hainya-un ꞌen yutsꞌun loodel ꞌinla.

Genesis 16:16

ꞋEt ꞌoh whuya whudizulh Abram ꞌen lhkꞌu dit whunizyat ꞌon ꞌat lhkꞌu tat be yus kꞌut (86) whe Ishmael yughu yulhtsi.

Genesis 18:1

ꞋEt Moodihti (Yahweh) ꞌen Abraham yunalh hainya, njan ndun Mamre, duchun tꞌah terebinth, oak huyulhni, whuꞌiz whunilghaz whe nimbali dati ꞌet usda.

Genesis 18:14

ꞋAw hoonli hoontsꞌi eh Moodihti (Yahweh) ꞌaw ooba hoolhtus eh? Ndet la ꞌet newhudizut-un ꞌet la nohghu naoosjaꞌ ꞌinkꞌez Sarah dune ooyaz tileh.”

Genesis 24:40

ꞋEt hoontsꞌi ꞌusulhni, ‘Moodihti (Yahweh) mbe la ootso nusya-un, ꞌen lizas yulh tiꞌus ha yutlꞌa itilhtelh ꞌinkꞌez inyalh whe sooꞌ hoontꞌoh whe syeꞌ ba ooꞌat snatneke butoh ꞌinkꞌez sbá ooyoh whutsꞌun, whuz de hainzut-un ꞌen ooba yutalhchulh.

Genesis 26:2

ꞋEt Moodihti (Yahweh) yunalhtsꞌet hainya ꞌinkꞌez ꞌuyulhni, “ꞋAw Egypt tsꞌu tonyaꞌ junih. Ndet la yun nyudutasnelh-un ꞌet sih hontꞌeꞌ.

Genesis 28:3

Yakꞌusda ꞋUkꞌenus ꞋUltus-un ꞋUstꞌoh (El Shaddai) soo cho ncha mba hoonzoo-un ngha hóotaltsꞌulh ꞌinkꞌez lhane hooleh dune huldlaine oohleh.

Genesis 35:11

ꞋInkꞌez ꞌet cha Yakꞌusda (Elohim) ꞌuyulhni, “Si Yakꞌusda ꞋUkꞌenus ꞋUltus-un (El Shaddai) ꞌen ꞌustꞌoh. Lhai cho ntsꞌu ha ookat ꞌinkꞌez lhai cho ooleꞌ didohne ꞌinkꞌez dune didohne tsꞌiyawh ꞌenne ntsꞌu ha hutidoh, ꞌinkꞌez lerwene ꞌenne nyustꞌe tsꞌu ha hutidulh.

Genesis 43:14

ꞋInkꞌez Yakꞌusda ꞋUkꞌenus ꞋUltus-un ꞌuntꞌoh (El Shaddai), ꞌen nohgha teꞌnozeh nyoon oobut. ꞋInkꞌez si ꞌilhoghun nohulhutsin ꞌen cha yula dootnih ꞌinkꞌez Benjamin. ꞋEt ꞌawet tsꞌodi susliꞌ de, ꞌawet tsꞌodi susliꞌ.”

Genesis 46:3

ꞋInkꞌez ꞌutni, “Yakꞌusda (El) ꞌustꞌoh, mbá ooYakꞌusda (Elohim). ꞋAw wheniljut whe Egypt tsꞌe tonyaꞌ junih, nyun tube didoh-un ncha-un ꞌet nyutiselh.

Genesis 48:15

ꞋInkꞌez Joseph soo hoonzoo-un be ubulh yalhduk ꞌinkꞌez ꞌutni, “Yakꞌusda (Elohim) mbe la sbáke Abraham ꞌinkꞌez Isaac bulh hitso nusuꞌazne, Yakꞌusda (Elohim) mbe la ꞌandit dzin whutsꞌun yinka susda nduwhulhyiz whe sgha ꞌanꞌaih,

Genesis 48:3

ꞋEt Jacob, Joseph ꞌuyulhni, “Yakꞌusda ꞋUkꞌenus ꞋUltus-un ꞌustꞌoh (El Shaddai) snalhtsꞌet hainya Canaan whuyun kꞌut Luz whe ꞌinkꞌez soo hoonzoo-un stsꞌun tizooꞌ.

Genesis 5:22

Methuselah whuzdli hukwꞌelhꞌaz Enoch Yakꞌusda (Elohim) bulh nusaꞌaz tat whunizyat whunizyai (300) be yus kꞌut ꞌinkꞌez ooyeꞌke ꞌinkꞌez ootseꞌke cha whuzdliꞌ.

Genesis 5:24

ꞋInkꞌez Enoch Yakꞌusda (Elohim) bulh nusaꞌaz ꞌinkꞌez hoolel, Yakꞌusda (Elohim) nayilhchoot huwa.

Genesis 6:9

Nowe tsꞌu haindene hukwꞌeguz ꞌet ꞌuhoontꞌoh. Nowe ꞌen tsꞌihꞌun dune unli, khuna daꞌ whe ꞌaw ookꞌeholtsꞌit hooloh. Nowe ꞌen Yakꞌusda (Elohim) bulh nuya inleꞌ.

Matthew 19:26

Jesus ꞌubunilhꞌen ꞌinkꞌez ndúbulhni, “Dunene, ꞌaw ꞌuhuhooleh ꞌaitꞌoh-un, ꞌet hoontsꞌi Yakꞌusda ba huwa lhúhoolnaꞌ wheꞌ hoontꞌoh.”

Matthew 5:48

ꞋEt huwa nohBá yakꞌuz usda-un, ꞌen dantꞌoh whe tsꞌihꞌun ꞌuntꞌoh, ꞌet nohni cha whuz unꞌa za oohtꞌeꞌ hubaꞌ hoontꞌoh.”

Luke 1:6

ꞋEt nahultꞌoh Yakꞌusda nalh tsꞌihꞌun dune hinli. Yakꞌusda ooghuni buba yutulhúhizyeꞌ-i ꞌinkꞌez ndet butsꞌu hukwaꞌ ninzun hikꞌuneꞌ titꞌen ha, ꞌet tsꞌiyawh hukwꞌú neꞌhutꞌen. ꞋAw hoonli whe bukꞌeholtsꞌit ꞌaítꞌoh.

Acts 23:1

Paul nahíyilhne bubut usyin Paul soo cho ꞌubunilhꞌen ꞌinkꞌez ubúlhni, “Sulhutsinkene neyo tsꞌe oogha tꞌetsꞌoninzun-i ꞌi gha Yakꞌusda but ꞌahoolhyiz wheni be khusna-i tsꞌihꞌun unꞌa ꞌustꞌoh.”

Acts 24:16

ꞋEt huwa si ꞌahoolhyiz Yakꞌusda tsꞌun ꞌinkꞌez dune cha tsꞌun neyo tsꞌe oogha tꞌetsꞌoninzun-i ꞌi gha tsꞌihꞌun unꞌa oostꞌeꞌ hukwa ꞌustꞌen.

Ephesians 3:20

ꞋEt neBá ndet la ootsꞌo hukwaꞌ tsꞌutni-un ꞌinkꞌez howu nuni uznuzut-un cha, ꞌet ꞌon nus ꞌultsuk-i negha tilelh whe ꞌuntꞌoh. Ndoni ye ulhtus-i neyoh ꞌuntꞌoh, ꞌet ꞌi beꞌ whutꞌen.

Philippians 4:13

Christ ꞌen ꞌuja be stus-i sgha nínꞌai. ꞋEn be tsꞌiyantsuk ꞌuwhusꞌen.

Hebrews 12:28

ꞋEt huwa ntsꞌe Yakꞌusda lerwe unli-un, ꞌet ꞌaw nohóohootnah ꞌaitꞌoh. ꞋEt netsꞌu whutikulh. ꞋInkꞌez ye unzoo-i, ꞌi be si Yakꞌusda, ꞌen neba díztiꞌ-un ꞌinkꞌez neba be óonujut-un, ꞌen ooba neꞌtsꞌootꞌen.

Hebrews 7:25

ꞋEn ꞌilhiz wheni khuna ꞌinkꞌez neba tenadudli, ꞌet huwa nawh lheꞌhóotꞌoh tsꞌiyanne, ꞌen be Yakꞌusda hiyenghoh hutitꞌelh, tsꞌiyawh ꞌenne buba ye ulhtus-i ꞌutꞌi whe ꞌilhiz wheni ubutilhyis ha.