Genesis 12:3 - Yak'usda Ooghuni

³ Mbene la mba soo hoonzoo-un ngha hóotaltsꞌulh, ꞌenne cha soo hoonzoo-un bugha hóotaltsꞌulh, ꞌinkꞌez mbe la nkꞌehiyihne cha bukꞌehutisyih, ndi yun kꞌut dilhtsꞌine ꞌenne tsꞌiyawh nyun ngha soo hoonzoo-un bugha hóotaltsꞌulh.”

Genesis 12:3 Iomraidhean Croise

Genesis 18:18

ꞌalha Abraham ꞌen didoh-un ncha ꞌinkꞌez tube ulhtus tileh. ꞋInkꞌez ꞌen gha tsꞌiyawh didohne ꞌenne soo hoonzoo-un bugha hóotaltsꞌulh.

Genesis 18:19

Tꞌeniszin duduzke bukꞌunuhilhyeꞌ, yoh whutꞌine cha bukꞌelhꞌaz Moodihti (Yahweh) ookwꞌunꞌa huhoontun zaꞌ hintꞌoh tsꞌihꞌun neꞌhutꞌen, ꞌet de la Moodihti (Yahweh) Abraham daja yulhni-un ꞌet yugha whutalelh.”

Genesis 22:18

Ntsꞌu hainde-un ndi yun kꞌut dune tsꞌiyawh soo hoonzoo-un bugha hóotaltsꞌulh, skꞌunꞌa ꞌinja ꞌet huwa.”

Genesis 24:35

Moodihti (Yahweh) ꞌen smoodih tube soo hoonzoo-un yuba whulhtsi ꞌinkꞌez dune ncha-un suliꞌ. Khuna-i didoh-i tsꞌiyawh ꞌinkꞌez silver ꞌinkꞌez diztiꞌ-i gold duntꞌi-i, ꞌinkꞌez dune cha, tsꞌekoo yuba ꞌutꞌenne cha ꞌinkꞌez ndi camel cha ꞌinkꞌez donkey cha lhai yugha ninla.

Genesis 25:11

ꞋEt whe lhuwhuzut Abraham dazsai hukwꞌelhꞌaz, ꞌet Yakꞌusda (Elohim) ꞌen ooyeꞌ Isaac soo hoonzoo-un yubaꞌ hoonla. ꞋInkꞌez Isaac ꞌen Beer Lahai Roi ꞌet whutꞌi.

Genesis 26:29

ꞋAw hoonli hoontsiꞌ hukwꞌunꞌa neꞌonleh ꞌaitꞌoh, ꞌaw ntꞌalhtsꞌinalh ꞌet huwa. Hoonzoo-un te za neꞌuntsꞌuyulhꞌen, dalhtsꞌinelh whe za whenantsꞌuyalhꞌaꞌ. Moodihti (Yahweh) soo hoonzoo-un ngha óoninꞌai inli.”

Genesis 26:4

ꞋInkꞌez ntsꞌu haindene, ꞌenne yakꞌuz whusum kꞌunꞌa lhkꞌuz te huldlai hubutilhtselh. ꞋInkꞌez ntsꞌu hainde ꞌen tsꞌiyawh njan yun kꞌut bugha óotasꞌalh. ꞋInkꞌez ntsꞌu haindene, ꞌenne bugha ndi yun kꞌut dune tsꞌiyawh huba soo hoonzoo-i ꞌi butilhtselh.

Genesis 27:29

Dune cha nyunat neꞌhootꞌen ꞌinkꞌez didohne cha mba nacha hunooldulh. Nyulhutsinke cha bumoodih ꞌonleꞌ, ꞌinkꞌez nloo buzkeh, ꞌenne cha mbut nacha hunooldulh. Mbene la nkꞌehuyihne ꞌenne cha bukꞌehoodeh, mbene la soo hoonzoo-un ntsꞌun hutizooꞌ, ꞌenne cha soo hoonzoo-un bugha hóotaltsꞌulh.”

Genesis 28:14

ꞋInkꞌez cha mbene la ntsꞌu haindene ndi yun kꞌut lhez lheꞌuntꞌoh. Lhai whuz unꞌa hutildlaiꞌ, nooꞌ cha ꞌinkꞌez ndaꞌ cha, whuz netihnelh, no cha, nyan ꞌinkꞌez ntsꞌu hainde-un cha, ꞌen gha ndi yun kꞌut dilhtsꞌine, ꞌenne tsꞌiyawh soo hoonzoo-un bugha hóotaltsꞌulh.

Genesis 30:27

ꞋInkꞌez Laban ꞌen ꞌuyulhni, “ꞋEt sinda, mba ꞌuszoo de! Tꞌeooniszin ꞌawet nyun ngha Moodihti (Yahweh) soo hoonzoo-un sgha ooninꞌai.”

Genesis 30:30

Nghu tisyalh whutso tube ntsool-i ꞌintꞌi inleꞌ, ꞌandit tsꞌiyawh ꞌonus lhai suliꞌ. Moodihti (Yahweh) soo hoonzooꞌ mba whulhtsi, si nghu nusya whutsꞌun ꞌinkꞌez nkede sichꞌoh syoh dilhtsꞌine bubaꞌ tistꞌelh.”

Genesis 39:5

ꞋEt yoh moodih yulhtsi ꞌet whutsꞌun ꞌinkꞌez ndai la yutꞌi-i cha tsꞌiyawh yutlꞌa yanla. ꞋEt huwa Moodihti (Yahweh) nyoo Egypt whutꞌen ooyoh dilhtsꞌine soo hoonzoo-un bugha whultsꞌut. ꞋInkꞌez ndai la yutꞌi-i cha, yoh yutꞌi-i cha ꞌinkꞌez ootlꞌo kꞌuz cha yutꞌi-i, tsꞌiyawh Moodihti (Yahweh) soo hoonzoo-un oogha whultsꞌut.

Matthew 25:40

ꞋEt lerwe njan ndúbudutanelh, ‘Ꞌalha ꞌi be nohdusni, ndunne sulhutsinke, ꞌaw nchane lhiloh, ꞌenne ꞌilhoghun hoontsꞌi whuz unꞌa ꞌet ndúbahla de, si ꞌusáhla wheꞌ hoontꞌoh.’

Matthew 25:45

ꞋEt budutanelh, ‘Ꞌalha ꞌi be ꞌunohdusni, sulhutsinke ꞌaw ncha lhilohne, ꞌaw ꞌilhoghun hoontsꞌi whuz unꞌa lhebáhlel. ꞋEt huwa si cha ꞌaw ndusúlhahlel leꞌ hoontꞌoh.’

Luke 24:27

ꞋInkꞌez Moses be ꞌudustlꞌus ꞌukꞌu nunáguz-un ꞌinkꞌez nus hooꞌenne bubeꞌ ꞌudustlꞌus cha, ndai ꞌukꞌu nuhúyuzgus ꞌen ghun, ꞌi tsꞌiyawh Yakꞌusda ooghuni yúbunilhtan.

Romans 4:11

Abraham Yakꞌusda daja yudániꞌ ꞌet ooba ꞌalha ꞌuhoontꞌoh, ꞌet huwa ꞌutni Yakꞌusda tsꞌihꞌun dune yulhni. Yakꞌusda yudániꞌ hititꞌus-un whutsodaꞌ. Hukwꞌelhꞌaz huyúztꞌus ꞌet whe be hóodatꞌen-un tsꞌihꞌun dune ꞌuntꞌoh. ꞋEt huwa mbe la Yakꞌusda daja ni ooba ꞌalha ꞌuhoontꞌohne, ꞌaw buba lheꞌhítꞌus whe bube hóodatꞌen hoontsꞌi, ꞌenne Abraham butso whudilhdzulh ínleꞌ. ꞋEnne cha Yakꞌusda ubúlhni, tsꞌihꞌun ꞌuntꞌohne.

1 Corinthians 1:30

ꞋEt huwa Yakꞌusda gha Christ Jesus ꞌen oochꞌeꞌne ꞌahli. ꞋEn ꞌuntꞌoh Yakꞌusda gha be tsꞌuwhunih-i neba yulhtsi, ꞌinkꞌez be tsꞌihꞌun unꞌa ꞌuhoontꞌoh-i cha neba yulhtsi, ꞌinkꞌez ꞌen gha ꞌudun neneninla, ꞌinkꞌez naneoket cha ꞌuja.

Galatians 3:16

ꞋEt Yakꞌusda Abraham ꞌinkꞌez ootsꞌu ha yánzut-un, ndai ye yutsꞌu náhizya, ꞌaw ꞌen za ꞌinkꞌez ootsꞌu ha yánzut-un, ꞌenne za butsꞌú yoozi. ꞋAw Abraham tsꞌu haíndene, ꞌenne iloh ꞌubudusni. ꞋAw lhane iloh ꞌulhni. ꞋEt hoontsꞌi Yakꞌusda ꞌilhoghun dune za ghu yalhduk whe ꞌutni. ꞋEt whuz unꞌa ꞌudija whe Abraham, “Ntsꞌu haínzut-un,” yúlhni. ꞋInkꞌez ndun Christ ꞌen Abraham tsꞌu hainzut-un ꞌuntꞌoh.

Galatians 3:28

ꞋInka ꞌaw lizwifne kꞌus ꞌudun yun kꞌut whutꞌenne hooloh. ꞋInkꞌez ꞌaw ꞌulhnane kꞌus oola naditnine cha hooloh. ꞋInkꞌez ꞌaw dune kꞌus tsꞌekoo cha hooloh. Nohni tsꞌiyawh Christ Jesus ꞌen bulh ꞌilhoh ꞌahtꞌoh.

Galatians 3:8

Yakꞌusda ooghuni nus de dawhútanelh, ꞌet whunénulhtun. Be ꞌalha ꞌuhoontꞌoh-i, ꞌi be Yakꞌusda ꞌudun yun kꞌut whutꞌenne tsꞌihꞌun ꞌuntꞌohne ubutilhtselh. ꞋEt whutso ꞌuwhutánelh-un, ꞌet Yakꞌusda Abraham njan ndúyulhni, “Nyun ngha ꞌudun yun kꞌut whutꞌenne, tsꞌiyawh dáwhuldzooꞌ-un bugha hóotaltsꞌulh.”

Ephesians 1:3

Yakꞌusda, Jesus Christ neMoodihti ooBá, ꞌen uzdílhtiꞌ. ꞋEn ꞌuntꞌoh Jesus Christ be yakꞌut whudiztiꞌ-un, ꞌet whunilhchoh Ndoni gha ndi negha ntꞌai.

Colossians 3:11

Mbene la ooba ꞌalha ꞌuhoontꞌohne, ꞌenne tsꞌiyawh lhunduhúltꞌoh. ꞋAw Greekne kꞌus Lizwifne hooloh. ꞋAw yuka dune unli-i kꞌut ꞌustꞌusne kꞌus ꞌaw lhitꞌusne cha, ꞌutsꞌiz de haindene kꞌus Scythia whutꞌenne cha, ꞌulhnane kꞌus bula nahuditnine dune cha, ꞌenne tsꞌiyawh. ꞋEt hoontsꞌi Christ ꞌen za tsꞌiyai unli ꞌinkꞌez tsꞌiyawh nebulh ꞌúntꞌoh.

Revelation 7:9

ꞋEt hukwꞌelhꞌaz whunisꞌen ꞌinkꞌez lhane dune, huldlai kꞌet ꞌaw ꞌubutsꞌolhto ꞌaitꞌoh, ꞌenne ubunusꞌen. Lhelhdun keyoh whutꞌenne, lhelhdoh didowhne. Yinka duneꞌne cha. Tsꞌiyawh lhelhtsꞌun unꞌa yalhdukne ꞌuhintꞌoh. ꞋEnne tsꞌiyawh kwꞌutsꞌuzda cho diztiꞌ-i ꞌinkꞌez ꞌusbaiyaz hibut núdilhya. Tsꞌiyawh ꞌulhyul-i nahuyitsꞌuz-i be dune hinli ꞌinkꞌez ꞌul tlꞌotel, ꞌi nahídule.