Mateo 3:2 - Sinia' Jlamtis 1994

² —¡Woye asosik ink'ieye, siunie Sinia' jika anechijiayas je pa tojwa ilia'm!

Mateo 3:2 Iomraidhean Croise

Mateo 10:7

Joyeyi ti jajwelayi ti siunie Sinia' jika anechijiayas majleye ilia'm.

Mateo 11:20

Japoka'ne ti jiwak yi'ne ja Jesús, siojopo i'winaja'ni ti i'winki'n siukiwa je ti'wena'nine ka ne'yi japa ka jlomaye. Kajeyepa ti je iyoyis jlosikis ink'iejyisa', 'wanjliyi ka kia'iwo ka 'wenis, 'naka'ne ti itiajlata.

Mateo 12:41

Ka inetiejenie'e siojona jloma ti ja ti'yena napo i'nio' ni jitis iyo, siunapo i'nio' t'ipi ji'wet japa Nínive janama'nina'a, ti jan'ye'en pi jitis 'napo i'nio' yiji pet siu'nie jloma awaki. Kajeyepa siupapo Nínive jlelet'ipi iyojonispe jlosikis ink'iejyisa' pakayi, ti ipi'yayet'iyispe pa Jonás ti iyo jlamtikie'. ¡'Yejne'n, siu'nie yi'ne jlajma ijiatayiji, kajeyepa ti 'yaka'm ape'e siupa iyot'iyipi pak jloma ti yiji pak i'nio' Sinia' jikawo Jonás!

Mateo 13:11

'Yina isiujlie japo ti iyo'ate: —Ti asa'am, Sinia' i'winki'nase'm ka intant'iejayi siuniwa yiji pet ni jika anechijiayas. Jlampet siunapo 'wenayi, Sinia' je iwijna'm ka 'najane niwaka.

Mateo 13:24

Jesús yamtiyi k'iye papo siu'nie ti jla'm i'yejnap jiwek. Iyo'ne 'ate: —Siunie Sinia' jika anechijiayas iyo'ate siunie ti takawijna'n, ti 'yut isia'm puwa jisiliaki ti isis yi'i pa jiwasok.

Mateo 13:31

Jesús yamtiyi k'iye 'neje siunie ti i'yejnap jiwek, iyo'ne 'ate: —Siunie Sinia' jika anechijiayas 'yiniye 'neje jana mostaza jlo', ti 'yut isia'm ni i'nio' yi'i pa jiwasok.

Mateo 13:33

'Naka 'ne'eje ti Jesús yamtiyi, ti i'yejnap jiwek, ti iyo'ate: —Siunie Sinia' jika anechijiayas nak 'yiniye 'neje ni woye ijliasat pijia'm, siojona i'nioki ti itieteje ni inwakiwa mak ti najape na kilo ti 'yotati', ti iyo ka injlasatk'i pijia'm puwa ilisane.

Mateo 13:47

“Sinia' jika anechijiayas kiak iyoyi 'neje jana 'najak jit'io ti titietajataja'm ni i'niat, 'yina ti titionajata kisie'e, inijle'en niwa si'yus niwa yiji.

Mateo 13:52

Jak je iyoyiji'ni ti Jesús kiak iyone: —Ka ne'yi pa siunapo jiwos pet ni Moisés jika'neyasajnaye, ti ini'neyasane ni Sinia' jika anechijiayas, iyoye'ate siunie jika'niona jana 'wuk, ti janak tajlajam'ni siuniwa 'yotat. Po' niwa ink'iejyis, ijia niwa ji'yusis niwa wask'i'nelaja.

Mateo 18:23

Nak it'imina ti Sinia' jika anechijiayas iyoye'ate siu'nie: 'Yejne'n, pojompe pi i'nio' ti iyo ka 'ye'en siupapo 'yasa'n jitieyi'i, ti kia'iyo anechiyasas, siupapo jikapia'lis yiyi.

Mateo 20:1

“Siunie Sinia' jika anechijiayas iyoye 'ate siu'nie: Pojompe pa i'nio' ti k'iejli mot ya'am ti iyojon jikawosa', ti t'osijiap'ni pi jiwasok.

Mateo 22:2

—Siunie Sinia' jika anechijiayas iyoye'ate siupi i'nio' ti iyo jiliakijnieye ape'e pi jlas ti tijwa'yi.

Mateo 23:13

Jesús kiak iyonayi'ijyi 'ate: —¡Aswet'ia japoye ti Fariséojosts'ase'm, siu'neje ti asampet ti jiwosts'ase'm nak Moisés jika'neyasajnaye! ¡Ijnoski'lanajyi'n! Jip'onajia'm ni jika 'wuk kiwet ni Sinia' jika anechijiayas k'iye napo i'nio' ti iyotajas ka 'noyisi. Tiwet'ianaja ka asama wek pet ka 'oyeyi, ni'ne ka asama ka wenayi napo i'nio' ti iyoyistaja'ni ka 'noyisi.

Mateo 25:1

Jesús iyoye'eje 'ate: —Siunie Inia' jika anechijiayas kiak jawo'ate siu'nie: Po' siupapo jlosie times sikio' itij'we, ti yamisk'iye siupi i'nio' ti janjwa'yi, itiunis puwa jika katese'l.

Mateo 25:14

Siunie Sinia' jika anechijiayas iyoye'ate siu'nie: Ti pojompe pa i'nio' janek ti jajnoyi japa ajnat jikiecha. Siuti yamat'ipi tanayi papo jikawos, ti ijliuye kan'yena siojopa wikiniet'aj iliyijap.

Mateo 4:17

Pak siupa jloma iyoyeyi kawo jika'niyeja', ti iyo'ate: —¡Woye ajosikis ink'iejyisa', je pa tojwa' ilia'm ni jika anechijiayas ni Inia'!

Mateo 4:23

Jesús itijw puwa isi'il yiji jlaja Galilea, ti 'yiyasajne'n papo i'nio' yi'i puwa 'najla'wetis ti jikimitis. Ijwi'il siupa inka'niye ti 'es, siupa Sinia' jika anechijiayas, jla'yi ti ijwiejiete'n puwa jiliaye papo i'nio', siu'neje puwa t'ajwes t'a'ti.

Mateo 5:10

“Sinia' wuj ti ip'ilisijne'n siunapo iyo ni Sinia' iyo kawo ti i'nio' teje'yi ilia'm k'iejliyi pa tiwonaja ti tiliakik. 'Yina ti napoka pet ti yiji ni jika anechijiayas.

Mateo 5:3

—Sinia' wuj ti ip'ilisijne'n siunapo itiant'ieje ti najata Sinia' jikap'ijliuskiye ti 'esi, jla'yi ti 'yijene pi iyone ti isitia'n naka. 'Yina napoka yiji pet nak jika anechijiayas.

Mateo 6:10

Siunie aka anechijiayas 'esiji ka inesajap. 'Esiji ka tiwoki 'ne ajnat'e siunie iyo niwa amtis, iyo'ate tiwonaja ts'iji poliyi.

Mateo 6:33

'Yina nak janajnata ti ja ijiatayi ti ja atankiunie'ni ti astaj ja enayi 'ate ni Sinia' jika anechijiayas, siu'neje na iyo ka woyeyi. Je jwel ka je a'wena' pet niwaka ajwe'el.

Marcos 1:15

Ti iyo'ate: “Yiyi jla'a jloma, siunie Sinia' jika anechijiayas je to'ilia'm. ¡Woye asosikis ink'iejyisa'! ¡Apilieyi ni Sinia', kima'yi ilia'm siu'nie jika'niye ti 'es, ká akakiuye!”

Marcos 1:4

Pojompe pi i'nio' jle' iyo'ate Juan, yi'i pi ajnat mami'yi ti iniejiejne'n papo i'nio', iyoyi jika'niyejayiji papo ti iyo'ate: —Woye asosikis ink'iejyisa', janiejyinajyi'n, ja 'nakayi ti Sinia' ja ke inwoyi astesayi niwa askeyis.

Marcos 6:12

Sekyi'i ti yamajan'nipe japoka t'eyasajnas ti iyo jika'niyejayi papo i'nio' ti iyo'ate: —Woye asosikis ink'iejyisa'.

Lucas 1:16

Ja ke jlasiye napo Israel jika kia'lis napo janekiajle pa Saka'niona.

Lucas 11:20

'Yaka naka jla'am ni Sinia' jijweye ti akiene ti anojwank'i kisie'e, je int'ayeyiji'n pet ti 'nets'ase ni jika anechijiayas ni Sinia'.

Lucas 13:3

Ya'am awo'ate, ¡Jeyi! Jet'i 'wanjliyi siuti ja ke awoye asosikis ink'iejyisa', kiak jawoyeyi janojwa'yi.

Lucas 13:5

Awo'ate, ¡Jeyi! Jet'i 'wanjliyi siuti ja ke awoye asosikis ink'iejyisa' ka apilieyi pi Sinia', kiak jawo'ojyi janojwa'yi.

Lucas 15:10

Jesús kiak t'ipa iyoyeyi'ijyi: —Jajwi'lase'm ti kia'iyoyeyi pet napo Sinia' jijliujwajnas poli jlele ti potie pa i'nio' k'iejli iyo jlosik ink'ieye.

Lucas 15:7

Sekyi'i Jesús iyo'ne 'ate: —Jajwi'lase'm ti kiak iyoyi siunie i'nio' ti je tajli ni jike' ti ininekiajlata. Ni inkanitiejeye wuj yi' poliyi 'yaka'm ape'e siunie inkanitiejeye tena'a siunapo noventa y nueve i'nio' ti ijwil kanses, ti je iyo ka inwo jlosikis ink'iejyisa'.

Lucas 16:30

Iyo'ne 'ate pak i'nio', “Ijiatataja wek atajla'm Abraham, siuka poye pa i'nio' ka inapi pijia'm ka intal a'noyi ka ijnoyi, ininekialtaja'ni wek.”

Lucas 21:31

Nak kia'iyo ka 'wenatiena'a siuniwa ajwel'ni, 'wena ja ke atejnisieyi'i ti janak jloma ti ja'nes ni Sinia' jika anechijiayas.

Lucas 24:47

Sekyi'i ji'lij iwijna'm pet napo jika kia'lis ka wo jika'niyejayi napo ijia ka wone'ate, “Woye asosikis ink'iejyisa', 'nakayeyijna'a ti Sinia' jamp'elisina', ka je intajlat'ase'm ni aske'.” 'Yina iyo jla'am niwa Sinia' jlamtis ka tiniajnata napo Jerusalén jlele ka tiwok jika'niyeja' yiji 'niwaka, 'yina paj ka ineyeyinie'e siunapo i'nio' yijits'i wikie'eyi niwa ajnatis.

Lucas 6:20

Jesús jitiej yikiajlat'iyipi japo t'eyasajnas, sekyi'i iyone'ne 'ate: —Sinia' wuj ti imp'elisina ti asa'am ti imp'elisisa'. Lapakawo ti tijna'yase'm ni jika anechijiayas ni Sinia'.

Lucas 9:2

Ti ijliuye'ni, iyonat'iyijpe 'ate: —Maye'ni, mayeyiji'n ni Sinia' jika anechijiayas ti jajwela', jwajietajyi'n napo je isis.

Hechos 11:18

Siupapo Sinia' jilis ti ipi'yaye ja Pedro ti kia'iyo, its'iuyet'iyisk'ipe 'ate, iyunitisie pa Sinia' ti iyo'ate: —¡Ijiatp'aneje ti Sinia' iyo pet ka iwo jlosikis ink'iejyisa', ka poye jana ji'wasankiye ti laj jlaja, napo je Judíojos!

Hechos 17:30

Ti pajk'i pa Sinia' yine'ate papo i'nio' siupa iniwonisi, 'yaka je wuj kan'ye'en. 'Nakayi je kia'iyo, 'wenajliyi ti iyo ka iwo jlosikis ink'iejyisa', wikie'eyi napo i'nio' yi' ape'e 'ni ajnat.

Hechos 2:38

Pedro isiujlie papo ti iyo'ate: —Woye asosikis ink'iejyisa', janwopi pa ka ijiatayi, pak tiniejienajape, ti janetijnapeje ni Sijwajieti Jesús jle', ja 'nakayeyijna'a ka Sinia' inetiajnat niwa askeyis iyo. Sekjane'yi ka wena'asemna'a jana Sinia' jikimet ti 'es.

Hechos 20:21

Je sikip'e ti ajwejla'm napo Judíojos siu'neje napo je Judíojos, ti awone 'ate, “Woye asosikis ink'iejyisa', tankiunieyi pa Sinia' jlas Jesús.”

Hechos 26:20

Jak je iyoyiji'ni ta'a'ne ti anajnate siojopo yi' Damáscojo, ti ajoyi ti awo yamtikie', sekyi'i ti atojmatayik'i siojopo yi' Jerusalenne, ti ajoyi. 'Wanjli'ne isia'm napo i'nio' yiji jana Judea, siu'neje napo i'nio' 'wenayi ti je Judíojosata. Jak je iyoyiji ti ayetaja, a'yasa ape'e ti awo'ate, “Woye asosikis ink'iejyisa'. Apilieyi pa Sinia'. 'Wenkinayipe pa akijmayeja' ka in'wenaja ka ijiatayi ti jiwoye asosikis ink'iejyisa'”.

Hechos 3:19

“Ji'yu, 'napo i'lijwas, woye asosikis ink'iejyisa'. Ataj ekiajlayi pi Sinia', 'nakayeyijna'a ka inetiajnat niwa askeyis, janjloyena'ase ni askamankiye ti 'es.

2 Corintios 7:10

Siuti tinilayitieje ti i'nio' je inkaj'ni, nak Sinia' inka'a pet, it'iminayi pet ni i'nio' ti yikiajlayi'iji ti iyo siunie Sinia' iyotaja ka woyi, sekyi'i ti nakaye pet ti tijwa'a ni i'nio'. 'Yina ja ke iyoki sijliak'aliye, kajeyepa ti ijiate jla'am ti 'es. Jlampet siunie injlak'ali ti tajle pet 'ni ajnat, ijioyiji pet jana 'najlati.

Colosenses 1:13

Sinia' jla'am ti kasjwajiete siunie jijweye nak ajnatiok, sekyi'i ti kasjlasatayi pi jlas ti jleminik ni jika anechijiayas.

2 Timoteo 2:25

Ja ke initonit ni i'nio', ti iyoyeta jlosikie' siunapo teje'yi ilia'm. Janejejwijyi'n pet k'iye ka Sinia' inoyeje ka wo 'niayija napoka kawoyis jlosikis ink'iejyisa', jla'yi ka intant'ieje ni siunie ti ijiatk'i,

Hebreos 6:1

Ijiatjliyi, je 'esiji ka 'yasak'isia'm, paj ka ts'ajwes i'neye'ejenna'a. Je 'esiji ka je itiajlaje siunie inka'neyasajnaye siunie ti 'nelanjie'e ani'neyasanaja ape'e ni Sijwajieti. Ká apilieyiji siuniwa wask'i'nelaja pajk'i ti 'najanayi pi jiwonayi, iyoye 'ate siunie inka'neyasajnaye ti ijwi'il siunie ti k'iejli awok sosik ink'ieye, siunie ti aleki siuniwa wask'i'nelaja kassoyiji ni siliaye. Iyoye 'ate siunie ti 'nelanjie'e atankiujniejayi ni Sinia'

2 Pedro 3:9

Ká ajwela ka jla'm iwo pi Saka'niona siupi iyo ti ijwi'il, siunie jitienkiujnieye iyone pa yi'i papo i'nio'. 'Wenajliyi ti its'iu'wasap ka k'iejliyeyi wat paka awoyeyi, 'yina ti je iyojonk'iye ka netia'n paka jane'yi pa, 'wenajlitieje ka wikie'eyeyi ka napilisi pa Sinia'.

Apocalipsis 2:21

Jlomas nak nojwaja'm kiwa entaja ti ak'iutiejap ka pakajat'iyipe ka iwo jlosik ink'ieye, 'yina je takajlaja ka wo ka ileyi siunie inwone ti ijiuski'lan'ni.

Apocalipsis 2:5

It'imina ti awo'ate, ataj wunitk'i siupa jle'yi ti inoyeyiji'n,, 'yina wo ajosik ink'ieye, woyi siu'ujwe siukia jiniwone ti 'nelanjie'e. Siuti ja ke awoyiyi, jijwel ka je ijio'wa, ti ja'yikisa'na, sek jane'yi ka ijiala'ajna'a siojona aka katese'l ji'wet ti jatiajla'ne ni yi'i, siuti kiak jawoyi ja ke inkajlaja ka wats'ilati siunie jiwoyi.