Juan 7:28 - Sinia' Jlamtis 1994

²⁸ Jesús taka'neyasa'n kiajwe jlaja 'najla'wet. 'Yakets'ijiap ti tamti ti ipi'yayeyi japo i'nio' ti kia'iyo: —¿Intant'iejap'ank'i, jla'yi ti 'najanap'ane siunie ataj'le? 'Yejne'n, siuti ana'am je ya'am ka intalk'i, 'wenajliyi jla'am siunie sijliu', ijiate jla'am ti 'yu'we napo i'nio' ka je inkakiuyis, naka ni je intant'iejayi.

Juan 7:28 Iomraidhean Croise

Mateo 11:27

Yiyik'i ti kia'iyo, sekyi'i iyo'ne 'ate: —Inia' yikialk'i wikie'eyi niwak wask'i'nelaja. Lajk'ipa ka nets'e ka ijiatayiji ka intant'ieje ni Jlas, ijwienjli jla'am ni Jinia' ti 'yijene pi iyone. Jla'yi ti lajk'ipa ka intant'ieje ni Jinia', najataja jla'am ni Jlas ti itiant'ieje, siu'neje napo iyo ni Jlas ka intant'iejeniti.

Mateo 2:23

Ti 'nesat'ipi yamitayi japa Nazaret, japak'ne ti iyo 'weta. Pakayi ti yiyeyi japak jloma siupi iyot'iyipi papo Sinia' jijwejlanawos ti kiak ja tiwonaja'ni 'ate Nazareno.

Mateo 26:55

Sekyi'i ti kiak iyonayi japo i'nio': —¿Yot'iyi'ni ti jiwoye astesajnatisie', jla'yi ti jiwoye ask'iulisie', ti jiniamak'i, siwonayeyi 'ate ni i'nio' kajlajnata? Jlam'ne wikie'eyi kiwa jlomas ti si'wenayeta'ni ka jakayetaja ka akimak'i'm.

Lucas 10:22

Yiyik'i ti kiak iyoyi sekyi'i iyo'ne 'ate: —Inia' yikialk'i wikie'eyi niwa wask'i'nelaja. Lajk'ipa ka 'najane paka wone siunie jlas, ijwienjli jla'am siunie Jinia' ti 'yijene pi iyone. Siunie Jinia' kia'iyojliyi, lajk'ipa ka 'najane paka iwone, ijwienjli jla'am ni jlas ti 'yijene pi iyone, siu'neje napo iyo ni jlas ka intant'ieje.

Lucas 2:11

Siu'nie jloma yijints'e yi'i jana isi', David jika isi', ni Asjwajietiye, ti Saka'niona.

Lucas 2:39

Jlamk'e'm t'ipi ti itimisi papo José siupa iyot'iyipi ka tiwoki puwa Saka'niona jlamtis ka tiwoki, ti i'nio 'yijijie'ne, yapiliet'iyispe Nazarette, siojopa ji'wetis, yiji jlaja ajnat Galilea.

Lucas 2:4

Jak je iyoyiji'ni pa José ti ya'am ti taj'le jlajak ajnat Nazaret, siujlieja yi'i jlaja Galilea, ti ijio Belenne, siujlieja yiji jlaja ajnat Judea, siujlieja yit'i'yijimpe pa anechiyas David. Papoka'ne papo ti José tajla'm, papo David.

Lucas 2:51

'Yina yamk'i'ne papo jiniewot ti yapilis Nazarette. Sekyi'i ti its'iuyeyiji papo jiniewot, siupa iyo ka woyi. María wuj ti iyoyi jitienkiujnieyeja' ti kia'iyo.

Juan 1:46

Natanael iyo'ne 'ate ti isiujlie: —¿Mi 'est'iyiji ka poye pa kantajla'm japa Nazaret ka 'esie? Felipe iyo'ne 'ate ti isiujlie: —Jomet. Jlam 'esijyi ka a'we'en.

Juan 10:36

'Yina kia'awo'ni pet, Sinia' sot ta'a 'niji ti silisa'n, ti sijliuye ajnat'e. ¿Yot'iyi'ni ti jijwela' ka iliaki pi Sinia', ti anijwe'el ti awo'ate “Sinia' Jlask'i'm”?

Juan 12:49

Lapawo ti je yam ka intalk'i siu'nie awo, 'wenajliyi jla'am ni Inia' siunie sijliu', nak ijliuyijk'i'm siunie awo ka ijwi'il, jla'yi ni siunie aka'neyasane.

Juan 14:10

¿Ijiatp'ane ti sakakiu ti ajwe'el ti ajyi pi Inia', jla'yi pet ti Jla'am yi' iwia'm? Siuniwa ajwe'el, je ya'am ka intalk'i. 'Wenajliyi ni Inia', ti Jlam ti yi' iwia'm, naka'ne ni isijme'n Jla'am.

Juan 14:31

lapawo ti jlam kia'iyo, siunie ajnat ja'najanayijna'a paka wone ti emi'n ni Inia', jla'yi ti ja'najanayijna'a paka wone ti awo siunie Inia' ijliuyijk'i'm. “Kasitiets'i, naja'ni.”

Juan 16:3

Niwak siuniwa janwo napo i'nio', lajk'ipa ka intajle ti naka, ti je itiant'iejts'e ti sa'am, ya'am jla'yi ni Inia'.

Juan 17:25

“Ji'yu, 'ni Inia' ti i'nes, siunapo yi' ape'e 'ni ajnat je itiant'ie'a, jlam pet ti ya'am sitiant'ie'a. Kia'iyojliyi pet siunapo jlekialk'i 'yijene pi iyone ti a'am ti sijliu'.

Juan 17:3

Ijiatjliyi, siojona in'wasankiye ti laj jlaja, naka siunie kantiant'ie'a, ti a'm ti injwanjli ti ijiateje ti Sinia'a'm, siu'neje kantant'iejesi ni siunie jijliu' naka Injwajieti Jesús.

Juan 3:2

Jakajimpe ti ijioyi ja Jesús ti ajnaj. Sekyi'i iyone'ne 'ate: —Inka'neyasajnawo, je kast'ayiji'n ti am ti inka'neyasajnawo'wa'm ti jitiajle pi Sinia'. Ijiate lajk'ipa ka inkajli ka inlesane iyo siuniwa ji'wenki'n siuti ja Sinia' ja ke inejiap.

Juan 3:33

Siunie i'nio' je 'yakakiu, nak 'yakajanit siuniwa Sinia' jlamtis ti ijiatk'i siunie iyoyi.

Juan 5:32

'Yina po' siunie sijwe'el, naka Inia', nak ijiate ti laja po' ni jlamtik.

Juan 5:43

Awo ti ya'am ti aname niwa jlamtis ni Inia', 'yina ka kia'iwo ka 'wenayi'ni ilia'm ka kima'yi. Jlam'ne ka na'm pa ka name puwa ka jlamtisie', pak ji'wenayi'ni ilia'm ti jikima'yi ilia'm.

Juan 6:42

ti iyoyists'i 'ate: —¿Mi je 'nak Jesús, José jlas? Kasye'etant'ieje japo jiniewot. ¿Nit'i iyo ti ijwi'il ti tal poliyi?

Juan 7:14

Jikiowe'eyi jakia inlakijnieye ti Jesús ijioye kiajwe japa 'najla'wet, ti taka'neyasa'n.

Juan 8:14

Jesús iyo'ne 'ate ti isiujlieyi: —Siuniwa yamtis, ijiate wek yam yamata ti anijwe'el, lapakawo ti laja po'. Siunie atajli ts'ajane pi awone, siunie jajiojwi kia'iyojliyi, siuti asa'am je 'najanayi.

Juan 8:16

Siuti ja yama ti ja'ye'en ni jitis iyo ni i'nio', ja 'esie. ¿Tepa jawo ka kiak je iwo ti jantaja wita'm ki iyo siunie ijiatk'i? 'Yina ja ke sijwanjlajap ka'yenta siunie ja iyo, ti po' ni Inia', nak ja inoyijk'i'm, ti Jlam ti sijliu'.

Juan 8:19

Sekyi'i japo Fariséojos i'yasayisi'n ti iyo'ate: —¿Tepa yi'i pi ana'? Jesús isiujlie ti iyo'ate: —Asa'am je intant'iejak'i, siunie Inia' kiak iyojliyi je intant'iejayi. Siuka intant'iejak'i intant'iejtaja ni Inia'.

Juan 8:26

Po' siuniwa jayo'nase, jla'yi ti ja'ye'en siunie jiwoyeyi. Ijiatk'i siuniwa jlamtis ni i'nio' sijliu', jla'yi ti lajk'ipa jikiechaye ka ijwi'il, najata jla'am siunie iyo ka ijwi'il, ka ijwijla'm napo i'nio'.

Juan 8:42

Jesús iyo'ne pet 'ate: —Ka ijiatayiji ti jijwela' asna' pi Sinia', ka seminayeta ti atajle pi Sinia', ya'am ti a'neye. Ti ana'am, je 'ne ka yama ka itiajlatk'i siunie awo, 'wenajliyi ni Sinia'.

Juan 9:29

Siupi Moisés kasts'ajane pi awonaja ti Sinia' tamtit'iyi'nijpe, jlam pet siuni i'nio' tiwet'ianaja ka ti'niejenaja siupi taj'le.

Hechos 17:23

Ti ekiajli'ni 'naka'a, siu'niwa jininenayi'i'ni ti jiwunitie pa aka dios, altar jlaja a'we'en ti po' niwa inamtis yi' ape'e ti tip'esina ti iyo'ate, “Dios ti Je Titiant'ieki”. 'Yina siunie Dios ti jijwela je intant'iejayi, 'naka ti ajwe'lase'm ti a 'neye.

Romanos 1:28

Siuti kia'iyo ti je iyoyisink'iye ka intant'iejesi ni Sinia', 'yina sekyi'i ti ijiutieyi ni siunie jitienkiujnieye ti ti'niachiki 'nakayi ti jawoyisi siunie ti je ti'wena ka tiwoki ti ijiate ti je 'yu'we.

Romanos 3:4

¡Jeyi kat'aja! 'Wanjliyi ka kia'inwoyi ni i'nio' ti iyoyi naka ti iyo sintiye, 'yina Sinia' je paj pet kanlek'i ni siunie iyo ti je tak'emiyeje wek siuniwa jlamtis iyo. Jak je iyoyiji siuniwa Sinia' jlamtis ka je iwo'ate: “'Yaka'niona, amtis niwak 'yakajanit'i atepe'e ti a'm ti ijiate ti i'nes, Jla'yi ti a'm ti ja 'an pijia'm siuka kia'iwotajanie'e ka injwel kan'ye'en napoka ti injwel je i'nes.”

2 Corintios 1:18

'Yejne'n, Sinia' 'yijene naka, ti ijiatk'i siunie awoyi, ti je ka iyo'ate, “Kiak jayonie'e”, sek jane'yi ka 'wena iyoyeyi, ka iyo'ate, “Aleyiji siukia awo ka iyoyi.”

2 Corintios 4:6

'Yina je 'wena siunie Sinia' ti iyot'ipi 'ate, “'Esiji ka nak intajla'm ni jloma ni siunie ajnatiok”, naka 'neje ti jloma yijnits'i niwa sosikis, 'nakayi ti ja jatiant'iekiejeniti ni siunie k'iejliyi ni jijweye ti ijiate ti 'es, ti jla'al itie'e ni Sijwajieti jitiokio'.

Tito 1:2

'Naka siunie awoki ti je niliak, tajle naka ti ijiate ti 'yaka ti anejejwiyejenk'iye, ti kasjatoni jana si'wasankiye ti t'o'n. Si'wasankiye siojona ti Sinia' pajk'i ti ijwi'il ti 'nelanjie'e lajlik'iji pa 'ni ajnat. Sinia' je nak i'nio' ti iyo sintiye.

Hebreos 6:18

'Yina times siuniwa Sinia' iyoyi. Inia'an siunie ti ji'lij iliyisajap ti po' siojona ijwilts'e'm, sekyi'i ti tomayik'i ti jlam jla'am ti yapi'li ti kiak iniwone ti isijmajne'n ni jle', ti ijwi'il siupa jawoyi. Jak je iyoyi siuti a'wena ti ijiatk'i niwaka siu'neje na ti Sinia' je jlamtisjliyik'i jiwekie'e siunie iyo ka woyi naka'ne ni siunie ti wuj ti iniuyits'e'm, sa'am ti a'yiltanaja'ni, siu'neje ti sitiej awoma, ti ja ijiatayi ti janents'e'm siunie iyo ka inijijwiyejen k'iye.

1 Jn 5:10

I'nio' ni je 'yakakiu siupa Sinia' jlas, yijni ni jlosik niwa Sinia' jlamtis. Jlampet ni i'nio' ni 'yakakiu pi Sinia', ijwila ka jla'm iwo pi Sinia', ti 'yakakiu siupuwa Sinia' jlamtis ti ijwi'il pi jlas.