Apocalipsis 1:5 - Sinia' Jlamtis 1994

⁵ 'Yina tajle 'neje ni Sijwajieti Jesús siunie jika'niyewo ti 'es, jla'am ti inia'an ti yapi pijia'm ti tajli pi a'no', siu'neje ti wikie'eyi siunapo anechiyasas yi'ne ajnat'e ti jika anechiyasis. 'Namats'e pa Sijwajieti, isia'ni pa ji'woyis, siu'neje ti 'ya'al, 'yina lapakawo ti iyo ka kasjwajiete siuniwa sakeyis.

Apocalipsis 1:5 Iomraidhean Croise

Mateo 20:28

'Yina kiak iyoyi ni I'nio' Jlas ti 'nes, je iyo jikawosa', 'wenajliyi jla'am ti iniwojwa'n inkawoye, jla'yi ti iwi'in jakia ji'wasankiye ti iyoyi lajaye ti ijwiejiete'n napo i'nio' ti je pini'.

Mateo 28:18

Sekyi'i Jesús ijliasayi, iyo'ne 'ate: —Inia' yikialk'i ka iyo anechiyasa' ape'e wikie'eyi siuniwa yi' poliyi, siu'neje niwa yi' ajnat'e.

Juan 13:1

Jlampa ijwienjliye jakia jloma tomk'iye ka neyi siojokia inlakijnieye Pascua, Jesús pajk'i ta'a ti 'yijene pi iyone ti yiyi japak jloma ti janek ti jantaj'le 'ni ajnat, ti jani'wene pi Jinia' poliyi. Jesús yamjliyi ti 'namaja japok, siojopo tijna'yi pet, yi' ajnat'e, tajlap'e ti 'nelanjie'e, paj ti yiyeyi pi jlaj yi'i.

Juan 13:34

“Jaliyi'asap siu'nie i'lij ti ink'ie': 'esiji ka nineminape. Jawo'ate awo ti ya'am ti ts'ama'ase, kiak wonayi napo as'lejwas, ka ninemina'.

Juan 15:9

Wuj ti ts'ama'ase, iyoye pet 'ate siunie Inia' ti 'namak'i. Je pajana'a ka leyeyi siunie yimijnaye ti e'nase'm, ka woyeyi.

Juan 18:37

Siuti Pilato ipi'ya, iyo'ne 'ate: —Ijiatp'ane 'yakaj ti anechiyasts'a'm. Jesús isiujlie ti iyo'ate: —Ijiate siunie jiwo ti sijwe'el ti anechiyask'i'm. Ya'am anam'ne ajnat'e, jla'yi ti a'yiji'n, 'nakayi ti jayamtiyi siunie ijiatk'i. Wikie'eyi siunapo yiji siunie ijiatk'i its'iuk'i'm.

Juan 3:11

Ijiate, ijiatk'i siunie ti kasts'ajane ajwela, siunie a'wena ajwela. 'Yina kaskakiu ti ajwelata'ase'm.

Juan 3:16

Lapakawo ti Sinia' wuj ti yimijne'n napo i'nio' yi' ape'e 'ni ajnat, it'imina'ne ti yikial siunie Jlas ti ijwienjli, ja'nakayeyijpe siunie i'nio' ja ke inkakiu ja ke inetia'n, 'wenajliyi jla'am ti japoye siojona in'wasankiye ti laj jlaja.

Juan 3:32

Ijwi'il siuniwa i'wi'in, siu'neje niwa ipi'ya, 'yina ka kiak iwo ka jwanjliyi paka ink'iuye siunie ijwilta.

Hechos 20:28

Ká anikiwaliye, ni'notatayiji, 'yenayi napo 'eyasajnas Sinia' jilis. Sinia' jikimet ti 'es pajk'i ti inwojwana sontas jiwosa', ka 'yenayi siunapo Sinia' iyo jika kia'lisa', ti takat'ini ape'e pa jlas ji'woyis ti yamayi.

Hechos 26:23

Siupa ti iyot'ipi 'ate, “Siunie Injwajieti ti Sinia' jijliujwanik ja wujwa ni jawo ti janilayiti, ts'ijiye ti ja tiliana, 'yina ja jlama ti janan kisie'e ti jano kisie'e ti jantajli pa a'no', naka'ne na jankajwejlane napo Judíojos, siu'neje napo i'nio 'wenayi, ti janjwele siojona jika jloma jana injwajieti ti ja'nakajanit'i ape'e”.”

Romanos 3:25

Sinia' jlam ti iwi'in pi Sijwajieti ka insa'ni ki ji'woyis, sekyi'i 'ya'al. 'Yina ti iyoyi ji'niayija' napo i'nio', lapakawo ti iyo ka inetiajnat ni jitis iyo jla'yi ka jiwak inojwi ni Sinia', iyo ti je 'yakakiuyis ni Sijwajieti. Jak je iyoyiji'ni 'yakaja ti tijnajyi ni Sinia', isiwaliye'e niwak inkeyis ti pajk'i, ijiatjliyi lajak'i paka iwo.

Romanos 8:37

'Yina 'wanjliyi ka poye puwa ka kia'iwo, 'yina 'anak'i pijia'm ti je wata'a je lajk'i ni siunie 'namats'e ti kasts'isisi.

1 Corintios 6:11

Ti pajk'i, siuniwa ajwel'ni je awo'ate je woyeyipi, siuti asa'am po' siunapo yit'ijyipi. 'Yina 'nakayi insisie kajeyepa ti Sinia' pajk'i ti inlejajyi'n, jla'yi ti initiajnat ask'ioye ki astes iyo, ka lajak'i pet ni jle' iyo ni Saka'niona Jesús ti Sijwajieti, siu'neje japa Sinia' jikimet.

Gálatas 2:20

'yina je'ne ka yama ka si'wasa'n, 'wenajliyi ti jla'am pi Sijwajieti ti yi' iwia'am ti si'wasankit. Siunie awo ti si'wasa'n, 'nakayi si'wasa'n kajeyepa ti itienkiujnieye yiyi ni Sinia' jlas, 'yina ti je akakiu ti jla'am ti semi'n, jla'yi ti ininekial itipe'e ka tiliana, ti iyo ka sijwajiet.

Efesios 2:4

Ijiate pa Sinia' ti wuj ti takap'ijliuski, it'imina ni iyo ti wuj ti kassemi'n,

Efesios 5:2

Woyeyi ni asemijnaye, 'wena ká aniwonayi iyot'iyipi pa Sijwajieti ti kia'iyo wuj ti 'nama, it'imina'ne ti iniwe'n sitipe'e. Ti iniwojwa'n Sinia' ji'wajieta', iyoye'ate ni k'iejlitieje ti tiliana ti tiwunitieta pi Sinia', sekyi'i siu'nie jini ti yame pi Sinia' ti 'yakanit'ni pet.

Colosenses 1:18

Jla'am 'neje ti jletik siunapo Sinia' jilis. Paka pi jlas ti iniajnat, jla'am 'neje ti inia'an ti iniu kisie'e ti tajli ni a'no', ti iyo anechiyasa' siunie wuj.

1 Timoteo 6:13

'Nakayi ya'am ene jitieyi'i pa Sinia', ti iyo ji'wasankiyeja' wikie'eyi niwa wask'i'nelaja yi' ape'e 'ni ajnat, jitieyi'i 'neje pi Sijwajieti Jesús, jlam ti inikajanit ti inijwel jitieyi'i pa Poncio Pilato, ti ajlo'wa'm ti awo'ate:

1 Timoteo 6:15

Ka netieje janak jloma, Sinia' ti jla'am ti anechiyas wuj janjlo' ti janapimet. Jlam ti jika anechiyas papoka ijia anechiyasas, jla'yi ti jika'niona pet siunapo ijia inka'nionajas.

Hebreos 10:29

'Yina ¿jijwelat'e ka Sinia' intasa'nena'a siunie ti iyo jiliakikie ni jlas, ijiate ti je iyo lajaye siunie ji'woyis, siu'neje ti iliaki siojona Sinia' jikimet ti 'es ti yiminta wek jla'am? ¡Je'e, ja ke intasa'ne! Ka je iwo pa ti siunie 'woyis naka ti 'yakajanitk'iyi siunie Sinia' ji'lij ti iliyi siunie janwoyi ti janwats'ilati siukia iyopi 'yina ink'ie' siunie janwoyi, 'yina naka ti i'mienit ni i'nio' ti Sinia' 'yotat.

Hebreos 9:14

'Yina jlampet siunie Sijwajieti ji'woyis ti kia'iyo ti tisa'ni jla'm ijiatayi jla'am ti 'yaka'm ape'e niwaka ni jijweye iyo. 'Yina Sijwajieti siunie t'oniye ti 'es po'o siunie ti jla'am ti ininekiajle pi Sinia', ka lajak'i pet ki iyo janaka Sinia' jikimet ti 'es, ti je paj ka netia'n. Siunie Sijwajieti ji'woyis kia'iyo initiajnat sik'ioye siuniwa sitienkiujnieyejes ti je isis siu'neje ti ijialts'e siuniwa je isis ti kastone jana ts'ajlati ti ja kasnetia'n. Sek jane'yi ka 'yakajlajanie'e ka iniukieje naka Sinia' ti je paj ka inetia'n.

1 Pedro 1:19

Naka Sijwajieti 'woyis ti wuj ti laja po'. 'Yina Sijwajieti jla'am ti iniwe'en ti tiliana, iyoye 'ate siunie 'wolepo' 'woma ti 'es ti laj jiliayeja'.

1 Jn 1:7

Jlam'ne pet ti jawieki ni jla'al jana 'esi', iyo'ate ni Sinia' ti yiji janak 'esi', kasjwanjliyik'i. Siunie jlas Sijwajieti Jesús kaslejayi ni ji'woyis ki iyo niwa sakeyis.

1 Jn 4:10

Nak jitis ni siunie inemijnaye: 'yina je sam'ne ka inianaja pi Sinia' ka yimina, jla'am ti iniane ti kassemijne'n. It'imina'ne ti ijliu' pi jlas ka iniwen sitipe'e ti 'ya'al, 'nakayi ti Sinia' janetiajnat niwa sakeyis, sekyi'i jiwak nojwi'ni.

Apocalipsis 11:15

Sekyi'i siojo injlojwanik poli jlele ti tomayi jlaja, jlampa ijwienjliye 'ni sikio' itij'we times tom'niji japo yam'niji, ti ti'wosojyi'n, 'yina pesiejayi papo tom'niji poliyi, jla'lap ijiok'i'ni ti iyoyits'i 'ate: “¡Siunie ajnat wikie'eyi siuniwa isie pet ape'e 'nakayi yi kiajwe pet ni jijweye ni Saka'niona, siu'neje ni Injwajieti ti jijliujwanik. 'Yina napoka ti anechiyasas jajnok'i'ni ti kiak jawo!”

Apocalipsis 11:3

'Yina sek jantajlisiap'e siuniwa cuarenta y dos we'lajas ajwel'ni paj ka ineyik'ina'a, ti janwoyi jlamtikie' siuniwa yamtis siunapo ti jijweye jawijna'm. Napoka times i'nio' 'yakawosa', ti ji'wuye jiniliaja niwa 'yuts'iji'n ji'wuye iyo napo ti jika amejyi po'.

Apocalipsis 17:14

'Yina papoka'ne ti janilanisi ni 'wolepo 'woma. Siunie 'wolepo' ji'woma, siu'neje napo je iliyi ni Sinia' jla'yi ti pajk'i ta'a ti isi'mik'i, siu'neje ti tanits'i, kantojmatayisijna'a isia'm papoka. Lapakawo ti siunie 'wolepo 'woma naka ti yi' ape'e papoka inka'nionas, siu'neje papo anechiyasas, kia'iyo jika anechiyasis pet.”

Apocalipsis 19:11

Sekyi'i ti a'wena ni poli ti inilajna'm, 'yakaja 'ni a'lenta lemits'i, jle' iyo'ate siojo i'nio' yi' ape'e ‘Ijiatk'i jla'yi ti Je Tak'emisie'n’, kajeyepa ti tijnajyi siunie ti 'yakajanit'i ape'e ni i'nio', siu'neje ti inila'an.

Apocalipsis 19:16

Po' niwa inamtis yi'i ja ji'wu', yi'neje ts'e jlekijna'a jawa ijia, ti iyo'ate, JIKA ANECHIYAS NAPO ANECHIYASAS SIU'NEJE JIKA'NIONA NAPO INKA'NIONAS.

Apocalipsis 2:13

Ts'ajane pi awone ti jle'yi siunie ajnat sitiejiejwa imosik jika anechijiayas yi'i. 'Yina jlekjliyi wek ti je liyi siunie atankiujnieye ti je sakakiu, ejlowek ti yamata ti at'emi'na, siukiwa jlomas ti Antipas, siukia ikawo ti 'es ti tilianajape, ni yi'i ni sitiejiejwa imosik.

Apocalipsis 3:14

Jla'm iyojli 'ate: —'Ete'e kiu'ujwe siunie ti jajloyi ni jijliujwanik napo Sinia' jilis yi'i jana isi' Laodicea: “Iyo naka ni siunie ti 'yakajanit ti jlam je iyo ni siunie iyo ni Sinia', siunie Sinia' jikawo ti inka'niyewo ti je tiwonaja, naka 'neje ni siunie ti ijiatk'i, jitis 'neje wikie'eyi siuniwa Sinia' jilisajna'.

Apocalipsis 7:14

Akiujlie'ne pet ti awo'ate: —T'eyi, 'ni ika anechiyas, a'm ti 'najane. Ijwilk'im'ne ti iyo'ate: —'Napoka siu'napo ti tijwajyi siukia ti ijiat ti a'tiek'i jijliak'ali, siu'neje ti pajk'i ti ilij niwa ji'wuye ti iyoyisi jika kieye siunie ti ilimijietis naka 'wolepo 'woma ji'woyis.