Apocalipsis 1:4 - Sinia' Jlamtis 1994

⁴ Ya'am Juank'i'm, ya'am ti ajloyi siu'nie imp'esinik siojopo Sinia' jilis yiyits'i ni ji'wetis ijwienjli sikio' itij'we times tom'niji, yiji pet siojona ajnat Asia. Siunie Sinia' jikap'ijliuskiye siu'neje na askamankiye ti jitiajlayiji siunie ti jla'am jane'yasap, siu'neje na ti 'nelanjie'e t'ipi ti po' ta'a, siu'neje na ti ja'nejts'eje, tajle 'neje jla'am napok ijwienjli sikio' itij'we times tom'niji Sinia' jikimet ti 'es ti initaj ti ijniul wita'm ti teje'yi siupa yi'iji'n ti jla'am ti anechiyas.

Apocalipsis 1:4 Iomraidhean Croise

Juan 1:1

Ti 'nelanjie'e t'ipi siunie inamtik ta'a ti po'o, ti je wakaljli'ijyi niwa wask'i'nelaja. Siunie inamtik yijap ta'a pi Sinia', 'yina jla'am ti Sinia'.

Hechos 19:10

Paj ti jika najkapis timesie ti kiak iyoyi, jak je iyoyiji siupapo i'nio' siupapo tajle japa ajnat Asia, siu'neje papo Judíojos siu'neje papo je Judíojos, tipechiyeyi puwa Sinia' jlamtis.

Hechos 2:9

Siuti atajla 'niji yi'i jana Partia, 'nak awak'i. Siu'neje napo tajle jana Media, Elam kia'iyojliyi. Mesopotamia, Judéaja, siu'neje napo tal Capadóciaja. Siu'neje napo tal Póntojo, siu'neje napo tal Ásiaja.

1 Corintios 1:3

'Esiji ka Sinia', jla'yi pa Saka'niona Jesús ti Sijwajieti, ka wujwa ka imp'elisinapi, jla'yi ka inoye'ase'm ka akamaja.

2 Corintios 1:2

'Esiji ka Sinia', siu'neje pa Saka'niona Jesús ti Sijwajieti, imp'elisinajyimpe, jla'yi ti jane'nasap ni jikamankiye iyo.

Hebreos 13:8

Sijwajieti Jesús paka siupa ti pajt'ik'ipe, siu'neje ti 'nakayi, siu'neje ti jajnok'i'ni.

Santiago 1:17

Jlam'ne je kiak iyo; 'yejne'n siuniwa isis ti Sinia' iwints'e'm ti iyoyi si'wajieta', je tajle pa ka jikiechaye, 'wenajliyi ti tajle jla'am pi Sinia' ti yi' poliyi ti ilisane ni kilie', siu'neje ni we'la, katese'l kia'iyojliyi. Jlam ti je iyo'ate ni siuniwa jilisajna' ti yiyi ts'iji inetia'n ni siunie iyo ti 'nlanjie'e, siunie yi'i ni Sinia', je paj ka int'eki.

Apocalipsis 1:1

'Nak siu'nie Sinia' iwijna'm pa Sijwajieti Jesús kanjwejla'm pet siupapo jikawos siuniwa wask'i'nelaja ti ja ke pajayi wat ka 'nakajana'a. Sijwajieti Jesús kiak iyone ti 'yakajanitie, pakayi ti ijliuyi pa Juan siupi jijliujwanik poli jlele kan'wenkijna'm.

Apocalipsis 1:11

ti iyonk'i 'ate: —'Ete'e siuniwa ji'we'en, 'yina e'ne pa imp'esinikie. Sek jane'yi ka jloyeyinie'e siunapo Sinia' jilis yiyits'i siuniwa ji'wetis ijwienjli sikio' itij'we times tom'niji yiji janaka ajnat Asia: Sinia' jilis yiji jana Éfeso, siunapo yiji jana Esmirna, siu'neje jana Pérgamo, siojona Tiatira, siojona Sardis, siu'neje jana Filadelfia, janaka 'neje jla'am siojona Laodicea.

Apocalipsis 1:17

Jlampet siuti a'wenayi, jlam sek anoyeyi'iji'n kiajwe, 'yinit'iyijpe siunie ti ijiate ti 'yale. 'Yina jikio' siunie jijweye yi'n itipe'e sekyi'i ti iyonak'i 'ate: —Ke ijnots'ijni. Ya'am siunie ti inia'an, siu'neje ni jlaj,

Apocalipsis 1:20

Siunie iyo 'niwa ji'we'en siu'niwa ijwienjli sikio' itij'we times tom'niji katese'l siu'niwa yi' poliyi, ti e'n isiojyi ti atojmat ijwiyeje, siu'neje 'niwa ijwienjli sikio' itij'we times tom'niji katese'l ji'wetis ti wikinie maja ti 'najli. 'Yina siu'niwa ijwienjli sikio' itij'we times tom'niji katese'l siu'niwa yi' poliyi, niwaka ijwienjli sikio' itij'we times tom'niji jijliujwajnas napo Sinia' jilis, jlampet siu'niwa ijwienjli sikio' itij'we times tom'niji katese'l ji'wetis, niwaka pet siuniwa ijwienjli sikio' itij'we times tom'niji Sinia' jilis ji'wetis.

Apocalipsis 1:8

“Ya'am siunie iniant'ipi, yam'neje siunie yi' jlaja”, iyo ni Saka'niona, Sinia' ti lajk'ipa ka ijnojliji, ti jla'am ti 'naka, siu'neje na ti 'nelanjie'e t'ipi po' ta'a, siu'neje na ti ja'nejts'eje.

Apocalipsis 1:9

Ya'am Juank'i'm siunie askiecha, lapakawo pet siuti ani'nopijieteje ni Jesús 'yina si'wet ijwienjlajam'ne siunie Sinia' jika anechijiayas, siu'neje ti siliaye iniuk'i wita'm ti siwet'ia poyeta, 'yina majejli naka 'neje siunie sijweye pet ti ani'netiejeta pet ilia'm niwaka. Sena 'ne yi'i jlaja ajnat siujlie'e i'niat tijwajiape'n jle' iyo'ate Patmos, 'yina je 'wena paka int'emink'i naka jla'am ti awoyi yamtikie' niwak Sinia' jlamtis, siu'neje na ijiatk'i ti Jesús iyo jika'niyeja'.

Apocalipsis 16:5

Ape'yayeyi ja injlojwanik poli jlele ti i'yena niwa i'niatis ti iyo'ate: “Sinia' ti i'nes, a'm ti impo' ta'a, jla'yi ti je t'iki ti a'm. A'm ti tijnajyi siunie jiwoyi ni asajkinaye ti a'tiejek'i.

Apocalipsis 2:12

'Yina kia'iyoyejyi'iji 'ate: —'Ete'e kiu'ujwe siu'nie ti jatajiete ni jijliujwanik napok Sinia' jilis yiji jana isi' Pérgamo: “Iyo ni siunie i'nio' ni jitisajnat tiok ni jikiwitawa timesi ti 'yakajlamk'i.

Apocalipsis 2:18

'Yina kiak iyoyi'ijyi 'ate: —'Ete'e kiu'ujwe siu'nie ti jatajiete ni jijliujwanik napok Sinia' jilis jana isi' Tiatira: “Iyo ni siunie Sinia' jlas, siunie ti jitiete niwa iyo'ate ni jwat ti yat'e ni jla'al, siu'neje niwa jisietis ti intaj je ijwi'yi, iyo'ate siunie wikinie maja ti t'onk'i ti tiliena ape'e siunie jit'iojli.

Apocalipsis 2:8

Iyonat'iyi'iji 'ate: —Lesane kiu'ujwe siu'nie ti jajloyi pet siunie jijliujwanik siunapo Sinia' jilis yiji jana isi' Esmirna: “Ni siunie inia'an siu'neje ni jlaj, siunie ti 'yalpe sekyi'i ti yikiajlayi'i ti 'wasa'n, ji'lij jla'am siu'nie,

Apocalipsis 22:16

“Ya'am ti Jesúsk'i'm, ya'am ti ajlo'wase ni ijliujwanik poli jlele, 'yina ti awojonk'iye ka injwe'lase siu'niwa wask'i'nelaja, sekjane'yi ti jajwelayi pit napo Sinia' jilis. Ya'am ti atajlaja'm siupapo David jilis t'ipi ti tomik'i pijia'm. Ya'am siojona kates jloma jla'yiki ti jlal po'.”

Apocalipsis 22:8

Ya'am Juank'i'm, ya'am a'we'en siu'neje ti ape'ya 'niwaka. Jlampa atemayi siuki iyo kiwa a'we'en siu'neje kiwa ape'ya, sekyi'i ti awoyetaja ka 'yakose kiajwe jak injlojwanik poli jlele ti jota ka iyunit.

Apocalipsis 3:1

'Yina iyo'neje 'ate: —'Ete'e kiu'ujwe siu'nie ti jajloyi siunie jijliujwanik siunapo Sinia' jilis yits'e yi' jana Sardis: “Iyo'ate siunie ti yi' jikiojyi napoka ijwienjli sikio' itij'we times tom'niji Sinia' jikimet ti 'es, siu'neje niwa ijwienjli sikio' itij'we times tom'niji katese'l siuniwa yi' poliyi. Wikie'eyi siuniwa jiwoyi ti ts'ajane pi awone, 'yina 'wanjliyi ka e'e ijnok'i'ni ti injwela ka ayel 'wanjliyeje, 'yina jlampet ti ya'am ts'ajane pi awone ti i'na'al.

Apocalipsis 3:14

Jla'm iyojli 'ate: —'Ete'e kiu'ujwe siunie ti jajloyi ni jijliujwanik napo Sinia' jilis yi'i jana isi' Laodicea: “Iyo naka ni siunie ti 'yakajanit ti jlam je iyo ni siunie iyo ni Sinia', siunie Sinia' jikawo ti inka'niyewo ti je tiwonaja, naka 'neje ni siunie ti ijiatk'i, jitis 'neje wikie'eyi siuniwa Sinia' jilisajna'.

Apocalipsis 3:7

'Yina iyo'ne 'ate: —'Ete'e kiu'ujwe siu'nie ti jajloyi siunie jijliujwanik napok Sinia' jilis yiji jana Filadelfia: “Iyo'ni siu'nie Sinia' 'yotat, siu'neje ti nak yiyi siojona anechiyas David jika 'wuk kiwet jikie'e. Ni siunie etie jla'm ka 'najlinitia'm ja lajak'ipa ka imp'ojna'm, siu'neje ti jlama ka imp'ojna'm kiak jawo ja lajak'ipa ka 'najlinitia'm.

Apocalipsis 4:5

Siojowa ti tak'ayetajats'i sek taj'le ni yi'i jlajak anechiyas ji'wet, siu'neje jawa jla'lapis papo ti 'loj i'nio', siu'neje jawa isiumtijnits'i; 'yina jitieyi'i jlajak in'wet anechiyas ji'wet sekyiye'e siu'niwa ijwienjli sikio' itij'we times tom'niji jwatis ti tiwoki katesila ti yatamk'i, jawaka siunapo ti kia'iyo ijwienjli sikio' itij'we times tom'niji Sinia' jikimet ti 'es.

Apocalipsis 4:8

Siojowa ijniujlits'i pini' Sinia' jilisajna', kiajatak'i ti kia'iyo ti ijwienjli sikio' itij'we ijwienjli tom'niji 'niwa jijwesis, 'yina siojowa jitiete'l itijwk'i, po' jawa ti yi' kisie'e, po'neje jawa ti yi' jitiowaja'm. Jlomas itijwe ajnaj kia'iyojliyi ti je mamiyisie ti takelisiejne'n, ti iyoyis'ni 'ate: “¡'Es, 'es, ijiate ti jlam 'es, 'ni Saka'niona, ti lajk'ipa ka ijnojli, siunie ti po' ta'a ti 'nelanjie'e, siu'neje na ti jla'am siunie 'naka, siu'neje na ti ja 'nejts'eje!”

Apocalipsis 5:6

Sekyi'i ti a'wenayi ja 'wolepo 'woma takasiti'n jikiowe'e siojowa ji'wetis napo anechiyasas, siu'neje jawa ijniujlits'i pini' Sinia' jilisajna' jitiete 'loj, siu'neje japo i'nio' jwajla'a iyots'i'ni, 'wanjliyi ti iyo ti tiliana. Ijwienjli sikio' itij'we times tom'niji jawa jik'iulis, kia'iyojliyi jawa jitiete 'nak nojwaja'm 'neje, jawaka siojopo ijwienjli sikio' itij'we times tom'niji Sinia' jikimet ti 'es ti ijliu'we 'ni ajnat.

Apocalipsis 8:2

A'wena japo ijwienjli sikio' itij'we times tom'niji injlojwajnas poli jlele ti takasitk'i jitieyi'i 'ni Sinia', sekyi'i tijwankitajamk'i jawa ji'woso'l, siojowa tipajwukk'iji'n.