Revelation 2:3 - Chishemanituu Utayimuwin: Kaa Uskaach Testament

³ Muush chichii siipiiwesiinaawaau e nachishkamekw chekwaan. Chichii aayimuhunaawaau kaye e nuushuushkuuyekw. Namui maak kuuhchi nuuhtipuuniinaawaau e taapwehtamekw.

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

³ ᒨᔥ ᒋᒌ ᓰᐲᐌᓰᓈᐙᐤ ᐁ ᓇᒋᔥᑲᒣᒄ ᒉᒀᓐ᙮ ᒋᒌ ᐋᔨᒧᐦᐅᓈᐙᐤ ᑲᔦ ᐁ ᓅᔔᔥᑰᔦᒄ᙮ ᓇᒧᐃ ᒫᒃ ᑰᐦᒋ ᓅᐦᑎᐴᓃᓈᐙᐤ ᐁ ᑖᐺᐦᑕᒣᒄ᙮

Revelation 2:3 Iomraidhean Croise

Mark 15:21

Simon e ishinihkaasut naapeu Cyrenehch e uhchiit nihaau anit chii pechi pimuhteu, wiiwiitamihch anite aniyuu ihtaawiniyuu e uhtuhtet. Eukw uyuu kaa uhtaawiitwaau Alexander ekw maak Rufus. Eukw maak uyuu naapeu anichii shimaakanishach kaa aayihkamihaatwaau chechii pimuhtahaayich Jesus utaashiteyaahtikumiyuu.

Luke 14:27

Awen ekaa pimuyaate utaashiteyaahtikum e pechi nuushuushkuut namui nika chii uchischinuhamuwaakanitutuwaau.

Luke 18:1

Jesus chii wiihtamuweu uchischinuhamuwaakan uyuu chischinuhamaacheu tipaachimuwiniyuu chechii uhchi chischeyihtamiyich muush chechii ayimihaayich, kaye ekaa chechii saskachiyich.

Luke 21:19

Chika ayaanaawaau chihchiwe pimaatisiiwin ekaa nuuhtipuuniyekwe e nuushuushkuwiyekw.”

Luke 5:5

Simon maak chii nishkweushiheu e itaat, “Chischinuhamaacheu, iskan tipiskaau nichii nuutamesenaan, namui maak nuuhchi pitahuyaanaan. Eyuwehch maak nika pakashtawehwaanaanich nitahiipiinaanich wesh ekun e iishiyaahch chechii ihtiyaahch.”

Luke 8:15

An maak shuumin kaa miyu nihtaauchit e miyuskamikaayich aschiihch mwehch eukw e ishinaakusitwaau anichii awenichii kaa nituhtahkwaau Chishemanituu utayimuwiniyuu. Nanihiihtamuch, kaye kanuweyihtamuch. Kanawaach taapwehtamuch e siipiiwesiitwaau ekw maak chek e miyu miinishuutwaau upimaatisiiwiniwaahch.”

John 15:21

Misiwe uu kaa ishi aayimuutamaatakuch che ihtuutaataakuch niya aniyeyuu che uhchi ihtuutaataakuch wesh taapaa uhchi chischeyimeuch aniyuu kaa pechi itishahuyich.

Romans 12:12

Chitaspeyimututawaawaau Chishemanituu muush maak miywaatamukw. Suuhk siipiiwesikw nenehkaateyimuyekw. Muush kaye ayimihaakw.

Romans 16:12

Anichii iskweuch Tryphaena ekw maak Tryphosa Utipeyihchikeu kaa atuskwaatwaau, niwaachiyemaauch kaye. Niwiichewaakan Persis, eukw miin waachiyemak, naashch taapwe nisaachihaau. Nasch taapwe chii mista aapatisuu uu iskweu Utipeyihchikeu e atushkuwaat.

Romans 2:7

Aniyuuh aweyuuh muush kaa miyutuutamiyich e pukuseyimuyich chechii miyu kanawaapamikuyich Chishemanituu kaye chechii miywaachimikuyich kaye chechii miikuyich kaachiche chechii pimaatisiyich, kata miyeu kaachiche chechii pimaatisiyich.

Romans 8:25

Chitasuwaapahtenaanuu maak chekwaan ekaa nihtaa uhchi waapahtamukw. Chisiipiiwesiinaanuu maak e ashuwaapahtamuhkw.

1 Corinthians 13:7

E saachihaat awen aweyuuh muush siipiiwesiistuweu mikw taan e ihtiyikwen. Kaye muush taapweucheyimeu aniyuuh aweyuuh kaye muush ihtakuniyuu e ishi aspeyimut chechii miyupayiyich. Namui puuniyuu e siipiiwesiistuwaat aniyuuh aweyuuh.

1 Corinthians 16:16

Niichishaanitikw, naashch taapweh chisiihchimitinaawaau chechii pachishteyimititisuustawekuch anichii awenich uyuu kaa iteyihtaakusitwaau. Pachishteyimitisuustuumaahkw kaye misiwe aniyuuh kaa wiichihiikutwaau aniyuu utitaapatisuwinawaau nesht suuhk kaa aahchiistamiyich aniyuu e ishi wiichihiikutwaau.

2 Corinthians 10:15

Namui kaye nitaayimuutamuwaanaan kutak awen utatuschewin mwehch niyaan an e chii ishi atushcheyaahch chechii itihtaakusiyaahch. Namui niwii paashichiskamuwaanaan taan e ishi miyimiht Chishemanituu chechii ishi atushkuwachiht. Nipukuseyihtenaan mikw etituu chechii atushcheyaahch anite e ihtaayekw wetaach chechii nihtaauchihch chitaapwehtamuwinawaau kaye che ishpish miikuwaahche Chishemanituu chechii wiichihiitaahch.

2 Corinthians 11:23

Iteyihtamuch aa e atushkuwaatwaau Christ. Etituu niya nitatuskuwaayuuh. Shaash etituu nichiishkwe ayimin. Namui nimiyeyihten mwehch wiyawaau e ishi aayimuumisutwaau e ishi aayimuumisuyaan. Etituu niya nichii mistaapatisin ishpish wiyawaau. Etituu niya mihchetwaau nichii chipahukuun. Etituu niya mihchetwaau nichii pishishtehukuun ishpish wiyawaau. Etituu niya mihchetwaau nichii peshuwaapahten nipuwin ishpishaat wiyawaau.

2 Corinthians 4:1

Naashch taapwe nichii shaweyimikunaan Chishemanituu uyuu aapatisuwiniyuu e chii miiyimiht. Eukw maak wehchi ekaa wii puuniyaahch.

2 Corinthians 4:16

Ekun maak wehchi ekaa nihtaa wii puuniyaahch. Aat uschich utah chiiyuunaahch wetaach e ati wanaatisiihkw, eshikum chiishikaau maskuuhaakanuuch chitahchaahkunuuch.

2 Corinthians 5:9

Ekw maak kwaast e ihtiihkw chitihtinaanuu chechii naheyihtamihiihkw Utipeyihchikeu mekwaach utah e pimaatisiihkw maak anite e ihtaat ihtaayihkwe.

2 Corinthians 6:5

Nichii pishishtehukunaan. Nichii chipahukunaan chipahutuukamikuhch. Nichii kusiihkaakunaanich awenichii e mihchetitwaau. Nichii ayeskusiinaan e ishpish mistaapatisiyaahch. Niyaanikutehch namui nuuhchi nipaanaan. Kaye nichii siiweyinaan maanh.

Galatians 6:2

Maamiiskuch wiichihiitukw e aayimuhuyekw. Uu ihtiyekwe chika ihtuutamuwaanaawaau taan kaa itashuwet Christ.

Galatians 6:9

Ekaawii chika uhchi saskachiinaanuu e miyutuutamuhkw. Wesh kata utihchipayuu taanite che miikuyihkw chitipahamaakusiiwinuu ekaa puuniikwe e miyutuutamuhkw.

Philippians 2:16

Ekun uu chipaa ishi pimaatisiinaanuu e waawiihtamuuhkwaau awenichii Chishemanituu e pimaachihiiweyich. Ekw maak iskutak utihchipayihche Christ che takushinit, ekw che maamihchihiyekw. Ekut che nuukuhch ekaa sehchei uhchi aapatisiyaan.

Philippians 4:3

Niwiichewaakan muush kuiskw kaa chii ihtiyin e wiich aapatisiimitaan chipukuseyimitin chechii wiichihiitwaau uchii iskweuch chechii puuniitwaau e machipayitwaau. Wesh taapishkun chii mista aapatisuuch e wiichihiitwaau e waawiihtamuch miywaachimuwiniyuu. Kaye Clement ekw maak anichii kutakach kaa wiich aapatisiimakwaau, utishinihkaasuwinawaau kaa masinaateyikwaauh Chishemanituu upimaatisiiwin masinahiikanihch chechii ayaatwaau kaachiche pimaatisiiwiniyuu nichii wiichihiikuuch.

Colossians 1:11

Nitutamuwaau Chishemanituu chechii ihtuutaataakw mitun tekash chechii maskuuhiikuyekw suuhkaatisiiwin, wiya kaa chisteyihtaakuniyich usuuhkaatisiiwinihch uhchi. Ekw maak che siipiiwesiyekw mikw taan che ishi nachishkamuwekwe.

1 Thessalonians 1:3

Nichischisinaan e ayimihiichiht Chishemanituu taan e ishi miyu atushkaatuyekw e taapweyimekw Utipeyihchikeu. Nichischisinaan taan e ishi miywaapatisiyekw e saachihekw Jesus. Nichischisinaan kaye taan e ishi suuhchikaapuuyekw e aspeyimututawekw Chitipeyihchikeminuu Jesus Christ.

1 Thessalonians 2:9

Niichishaanitikw, cheshtinaash chichischisinaawaache taan kaa ishpish mistaapatisiyaahch anit e ihtaayekw. Nichii aapatisinaan e chiishikaach kaye e tipiskaach niyaan chechii pimipayihiisuyaahch ekaa chechii kusikushkaakuyekw e iteyihtamekw chechii pechi pimipayihiyaahch mekwaach e waawiihtamaataahch Chishemanituu umiywaachimuwin.

1 Thessalonians 5:12

Niichishaanitikw, chipukuseyimitinaan chechii chisteyimekuch anichii kaa niikaanishkaataakuch. Wesh Utipeyihchikeuh chii wiyaapamikuuch chechii chistunihtahiitaakuch kaye chechii chiskutamaataakuch Chishemanituu e ihtaayich chechii ishi pimaatisiiwekw.

2 Thessalonians 3:13

Misiwe niichishaanitikw chititinaawaau, ekaawii saskachiikw e miyutuutamekw.

2 Thessalonians 3:5

Nitutamuwaanaan Utipeyihchikeu chechii wiichihiitaakw etituu chechii chischeyihtamuwekw Chishemanituuh usaachihiiwewin. Kaye maak chechii siipiiwesiiwekw e nachishkamekw e aayimihch muyaam Christ kaa ishi siipiiwesiit.

2 Thessalonians 3:8

Namui nuuhchi pachishtinaanaanich awenichii chechii ashamikuyaahch ekaa mechim chiishiihkuwachihtwaau. Teyakuch nichii mista aapatisinaan e chiishikaach kaye e tipiskaach ekaa chechii aayimihiitaahch.

1 Timothy 4:10

Eukw maak wehchi suuhk yaapach iteyihtamihiikuyihkw uu taan e itaapatisiihkw aat e aayimuhuyihkw wesh chitaspeyimututawaanuu Chishemanituu kaa pimaatisiit, an kaa nituweyimaat misiwe aweyuu chechii pimaachihuyich kaye kaa pimaachihaat misiwe aniyuu kaa taapweyimikut.

1 Timothy 5:17

Anichii kaa wiichihiiwetwaau e niikaanishkaakanuyich ayimiheukamikuyuu e miyu nanaakatuweyihtahkwaau maak aniyuu e itaapatisitwaau iteyihtaakuniyuu naashch chechii chisteyimaakanuutwaau. Etituu maak chipaa chisteyimaakanuuch anichii mitun tekash kaa ishi pachishtinisutwaau chechii waawiihtahkwaau Chishemanituu utayimuwiniyuu kaye chechii chiskutamaachetwaau.

Hebrews 10:36

Chinituweyihtaakusinaawaau chechii siipiiwesiyekw ekw maak chechii ihtuutamuwekw Chishemanituu utiteyihtamuwin kaye chechii miskamuwekw aniyuu kaa itwet cheshtinaash che miitaakw.

Hebrews 12:1

Maamituneyimaataauch maa anichii kaa mihchetitwaau awenichii naashch kaa waapahtiiwetwaau e taapweyimaatwaau Chishemanituu. Uyuu e chii ihtitwaau kaye chiyaanuu ekun chipaa ihtinaanuu. Ekw maak an uhchi kaye chiyaanuu puunihtaataau misiwe aniyuu chekwaayuu e wanaahiikuyihkw chechii itaatisiihkw aniyuu taan e ishi nituweyimitahkw Chishemanituu chechii itaatisiihkw. Kaye misiwe wepinihtaau aniyuu machihtwaawinh kaa wii tipeyimikuyihkw, ekw maak che pimipahtaayihkw anite e kakwechiskatuhutunaanuuhch anite ahchaahkuwinihch ishi paatish chii utihtamuhkwe anite netaweyimitahkw Chishemanituu chechii ispahtaauhkw.

Hebrews 13:13

Ekw maak wiiwiitaau anita ihtaawinihch che nituwaapamuhkw Jesus kaye chiyaanuu chechii muushihtaauhkw taan kaa ishi maayeyimaakanuut.

Hebrews 6:10

Ehe, chitaapweucheyimitinaawaau e chii pimaachihuyekw. Nichischeyimaau Chishemanituu kuiskw e ihtuutawaat misiwe aweyuuh. Chichischeyimikuwaau taan kaa ishi miyutuutamuwekw kaye taan kaa ishi nuukuhtawekw e saachihekw e chii wiichihiimekw kaa taapwehtamiitwaauh kaye eshkw e wiichihiimekw. Namui maak chika uhchi wanichischisuu uyuu.

Hebrews 6:12

Namui chinituweyimitinaan chechii chihtimiyekw, teyakuch nispituwaahkuch anichii kaa taapwehtahkwaau ekaa kaa chiiwekaapuushtawaatwaau Chishemanituu, wesh eukw uchii che miikuutwaau Chishemanituuh taan aniyuuh kaa itweyich cheshtinaash che miikutwaau.

Hebrews 6:15

Chii siipiiwesiyuu maak Abraham e ashuwaapit che ishpish ihtuutamuwaakanuut aniyuu kaa itaakanuut cheshtinaash che ihtuutamuwaakanuut. Chek mihchetu pipunh kaa ashuwaapit. Ekw kaa miikut Chishemanituu aniyuu kaa itweyich cheshtinaash che miikut.

2 Peter 1:6

Miin maak chekwaan che wii ati ayaayekw eukw uu chechii miyu nanaakataweyimisuyekw chipimaatisiiwiniwaahch. Iskutak maak e ati miyu nanaakataweyimisuyekw ekw che ati suuhchikaapushtamekw nanaahkuu chekwaan. Uu maak e ati suuhchikaapuuyekw ekw che ati manituuwaatisiyekw.

Revelation 1:9

Eukw niya chiichishaanawaau John. Misiwe chiwiichishaanihtunaanuu Jesus e ihtaat ishi. Chinanehkaateyimuhiikuyihkw an uhchi e nuushuushkuuhkw Jesus mikw maak maamuu chiwii siipiiwesinaanuu taanit anit nechishkamuhkw maan e aayimihch chekwaan. Nichii maakunikuun ekw anite an ministikw Patmos kaa ishinihkaatech kaa tayikuyaan an uhchi e chii waawiihtamaan Chishemanituu utayimuwin kaye e chii tipaachimak Jesus taan kaa aihtit.

Revelation 3:10

An e chii siipiiwesiyekw taan e ishi nachishkamekw muyaam kaa itashumitakuch chechii ihtiyekw, chika kanuweyimitinaawaau anit mekwaach pimipayihche e aayimuhutwaau awenichii, anit mekwaach che nituu chischeyimaakanuutwaau misiwe awenichii utah aschiihch kaa ihtaatwaau.