Matthew 8:22 - Chishemanituu Utayimuwin: Kaa Uskaach Testament

²² Ekw Jesus kaa itaat, “Pechi wiicheuh. Ekush anichii mwehch kaa nipitwaau kaa iteyihtaakusitwaau awenich kata nahiihkuweuch aniyuu utiiniimuwaauh kaa nipiyich.”

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

²² ᐁᒄ ᒌᓴᔅ ᑳ ᐃᑖᑦ, ᐯᒋ ᐐᒉᐤᐦ᙮ ᐁᑯᔥ ᐊᓂᒌ ᒬᐦᒡ ᑳ ᓂᐱᑣᐤ ᑳ ᐃᑌᔨᐦᑖᑯᓯᑣᐤ ᐊᐌᓂᒡ ᑲᑕ ᓇᐦᐄᐦᑯᐌᐅᒡ ᐊᓂᔫ ᐅᑏᓃᒧᐙᐤᐦ ᑳ ᓂᐱᔨᒡ᙮

Matthew 8:22 Iomraidhean Croise

Matthew 8:21

Ekw maak kutak naapeu e nuushuushkuwaat Jesus chii iteu, “Utipeyihchikeu, pachishtinh pitamaa chechii nahiihkuuk nuuhtaawii puunipimaatisiite ekw maak yaakw che wiicheutaan.”

Matthew 9:9

Ekw Jesus kaa chistuhtet anit uhchi, mekwaach maak e ati pimuhtet, chii waapameu naapeu e apiyich masinahiicheukamikuhch Matthew e ishinihkaasuyich, Chisheuchimaau shuuliyaayuu kaa maamuushtinamiyich e chii itaapatisiyich. Ekw Jesus kaa itaat, “Pechi papaawiicheu.” Ekw Matthew kaa pisikuut, kaa ati wiichewaat Jesus.

Mark 2:14

Aniyuu maak e ati pimuhtet chii utihteu naapeu chisheuchimaau shuuliyaayuu kaa maamuushtinamiyich e itaapatisiyich. Levi chii ishinihkaasuyuuh. Alphaeus chii ishinihkaasuyuuh uhtaawiyuuh. Mekwaach anite umasinahiicheukamikuhch chii apuu uu Levi. Ekw kaa itaat Jesus, “Pechi papaawiicheuh.” Chii pishikuu maak Levi kaa ati wiichewaat Jesus.

Luke 15:24

Wesh uu nikus mwehch e chii nipit chii ishinaakusuu ekw muyaam miin e pimaatisiit eukw e ishinaakusit, mwehch e chii wanishinit ekw maak miin e miskawaakanuut.’ Ekw maak kaa muuchikahtaatwaau.”

Luke 15:32

Ishinaakun taapwe chechii muuchicheyihtamuhkw wesh chiichishaan mwehch e chii nipit chii ishinaakusuu ekw maak anuhchiish mwehch miin e pimaatisiit ekun e ishinaakusit. Mwehch e chii wanishinit chii ishinaakusuu ekw maak miin e miskawaakanuut ekun e ishinaakusit.’ ”

Luke 9:59

Ekw Jesus kaa itaat kutak naapeu, “Pechi wiicheuh.” Ekw an naapeu kaa itaat Jesus, “Utipeyihchikeu, pachishtinh pitamaa chechii nahiihkuuk nuuhtaawii puunipimaatisiite ekw maak yaakw che wiicheutaan.”

Luke 9:60

Ekw Jesus kaa itikut, “Anichii mwehch kaa nipitwaau kaa iteyihtaakusitwaau iinuuch ekush kata nahiihkuweuch aniyuu utiiniimuwaau kaa nipiyich. Chiya maak, maachiih che papaamaachimuut Chishemanituu chisheuchimaawin.”

John 1:43

Miin aniyuu e ati chiishikaayich Jesus chii iteyihtam Galilee aschiihch chechii ituhtet. Ekute anite kaa miskuwaat Philip ekw kaa itaat, “Pechi papaawiicheu.”

John 21:19

Uyuu maak Jesus kaa itwet chii nituweyimeu chechii chischeyihtamiyich taanite che ishi nipiyich chechii uhchi chisteyimaakanuyich Chishemanituu. Ekw Jesus kaa itaat, “Pechi papaawiicheuh.”

John 21:22

Jesus chii itikuu, “Nituweyimike chechii pimaatisiit paatish miin takushinuuche, taan maak chechii ihtiyin chiya. Pechi nuushuushkuu chiya.”

Ephesians 2:1

Chiyawaau maak e nipiyekw chichii ishinaakusinaawaau eshkw ekaa uhchi pimaachihiitaakw Chishemanituu. Chichii machaatisiinaawaau kaye namui kuuhchi nanihiihtuwaawaau Chishemanituu.

Ephesians 2:5

aat eshkw mekwaach e nipiihkw e chii ishinaakusiihkw ekaa uhchi nanihiihtuuhkw, chichii ihtuutaakunuu chechii wiich pimaatisiimahkw Christ. Chishemanituu chichii pimaachihiikunuu e chii wii shaweyimitahkw aat ekaa uhchi tepicheyihtaakusuuhkw.

Ephesians 5:14

Eukw maak wehch iinaanuuhch maan, “Wanishkaah chiya kaa wiihchihkwaamuyin, wanishkaah anit nipuwinihch uhchi. Ekw maak Christ che miisk waashtewiniyuu.”

Colossians 2:13

Chimachihtwaawinawaauh chichii ihtuutaakunaawaau muyaam e nipiyekw chechii ishinaakusiyekw Chishemanituu ishi e ihtaat, kaye maak eshkw namui kuuhchi ihtuutaakuwaau Chishemanituu chechii utawaashiimitutaataakw taan kaa ihtuutamaataakw Christ uhchi. Anuhchiish maak chichii miikuwaau Chishemanituu e uskaayich pimaatisiiwiniyuu mwehch kaa ishi wanishkaanaat Christ nipuwinihch uhchi. Tekash chichii wepeyihtamaakunuu Chishemanituu chimachihtwaawinuuh.

1 Timothy 5:6

Ekw an iskweu kaa peyakut pisikw maak mikw wiya kaa wii nanihiiwehiisut muyaam e nipit ishinaakusuu aat aniyuu eshkw e pimaatisiit.