Matthew 7:21 - Chishemanituu Utayimuwin: Kaa Uskaach Testament

²¹ “Namui misiwe awen kaa pechi ishinihkaasit, ‘Utipeyihchikeu, Utipeyihchikeu,’ chika uhchi piihcheu kihchikiishikw chisheuchimaawinihch, anichii eukw kaa ihtuutahkwaau taan e ishi nituweyimikutwaau Nuuhtaawii kihchikiishikuhch kaa ihtaayich eukunich anichii che piihchetwaau.”

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

²¹ ᓇᒧᐃ ᒥᓯᐌ ᐊᐌᓐ ᑳ ᐯᒋ ᐃᔑᓂᐦᑳᓯᑦ, ᐅᑎᐯᔨᐦᒋᑫᐤ, ᐅᑎᐯᔨᐦᒋᑫᐤ, ᒋᑲ ᐅᐦᒋ ᐲᐦᒉᐤ ᑭᐦᒋᑮᔑᒄ ᒋᔐᐅᒋᒫᐎᓂᐦᒡ, ᐊᓂᒌ ᐁᐅᒄ ᑳ ᐃᐦᑑᑕᐦᒀᐤ ᑖᓐ ᐁ ᐃᔑ ᓂᑐᐌᔨᒥᑯᑣᐤ ᓅᐦᑖᐐ ᑭᐦᒋᑮᔑᑯᐦᒡ ᑳ ᐃᐦᑖᔨᒡ ᐁᐅᑯᓂᒡ ᐊᓂᒌ ᒉ ᐲᐦᒉᑣᐤ᙮

Matthew 7:21 Iomraidhean Croise

Matthew 12:50

Muyaam nikaawii kaye niichishaanich kaye niichishaaniskwemach nititeyimaauch anichii kaa ihtuutahkwaau Nuuhtaawii kihchikiishikuhch kaa ihtaayich utiteyihtamuwiniyuu.”

Matthew 16:17

Ekw Jesus kaa itaat aniyuu Peter, “Chishaweyihtaakusin Simon, John ukusisa, wesh uu kaa ishi chischeyimiin, namui iinuu kuuhchi wiihtamaakw, Nuuhtaawii kihchikiishikuhch kaa ihtaat ekute kaa uhchi miikuyin uu chechii ishi chischeyimiin.

Matthew 18:10

“Yaakwaamiikw maak ekaa chechii aatuweyimekuch uchii awaashach, wesh chiwiihtamaatinaawaau, utenchilamuwaau kihchikiishikuhch kaa ihtaayich muush ayimishtamaakuuch e uhchishkuukaapuushtawayich Nuuhtaawii kihchikiishikuhch kaa ihtaayich.

Matthew 18:19

“Kaye maak chiwiihtamaatinaawaau, niishu awenichii taapishkun e iteyihtamihiikutwaau chekwaayuu taan e ishi ayimihchiketwaau ekun nihaau che ishi ihtuutamaakutwaau Nuuhtaawii kihchikiishikuhch kaa ihtaayich.

Matthew 18:3

Ekw kaa itwet, “Taapwe chiwiihtamaatinaawaau, chiishpin ekaa kweskaatisiyekwe ekaa iteyihtaakusiyekwe muyaam awaash e iteyihtaakusit, namui wiiskaat chika chii piihchenaawaau kihchikiishikw chisheuchimaawinihch.

Matthew 18:35

Ekw Jesus miin kaa itwet, “Ekun maak mwehch che ihtuutaakuyekw Nuuhtaawii kihchikiishikuhch kaa ihtaat, ekaa wepeyihtamuwekwenich chiichishaanuwaauch chitehiiwaahch uhchi.”

Matthew 19:24

Miin peyakwaau nika itwen, etituu aayimaniyuu awen kaa miisitisiit chechii piihchet Chishemanituu uchisheuchimaawiniihch ishpishaat an awesiis kaa mista piskwaakunet chechii shaapushkahk shaapunikaniyuu anite pekuneyaapiskaayich.”

Matthew 25:10

Ekw anichii ekaa naashch kaa iipwaahkaatwaau ishkweshach kaa nituu utinihkwaau pimiyuu. Mekwaach maak e ispihtanihutwaau, chii takushiniyuu aniyuu uschinaapewaan. Anichii maak ishkweshach kaa ayeskuwiitwaau chii ati wiicheweuch e ati piihcheyich anite e makushaanuyich, ekw kaa chipahwaakanuut an chishtuhkan.”

Matthew 25:21

‘Taapwe chimiyutuuten kaye taapwe chimiywaapatisin,’ chii itikuu aniyuu uchimaam. ‘Kuiskw e chii ishi aapatisiihkahtaman an e apishaashich taan kaa ishi pukuseyimikuyin ekw etituu e mishaakwaau chekwaayuu che pachishtinamaakuyin chechii uchimaahkahtaman. Aashtam pechi piihche, che pechi wiichihiyin taan e ishi miywaatamaan.’

Matthew 26:39

Ekw anite iiche kaa ituhtet wiya, chii uchihchiihkunipuu maak, kaa ayimihaat e itwet, “Nuuhtaawii, chechii ishinaakunikwe pechi iichenamuuh uu taan che ishi wawiisacheyihtamaan, mikw maak chii chititeyihtamuwin chika ihtuutaakanuu, namui niya nititeyihtamuwin.”

Matthew 26:42

Ekw miin kaa nituu ayimihaat Jesus kaa itwet, “Nuuhtaawii ekaa chechii iichenikanuukwe uu che ishi wiisacheyihtamaan ekun kiipaa che ishi ihtuutamaan, chiya chititeyihtamuwin chechii ihtuutaakanuuhch.”

Mark 3:35

An awen che ihtuutamukwe Chishemanituu utiteyihtamuwiniyuu eukun an wiichishaaniyaan kaye eukun an wiichishaaniskwemiyaan kaye eukun an wekaawiyaan.”

Mark 9:47

Maak chischiishikw ihtuutaakuyine chechii machituutaman, ekush kuikupit an chischiishikw. Uste kata miywaau chechii piihcheyin Chishemanituu uchisheuchimaawinihch mikw e napateyaapiyin ishpish wii taapishkun chechii kanuweyihtaman chischiishikw machishkutehch maak che ituhteyin.

Luke 11:28

Ekw Jesus kaa itaat, “Ehe, taapwe, mikw maak uste shaweyihtaakusuuch anichii kaa pehtahkwaau Chishemanituu utayimuwiniyuu kaye kaa nanihiihtamuwaatwaau.”

Luke 13:25

Ekaa maak wehchi piihchewekwe, iskutak chipahwaate ishkwaahtem an kaa tipeyihtahk aniyuu waaskaahiikaniyuu, wiiwiitamihch niipuuyekwe e paahpawahiicheyekw chika itwenaawaau, ‘Utipeyihchikeu, pechi aapahamuunaan.’ Ekw maak che ishi nishkweushihiitaakw, ‘Namui chika uhchi aapahamaatinaawaau wesh namui chichischeyimitinaawaau, namui kaye nichischeyihten taanite wehchiyekw.’

Luke 18:25

Etituu aayimaniyuu awen kaa miisitisiit chechii piihchet Chishemanituu uchisheuchimaawiniihch ishpishaat an awesiis kaa mista piskwaakunet chechii shaapushkahk shaapunikaniyuu anite pekuneyaapiskaayich.”

Luke 6:46

“Chekwaan maak wehchi ishinihkaasiyekw Utipeyihchikeu, ekaa maak ihtuutamekw taan e ishi wiihtamaatakuch chechii ihtuutamekw.

John 14:7

Shaash maak e chischeyimiyekw shaash chipaa chischeyimaawaau kaye Nuuhtaawii. Anuhchiish maak shaash chichischeyimaawaau kaye shaash chichii waapamaawaau.”

John 15:23

Wesh an awen kaa uhkaateyimit Nuuhtaawiih kaye uhkaateyimeu.

John 3:5

Jesus kaa itaat, “Kuiskw chiwiihtamaatin, namui awen chika chii piihcheu Chishemanituu uchisheuchimaawiniihch paatish nipiihch kaye Ahchaahkuwinihch uhchi pimaatisiite

John 5:17

Ekw kaa itikutwaau Jesus, “Nuuhtaawii muush miyutuutam aat e ayimiheuchiishikaayich, kaye niya maak ekun che wii ihtiyaan.”

John 6:40

Wesh eukw uyuu Nuuhtaawii utiteyihtamuwin, misiwe aweyuu kaa waapamaayich kaye kaa taapweyimaayich Ukusisimaau kaachiche pimaatisiiwiniyuu chechii ayaayich. Niya maak che wanishkaanak maahchishtai chiishikaache.”

John 7:17

An maak awen suuhk wii ihtuutamuwaate Chishemanituu utiteyihtamuwiniyuu, aniyuu taan e ishi chischinuhamaacheuch ekut che uhchi chischeyihtahk Chishemanituuh kaa pechi itashumiikwen aniyuu chechii ishi chiskutamaacheuch maak mikw niya nititeyihtamuwinihch wehchipayiyikwe.

ᐊᐸᔅᑕᓚᒡ 14:22

Ekut anit kaa ayimihaatwaau aniyuu aweyuu kaa taapweyimaayich Jesus e siihchimaatwaau chechii memechiminimiyich utaapwehtamuwiniyuu. Chii iteuch kaye e nituweyihtaakuniyich awen chechii nachishkahk nanaahkuu chekwaayuuh e aayimaniyikwaau ekw maak chechii piihchet Chishemanituu uchisheuchimaawinihch.

Romans 12:2

Ekaawii nispituwaahkuch taan e ishi pimaatisiitwaau anichii ekaa kaa taapweyimaatwaau Chishemanituuh. Teyakuch pachishtinaakw Chishemanituu aahchiiuh chechii iteyihtaakuhiitaakw e uschihtaat taan e ishi maamituneyihtamuwekw. Ekw maak che chischeyihtamuwekw Chishemanituu utiteyihtamuwin, chika chischeyihtenaawaau chekwaan meywaashiyich kaye chekwaayuu neheyihtamihiikut Chishemanituu, kaye maak aniyuuh chekwaayuuh mitun tekash e kuiskunaakuhkwaauh.

Romans 2:13

Wesh taapaa anit e pehtahk awen Moses uwiishuwewiniyuu kata uhchi kuiskunaakusuu Chishemanituu ishi e ihtaayich. Ihtuutahke taan e itashteyich anit ekut che uhchi kuiskunaakusit Chishemanituu ishi e ihtaayich.

Ephesians 6:6

Ekaawii mikw e kanawaapamisk kuuchimaam suuhk wii aapatisih muyaam mikw naapeuh kaa wii nanihiiwehaat chechii ishinaakusiyin wesh Christ utaapachihaakanh nituweyihtaakusiyuu mitun utehiihch chechii uhchi ihtuutamiyich Chishemanituuh utiteyihtamuwiniyuu.

Colossians 4:12

Miin kutak awen e ihtaayekw e uhchiit chiwaachiyemikuwaau eukw uu Epaphras. Kaye wiya atushkuweu Christ Jesus. Muush suuhk chitayimiheshtamaakuwaau e nitutamuwaat Chishemanituuh chechii yaaichikaapuuhiitaakw tekash e nanihiihtamuwekw utiteyihtamuwiniyuu mwehch e ihtitwaau anichii kaa chiishi nihtaauchitwaau kaye tekash kaa taapweyimaatwaau Jesus.

1 Thessalonians 4:3

Wesh Chishemanituu aniyuu utiteyihtamuwin chechii payehchisiiwekw kaye ekaa mitun wiinisuwaatisiwin chechii ihtakuhch chipimaatisiiwiniwaahch.

1 Thessalonians 5:18

Mikw taan che ispayuwekwe muush nanaaskumukw. Wesh eukw uyuu e ishi pukuseyimitaakw Chishemanituu chechii ihtuwekw e wiicheumekw Christ Jesus.

Titus 1:16

Itweuch e chischeyimaatwaau Chishemanituuh mikw maak aniyuu e itaatisiitwaau nuukuniyuu ekaa taapwe chischeyimaatwaau Chishemanituu wesh naashch machaatisiyuuch. Namui mitun nanihiihtuweuch Chishemanituu kaye namui mitun iteyihtaakusuuch chechii miyutuutahkwaau.

Hebrews 13:21

Mistahii chichii ihtuutamaakuwaau Chishemanituu Jesus uhchi ekw maak netutamuuk chechii miitaakw misiwe aniyuu kaa miywaayikwaau chekwaayuu e ishi nituweyihtamekw chechii ihtuutamuwekw utiteyihtamuwin. Nitayimihaau kaye chechii aapatisit anite chipimaatisiiwiniwaahch ekw maak chechii naniheyihtamihiikut aniyuu e itaatisiiwekw. Muush maak maamihchimaataau Jesus Christ kaachiche kaye kaachiche. Amen.

Hebrews 4:6

Aat e chii ishinaakusitwaau anichii niishtam kaa wiihtamuwaakanuutwaau miywaachimuwiniyuu ekaa uhchi wii taapwehtahkwaau kaye ekaa uhchi aapatihtahkwaau ekw maak kiipaa namui mechim uhchi utisaapahtamuch. Eshkw maak nihiipayuu chechii piihchaanuuhch anite chechii ayiwepinaanuuhch.

James 1:22

Mikw nituhtamute Chishemanituu utayimuwin ekaa maak ihtuutamute, chiwiyeshihiisun. Ihtuutam taan e itashteyich.

1 Peter 2:15

Wesh eukw uyuu Chishemanituu utiteyihtamuwin, naashch chechii miyunaakuhkwaau chipimaatisiiwinawaau ekaa mitun nitamukw chechii ishi aayimuutahkwaau miywaachimuwiniyuu anichii ekaa kaa chischeyihtahkwaau taan e ishi chiishkwe ayimitwaau.

1 Peter 4:2

Ekw maak taan eshkw che ishpish pimaatisiikwe utah aschiihch namui ekw chipaa uhchi tipeyimikuu wiya taan e ishi mushteneyihtahk tipiiwe chechii itaatisiit maak uste Chishemanituu taan e ishi nituweyimikut eukw aniyuu chipaa wii nanaakatuweyihtamihiikuu chechii ihtuutahk.

Revelation 2:27

Aniyuu tipeyihchewiniyuu kaa pechi miyich Nuuhtaawiih eukw aniyuu che miikwaau kaye wiyawaau. Anite maak Chishemanituu utayimuwinihch kaa itashteyich, tekash chika uchimaahkahtuweu. Aniyuuh ekaa che nituhtaakuukwe chika piikuhweu mwehch wiyaakan tekash e piikuhiikanuuhkwaau ekun che ihtuutawaat.

Revelation 22:14

Taapwe kata shaweyihtaakusuuch anichii kaa payehchihtaatwaau uchekwaanimuwaau. Eukw uchii che tepicheyihtaakusitwaau chechii piihchetwaau aniyuu ihtaawiniyuu kaye chechii utinamaasutwaau miinishah anite uhchi aniyuuh mistikw anit wehchi ayaayich aweyuuh pimaatisiiwiniyuu.

Revelation 3:5

Chika waapaaspisuuch anichii che shaakuuchihtaawaakwenich taan che ishi kakwechihiikutwaau machi chekwaayuu. Namui nika uhchi kaasiisinahamuwaan utishinihkaasuwinawaauh anite masinahiikanihch taanit mesinaasuyich aweyuuh che ayaayich kaachiche pimaatisiiwiniyuu. Nika wiihtamuwaan anite Nuuhtaawii kaye enchil e ihtaayich niya e ihtaauch e ishi tipeyihtaakusitwaau.”