Matthew 6:13 - Chishemanituu Utayimuwin: Kaa Uskaach Testament

¹³ Ekaawii maak ituhtahiinaan anite chechii kakwechihiikuyaahch. Pechi kanuweyiminaan taan waa ishi kakwechihiikuyaahch machimanituu. Wesh chiya chitipiyeusiyin chuuchimaawin kaye chiya chitayaan suuhkaatisiiwin kaye chisteyihtaakusuwin kaachiche kaye kaachiche. Eukw maak uyuu Jesus kaa ishi chiskutamaachet che ishi ayimihaanuyich.”

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

¹³ ᐁᑳᐐ ᒫᒃ ᐃᑐᐦᑕᐦᐄᓈᓐ ᐊᓂᑌ ᒉᒌ ᑲᑴᒋᐦᐄᑯᔮᐦᒡ᙮ ᐯᒋ ᑲᓄᐌᔨᒥᓈᓐ ᑖᓐ ᐙ ᐃᔑ ᑲᑴᒋᐦᐄᑯᔮᐦᒡ ᒪᒋᒪᓂᑑ᙮ ᐌᔥ ᒋᔭ ᒋᑎᐱᔦᐅᓯᔨᓐ ᒎᒋᒫᐎᓐ ᑲᔦ ᒋᔭ ᒋᑕᔮᓐ ᓲᐦᑳᑎᓰᐎᓐ ᑲᔦ ᒋᔅᑌᔨᐦᑖᑯᓱᐎᓐ ᑳᒋᒉ ᑲᔦ ᑳᒋᒉ᙮ ᐁᐅᒄ ᒫᒃ ᐅᔫ ᒌᓴᔅ ᑳ ᐃᔑ ᒋᔅᑯᑕᒫᒉᑦ ᒉ ᐃᔑ ᐊᔨᒥᐦᐋᓄᔨᒡ᙮

Matthew 6:13 Iomraidhean Croise

Matthew 26:41

Yaakwaamiikw kaye ayimihaakw ekaa chechii shaakuuchihiikuyekw kakwechihiiwewin. Wesh chitahchaahkuwaahch naashch taapwe kuiskw chiwii ihtinaawaau mikw maak chiyaasiwaahch namui mitun chisaapisiinaawaau.”

Matthew 28:20

Kaye che chiskutamuwekuch chechii nanihiihtahkwaau misiwe taan kaa itashumitakuch. Muush maak chika wiicheutinaawaau piihiim ati iskwaapayihche aschii.”

Matthew 5:37

Mikw ehe maak namui chipaa itwen, kutach maak chekwaan itweyine e nituweyihtaman chechii taapwehtaakuyin, machimanituu e ihtaat uhchipayuu.”

Matthew 6:10

Nitayimihaanaan kaye chuuchimaawin che utihchipayihch, kaye chititeyihtamuwin chechii ihtuutaakanuuhch utah aschiihch muyaam e ishi ihtuutaakanuuhch anite kihchikiishikuhch.

John 17:15

Namui wii chinitutamaatin chechii utinatwaau utah aschihch uhchi, chinitutamaatin chechii kanuweyimatwaau ekaa chechii pischeyimikutwaau machimanituuh.

1 Corinthians 10:13

Misiwe e ishi kakwechihiikuyihkw, ekun e ishi kakwechihaakanuut misiwe awen. Mikw maak Chishemanituu kuiskw ihtuu. Namui chika uhchi pachishtinikunuu paashich chechii ishi kakwechihiikuuhkw ekaa chii ishikaapuushtamuhkw kakwechihiiwewin. Anit aniyuu mekwaach e kakwechihiikuuhkw chika waapahtiikunuu Chishemanituu taanite chechii uhchi shaapushkamihkw an kakwechihiiwewin. Eukw uyuu e ishi wiichihiitahkw ekaa chechii shaakuuchipitikuuhkw aniyuu taan e ishi kakwechihiikuuhkw.

1 Corinthians 14:16

E maamihchimat Chishemanituu e kweschayimiyin, kutak awen ekaa eshkw uhchi miyaakanuut ahchaahkuu miiwewinh namui chika chii wiichihiikw e maamihchimat Chishemanituuh wesh namui chika uhchi nisituhtaakw.

2 Corinthians 1:20

Chishemanituu aapachiheu Jesus cheshtinaash chechii ihtuutahk taan kaa itwet che ihtuutahk kaye che ati chisteyihtaakuhaakanuut.

Galatians 1:4

Jesus tekash chii pachishteyimisuu chechii nipahaakanuut chechii wiihkuchihiitahkw taan e ishi tipeyimikuuhkw machaatisiiwiniyuu anuhchiish taan e ishi ihtakuniyich utah aschiihch. Eukw uyuu kaa ishi nituweyihtamiyich Kuuhtaawinuuh Chishemanituuh chechii ihtit.

1 Thessalonians 1:10

eyuu maak e ashuwaapamekw Chishemanituuh Ukusiyuuh miin kaau chechii takushiniyich kihchikiishikuhch uhchi. Eukw uyuuh Ukusisa kaa wanishkaanaat nipuwinihch uhchi. Eukw maak uu Jesus kaa pimaachihiitahkw ekaa chechii waweshihiikuuhkw Chishemanituuh wiyaaskunicheu chiishikaayiche.

2 Thessalonians 3:3

Tepicheyihtaakusuu maak Utipeyihchikeu chechii taapweucheyimaakanuut. Chika ihtuutaakuwaau chechii suuhchikaapuwekw neshta chika miyu kanuweyimukuwaau ekaa chechii wanaachihiitaakw machimanituu.

1 Timothy 1:17

Ekw maak kaachiche katawii chisteyimaakanuu kaye wiya maauch katawii chisteyihtaakuhaakanuu an kaachiche kaa chisheuchimaaut, an ekaa nihtaa che nipit, ekaa kaa nuukusit kaye an mikw payekut Chishemanituu. Amen.

Hebrews 11:36

Kutakach chii wausinuwaakanuuch e maayeyimaakanuutwaau anite e mihchetinaanuyich, kaye chii kusiihkuwaakanuuch kaye wawaach chii mamechimaapiskuhwaakanuuch anite chipahuutuukamikuhch.

1 Peter 5:8

Muush yaakwaamiishtuwaahkw machimanituu, an muush kaa wii naanituu machipayihiikuyekw, wesh muyaam mistatim muush kaa papaamuhtet e papaanemut e naanituu miichisut ekun e ishinaakusit. Machimanituu muush naanituuweyimeu aweyuu chechii wanaachihaat.

2 Peter 2:9

Cheshtinaash kaschihtaau Chishemanituu chechii wiihkuchihaat ukuiskutaatisiiu taan e ishi nachishkamiyich kaye maak nanaakataweyihtamihiikuu wesh Chishemanituu taan e ishi machaatisiinaanuyich e chischeyihtahk peyakwaau e chiishikaayich misiwe aweyuu che wiyaaskunaat.

1 John 3:8

An awen kaa machipimaatisiit machimanituu kaa iteyihtaakusiyich iteyihtaakusuu. Wesh machimanituu muush chii pechi machituutam. Chishemanituu maak Ukusisa chii pechi takushiniyuu utah aschiihch chechii wanaachihtaawaayich misiwe utaapatisuwiniyuu machimanituu.

Revelation 1:18

Eukw niya kaa pimaatisiit. Nichii nipin mikw maak anuhchiish kaachiche nipimaatisiin. Niya nuuchimaahkahten nipuwin kaye niya nuuchimaawin anite e ihtaatwaau anichii kaa nipitwaau.

Revelation 19:1

Miin kaa ishi waapahtiikuyaan chekwaan. Nichii pehten mwehch naashch e mihchetuwetahkwaau awenichii anite kihchikiishikuhch e uhtahtewetahkwaau e itihtaakuhch. Naashch chii chisheweuch e itwetwaau, “Maamihchimaahkw Chishemanituu. Wiya eukw kaa pimaachihiitahkw. Naashch taapwe chisteyihtaakusuu kaye naashch suuhcheyihtaakusuu.

Revelation 19:4

Anichii maak niistanuu neu kaa chisteyihtaakusitwaau chisheinuuch ekw maak anichii kaa neutwaau kaa pimaatisiitwaau awenich chii uchihchiihkunapayistuweuch kaye chii ati nuuchiishtuweuch Chishemanituu, aniyuu kaa apiyich anit chisheuchimaau tehtapuwinihch. Chii iteuch, “Maamihchimaataau Chishemanituu. Amen.”

Revelation 2:10

Ekaawii kushtaachikw taan che ishi nanehkaateyimuyekw. Machimanituu chika kakwechihiikuwaau e ihtuutaataakw pasch chechii chipahukuwekw chipahutuukamikuhch. Mitaahtw chiishikaauh chika ishpish nanehkaateyimunaawaau. Ekaawii maak puuniikw e taapweyimiyekw aat wii nipahiikuyekwe. Ekw maak che kaaniyuwiyekw chisheuchimaau astutin eukuu kaachiche pimaatisiiwin.”

Revelation 21:4

Chika kaasiichaapahweu maak tahtwaau e uhchikuwaapiyich. Namui ekw kata uhchi ihtakuniyuu nipuwiniyuu maak misimeyihtamuwiniyuu. Namui kaye ekw kata uhchi ihtakuniyuu maatuuwiniyuu maak e wiisacheyihtaakanuyich. Wesh misiwe an weskach kaa ispayihch chekwaan namui shaash ihtakun.”

Revelation 3:10

An e chii siipiiwesiyekw taan e ishi nachishkamekw muyaam kaa itashumitakuch chechii ihtiyekw, chika kanuweyimitinaawaau anit mekwaach pimipayihche e aayimuhutwaau awenichii, anit mekwaach che nituu chischeyimaakanuutwaau misiwe awenichii utah aschiihch kaa ihtaatwaau.

Revelation 3:14

Miin maak nichii itikuun. Eukw uyuu itasinahamuu an enchil kaa naanaakachihaat umaamuuayimihaauh Laodiceahch kaa ihtaayich. “Eukw uyuu e itwet an anit wehchi cheshtinaateyihtaakuniyich misiwe taan e itwet Chishemanituu che ihtuutamaachet kaye che ihtit, an kuiskw kaa ihtit e wiihtahk taan nihaau e iteyihtaakusiyich Chishemanituuh, aniyuuh kaa aapachihaat Chishemanituu misiwe chekwaayuu kaa ushihtaat.

Revelation 5:13

Ekw kaa pehtuukwaau misiwe awenich anite kihchikiishikuhch kaye misiwe awenich kaye awesiishach aschiihch kaye anite nipiihch kaye misiwe e ispichiskamikaayich aschiihch kaa ihtaatwaau e nikamutwaau, uyuu e itwetwaau, “An awen kaa apit anit chisheuchimaau tehtapuwinihch kaye an Maanishchaanish kaachiche chika shaweyimaakanuuch kaye chika chishtaachimaakanuuch kaye chika chisteyihtaakuhaakanuuch kaye chika suuhkaatisiyuuch kaachiche kaye kaachiche.”