Matthew 5:45 - Chishemanituu Utayimuwin: Kaa Uskaach Testament

⁴⁵ ekw maak che ukusitutaataakw an Kuuhtaawaau anite kihchikiishikuhch kaa ihtaat. Wesh taapishkun miyeu aniyuuh kaa machituutamiyich kaye kaa miyutuutamiyich chechii waashtenamaakuyich piisim, kaye taapishkun miyeu e chimuuniyich aniyuu kaa miyutuutamiyich kaye aniyuu kaa machituutamiyich.

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

⁴⁵ ᐁᒄ ᒫᒃ ᒉ ᐅᑯᓯᑐᑖᑖᒄ ᐊᓐ ᑰᐦᑖᐙᐤ ᐊᓂᑌ ᑭᐦᒋᑮᔑᑯᐦᒡ ᑳ ᐃᐦᑖᑦ᙮ ᐌᔥ ᑖᐱᔥᑯᓐ ᒥᔦᐤ ᐊᓂᔫᐦ ᑳ ᒪᒋᑑᑕᒥᔨᒡ ᑲᔦ ᑳ ᒥᔪᑑᑕᒥᔨᒡ ᒉᒌ ᐙᔥᑌᓇᒫᑯᔨᒡ ᐲᓯᒻ, ᑲᔦ ᑖᐱᔥᑯᓐ ᒥᔦᐤ ᐁ ᒋᒨᓂᔨᒡ ᐊᓂᔫ ᑳ ᒥᔪᑑᑕᒥᔨᒡ ᑲᔦ ᐊᓂᔫ ᑳ ᒪᒋᑑᑕᒥᔨᒡ᙮

Matthew 5:45 Iomraidhean Croise

Matthew 5:9

Shaweyihtaakusuuch anichii kaa miyupayihaatwaau aweyuu e machipayihkahtaatuyich, wesh Chishemanituu utawaashiimh chika ishinihkaataakanuuch.

Luke 6:35

Maaute chipaa ihtin, chipaa saachihaauch anichii kaa macheyimiskwaau, kaye chipaa miyutuutawaauch, chipaa miyaauch kaye chekwaayuu e ishi nituweyihtamaaskwaau. Namui chipaa uhchi pukuseyihten miin chechii chiiwemiikuyin, che mishaach maak chitipahamaakusiiwin. Kaye maak uu ihtuutamane chika nuukun e utawaashiimitutaask Chishemanituu, maauch kaa ispeyihtaakusit. Wesh miyutuutaweu misiwe aweyuu aat aniyuu ekaa kaa nanaaskumuyich kaye aniyuu kaa machihtwaayich.

John 13:35

Saachihiituyekwe maak ekut che uhchi chischeyimakuyekw e uchischinuhamuwaakanitutaatakuch.”

ᐊᐸᔅᑕᓚᒡ 14:17

Yaapach maak Chishemanituu muush chii chischeyihtamiheu iinuu taan e iteyihtaakusit aniyuu uhchi taan kaa ishi miyutuutahk, mwehch kaye chiyawaau chichii ihtuutamaakuwaau chechii chimuuniyich chechii uhchi nihtaauchiniyich miichimiyuu. Chichii miikuwaau miichimiyuu kaye chitihtuutaakuwaau chechii miyeyihtamekw.” Eukw uyuu kaa itaat Paul aniyuu iinuu e wii nikaahwaat aniyuu e wii nuuchiishtaakutwaau.

Ephesians 5:1

Suuhk wii nispituwaahkw Chishemanituu taan e iteyihtaakusit, wesh eukw chiyawaau utawaashiimh kaa saachihaat.

Philippians 2:15

Wesh eukw uu chipaa ishi pimaatisiinaanuu e utawaashiimitutaatahkw Chishemanituu utah aschiihch mekwesiinuu kaa machaatisiitwaau e ihtaatwaau e ihtaayihkw. Ekw maak namui kata uhchi ihtakuniyuu taan chechii ishi ataameyimitahkw awen kaye mitun chika payehchinaakunh chipimaatisiiwinuuh. Mwehch achahkushach e chihkaashtuwetwaau e tipiskaayich ekun chipaa ishi waashtuwenaanuu uta aschiihch.

1 John 3:9

An awen Chishemanituu kaa pimaachihiikut puuniyuu e machituutahk. Wesh Chishemanituu ihtuutaakuu chechii iteyihtaakusit Chishemanituu e iteyihtaakusiyich. Namui maak chii machituutam Chishemanituuh e chii pimaachihiikut.