Matthew 5:18 - Chishemanituu Utayimuwin: Kaa Uskaach Testament

¹⁸ Wii chischisikw, che ishpish ihtakunikwe kihchikiishikw kaye aschii, namui waawaach an maauch e apishaashich e masinaatech wiishuwewinihch chika uhchi paashikunaakun, paatish misiwe chii ispayihche taan e itashtech che ispayihch.

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

¹⁸ ᐐ ᒋᔅᒋᓯᒄ, ᒉ ᐃᔥᐱᔥ ᐃᐦᑕᑯᓂᑴ ᑭᐦᒋᑮᔑᒄ ᑲᔦ ᐊᔅᒌ, ᓇᒧᐃ ᐙᐙᒡ ᐊᓐ ᒫᐅᒡ ᐁ ᐊᐱᔖᔑᒡ ᐁ ᒪᓯᓈᑌᒡ ᐐᔓᐌᐎᓂᐦᒡ ᒋᑲ ᐅᐦᒋ ᐹᔑᑯᓈᑯᓐ, ᐹᑎᔥ ᒥᓯᐌ ᒌ ᐃᔅᐸᔨᐦᒉ ᑖᓐ ᐁ ᐃᑕᔥᑌᒡ ᒉ ᐃᔅᐸᔨᐦᒡ᙮

Matthew 5:18 Iomraidhean Croise

Matthew 10:15

Chiwiihtamaatinaawaau, iskutak wiyaaskunicheu chiishikaache Chishemanituu uste chika chistimaacheyimeu aniyuu kaa machaatisiyich anit kaa ihtaayich Sodom ekw maak Gomorrah ishpishaat aniyuuh aweyuuh ekaa kaa naheyimitaakw.”

Matthew 10:23

Nanehkaachihiikuyekwe peyakw ihtaawin, ushimukw ekw anite kutach ihtaawin che ituhteyekw. Chiwiihtamaatinaawaau, namui eshkw misiwe chika uhchi ishi waawiihtenaawaau miywaachimuwin anite aniyuu ihtaawin Israelihch kaa ihtakuhkwaauh, shaash che takushihk Iinuu Ukusisa.”

Matthew 10:42

Chiwiihtamaatinaawaau, aat mikw minihaate awen e tahchikamiyich nipiiyuu uyuu peyakw apishtawaasha aniyuu uhchi e pechi nuushuushkuyich, chiwiihtamaatinaawaau cheshtinaash chika miskam utipahamaakusiiwin.”

Matthew 11:11

Chiwiihtamaatinaawaau, tahtu awenichii kaa pimaatisiitwaau namui uste iteyihtaakusuuch taan e iteyihtaakusiyich John siikahaahtaacheu. Yaapach maak an taan maauch nuuhtaash kaa iteyihtaakusit kihchikiishikw chisheuchimaawinihch uste wiya chisteyihtaakusuu ishpishaat Johna.

Matthew 13:17

Chiwiihtamaatinaawaau, anite pechi chii mihchetuuch uchischiwehiichesuuch kaye chii mihchetuuch ukuiskutaatisiiuch e chii pukuseyihtahkwaau chechii waapahtahkwaau taan e ishi waapahtamekw namui maak uhchi waapahtamuch kaye chii pukuseyihtamuch chechii pehtahkwaau taan e ishi pehtamekw, namui maak uhchi pehtamuch.”

Matthew 16:28

Chiwiihtamaatinaawaau, taapwe e ihtaatwaau utah awenichii eshkw che pimaatisiitwaau iskutak utihchipayihche che takushiniyich Iinuu Ukusisa che pechi chisheuchimaawiyich.”

Matthew 17:20

Ekw Jesus kaa itaat, “Kiipaa an ekaa ishpishaach chitaapwehtamuwinawaau. Taapwe chititinaawaau aat mikw apishaashiche chitaapwehtamuwin muyaam e ishpish apishiishit shuumin mastart kaa ishinihkaasut ishpishaache, wachii chika chii itashuwaaten, ‘Nete ishi aahchikaapuu.’ Chika pishichihiikuun maak. Mikw chekwaan waa ihtuutaman chika chii ihtuuten ayaayine taapwehtamuwin.

Matthew 18:18

“Wesh taapwe chiwiihtamaatinaawaau, an chekwaan che maahkupatamuwane utah aschiihch chika maahkupitaakanuu anite kihchikiishikuhch, kaye an chekwaan che aapihkunamuwane utah aschiihch chika aapihkunakanuu anite kihchikiishikuhch.”

Matthew 18:3

Ekw kaa itwet, “Taapwe chiwiihtamaatinaawaau, chiishpin ekaa kweskaatisiyekwe ekaa iteyihtaakusiyekwe muyaam awaash e iteyihtaakusit, namui wiiskaat chika chii piihchenaawaau kihchikiishikw chisheuchimaawinihch.

Matthew 19:23

Ekw Jesus kaa itaat aniyuu uchischinuhamuwaakan, “Taapwe chiwiihtamaatinaawaau, awen kaa miisitisiit taapwe chika aayimaniyuu chechii piihchet kihchikiishikw chisheuchimaawinihch.

Matthew 19:28

Ekw Jesus kaa itaat, “Chika cheshtinaahunaawaau, iskutak Iinuu Ukusisa apiyichen chisheuchimaau tehtapuunihch miin uskaache aschii, ekw kaye chiyawaau nichischinuhamuwaakanitikw che apiyekw niishushaap uchimaau tehtapuunih, che wiyaaskunekuch niishushaap kaa itiskaanesitwaau Israel iinuuch.

Matthew 21:21

Ekw Jesus kaa itaat, “Chiwiihtamaatinaawaau, ekaa mitun che uhchi aanuwehtamuwekwe mitun che taapwehtamuwekwe, chika chii ihtuutawaawaau kaye chiyawaau taan kaa ihtuutuuk uu misishuuminaahtikw. Namayeu mikw an chekwaan chechii ihtuutamekw kaye chika chii itashuwaaten wachii, ‘Ishiwepinisuh anite chihchikamiihch.’ Chika pishichihiikuun maak.

Matthew 21:31

Taan maak yaakw anichii e niishitwaau naapeshach kaa nanihiihtuwaat uhtaawii.” Ekw Jesus kaa itikut aniyuu kaa kakwechimaat, “An ustesimaau.” Ekw Jesus kaa itaat, “Chiwiihtamaatinaawaau, anichii nitamukw kaa ihtitwaau chisheuchimaau e aapachihiikutwaau chechii maamuushtinamuwaatwaau ushuuliyaamiyuu ekw maak anichii pisikwaatisiiskweuch eukunich niishtam che piihchetwaau Chishemanituu uchisheuchimaawiniihch eshkw ekaa chiyawaau piihcheyekw.

Matthew 23:36

Ehe, chiwiihtamaatinaawaau, kaye chiyawaau anuhchiish kaa pimaatisiyekw chika aanische maahtakushkaakunaawaau taan che ishi waweshihaakanuutwaau uchii.”

Matthew 24:2

Chii iteu maak, “Chimiyunenaawaau taan kaa ishihtaakanuuhkwaau uyuu waaskaahiikan, mikw maak chiwiihtamaatinaawaau, chika utihchipayuu anit misiwe che wanaachihtaakanuuhkwaau. Namui waachi peyakw asinii chika uhchi aakwiihtuupuu kutak asinii taan aniyuu kaa itahaakanuut. Misiwe asiniich kaa ishi aapachihaakanuutwaau kaa ushihtaakanuuhkwaau uyuu waaskahiikan chika niihchiwepinaakanuuch.”

Matthew 24:47

Chihchiwe chititinaawaau, chika miikuu aniyuu uchimaam misiwe chechii naanaakachihtaawaat taan e ishi tipiyeusiyich.

Matthew 25:12

Ekw kaa itikutwaau aniyuu uschinaapewaan, ‘Chihchiwe chititinaawaau, namui chichischeyimitinaawaau.’ ”

Matthew 25:40

Ekw Chisheuchimaau kaa itaat, ‘Chiwiihtamaatinaawaau, aniyuu taan kaa ishi ihtuutawekw peyakw an niichishaan ekaa mitun kaa aapateyihtaakusit kaa iteyimaakanuut, niya chichii ihtuutuunaawaau.’ ”

Matthew 25:45

Ekw maak che itikutwaau Utipeyihchikeu, ‘Taapwe chiwiihtamaatinaawaau an ekaa uhchi wiichihekw peyakw niichishaan an ekaa mitun kaa aapateyihtaakusit kaa iteyimaakanuut, niya kaye namui chuuhchi wiichihiinaawaau.’

Matthew 5:26

Chiwiihtamaatin maak taapaa chika chii wiiwiyin anit chipahutuukamikuhch paatish mitun tekash chii chiishiihkamane an e ishi masinahiichepayin.”

Matthew 6:16

“Iskutak maak ekaa utinamekwe miichim mikw e wii ayimihaayekw, ekaawii misimeyihtaminaakuhiisukw muyaam e ihtitwaau anichii kaa ayimihehkaasutwaau. Papaamuhteuch naashch e nanehkaashinaakuhiisutwaau muyaam naashch e wawaanihkatetwaau e ishinaakuhiisutwaau chechii waapamikutwaau kaye chechii chischeyimikutwaau aweyuuh ekaa miichisutwaau mikw ushaa e ayimihaatwaau. Chiwiihtamaatinaawaau shaash mitun tekash miskamuch utipahamaakusiiwinawaau e chii ihtuutuwaakanuutwaau aniyuu taan kaa ishi nituweyihtahkwaau chechii ishi chistimaacheyimaakanuutwaau.

Matthew 6:2

“Ekw maak e miyat awen chekwaayuu e ishi nuuhtepayit, ekaawii ihtuut uu misiwe awen chechii chischeyihtahk, wesh wiyawaau anichii kaa ayimihehkaasutwaau naashch wii kaa chescheyihtaakuhuuch taan e ishi miyutuutahkwaau. Mikw e iteyihtamihiikutwaau chechii maamihchimikutwaau aweyuuh. Chiwiihtamaatinaawaau taapwe, shaash chiisaach miyaakanuuch utipahamaakusiiwinawaau.

Matthew 8:10

Iskutak maak Jesus piyehtawaat uyuu e itweyich naashch taapwe chii miskaateyihtamihiikuu utaapwehtamuwiniyuu. Ekw kaa itaat aniyuu aweyuuh kaa wiicheukut, “Aat maak ekaa Jewa itiskaanesit uu naapeu eshkw namui nuuhchi waapamaau Jewa e itiskaanesit awen utah Israelihch chechii ishpish suuhchitaapwehtahk.

Mark 10:15

Chihchiwe chititinaawaau, michihpin awen ekaa che taapweucheyihtamuwaakwe Chishemanituuh uchimaawiniyuu e ishi taapweucheyihtamiyich awaasha namui kata chii piihcheu taanite wechimaawiyich Chishemanituu.”

Mark 10:29

“Ehe, taapwe,” chii itikuu Jesus, “chiwiihtamaatinaawaau maak, an awen che nakatamukwe wiichi, maak che nakataakwe wiichishaan, wiichishaaniskwem, maak ukaawii, uhtaawii, maak utawaashiim maak che nakatamukwe unihtaauchihchikan aschii, niya uhchi kaye miywaachimuwiniyuu uhchi,

Mark 11:23

Kuiskw chiwiihtamaatinaawaau, awen chechii itashuwaatamukwe uyuu wachiyuu, pihkuchiih ekw anite chihchikamiihch che ishiwepinisuyin, ekaa maak mitun aanuwehtahke chechii ispayiyich uyeyuu, mitun taapwehtahke aniyuu kaa itwet che ispayiyich, ekun che ihtuutamuwaakanuut taan kaa ishi nitaweyihtahk.

Mark 12:43

Ekw Jesus kaa ayimihaat uchischinuhamuwaakanh. Chii iteu maak, “Chihchiwe chititinaawaau, kaa ishpish pachishtinichet an kaa peyakut iskweu kaa chistimaatisiit etituu wiya mishaayuu upachishtinichewin ishpish anichii kutakach kaa pachishtinichetwaau.

Mark 13:30

Kuiskw chiwiihtamaatinaawaau, anichii kaa pimaatisiitwaau anuhchiish namui kata uhchi mehchi nipuuch eshkw ekaa tipipayihche misiwe taan chipaa ispayuu.

Mark 14:18

Mekwaach maak e miichisutwaau Jesus chii itweu, “Chihchiwe chititinaawaau, peyakw utah e tashiyekw nika wiyeshipachishtinikw, ekut utah niyaanitam waachimiichisuumit an awen.”

Mark 14:25

Chihchiwe chititinaawaau, namui miin nika uhchi minihkwen shuuminaapuu paatish e uskaakamihch shuuminaapuu minihkweyaane anite Chishemanituu uchisheuchimaawinihch.”

Mark 14:30

Ekw Jesus kaa itaat, “Chihchiwe chititin, eshkw ekaa mechim niishwaau chistute naape pakahaahkwaan che utaakushich shaash nishtwaau chika itwen ekaa chischeyimiyin.”

Mark 14:9

Chihchiwe chititinaawaau, taanite mikw che kacheskwaanuukwe e waawiihtaakanuuhch miywaachimuwin misiwe e ispichiskamikaach uu aschii kata wiihtaakanuuyuu uyuu taan kaa ihtit e chischisiitutuwaakanuut uu iskweu.”

Mark 3:28

“Taapwe wesin chititinaawaau, kata wepeyihtamuwaakanuuch awenichii misiwe umachihtwaawinawaauh nesht taan e ishi machaayimuumaatwaau aweyuuh.

Mark 6:11

Ekaa maak wii piihtakahiikuyekwe maak ekaa wii nituhtaakuyekwe, nakatamekwe an ihtaawin che pahpuusiteshimuyekw. Eukuu che ihtiyekw e nuukuhtaayekw e ayaakwaamimekuch anichii iinuuch anit kaa ihtaatwaau.”

Mark 8:12

Jesus maak chii yahkataamuu utahchaahkuhch ekw kaa itwet, “Chekwaan wehchi nitaweyihtahkwaau iinuuch anuhchiish kaa chiishikaayich chechii waapahtiyaakanuutwaau maamishkaach waapahtiiwewiniyuu. Kuiskw chiwiihtamaatinaawaau, namui chika uhchi waapahtiikunaawaau maamishkaach waapahtiiwewin chiyawaau iinuuch anuhchiish kaa pimaatisiyekw.”

Mark 9:1

Ekw Jesus uyuu miin kaa ati itaat, “Chiwiihtamaatinaawaau, ihtaauch pasch utah mekwesiinuu awenichii ekaa che uhchi nipitwaau paatish waapahtamuwaatwaawenich Chishemanituu uchisheuchimaawiniyuu e pechi nuukuniyich suuhkaatisiiwinihch.”

Mark 9:41

Chihchiwe maak chititinaawaau, an awen che minihiikuwekwe nipiiyuu aniyuu uhchi Christ e wiichewekw, cheshtinaash kata miyaakanuu utipahamaakusiiwin.”

Luke 11:51

anite aniyaa uchischiwehiichesuu Abel kaa ishinihkaasut e uhchi chihchipayihch anite maak ishi aniyaa Zechariah taan kaa ishi nipahaakanuut. Piihtakamihch chisheayimiheukamikuhch chii nipahaakanuu Zechariah chishtauch aniyuu pachishtinicheunaapiskuyuu anit maak maauch e payehcheyihtaakuhch chisheayimiheukamikw. Ehe, chihchiwe chititinaawaau, anichii iinuuch kaa pimaatisiitwaau anuhchiish wiyawaau chika aanische maahtakushkaakuuch misiwe aniyuu taan kaa ishi wanituutawaakanuyitwaau.”

Luke 12:37

Kata shaweyihtaakusuuch maak anichii aapachihaakanich miskaakutwaawenich aniyuu uchimaamuwaauh e chii ayeskuwiishtawaatwaau. Chiwiihtamaatinaawaau maak, an uchimaau kata ayeskuwiyuu wiya kweschiipan chechii ihtuutamuwaat taan kaa ishi ihtuutamaakut ekw maak che wiishaamaat chechii miichisuyich, mechim wiya chika wiishtuweu.

Luke 13:35

Chika nakatamaakunaawaau chiichiwaauh mitun e nishuunaatahkwaau. Chiwiihtamaatinaawaau namui chika uhchi waapaminaawaau paatish utihchipayihche chechii itweyekw, Shaweyihtaakusuu an kaa pechi itishahwaakanuut chechii ayimishtamuwaat Utipeyihchikeu.”

Luke 16:17

Ekaawii iteyihtamukw ekaa shaash nituweyihtaakuhch chechii nanihiihtaakanuyich Chishemanituu uwiishuwewin. Aat aniyuu maauch ekaa iteyihtaakuniyich kaa iteyihtaakanuyich yaapach iteyihtamihiikuu Chishemanituu chechii nanihiihtaakanuyich che ishpish ihtakunikwe uu aschii kaye kihchikiishikw.”

Luke 18:17

Taapwe chiwiihtamaatinaawaau, mwehch e ishi taapwehtahk awaash taan e ishi wiihtamuwaakanuut eukun kaye chiyawaau chipaa ishi taapwehtenaawaau taan e ishi wiihtamaakuyekw Chishemanituu chisheuchimaawin ekw maak chechii piihcheyekw anite.”

Luke 18:29

“Ehe, taapwe,” chii iteu Jesus, “Misiwe awen kaa nakatahk wiichi kaye kaa nakataat wiichiskweu kaye wiichishaan kaye uniichihiikw kaye utawaashiim, Chishemanituu uchisheuchimaawiniyuu uhchi chika cheshtinaateyihtenaawaau,

Luke 23:43

Jesus kaa itaat, “Chihchiwe chititin, anuhchiish chika ihtaanaanuu Paradise, anite e miyeyihtaakuhch e ihtaanuuhch.”

Luke 4:24

Mikw maak chititinaawaau, an awen kaa uchischiwehiichesuut namui aapateyimaakanuu anit aniyuu ihtaawiniyuu kaa nihtaauchit.

John 1:51

Ekw miin kaa ati itwet, “Kuiskw chiwiihtamaatinaawaau, chika waapahtenaawaau kihchikiishikw e aapahiipayihch, ekw maak Chishemanituu utenchilamh e uhpipayitwaau kaye e pechi aashiitutuwaatwaau Iinuu Ukusisa.”

John 10:1

“Kuiskw chiwiihtamaatinaawaau, awen e chimutiskuut namui anite e ishkwaahtemuuniyich maanishchaanishikamikuyuu uhchi piihcheu. Aahchiiuh anite uhchi paastaahtawiyuu e wii piihchet.

John 10:7

Ekw maak Jesus miin kaa itaat, “Kuiskw chiwiihtamaatinaawaau, niya eukw ishkwaahtem anite wehchi piihchetwaau kaye anite wehchi wiiwiitwaau anichii maanishchaanishach.

John 12:24

Kuiskw chiwiihtamaatinaawaau michihpin ekaa anite aschiihch ashtaakanuuhche peyakumin nihtaauchihchikan namui chika uhchi nihtaauchin mikw maak ashtaakanuuhche anite aschiihch ati nipiimakahche maak ekut che uhchi nihtaauchihkwaau mihchetu nihtaauchihchikan.

John 13:16

Kuiskw chiwiihtamaatinaawaau, aapachihaakan namui wii uste iteyihtaakusuu e iteyihtaakusiyich uchimaam kaye awen kaa chihchitishahwaakanuut chechii nituu waawiihtahk chekwaayuu namui wiya uste iteyihtaakusuu e iteyihtaakusiyich aniyuu kaa chihchitishahukut.

John 13:38

Jesus kaa itaat, “Taapwe aa shaash chitayeskuwiin chechii pachishtinamin chipimaatisiiwin niya uhchi. Chihchiwe chititin, eshkw ekaa mechim chistute naapepakahaahkwaan, shaash nishtwaau chika nanatayin e itweyin ekaa chischeyimiin.”

John 14:12

Kuiskw chiwiihtamaatinaawaau, an awen kaa pechi taapweyimit chika ihtuutam taan e ishi ihtuutamuch kaye maak etituu maamishkaach chekwaayuuh chika ihtuutam wesh anite Nuuhtaawii e ihtaat nika ihtaan niya.

John 16:20

Kuiskw e wiihtamaatakuch chika maatunaawaau kaye chika nanehkateumunaawaau. Ekw uchii utah aschiihch kaa ihtaatwaau ekaa kaa nanaakatuweyimaatwaau Chishemanituuh upimaatisiiwiniwaahch chika sichiyesuuch. Chika misimeyihtenaawaau chiyawaau. Mikw maak an e misimeyihtamekw chika kweschipayuu teyakuch chechii muuchicheyihtamekw.

John 16:23

“Utihchipayihche maak uu kaa ishi aayimuutamaatakuch namui chekwaan chika uhchi nitutamuunaawaau. Kuiskw e wiihtamaatakuch mikw taan che ishi nituweyihtamuwekw Uhtaawiimaau nitishinihkaasuwin e aapachihtaayekw chika miikuwaau.

John 21:18

Kuiskw chiwiihtamaatin, eshkw e chii uschiniichiiwiin mikw taan waa aihtiin chichii ihtin kaye mikw taanite waa ituhteyin ekute kaa ituhteyin. Iskutak maak chisheinuuyine, suwanischeyine maak chika maahkupitaakanuu chitihchii ekw che ituhtahiikuyin anite ekaa wii ituhteyin.”

John 3:11

Kuiskw chiwiihtamaatin. Nitaayimuutenaan taan e ishi chischeyihtamaahch kaye taan kaa ishi waapahtamaahch namui maak yaapach waachipeyakw chiwii taapwehtuunaan.

John 3:3

Jesus kaa itaat, “Kuiskw chiwiihtamaatin, namui awen chika chii waapahtamuweu Chishemanituu uchisheuchimaawiniyuu paatish miin pimaatisiite.”

John 3:5

Jesus kaa itaat, “Kuiskw chiwiihtamaatin, namui awen chika chii piihcheu Chishemanituu uchisheuchimaawiniihch paatish nipiihch kaye Ahchaahkuwinihch uhchi pimaatisiite

John 5:19

Jesus maak chii iteu, “Kuiskw chiwiihtamaatinaawaau, Ukusisimaau namui mikw wiya chika chii ihtuutam chekwaayuu. Uhtaawiimaauh kanawaapameu chekwaayuu e ihtiyich kaye wiya maak ekun e ati ihtit. Mikw taan e ihtiyich Uhtaawiih ekun e ihtit kaye wiya Ukusisimaau.

John 6:26

Jesus kaa itaat, “Kuiskw chiwiihtamaatinaawaau, namui mikw an e chii waapamiyekw maamishkaach waapahtiiwewinh e ihtuutamaan wehchi pechi naanituwaapamiyekw. An e chii muwekw aaihkunaau kaye e chii chiishpuyekw ekun wehchi naanituuwaapamiyekw.

John 6:32

Jesus kaa nishkweushihaat e itaat, “Kuiskw chiwiihtamaatinaawaau, aniyuu aaihkunaau Moses kaa miitaakw namui anite kihchikiishikuhch uhchi uhchipayuuh. Chishemanituu, Nuuhtaawii eukw an maayitaakw aniyuu chihchiwe aaihkunaau kihchikiishikuhch kaa uhchipayihch.

John 6:47

Kuiskw chiwiihtamaatinaawaau, an awen kaa pechi taapweyimit ayaau kaachiche pimaatisiiwiniyuu.

John 6:53

Jesus kaa itaat, “Kuiskw chititinaawaau, namui chika chii ayaanaawaau kaachiche pimaatisiiwin ekaa miichuwekwe Iinuu Ukusisa wiyaas kaye ekaa minihkwewekwe umihkw.

John 8:34

Jesus kaa ishi nishkweushihaat e itaat, “Kuiskw chiwiihtamaatinaawaau, misiwe awen kaa machituutahk tipeyimikuu aniyuu taan e ishi machituutahk.

John 8:51

Kuiskw chiwiihtamaatinaawaau, an awen che nanihiihtamukwe taan e iteuch namui wiiskaat kata uhchi nipuu.”

John 8:58

Jesus kaa itaat, “Kuiskw chiwiihtamaatinaawaau, eshkw ekaa uhchi pimaatisiit Abraham, shaash nichii ihtaan.”

1 Peter 1:25

Mikw maak Utipeyihchikeu utayimuwin kaachiche ihtakuniyuu. Uu maak ayimuwin eukuu miywaachimuwin kaa waawiihtamaakuyekw.

Revelation 20:11

Ekw kaa waapahtamaan e mishaach chisheuchimaau tehtapuwin. Chii waapaau an tehtapuwin. Nichii waapamaau maak an awen kaa apit anit. Misiwe chiishikw ekw maak aschiiyuu chii ati paasikunaakuniyuuh uhchishkuu e ihtaat. Namui maak miin uhchi ihtakuniyuuh.