Matthew 27:2 - Chishemanituu Utayimuwin: Kaa Uskaach Testament

² Iskutak maak kaa mamechimaapihkaatamuwaatwaauh utihchiiyuuh, ekw kaa chistuhtahaatwaau. Anite maak aniyuu Rome chisheuchimaau aapachihaakan Pilate kaa ishinihkaasuyich e ihtaayich ekute kaa ituhtahaatwaau.

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

² ᐃᔅᑯᑕᒃ ᒫᒃ ᑳ ᒪᒣᒋᒫᐱᐦᑳᑕᒧᐙᑣᐤᐦ ᐅᑎᐦᒌᔫᐦ, ᐁᒄ ᑳ ᒋᔅᑐᐦᑕᐦᐋᑣᐤ᙮ ᐊᓂᑌ ᒫᒃ ᐊᓂᔫ ᕎᒻ ᒋᔐᐅᒋᒫᐤ ᐋᐸᒋᐦᐋᑲᓐ ᐹᐃᓚᑦ ᑳ ᐃᔑᓂᐦᑳᓱᔨᒡ ᐁ ᐃᐦᑖᔨᒡ ᐁᑯᑌ ᑳ ᐃᑐᐦᑕᐦᐋᑣᐤ᙮

Matthew 27:2 Iomraidhean Croise

Matthew 20:19

Ekw maak miin anite aniyuu ekaa Jewa kaa itiskaanesiyich e ihtaayich che ituhtahaatwaau chechii maayeyimaakanuyich kaye chechii pishishtehwaakanuyich kaye chechii chiistaaskuhwaakanuyich. Mikw maak chii nishtu chiishikaayiche kaau chika wanishkaau.”

Matthew 28:14

Pehtahke maak uyuu an chisheuchimaau, nika shaakuuchimaanaan ekaa chiyawaau chechii ataameyimikuyekw, chika miyupayihiitinaan ekaa wiyesh chechii ihtuutaakuyekw.”

Luke 13:1

An maak mekwaach chii ihtaauch anit iinuuch e chii wiihtamuwaatwaau Jesus taan kaa ihtuutawaakanuyich pasch iinuu Galilee aschiihch kaa uhchiyich. Chisheuchimaaukuuhpaaneu Pilate e ishinihkaasut e chii nipahaayich aniyuu iinuuh mekwaach e chii wii machishtawehamuwaatwaau Chishemanituu anichii iinuuch aniyuu awesiisa kaa nipahaatwaau.

Luke 20:20

Ekw mikw kaa naanaakachihtaatwaau che ishpish miyupayich chechii maakunaatwaau. Chii itishahweuch maak naapeuh anite Jesus e ihtaayich memehch chechii ishi kakwechimaatwaau, e wii naanituu pisiiwiyaatwaau chechii itweyich chekwaayuu chechii uhchi maakunaatwaau. Ekw maak chii maakunaatwaawenich ekw anite chipaa ituhtaheuch Rome chisheuchimaau e ihtaayich, aniyuu chipaa wiyaaskunikuyuu.

Luke 23:1

Misiwe maak maamuu e tashitwaau chii ituhtaheuch Jesus anite Rome chisheuchimaau e ihtaayich, Pilate kaa ishinihkaasuyich.

Luke 23:12

Ekut maak anit iskunaak kaa uhchi wiichewaakanitutaatutwaau Herod ekw maak Pilate wesh anite utaahch chii uhkaatituuch.

Luke 3:1

Aniyuu pepuniyich niyaayinushaap pipunh kaa ishpish chisheuchimaaut Tiberius kaa ishinihkaasut, Pontius Pilate mekwaach chii niikaanishkaacheu anite Judea aschiihch ekw Herod anite Galilee aschiihch kaa niikaanishkaachet ekw wiichishaan Herod, Philip kaa ishinihkaasuyich anite chii niikaanishkaacheyuu Iturea kaye Trachonitis kaa ishinihkaatekwaauh aschii. Ekw Lysanias kaa niikaanishkaachet anite Abilene kaa ishinihkaateyich aschiiyuu.

John 18:12

Anichii maak shimaakanishach ekw maak aniyuu uchimaamuwaauh kaye maak anichii Jewa kaa itiskaanesitwaau kaa maakunawesuutwaau chisheayimiheukamikuhch, chii maakuneuch aniyuuh Jesus kaye chii maahkupiteuch.

John 18:24

Ekw Annas kaa itishahwaat aniyuu Jesus anite Caiaphas chisheayimiheuchimaau e ihtaayich eshkw e maahkupisuyich.

John 18:28

Wiipach aniyuu kaa chechishepaayaayich anit Caiaphas e ihtaayich chii uhchi chistuhtahaakanuu Jesus, anite chisheuchimaaukuuhpaaneu wiichihch kaa ituhtahaakanuut. Pilate chii ishinihkaasuu an chisheuchimaaukuuhpaaneu. Anichii maak Jewa iinuuch namui uhchi wii piihcheuch wiyawaau anite wesh chii itashteyuu uchuuwa wiishuwewiniwaahch ekaa chechii piihchetwaau wiichiihch aweyuu ekaa Jewa itiskaanesiyich. Kaye namui chipaa uhchi miichuuch miyaaskacheu makushaaniyuu chii piicheuwaakupanenich anite chisheuchimaaukuuhpaaneu wiichiihch.

ᐊᐸᔅᑕᓚᒡ 12:6

Aniyuu maak maahchishtai tepiskaayich che ihtaat Peter anite chipahutuukamikuhch chistuuch niishu shimaakanisha e ihtaayich chii nipaau. Aniyuu maak waapaniyiche ekw chipaa wiyaaskunaakanuu. Niishwaapech maak upuuchishiyaapii chii maahkupitaakanuu. Kaye chii ihtaayuuh shimaakanisha e kanuushkuwaahtaweyich.

ᐊᐸᔅᑕᓚᒡ 21:33

Ekw an nitupayuuchimaau kaa nituwaapamaat aniyuu Paul ekw kaa maakunaat. Kaa itashuwet chechii maahchikwaapihkaataakanuyich, niishu puuchisiyaapiih e aapataniyikwaauh. Ekw kaa itwet, “Chekw naapeu uu, taan kaa ihtit.”

ᐊᐸᔅᑕᓚᒡ 22:25

Iskutak maak kaa wiyaapihkaataatwaau che papasistehwaatwaau, an shimaakanishuuchimaau chii ishi kakwechimikuu aniyuu Paul, “Kuiskunaakun aa chechii papasistehwekw awen Rome e ishi masinaasut kaye ekaa eshkw uhchi wiyaaskunaakanuut.”

ᐊᐸᔅᑕᓚᒡ 22:29

Piyehtahkwaau maak uyuu e itweyich Paul anichii kaa wii nituu chischeyimaatwaau taan kaa ishi wanituutamiyich chii ati ashaakaapuuch. Ekw an nitupayuuchimaau kaa sasechisit iskutak chescheyimaat Paul taapwe Rome e itasinaasuyich, kaye maak aniyuu e chii maahkupitaat upuuchishiyaapiih e aapachihtaat.

ᐊᐸᔅᑕᓚᒡ 24:27

Niishu pipunh maak ishpish ekw kutak aweyuu kaa miiskuchishkaakut an chisheuchimaau Felix. Porcius Festus chii ishinihkaasuyuuh aniyuu kaa miiskuchishkaakut. Ekw maak Felix mikw e wii nanihiiwehaat aniyuu Jewa iinuuh ekut anit chipahutuukamikuhch kaa nakataat aniyuuh Paul.

ᐊᐸᔅᑕᓚᒡ 28:20

Eukw uu wehchii wiishaamitakuch. Chichii wii wiihtamaatinaawaau chekwaan wehchi maakunikuyaan, eukw uu e atushkuuk Christ aniyuu Israel iinuuch kaa aspeyimutuwaatwaau.”

ᐊᐸᔅᑕᓚᒡ 3:13

Aniyuuh Chishemanituuh kaa atushkuwaatwaau aniyehkaanaanich, Abraham, Isaac kaye Jacob kaye utaahch kuuhtaawiinuuch chisteyihtaakuheu aniyuu utaapachihaakanh, eukw uyuuh Jesus. Chiyawaau maak chichii ihtuutuwaawaau chechii pachishtinaakanuut anite Rome Chisheuchimaau e ihtaayich. E chii aatuwaahekw uhchishkuu Pilate e ihtaayich, aat iskutak Pilate kaa wii pachishtinaat.

ᐊᐸᔅᑕᓚᒡ 4:27

Eukun maak taapwe e ispayihch anuhchiish wesh chisheuchimaau Herod, kaye an uchimaau Pontius Pilate, ekw maak anichii Jewa iinuuch, kaye maak anichii ekaa Jewa kaa itiskaanesitwaau nishtuwiyuuch e nishkuushtuwaatwaau Jesus, aniyuu kaa wiyaapamaat kaa payehchisiyich chitaapachihaakanh.

ᐊᐸᔅᑕᓚᒡ 9:2

kaa nitutamuwaat chechii miikut masinahiikaniyuu chechii waapahtiyaat aniyuu kaa niikaanishkuwaayich Jewa ayimiheuchimaau anit Damascus kaa ihtaayich e wiihtaakuniyich anit e miyaakanuut chechii maakunaat iskweu kaye naapeu kaa taapweyimaayich Jesus, kaye kaau chechii chiiwehtahaat anite Jerusalemihch.

1 Timothy 6:13

Chishemanituu chii pachishtinam misiwe chekwaayuu kaa pimaatisiimakaniyich. Christ Jesus tekash chii chischeyihtaakuhuu awen wii anit kaa uhchishkuukaapuushtawaat Pontius Pilate. Taapishkun Chishemanituu ekw maak Christ Jesus e pehtuutwaau, uu chiwiishi siihchimitin,

2 Timothy 2:9

Wesh e waawiihtamaan uu miywaachimuwin eukuu wehchi nanehkaateyimuyaan, kaye mwehch awen e chii wanahpisut kaa chii maamaahchikwaapiskahwaakanuut ekun e ihtuutaakuyaan, mikw maak namui chika chii maamaahchikwaapiskahiikanuuyuu Chishemanituu utayimuwin.

Hebrews 13:3

Maamituneyimaahkuch anichii awenichii chipahutuukamikuhch kaa ihtaatwaau. Muyaam kaye chiyawaau e ihtaayekw anite aniyuu kaa ihtaatwaau chechii ishi maamituneyihtamekw. Maamituneyimaahkuch kaye anichii kaa nanehkaachihaakanuutwaau muyaam kaye chiyawaau e nanehkaachiihiikuyekw mwehch wiyawaau e ishi nanehkaachihaakanuutwaau chechii iteyihtamekw.