Matthew 24:5 - Chishemanituu Utayimuwin: Kaa Uskaach Testament

⁵ Wesh chika mihchetuuch awenichii e takushihkwaau nitishinihkaasuwiniyuu e aapachihtaatwaau e itwetwaau, ‘Eukw niya Christ.’ Mihchetu maak aweyuu chika wiyeshimeuch.

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

⁵ ᐌᔥ ᒋᑲ ᒥᐦᒉᑑᒡ ᐊᐌᓂᒌ ᐁ ᑕᑯᔑᐦᒀᐤ ᓂᑎᔑᓂᐦᑳᓱᐎᓂᔫ ᐁ ᐋᐸᒋᐦᑖᑣᐤ ᐁ ᐃᑗᑣᐤ, ᐁᐅᒄ ᓂᔭ ᙭᙮ ᒥᐦᒉᑐ ᒫᒃ ᐊᐌᔫ ᒋᑲ ᐎᔦᔑᒣᐅᒡ᙮

Matthew 24:5 Iomraidhean Croise

Matthew 24:11

Mihchetu machi uchischiwehiichesuuch chika takushinuuch che wiyeshihaatwaau aweyuuh, mihchetu maak aweyuu chika ihtuutaweuch chechii puuniyich e taapwehtamiyich.

Matthew 24:24

Kata ihtaauch awenichii e wiyeshihiiwetwaau e itwetwaau niya Christ. Kata ihtaauch kaye machi uchischiwehiichesuuch. Eukunich maak uchii nanaahkuu maamishkaach waapahtiiwewinh che waapahtiiwetwaau kaye kata ihtuutamuch e maamishkaateyihtaakuniyikwaauh chekwaayuuh. Ekut maak che uhchi wiyeshihaatwaau aweyuu nitamukw chechii ishi taapwehtamiyich. Aniyuuh maak Chishemanituu kaa wiyaapamaayich aweyuuh eukunh aniyuuh che wii wiyeshihaatwaau.

John 5:43

Nichii takushin utah aschiihch Nuuhtaawii e chii pechi itishahuut yaapach maak namui chitaapateyiminaawaau. Kutak awen chii takushinit ekaa Chishemanituu uhchi pechi itashuwaat chipaa Nituhtaawawaau wiya.

John 8:24

Chichii wiihtamaatinaawaau che nipiyekw e chichishkamekw chimachaatisiiwinawaauh. Ekun maak taapwe che ishi nipiyekw e chichishkamekw chimachaatisiiwinawaauh, ekaa taapwehtamekwe eukun an niya taapwe e aawiyaan.”

John 8:28

Ekw Jesus kaa itaat, “Iskutak chiistaaskuhwekwe Iinuu Ukusisa ekw che chischeyimiyekw eukw niya e aawiyaan. Chika chischeyihtenaawaau kaye ekaa ihtuutamaan chekwaan paatish kaa itashumit Nuuhtaawii chechii ihtuutamaan. Mikw aniyuu taan e itashumit uhtaawiimaau chechii wiihtamuch eukw aniyuu che wiihtamuch.

1 John 2:18

Awaashitikw, eukw uyuuh maahchishtai e chiishikaakwaauh. Chichii wiihtamaakunaawaau che takushihk an awen kaa suuhcheyimututawaat Christ. Shaash maak mihchetu awen Christ kaa wii suuhcheyimututawaat chii takushinuu. Ekut maak wehchi chischeyihtamuhkw eukw uyuuh e maahchishtai chiishikaakwaauh.

1 John 2:22

Awen maak an kaa nanatait. Eukw kiipaa an kaa aanuwehtahk Jesus e aawiyich Christ. Eukuu kaa suuhcheyimututawaat Christ, taapishkun Uhtaawiimaau ekw maak Ukusisimaau kaa aataweyimaat.

1 John 4:3

Ekw an awen kaa itwet ekaa taapweyimaat Jesus namui Chishemanituuh Utahchaahkuyuuh aapachihiikuu. Piihchishkaakuu aniyuu Ahchaahkwa kaa suuhcheyimututawaat Christ. Chichii pehtenaawaau che ihtakuhch uu e iteyihtaakusinaanuuhch. Shaash maak ihtakun utah aschiihch uu e iteyihtaakusinaanuuhch.

Revelation 13:8

Ekw maak misiwe awen aschiihch kaa ihtaat chika nuuchiishtuweu aniyuu machi awesiisa. Mikw anichii pimaatisiyuu masinahiikanihch kaa masinaateyikwaau utishinihkaasuwinawaau, aniyuu masinahiikaniyuu taanit kaa masinaasutwaau awenichii eshkw ekaa uhchi usihtaakanuuhch aschii, eukunich anichii namui uhchi nuuchiishtuweuch aniyuu machi awesiisa. Uu maak masinahiikan an Maanishchaanish kaa nipahaakanuut tipeyihtam.