Matthew 23:15 - Chishemanituu Utayimuwin: Kaa Uskaach Testament

¹⁵ “Chekwaan chika ishi machipayinaawaau chiyawaau wiishuwewin kaa chiskutamaacheyekw ekw maak chiyawaau Phariseech mikw kaa ayimihehkaasuyekw. Misiwe e ispichiskamikaach uu aschii chitituhtenaawaau peyakw awen chechii ihtuutawekw chechii taapwehtaataakw maak chechii ihtuutahk taan e ishi chiskutamaachewekw. Iskutak maak kaa saakutaaskunekw chitihtuutawaawaau uste wii chechii machaatisiit ishpishaat chiyawaau. Niishwaa chitahkuchishtaawaanaawaau taan e iteyihtaakusit chechii uhchi ituhtet machishkutehch.”

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

¹⁵ ᒉᒀᓐ ᒋᑲ ᐃᔑ ᒪᒋᐸᔨᓈᐙᐤ ᒋᔭᐙᐤ ᐐᔓᐌᐎᓐ ᑳ ᒋᔅᑯᑕᒫᒉᔦᒄ ᐁᒄ ᒫᒃ ᒋᔭᐙᐤ ᕓᕆᓰᒡ ᒥᒄ ᑳ ᐊᔨᒥᐦᐁᐦᑳᓱᔦᒄ᙮ ᒥᓯᐌ ᐁ ᐃᔅᐱᒋᔅᑲᒥᑳᒡ ᐆ ᐊᔅᒌ ᒋᑎᑐᐦᑌᓈᐙᐤ ᐯᔭᒄ ᐊᐌᓐ ᒉᒌ ᐃᐦᑑᑕᐌᒄ ᒉᒌ ᑖᐺᐦᑖᑖᒄ ᒫᒃ ᒉᒌ ᐃᐦᑑᑕᐦᒃ ᑖᓐ ᐁ ᐃᔑ ᒋᔅᑯᑕᒫᒉᐌᒄ᙮ ᐃᔅᑯᑕᒃ ᒫᒃ ᑳ ᓵᑯᑖᔅᑯᓀᒄ ᒋᑎᐦᑑᑕᐙᐙᐤ ᐅᔅᑌ ᐐ ᒉᒌ ᒪᒑᑎᓰᑦ ᐃᔥᐱᔖᑦ ᒋᔭᐙᐤ᙮ ᓃᔣ ᒋᑕᐦᑯᒋᔥᑖᐙᓈᐙᐤ ᑖᓐ ᐁ ᐃᑌᔨᐦᑖᑯᓯᑦ ᒉᒌ ᐅᐦᒋ ᐃᑐᐦᑌᑦ ᒪᒋᔥᑯᑌᐦᒡ᙮

Matthew 23:15 Iomraidhean Croise

Matthew 23:13

“Chekwaan chika ishi machipayinaawaau chiyawaau wiishuwewin kaa chiskutamaacheyekw kaye chiyawaau Phariseech, chiyawaau kaa ayimihehkaasuyekw, chiyawaau kaa kachipiskuwekuch awenichii chechii piihchetwaau anite kihchikiishikw chisheuchimaawinihch, ekaa maak mechim chechii piihcheyekw chiyawaau. Namui chipachishtinaawaauch anichii kaa wii piihchetwaau anite kihchikiishikw chisheuchimaawinihch chechii piihchetwaau.

Matthew 3:7

Iskutak maak John wiyaapamaat mihchetu Phariseeh kaye Sadduceeh e pechi takushiniyich chechii siikahaahtuwaakanuyich, chii iteu, “Muyaam taapwe chinepukuch e iteyihtaakusiyekw. Awen kaa ititaakw chechii ushimututamuwekw Chishemanituu utaahkuiwesuwin.

Matthew 5:22

Mikw maak chititinaawaau niya, awen e chishuwaasiistuwaat wiichishaanh chika wiyaaskunaakanuu, kaye awen e aatuweyimaat wiichishaanh chika peshuwaakanuu uhchishkuu aniyuu kaa wiishuwaatamiyich taan che ihtuutawaakanuyich aweyuu, kaye awen kaa itaat wiichishaanh taapwe ekaa chekwaan mitun kaa iteyihtaakusiyin kushpanaateyihtaakuniyuu chechii ishiwepinaakanuut machishkutehch.

Matthew 5:29

Ekw maak ihtuutaakuyine chischiishikw chinihiiwinihch kaa ihtakuhch chechii machituutaman kuikunh, che wepinaman. Uste miywaau chechii wanihtaayin apishiish chiiyuu ishpish wii misiwe chiiyuu chechii ishiwepinikanuuhch machishkutehch.

John 8:44

Machimanituu eukw wehtaawiyekw, aniyuu e ishi nituweyimitaakw chechii ishi machituutamuwekw eukun mikw waa ihtuutamekw. Muush chii nipahiiweu kaa ishpish ihtakuniyich uyuu aschiiyuu. Namui wiiskaat uhchi nituweyihtam kuiskw chechii ishi wiihtaakuniyich chekwaayuu wesh namui mitun ihtakuniyuu taapwewiniyuu anit e ihtaat. Muush nanatayuu wesh ekun chihchiwe e itaatisiit, eukw maak an taapwe weuhtaawiitutawaat aniyuuh kaa nanatayich.

ᐊᐸᔅᑕᓚᒡ 13:10

ekw kaa itaat, “Muyaam machimanituu utawaashiim e iteyihtaakusiyin, e uhkaataman misiwe kuiskutaatisiiwin. Ekun ekw ishpish wiyeshihiiwe kaye puunii ekw e wii wanaachihtaawat aniyuu taan e ishi nituweyihtahk Chishemanituu chechii itaatisiinaanuyich.

ᐊᐸᔅᑕᓚᒡ 13:43

Ekw maak mihchetu Jewa iinuuch kaye anichii ekaa Jewa kaa itiskaanesitwaau kaa ayimihewaatisiitwaau chii wiicheweuch aniyuu Paul ekw maak Barnabas. Ekw maak anichii apastalach kaa wiihtamuwaatwaau aniyuu iinuu e itaatwaau, Chishemanituu naashch taapwe chimiyutuutaakuwaau, suuhk kuiskw wii ishi pimaatisiikw chechii uhchi shaweyimitaakw Chishemanituu.

ᐊᐸᔅᑕᓚᒡ 14:19

Pasch Jewa iinuuch chii uhtuhteuch anite Antiochihch an ihtaawin anite Pisidia aschiihch kaa ihtakuhch, kaye pasch anite Iconium chii uhtuhteuch, ekw kaa shaakuuchimaatwaau aniyuu iinuu chechii wiichihiikutwaau e wii nipahaatwaau Paul. Ekw kaa paahpimusinaatahwaatwaau ekw kaa wiiwiitaapaataatwaau anit aniyuu ihtaawiniyuu e chii iteyimaatwaau e nipiyich aniyuu Paul.

ᐊᐸᔅᑕᓚᒡ 14:2

Ekw anichii Jewa iinuuch ekaa kaa taapwehtahkwaau, chii ihtuutaweuch aniyuu ekaa Jewa kaa itiskaanesiitwaauh chechii machipayihkahtuwaayich aniyuu wiichishaanimaauh.

ᐊᐸᔅᑕᓚᒡ 17:13

Iskutak maak piyehtahkwaau anichii Jewa iinuuch anite Thessalonicahch kaa ihtaatwaau Paul e waawiihtamiyich Chishemanituu utayimuwiniyuu anite Berea ihtaawinihch, chii ituhteuch anite, kaa ihtuutawaatwaau kaye aniyuu iinuu anit chechii chishuwaahiikutwaau aniyuu Paul ekw maak Silas.

ᐊᐸᔅᑕᓚᒡ 2:10

Phrygia, Pamphylia, Egypt, kaye Libya peshuch anite Cyrene kaa ihtakuhch ihtaawin. Kaye maak pasch utah e tashiihkw Rome kuuhchiinaanuu.

ᐊᐸᔅᑕᓚᒡ 6:5

Misiwe maak chii naheyihtamuch anit e tashitwaau aniyuu kaa itweyich aniyuu apastalh. Ekw kaa wiyaapamaatwaau Stephen. Stephen maak utaapwehtamuwin naashch chii suuhcheyihtaakuniyuu, kaye chii saakaschineshkaakuu Kaa payehchisiyich Ahchaahkwa. Kaye Philip chii wiyaapameuch kaye Prochorus, kaye Nicanor, kaye Timon, kaye Parmenas, ekw maak Nicolaus. Uu Nicolaus anite Antioch chii uhchiyuu wiya, aat maak ekaa Jewa uhchi itiskaanesit yaapach maak chii taapwehtam taan e ishi taapwehtamiyich Jewa iinuuh.

Galatians 4:17

Naashch taapwe chiwii naheyihtamihiikuwaauch anichii aahchiiuh kaa ishi chiskutamaachetwaau. Mikw maak ihtakuniyuu taan e ishi ekaa muyaam iteyihtaakuniyich taan waa ihtitwaau. Chiwii ihtuutaakuwaauch ekaa chechii aapateyimiyekw niya, wiyawaau teyakuch chechii nituhtawekuch.

Galatians 6:12

Anichii kaa wii siihchimitaakuch chechii chischinuwaachishukuwekw mikw wii nuukuhiisuuch e nanihiihtahkwaau Jewa ayimiheu wiishuwewinh kaye maak nituweyihtamuch chechii miywaachimaakanuutwaau. Eukw uyuu e ihtitwaau ekaa chechii nanehkaateyimuhaakanuutwaau e aayimuumaatwaau Christ utaashiteyaahtikumiyuuh.

Ephesians 2:3

Ekun maak peyakwaau misiwe kaa ishinaakusiihkw kaye chiyaanuu, mikw taan waa ihtiihkw chichii ihtinaanuu. Chichii ihtuutenaanuu mikw taan e ishi nituweyihtamuumakahkwaau chiyaasinuuh kaye chimituneyihchikanuuh. An maak kaa ishpish chii machaatisiihkw chii iteyihtaakuniyikupane taapwe kaye chiyaanuu chechii waweshihiitahkw Chishemanituu.