Matthew 22:16 - Chishemanituu Utayimuwin: Kaa Uskaach Testament

¹⁶ Chii itishahweuch maak uchischinuhamuwaakanawaau kaye Herod utaapachihaakaniyuu anite Jesus e ihtaayich. Ekw kaa itaatwaau aniyuu Jesus, “Chischinuhamaachesuu, chichischeyimitinaan taapwe e taapwemakahch taan e ishi chiskutamaacheyin kaye misiwe peyakunihch e ishi chiskutamuutwaau awenichii taan e ishi nituweyimikutwaau Chishemanituu chechii ishi pimaatisiitwaau. Namui mitun wiyesh chititeyihtamihiikuun taan che ati iteyihtamihiikutwaau awenichii taan e ishi chiskutamaacheut, kaye misiwe peyakunihch chititeyimaauch awenichii.

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

¹⁶ ᒌ ᐃᑎᔕᐦᐌᐅᒡ ᒫᒃ ᐅᒋᔅᒋᓄᐦᐊᒧᐙᑲᓇᐙᐤ ᑲᔦ ᐦᐁᕋᑦ ᐅᑖᐸᒋᐦᐋᑲᓂᔫ ᐊᓂᑌ ᒌᓴᔅ ᐁ ᐃᐦᑖᔨᒡ᙮ ᐁᒄ ᑳ ᐃᑖᑣᐤ ᐊᓂᔫ ᒌᓴᔅ, ᒋᔅᒋᓄᐦᐊᒫᒉᓲ, ᒋᒋᔅᒉᔨᒥᑎᓈᓐ ᑖᐺ ᐁ ᑖᐺᒪᑲᐦᒡ ᑖᓐ ᐁ ᐃᔑ ᒋᔅᑯᑕᒫᒉᔨᓐ ᑲᔦ ᒥᓯᐌ ᐯᔭᑯᓂᐦᒡ ᐁ ᐃᔑ ᒋᔅᑯᑕᒨᑣᐤ ᐊᐌᓂᒌ ᑖᓐ ᐁ ᐃᔑ ᓂᑐᐌᔨᒥᑯᑣᐤ ᒋᔐᒪᓂᑑ ᒉᒌ ᐃᔑ ᐱᒫᑎᓰᑣᐤ᙮ ᓇᒧᐃ ᒥᑐᓐ ᐎᔦᔥ ᒋᑎᑌᔨᐦᑕᒥᐦᐄᑰᓐ ᑖᓐ ᒉ ᐊᑎ ᐃᑌᔨᐦᑕᒥᐦᐄᑯᑣᐤ ᐊᐌᓂᒌ ᑖᓐ ᐁ ᐃᔑ ᒋᔅᑯᑕᒫᒉᐅᑦ, ᑲᔦ ᒥᓯᐌ ᐯᔭᑯᓂᐦᒡ ᒋᑎᑌᔨᒫᐅᒡ ᐊᐌᓂᒌ᙮

Matthew 22:16 Iomraidhean Croise

Matthew 22:24

Chii itikuu aniyuu Sadduceeh, “Chischinuhamaachesuu, Moses chii masinaham uyuu wiishuwewiniyuu. Itashteyuu maak, ‘Nipite naapeu, ekaa maak uhchi ayaawaakwe awaasha, aniyuu wiichishaanh an naapeu kaa nipit chipaa wiichimeyuu aniyuu wiichiskweu. Ekw maak chipaa ayaaweuch awaasha aniyaa ustesa chechii uhpinihtaauchishtamuwaat.’ ”

Matthew 22:26

Chek maak kaye wiya an wiichishaanimaau kaa wiichimaat aniyaah wiichishaanh wiichiskweuyuuh kaa puunipimaatisiyich. Namui kaye wiya uhchi ayaaweu awaasha. Ekw miin aniyuuh wehchi taahchiskaakut an anuhchiish kaa puunipimaatisiit kaa wiichimaayich aniyuu iskweu. Ekun mwehch kaa ati ispayit kaye wiya uu. Chii puunipimaatisiyuu ekaa mechim uhchi ayaawaat awaasha. Chek misiwe ekun kaa ati ishinaakusitwaau anichii niishwaashch wiichishaanimaauch. Misiwe chii wiichimeuch aniyuuh iskweu kaye misiwe chii ati puunipimaatisiyuuch ekaa uhchi ayaawaatwaau awaasha.

Matthew 26:18

Chii iteu maak, “Ituhtekw anite ihtaawinihch, che nituwaapamekw peyakw naapeu ekw che itekw, ‘Iteu Chischinuhamaachesuu, shaash wiipach chika utihchipayuu che nakatamaan uu aschii. Anite chiichihch nichischinuhamuwaakanich nika pechi makushenaan an miyaaskaacheu makushaan.’ ”

Matthew 26:49

Judas maak kuiskw chii nituwaapameu aniyuu Jesus, ekw kaa itaat, “Kwei, chischinuhamaachesuu.” Ekw kaa uchemaat.

Mark 10:17

Mekwaach maak e pimuhtet Jesus meskanaahch, naapeu chii uhchi paapahtaayuuh kaa ati uchihchiihkunapayihuyich anit e ihtaat ekw kaa itikut, “Chischinuhamaachesuu, kaa miyeyihtaakusiyin, taan che ihtiyaan chechii ayaayaan kaachiche pimaatisiiwin.”

Mark 12:13

Chii itishahwaakanuuch pasch Phariseech kaye pasch anichii Herod kaa nuushunehwaatwaau anite Jesus e ihtaayich chechii naanituu pisiiwiyaatwaau ekaa muyaam chechii itweyich chekwaayuu. Nanaahkuu chekwaayuu chii ishi kakwechimeuch.

Mark 12:14

Chii pechi nituwaapameuch maak ekw kaa itaatwaau, “Chischinuhamaachesuu, chichischeyimitinaan muush e taapweyin taan e itweyin. Namui wiyesiin awen an kaa ayimihiit wesh misiwe awen peyakunihch chit iteyimaau. Namui chikanawaapahtamuwaan taan e ishi chisteyihtaakusit awen. Kuiskw kaye chichiskutamuwaauch awenichii taan e ishi nitaweyimikutwaau Chishemanituu chechii ishi pimaatisiitwaau. Itashteu aa wiishuwewinihch Rome chisheuchimaau chechii miyaakanuut aniyuu shuuliyaayuu kaa chiishiihkaasuyich aweyuu.”

Mark 3:6

Ekw anichii Phariseech chii ati wiiwiyuuch anit Jewa ayimiheukamikuhch. Ekw tiiwehch kaa nituwaapamaatwaau aniyuuh aweyuuh Herod kaa wiichihaayich ekw kaa nishtawiitwaau. Chii aayimuutamuch taan chipaa chii ihtuuch chechii nipahaatwaau Jesus.

Mark 8:15

Jesus chii ishi yaakwaamimikuuch, “Yaakwaakw, ayaakwaamiishtamuwaahkw uhpisikanimuwaau Phariseech kaye maak Herod uhpisikanim.”

Luke 20:21

Ekw maak uchii naapeuch kaa kakwechimaatwaau Jesus e itaatwaau, “Chischinuhamaacheu, chichischeyimitinaan chekwaan e itweyin kaye taan e ishi chiskutamaacheyin e taapwemakahch. Kaye chichischeyimitinaan misiwe peyakunihch e iteyimitwaau awenichii, kaye misiwe peyakunihch taapwe e ishi chiskutamuutwaau Chishemanituu utiteyihtamuwiniyuu chechii ishi pimaatisiitwaau.

Luke 7:40

Jesus kaa ayimihiikut e itikut, “Simon, chiwii ititin chekwaan.” Simon kaa itwet, “Chiskutamaachesuu, pechi wiihtamuu chekwaan an.”

John 14:6

Jesus chii nishkweushiheu e itaat, “Niya eukw meskanuu kaye taapwewin kaye pimaatisiiwin, namui awen chika chii naateu Uhtaawiimaau mikw niya uhchi.

John 18:37

Ekw Pilate kaa itaat, “Taapwe kiipaa chichisheuchimaaunaache.” Jesus maak chii iteu, “Chititwen e chisheuchimaawiyaan. Ekun wehchi pimaatisiyaan kaye ekun wehchi pechi takushiniyaan utah aschiihch chechii tipaatutamaan an taapwewin Chishemanituu e ihtaat kaa uhchipayihch. Tahtu awen taapwewinihch kaa ihtaat eukw an piyechi nituhtuut.”

John 7:18

An awen mikw wiya taan e iteyihtahk kaa ishi wiihtahk chekwaayuu, nituweyihtam wiya chechii chisteyimaakanuut. Ekw an awen kaa nituweyihtahk chechii chisteyimaakanuyich aniyuu kaa pechi itishahukut kuiskw ihtuu kaye namui mitun ihtakuniyuu wiyeshihiiwewiniyuu anit e ihtaat.

2 Corinthians 2:17

Pasch awenichii kaa papaa kacheskwetwaau muyaam e papaa ataawewaatwaau Chishemanituuh utayimuwiniyuu ekun e ishinaakusitwaau, e wii uhtisiitwaau shuuliyaayuu e ihtitwaau. Namui wii niyaan uu nitishinaakusinaan. Nikuiskutehenaan kaye chihchiwe nititeyihtenaan taan e itashumiyimiht Christ chechii ishi atushkuwachiht wesh nichischeyimikunaan taan e ihtuuchiht.

2 Corinthians 4:2

E waawiihtamaahch uu miywaachimuwin namui chekwaan nichiimuuch ihtinaan. Muush kuiskw kaye muushe niwiihtenaan chekwaan. Namui niwii wiyeshimaanaan awen chechii uhchi taapwehtahk. Namui kaye nichiikuunenaan kutach chekwaan e waawiihtamaahch Chishemanituu utayimuwin. Kuiskw niwiihtamuwaanaan misiwe awen taapwewiniyuu ekw maak che chischeyihtahkwaau taapwe chechii taapwehtahkwaau taan e ishi waawiihtamuchiht. Nichischeyimikunaan maak Chishemanituu e taapwewachiht.

2 Corinthians 5:16

Namui maak ekw uschich e ishinawaakanuut awen nit ishi kanawaapamaanaan. Ekun kaa ishi kanawaapamachiht Christ peyakwaau. Namui ekw anite nit ishi kanawaapamaanaan.

Galatians 1:10

Mikw wii ihtuutaweu aweyuu chechii mamiywaachimikut chititeyiminaawaau aa. Namui, Chishemanituu eukw waa chischeyihtamuch taan e ishi miywaachimit. Mikw wii naheyihtamiheu aweyuuh chititeyiminaawaau aa. Wesh mikw iinuuch wii naheyihtamahiikwaau namui nipaa uhchi atushkuwaau Christ.

Galatians 2:6

Anichii kaa niikaanishkaachetwaau, chisteyihtaakusuuch chii iteyimaakanuuch. Namui maak chekwaan taan e iteyimaakanuutwaau nititeyihten niya wii. Wesh misiwe aweyuuh peyakunihch iteyimeu wii Chishemanituuh. Chii naheyihtamuch e waawiihtamuch miywaachimuwiniyuu, namui uhchi ihtakuniyuu etituu chechii ishi pechi wiihtamuutwaau.

1 Thessalonians 2:4

Teyakuch muush mikw taan e ishi nituweyimiyimiht Chishemanituu chechii ishi waawiihtamuchiht ekun e ishi waawiihtamaahch, wesh wiya nichii iteyimikunaan e taapweucheyihtaakusiyaahch chechii aapatisiihkahtamuchiht miywaachimuwiniyuu. Ekw maak wiyaawiihtamaahch namui wii naapeu e wii naheyihtamihiichiht, Chishemanituu eukw chechii naheyihtamihiichiht wesh wiya chinituu chischeyimikunuu taan e ihtuuhkw.

James 3:17

An maak kachehtaaweyihtamuwin ishpimihch kaa uhchipayihch niishtam tekash payehkan, ekw miin e chiyaameyihtaakuhiiwemakahch, yuuspeyihtaakuhiiwemakahch, kaye ihtuutaakuu awen yaakwaau chechii nituhtawaat aweyuuh. Awen e ayaat uyuu kachehtaaweyihtamuwiniyuu naashch kata weyuuch chishewaatutaweu aweyuuh kaye mistahii chika miyutuutamaacheu, peyakunihch chika ishi kanawaapameu misiwe aweyuuh kaye namui mitun chika uhchi wii kakaataau taan nihaau e iteyihtaakusit.

1 John 5:20

Chichischeyihtenaanuu Chishemanituu Ukusisa e chii pechi takushiniyich utah aschiihch, chechii chiskutamaatahkw chechii chischeyimahkw aniyuu chihchiwe Chishemanituwiyich. Chiwiichewaanuu an taapwe Cheshemanituut e wiicheumahk Ukusisa Jesus Christ. Eukw uu taapwe Cheshemanituut, an kaa miiwet kaachiche pimaatisiiwiniyuu.