Matthew 20:16 - Chishemanituu Utayimuwin: Kaa Uskaach Testament

¹⁶ Ekw Jesus kaa ati itwet, “Eukw maak che uhchi utaahch ishi pachishtinaakanuutwaau anichii niikaanihch kaa itahiisutwaau ekw anichii maahchishtai kaa ishi pachishtinisutwaau niikaanaanihch chikaa ishi pachishtinaakanuuch.”

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

¹⁶ ᐁᒄ ᒌᓴᔅ ᑳ ᐊᑎ ᐃᑗᑦ, ᐁᐅᒄ ᒫᒃ ᒉ ᐅᐦᒋ ᐅᑖᐦᒡ ᐃᔑ ᐸᒋᔥᑎᓈᑲᓅᑣᐤ ᐊᓂᒌ ᓃᑳᓂᐦᒡ ᑳ ᐃᑕᐦᐄᓱᑣᐤ ᐁᒄ ᐊᓂᒌ ᒫᐦᒋᔥᑕᐃ ᑳ ᐃᔑ ᐸᒋᔥᑎᓂᓱᑣᐤ ᓃᑳᓈᓂᐦᒡ ᒋᑳ ᐃᔑ ᐸᒋᔥᑎᓈᑲᓅᒡ᙮

Matthew 20:16 Iomraidhean Croise

Matthew 19:30

Mikw maak mihchetu anichii e chisteyihtaakusitwaau kaa iteyimaakanuutwaau namui chika uhchi chisteyihtaakusuuch anite Chishemanituu uchisheuchimaawiniihch kaye mihchetu anichii kaa iteyimaakanuutwaau ekaa chisteyihtaakusitwaau chika chisteyihtaakusuuch anite Chishemanituu uchisheuchimaawaniihch.”

Matthew 21:31

Taan maak yaakw anichii e niishitwaau naapeshach kaa nanihiihtuwaat uhtaawii.” Ekw Jesus kaa itikut aniyuu kaa kakwechimaat, “An ustesimaau.” Ekw Jesus kaa itaat, “Chiwiihtamaatinaawaau, anichii nitamukw kaa ihtitwaau chisheuchimaau e aapachihiikutwaau chechii maamuushtinamuwaatwaau ushuuliyaamiyuu ekw maak anichii pisikwaatisiiskweuch eukunich niishtam che piihchetwaau Chishemanituu uchisheuchimaawiniihch eshkw ekaa chiyawaau piihcheyekw.

Matthew 22:14

Ekw Jesus kaa ati itwet, “Mihchetu awenichii tepwaataakanuuch, mikw maak namui mihchet wiyaapamaakanuuch.”

Matthew 7:13

“Niishinh ishkwaahtemh, peyakw iyakashkaau ekw an peyakw shaakuwaashuu. An maak ishkwaahtem kaa iyakashkaach wehtan chechii pimuhtaanuuhch an meskanuu anite kaa itamuhch, mikw maak machishkutehch itamuu an meskanuu. Mihchetu maak awenichii pimuhteuch aniyuu meskanaayuu. An maak kaa shaakuwaashich ishkwaahtem ekute chipaa uhchi piihchenaawaau.

Mark 10:31

Mihchetu awenich niikaan kaa iteyihtaakusitwaau anuhchiish maahchishtai kata ishi pachishtinaakanuuch, ekw anichii maahchishtai kaa ihtaatwaau anuhchiish wiyawaau niishtam kata ishi pachishtinaakanuuch.”

Luke 14:24

Chiwiihtamaatin, namui waawaach peyakw anichii niishtam kaa wiishaamakwaau kata uhchi kuchishtamuch uyeyuu nimakushaaniyuu.’ ”

Luke 15:7

Kaa itwet miin Jesus, “Chiwiihtamaatinaawaau, mwehch ekun e iteyihtaakuhch muuchicheyihtamuwin anite kihchikiishikuhch iskutak peyakw umachihtwaau e naataat Chishemanituu e wii kweskaatisiit, uste wiya muuchicheyihtamihiiweu ishpishaat peyakushtemitanuu peyakushteu kaa kuiskutaatisiitwaau awenichii shaash e kweskaatisiitwaau.”

Luke 7:47

Chiwiihtamaatin, aniyuu naashch e saachihiiwet ekut wehchi nuukuniyich mihchetu machihtwaawinh e chii wepeyihtamuwaakanuut. Awen apishiish kaa wepeyihtamuwaakanuut apishiish saachihiiweu.”

Romans 5:20

Iskutak kaa pachishtinahk Chishemanituu uwiishuwewin ekut kaa uhchi chischeyihtahkwaau awenichii e ishpish weyuuch machituutahkwaau. Mikw maak taanit kaa weyuuch machituutaakanuuhch Chishemanituu ushaweyihchichewin etituu chii aapatisiimakaniyuu.

Romans 8:30

Aniyuuh maak niyaakan kaa wiyeyimaat aweyuu chii tepwaateu. Uyuuh maak kaa tepwaataat chii kuiskunaakuheu wiya ishi e ihtaat. Uyuu maa kaa kuiskunaakuhaat chii chisteyihtaakuheu.

Romans 9:30

Mwaau e ishi wiihtamaachemakahch misiwe uu kaa ishi aayimuutech, anichii ekaa Jewa kaa itiskaanesitwaau namui mechim uhchi kuchihtaauch chechii kuiskunaakuhiisutwaau Chishemanituu ishi e ihtaayich. Eukunh maak uyuu Chishemanituu kaa kuiskunaakuhaat iskutak kaa taapwehtamiyich.

1 Thessalonians 2:13

Mwaau miin wehchi muush nanaaskumachiht Chishemanituu. Iskutak kaa pechi waawiihtamaataahch taan kaa ishi miikuyaahch Chishemanituu chechii ishi waawiihtamaahch yaakwaau chichii nituhtenaawaau kaye maak chichii taapwehtenaawaau. Namui wii naapeu utayimuwin chuuhchi iteyihtenaawaau maak Chishemanituu utayimuwin. Taapwe maak Chishemanituu uyuu utayimuwin. Ihtakun maak e ishi aapatisiimakahch chipimaatisiiwiniwaahch an kaa ishi waawiihtamaataahch.