Matthew 2:13 - Chishemanituu Utayimuwin: Kaa Uskaach Testament

¹³ Iskutak maak kaa chistuhtetwaau anichii naapeuch kaa pechi chiiutetwaau, ekw Utipeyihchikeu utenchilam kaa nuukushiishtaakut Joseph upuwaamuwinihch e itikut, “Herod chika naanituweyimeu aniyuu awaasha e wii nipahaat. Wanishkaah, nete Egypt che ishi ushimuhiit an awaash ekw maak aniyuuh ukaawiih, ekute che ihtaayekw paatish ititakuche chechii chistuhteyekw.”

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

¹³ ᐃᔅᑯᑕᒃ ᒫᒃ ᑳ ᒋᔅᑐᐦᑌᑣᐤ ᐊᓂᒌ ᓈᐯᐅᒡ ᑳ ᐯᒋ ᒌᐅᑌᑣᐤ, ᐁᒄ ᐅᑎᐯᔨᐦᒋᑫᐤ ᐅᑌᓐᒋᓚᒻ ᑳ ᓅᑯᔒᔥᑖᑯᑦ ᒞᓴᕝ ᐅᐳᐙᒧᐎᓂᐦᒡ ᐁ ᐃᑎᑯᑦ, ᐦᐁᕋᑦ ᒋᑲ ᓈᓂᑐᐌᔨᒣᐤ ᐊᓂᔫ ᐊᐙᔕ ᐁ ᐐ ᓂᐸᐦᐋᑦ᙮ ᐗᓂᔥᑳᐦ, ᓀᑌ ᐄᒋᑉ ᒉ ᐃᔑ ᐅᔑᒧᐦᐄᑦ ᐊᓐ ᐊᐙᔥ ᐁᒄ ᒫᒃ ᐊᓂᔫᐦ ᐅᑳᐐᐦ, ᐁᑯᑌ ᒉ ᐃᐦᑖᔦᒄ ᐹᑎᔥ ᐃᑎᑕᑯᒉ ᒉᒌ ᒋᔅᑐᐦᑌᔦᒄ᙮

Matthew 2:13 Iomraidhean Croise

Matthew 1:20

Mekwaach uyuu e maamituneyihtahk, iskutak maak nepaat, Utipeyihchikeu utenichilamiyuuh chii nuukushiishtaakuu upuwaamuwinihch e itikut, “Joseph, chiya aniyaa David aanische ukusisa, ekaawii kushtaach chechii wiichimat Mary wesh Kaa payehchisiyich Ahchaahkwa chii ihtuutaakuu chechii ayaawaat aniyuu awaasha.

Matthew 10:23

Nanehkaachihiikuyekwe peyakw ihtaawin, ushimukw ekw anite kutach ihtaawin che ituhteyekw. Chiwiihtamaatinaawaau, namui eshkw misiwe chika uhchi ishi waawiihtenaawaau miywaachimuwin anite aniyuu ihtaawin Israelihch kaa ihtakuhkwaauh, shaash che takushihk Iinuu Ukusisa.”

Matthew 2:12

Iskutak maak che chiiwetwaau namui anite Jerusalemihch itehche uhchi ishi chiiweuch chechii nituu wiihtamuwaatwaau Herod taanite e ihtaayich aniyuu awaasha. Wesh Chishemanituu chii ayaakwaamimikuuch upuwaamuwiniwaahch ekaa chechii kaau nituwaapamaatwaau Herod ekw maak aahchiiuh kaa ishi chiiwetwaau.

Matthew 2:14

Ekw Joseph kaa wanishkaat, kaa chistuhtahaat aniyuu awaasha ekw maak aniyuu ukaawiyuu e mekwaatipiskaayich. Anite Egypt ekute kaa ituhtahaat.

Matthew 2:16

Eshkw maak mekwaach e chii pimaatisiit Herod iskutak chescheyihtahk e chii pishiiwiikut aniyuu kaa kachehtaaweyihtamiitwaauh naapeuh chii mista chishuwaasuu. Ekw kaa itashuwet chechii nipahaakanuyich misiwe awaasha e naapeshiiwiyich kaa niishupunesiyich anite maak ishi niihtaahch anite Bethlehemihch kaa ihtaayich ekw maak waaskaa anit kaa ihtaayich, eukw uyuu wehchii ihtuutuwaat wesh ekun wiyesh kaa ishpish wiihtamaakut aniyuu kaa kachehtaaweyihtamiitwaauh naapeuh niishu pipun anite utaahch ekut niishtam kaa waapamaayikupanenh aniyuu achahkusha.

Matthew 2:22

Mikw maak iskutak Joseph piyehtahk Archelaus e chii miishkuchishkuwaakupane aniyuu uhtaawiih Herod e chisheuchimaaupinaanuyich anite Judea aschiihch, ekw kaa kushtaachit chechii wiichit anite. Ekw miin kaa wiihtamuwaakanuut taan che ihtit e puwaamut, ekw anite Galilee aschiihch ekute kaa ituhtetwaau.

ᐊᐸᔅᑕᓚᒡ 10:22

Chii iteuch maak, “Nuuchimaaminaan Cornelius kaa niikaanishkuwaat Rome shimaakanisha nichii pechi itishahukunaan. Miyeyihtaakusuu uu naapeu, kaye chisteyimeu Chishemanituu, misiwe kaye Jewa iinuuh iteyimikuu e miyeyihtaakusit. Peyakw Chishemanituu kaa payehchisiyich utenchilamiyuu chii itikuu chechii wiishaamisk anite wiichihch ekw maak chechii pehtahk taan waa ishi wiihtaman.”

ᐊᐸᔅᑕᓚᒡ 10:7

Iskutak maak ekaa e ihtaayich aniyuu enchil kaa ayimihiikut ekw Cornelius kaa wiishaamaat niishu utaapachihaakan, kaye peyakw shimaakanisha e ayimihewaatisiyich aniyuu muush kaa chii naanaakatuweyimikut.

ᐊᐸᔅᑕᓚᒡ 12:11

Iskutak maak Peter miyaamituneyihtahk uyuu kaa ispayit, ekw kaa itwet, “Nicheshtinaahun Utipeyihchikeu e chii pechi itishahwaat utenchilam che pechi wiihkuchihiyich, ekaa chechii pechi wiyesh ihtuutuut Herod kaye anichii Jewa iinuuch ekaa chechii ihtuutuutwaau taan kaa wii ihtuutuutwaau.”

ᐊᐸᔅᑕᓚᒡ 12:7

Chek sischikuuch kaa uhchi waashteyich anit Peter kaa chipahwaakanuut, aweyuu Utipeyihchikeu utenchilamiyuu wehchi niipuyich anit e ihtaat. Kaa yaayaahchipitikut e wii kushkunikut ekw kaa itikut, “Chiipiih wanishkaa.” Tiiwehch maak chii ayaapahkupaayuuh aniyuu upuuchishiyaapiih kaa maahkupitaakanuut Peter uhkunitihchiihch.

ᐊᐸᔅᑕᓚᒡ 16:36

Ekw an kaa naanaakachihtaat chipahutuukamikuyuu chii iteu aniyuu Paul, “Anichii uchimaauch itweuch chechii pachishtinitaahch, maachiikw maak chiyaam chistuhtekw, namui awen chika uhchi wiyesh ihtuutaakuwaau.”

ᐊᐸᔅᑕᓚᒡ 5:19

Mikw maak aniyuu e ati tipiskaayich, Utipeyihchikeu utenchilam chii aapuhweyuu chishtuhkan anit chipahutuukamikuhch, ekw kaa wiiwiihtahaat aniyuu apastalh kaa itaat,

ᐊᐸᔅᑕᓚᒡ 7:19

Uu maak chisheuchimaau naashch chii maayeyimeu aniyehkaanaan chiwaahkumaakanuu, chii ihtuutaweu mistahii chechii nanehkaachihaakanuyich kaye chii itashuwaateu wiiwiitamihch chechii nakataakanuwiyich utawaashiimiyuu chechii nipiyich anite.”

Revelation 12:14

Mikw maak an iskweu chii miyaakanuu niishu mitihtahkunh muyaam mista piyesuu utihtahkun e ishinaakuniyikwaauh chechii ispahaat anite pakwaatiskamikaahch anite che kanuweyimikut Chishemanituu. ekute maak anite che ihtaat nishtu pipun miin aapihtuu ishpish ekaa chechii pischeyimikut aniyuu mista manichuusha.

Revelation 12:4

Chii pahkuchipiteu peyakw aniyuuh e naanishtiyich achahkusha anite chiishikuhch uhchi usuu e aapachihtaat ekw anite aschiihch kaa ishuwepinaat. Chii niipuu uhchishkuu aniyuu iskweu e ihtaayich mekwaach e aahkusiyich e ashuwaapamaat che ishpish pimaatisiyich aniyuuh awaasha chechii muwaat iskutak pimaatisiichen.

Revelation 12:6

Ekw an iskweu anite pakwaatiskamikaahch ekute kaa itashimut, anite kaa ayeskustimaakut Chishemanituu che ihtaat. ekute maak anite che kanuweyimaakanuut peyakwaau chishemitaahtumitanuu niishwaa mitaahtumitanuu miin nikutwaashumitanuu chiishikaauh ishpish.