Matthew 18:17 - Chishemanituu Utayimuwin: Kaa Uskaach Testament

¹⁷ Ekaa maak pishichistahke kaye aniyuu kutak aweyuu ekaa pishichihaate, ekw che wiihtamuumat umaamuuayimihaauh taan kaa ishi machituutaask, ekaa maak pishichihaate kaye aniyuuh umaamuuayimihaauh ekaawii chika uhchi aapateyimaakanuu mwehch awen ekaa kaa chischeyimaat Chishemanituu ekun che ishi kanawaapamaakanuut maak awen ekaa kaa wii kweskaatisiit ekun che ishi kanawaapamaakanuut.”

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

¹⁷ ᐁᑳ ᒫᒃ ᐱᔑᒋᔅᑕᐦᑫ ᑲᔦ ᐊᓂᔫ ᑯᑕᒃ ᐊᐌᔫ ᐁᑳ ᐱᔑᒋᐦᐋᑌ, ᐁᒄ ᒉ ᐐᐦᑕᒨᒪᑦ ᐅᒫᒨᐊᔨᒥᐦᐋᐤᐦ ᑖᓐ ᑳ ᐃᔑ ᒪᒋᑑᑖᔅᒃ, ᐁᑳ ᒫᒃ ᐱᔑᒋᐦᐋᑌ ᑲᔦ ᐊᓂᔫᐦ ᐅᒫᒨᐊᔨᒥᐦᐋᐤᐦ ᐁᑳᐐ ᒋᑲ ᐅᐦᒋ ᐋᐸᑌᔨᒫᑲᓅ ᒬᐦᒡ ᐊᐌᓐ ᐁᑳ ᑳ ᒋᔅᒉᔨᒫᑦ ᒋᔐᒪᓂᑑ ᐁᑯᓐ ᒉ ᐃᔑ ᑲᓇᐙᐸᒫᑲᓅᑦ ᒫᒃ ᐊᐌᓐ ᐁᑳ ᑳ ᐐ ᑴᔅᑳᑎᓰᑦ ᐁᑯᓐ ᒉ ᐃᔑ ᑲᓇᐙᐸᒫᑲᓅᑦ᙮

Matthew 18:17 Iomraidhean Croise

Matthew 10:3

Philip, ekw maak Bartholomew, Thomas, ekw maak Matthew, an kaa chii maamuushtinahk Chisheuchimaau shuuliyaayuu, ekw maak James, Alphaeus ukusisa, ekw maak Thaddaeus,

Matthew 11:19

Ekw maak Iinuu Ukusisa chii miichisuu kaye chii minihkweu, chii itweyuuh maak aweyuuh, ‘Kanawaapamaahkw maa uu naapeu, taapwe kaa ukaasichimit kaye taapwe wiihchipeu, e uwiichewaakanit umachaatisiyuuh, kaye aniyuuh nitamukw kaa ihtitwaau kaa maamuushtinamiitwaauh chisheuchimaau shuuliyaayuu.’ Mikw maak taan e ishi pimaatisiit awen ekut e nuukuniyich taan e ishi kachehtaaweyihtahk.”

Matthew 5:46

Chekwaayuu chipaa uhchi miikw Chishemanituu chikaaniyuwiniyuu mikw saachihiitwaau anichii awenichii kaa saachihiiskwaau. Wesh ekun misiwaach e ihtitwaau anichii kaa machituutahkwaau.

Matthew 6:7

“Kaye maak e ayimihaayin, ekaawii aapachihtaah ayimuwin ekaa chekwaan mitun itwemakahch muyaam e ihtitwaau anichii ekaa kaa taapweyimaatwaau Chishemanituu, e iteyihtahkwaau che pehtaakutwaau Chishemanituu mikw aniyuu chineush e ayimihaatwaau.

Luke 15:1

Peyakwaau anichii kaa maamuushtinahkwaau chisheuchimaau shuuliyaayuu kaa itaapatisitwaau chii pechi nituhtaweuch Jesus e pechi mihchetitwaau. Kaye kutakach iinuuch e chischeyimaakanuutwaau e machaatisiitwaau chii pechi takushinuuch.

Luke 18:11

Ekw an Pharisee chii peyakukaapuu e ishi ayimihaat, ‘Chishemanituu, chinanaaskumitin ekaa ishinaakusiyaan kutakach e ishinaakusitwaau awenichii kaye ekaa mistamaauchihtamaasuyaan shuuliyaau kaye ekaa nitamukw ihtuutuukwaau awenichii kaye ekaa pisikwaatisiyaan. Chinanaaskumitin ekaa ishinaakusiyaan taan e ishinaakusit anaah kaa maamuushtinahk chisheuchimaau shuuliyaayuu kaa itaapatisit.

1 Corinthians 5:9

Chichii wiihtamaatinaawaau utah kaa masinahamaatakuch, ekaa chechii wiichewekuch anichii nitamukw kaa itaatisiitwaau.

1 Corinthians 6:1

E ihtakuniyikwe e iteyimat e chii ishi wanituutaask chiichishaan namui wii ekaa kweskaatisiit wiyaaskunichesuu chipaa uhchi ituhtatuwaau chechii waweshihtwaataakw aniyuu. Teyakuch kaa taapwehtahkwaauh e ihtaatwaau ituhtataah.

2 Thessalonians 3:6

Niichishaanitikw, chititashumitinaan Utipeyihchikeu Jesus Christ utishinihkaasuwin uhchi, ekaawii piskaataahkuch anichii awenichii ekaa mitun wiyesh kaa itaapatisitwaau kaye ekaa kaa aapateyihtahkwaau taan kaa ishi chiskutamaataahch.

1 Timothy 6:5

Uchii maak kaa mamachipayihtaasutwaau namui chischeyihtamuch taapwewiniyuu kaye namui kuiskw chii ishi nisituhtamuch taapwewiniyuu. Eyuu maak iteyihtamuch e Chishemanituuwaatisiinaanuyich ekut chechii uhchi uhtisiitwaau.