Matthew 13:22 - Chishemanituu Utayimuwin: Kaa Uskaach Testament

²² Ekw maak an kutak shuumin kaa pahchishihk anite e ihtakuniyikwaauh kaa kaasutewaaskuhkwaauh niipisiyaahtikw, e ati nihtaauchit maak mwehch eukw e ishinaakusitwaau iinuuch kaa nituhtahkwaau Chishemanituu utayimuwiniyuu. Aniyuu naashch e mukushkaachishtaatwaau aschiiyuu chekwaayuuh kaye naashch mikw e wii ushuuliyaamitwaau e ihtitwaau kaye pishikw e mushtenahkwaau chekwaayuu chechii ayaatwaau eukw uyuu wehchi chek wanaataniyich utaapwehtamuwinawaau. Ekw maak namui chii miinisuuch upimaatisiiwiniwaahch.

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

²² ᐁᒄ ᒫᒃ ᐊᓐ ᑯᑕᒃ ᔔᒥᓐ ᑳ ᐸᐦᒋᔑᐦᒃ ᐊᓂᑌ ᐁ ᐃᐦᑕᑯᓂᔨᒀᐤᐦ ᑳ ᑳᓱᑌᐙᔅᑯᐦᒀᐤᐦ ᓃᐱᓯᔮᐦᑎᒄ, ᐁ ᐊᑎ ᓂᐦᑖᐅᒋᑦ ᒫᒃ ᒬᐦᒡ ᐁᐅᒄ ᐁ ᐃᔑᓈᑯᓯᑣᐤ ᐄᓅᒡ ᑳ ᓂᑐᐦᑕᐦᒀᐤ ᒋᔐᒪᓂᑑ ᐅᑕᔨᒧᐎᓂᔫ᙮ ᐊᓂᔫ ᓈᔥᒡ ᐁ ᒧᑯᔥᑳᒋᔥᑖᑣᐤ ᐊᔅᒌᔫ ᒉᒀᔫᐦ ᑲᔦ ᓈᔥᒡ ᒥᒄ ᐁ ᐐ ᐅᔔᓕᔮᒥᑣᐤ ᐁ ᐃᐦᑎᑣᐤ ᑲᔦ ᐱᔑᒄ ᐁ ᒧᔥᑌᓇᐦᒀᐤ ᒉᒀᔫ ᒉᒌ ᐊᔮᑣᐤ ᐁᐅᒄ ᐅᔫ ᐌᐦᒋ ᒉᒃ ᐗᓈᑕᓂᔨᒡ ᐅᑖᐺᐦᑕᒧᐎᓇᐙᐤ᙮ ᐁᒄ ᒫᒃ ᓇᒧᐃ ᒌ ᒦᓂᓲᒡ ᐅᐱᒫᑎᓰᐎᓂᐙᐦᒡ᙮

Matthew 13:22 Iomraidhean Croise

Matthew 12:32

Misiwe awen kaa maayeyimaat Iinuu Ukusisa katachii wepeyihtamuwaakanuu. Namui wiiskaat katachii wepeyihtamuwaakanuu awen maayeyimaate Kaa payehchisiyich Ahchaahkwa.”

Matthew 13:39

An maak awen kaa uhkaataat aniyuu kaa nihtaauchihcheyich an kaa wewepinahk machishuumin anite nihtaauchihchikan aschiihch eukw an machimanituu. An maak che utihchipayihch chechii maamuushtinikanuuhkwaauh aniyuu nihtaauchihchikan eukw an che iskwaapayihch aschii. Anichii maak kaa maamuushtinahkwaau aniyuu nihtaauchihchikan kaa itweyaan, eukw anichii enchilich.

Matthew 13:40

Mwehch maak an che ishinaakuhch che maamuushtinikanuuhkwaauh aniyuu machinihtaauchihchikan, che ishkwaasiikanuuhkwaauh maak ekun mwehch che ispayihch iskwaapayihche aschii.

Matthew 13:7

Ekw aniyuu shuumin kaa paahpahchishtihkwaauh anite kaa kaasutewaaskuhkwaau niipisiyaahtikw e ihtakuniyikwaauh, ekute anite chek kaa ati asich nihtaauchihkwaau. Chek maak namui uhchi miyu nihtaauchinh aniyuu kaa nihtaauchihtaakanuuhkwaau e chii chipishkaatuumakahkwaau aniyuu kaa kaawaaskuhkwaauh niipisiyaahtikw.

Luke 12:15

Ekw Jesus misiwe kaa itaat uyuu, “Yaakwaamiikw, ekaa chechii mushteneyihtamaacheyekw e ishpish wii ayaayekw chekwaan. Wesh taapaa aniyuu e ishi weyuutisiit awen maak naashch e miisitisiikwe, namiyeyuu aniyuu che ihtuutaakut chechii uhchi ayaat kaachiche pimaatisiiwiniyuu.”

Luke 12:21

Jesus kaa itwet, “Ekun maak mwehch e ishinaakuhch awen wiya kaa maauchihtamaasut chekwaayuu. Namui miisitisiyuu iteyimikuu Chishemanituu e kanawaapamikut.”

Luke 21:34

“Yaakwaamiikw taan e ishi pimaatisiyekw. Ekaawii utamihiisukw pisikw chechii minihkweyekw maak pisikw chechii miichisuyekw maak pisikw chechii aayimeyihtamekw taan e ishi pimaatisiinaanuuhch, wesh eukw e ihtitwaau kutakach awenichii. An ihtiyekwe chika chii ishinaakun sischikuuch chechii takushiniyaan mekwaach anit ekaa iteyihtamekwe. An maak sischikuuch takushiniyaane, muyaam nakwaakan ekaa peshuweyihtahk awesiis che nakwaasut eukun che iteyihtaakuhch.

Luke 8:14

Ekw maak an kutak shuumin kaa pahchishihk anite e kaasutewaayikwaau mashkushiih e ihtakuniyikwaauh mwehch eukw e ishinaakusitwaau awenichii kaa nituhtamuwaatwaau Chishemanituu utayimuwiniyuu. Mikw maak aniyuu utaapwehtamuwinawaau chek wanaachihtaakanuuyuu wesaa e aayimeyihtamihiikutwaau e ispayiyich upimaatisiiwiniwaahch kaye miisitisiiwiniyuu e maamituneyihtamihiikutwaau, kaye maak mikw aschiiyuu chekwaayuuh e maamituneyihtamihiikutwaau chechii uhchi miyeyihtahkwaau. Ekw maak namui chii ishi nihtaauchuuch taan aniyuuh chipaa ishi nihtaauchuuch.

ᐊᐸᔅᑕᓚᒡ 8:18

Iskutak Simon wiyaapamaat e ayaawaayich Kaa payehchisiyich Ahchaahkwa aniyuu apastalh kaa saaminaayich, chii wii miyeu shuuliyaayuu aniyuu Peter ekw maak John,

Romans 12:2

Ekaawii nispituwaahkuch taan e ishi pimaatisiitwaau anichii ekaa kaa taapweyimaatwaau Chishemanituuh. Teyakuch pachishtinaakw Chishemanituu aahchiiuh chechii iteyihtaakuhiitaakw e uschihtaat taan e ishi maamituneyihtamuwekw. Ekw maak che chischeyihtamuwekw Chishemanituu utiteyihtamuwin, chika chischeyihtenaawaau chekwaan meywaashiyich kaye chekwaayuu neheyihtamihiikut Chishemanituu, kaye maak aniyuuh chekwaayuuh mitun tekash e kuiskunaakuhkwaauh.

1 Corinthians 1:20

Taan maak an awen naashch kaa kachehtaaweyihtahk. Taan an awen naashch mistahii kaa chiskutamuwaakanuut. Kaye maak taan an awen naashch kaa kaschihuuhtaakusit e ayimit. Chii nuukuhtaau Chishemanituu ekaa mitun chechii iipwaahkaahtaakuniyich aniyuu aschiiyuu kachehtaaweyihtamuwiniyuu.

1 Corinthians 2:6

Anichii awenich kaa miyu nihtaauchitwaau taapwehtamuwinihch ninisituhtaakunaanich kachehtaaweyihtamuwinihch e ishi ayimihiichihtwaau. Namayeu maak an kachehtaaweyihtamuwin awenich utah aschiihch chihchiwe kaa iteyihtahkwaau kaa aayimuutamaan. Namayeu kaye an kachehtaaweyihtamuwin chihchiwe chekwaan kaa iteyihtahkwaau anichii awenich kaa uchimaautwaau. Wesh aniyuu wiyawaau ukachehtaaweyihtamuwinawaau chika iskwaapayiniyuu.

1 Corinthians 2:8

Namui maak waawaach peyakw anichii kaa uchimaautwaau utah aschiihch uhchi nisihtuhtamuch uyuu kachehtaaweyihtamuwiniyuu wesh taapaa chipaa uhchi chiistaaskuhweuch aniyuu Utipeyihchikeuh maauch kaa chisteyihtaakusiyich chii chischeyihtamuwaakupanenich.

1 Corinthians 3:18

Ekaawii awen chika uhchi wii wiyeshihiitisuu. E ihtaakwe awen anit e tashiyekw e iteyihtamukwe naashch e chischeyihtahk chekwaayuu utah aschiihch ekush kata ishinaakusuu ekaa iipwaahkaat chechii uhchi kachehtaaweyihtahk.

2 Corinthians 4:4

Namui taapwehtamuch wesh ihtaayuuh aniyuuh kaa machimanituyich kaa uchimaahkahtamiyich uyuu aschiiyuu. Eukunh maak aniyuuh e ihtuutaakutwaau ekaa chechii waapahtahkwaau aniyuu waashtewiniyuu anit chechii uhchi pimaachihutwaau. Namui chii nisituhtamuch aniyuu miywaachimuwiniyuu ati wehchi waapahtiikuyihkw Jesus Christ uchisteyihtaakusuwin. Wesh mwehch e ishi chisteyihtaakusit Chishemanituu ekun mwehch e ishi chisteyihtaakusit Jesus.

Galatians 1:4

Jesus tekash chii pachishteyimisuu chechii nipahaakanuut chechii wiihkuchihiitahkw taan e ishi tipeyimikuuhkw machaatisiiwiniyuu anuhchiish taan e ishi ihtakuniyich utah aschiihch. Eukw uyuu kaa ishi nituweyihtamiyich Kuuhtaawinuuh Chishemanituuh chechii ihtit.

Ephesians 2:2

Eukun kaa ishi pimaatisiyekw eshkw e chii nuushunehamekw taan e ihtinaanuuhch utah aschiihch kaye eshkw e chii nuushuushkuwekw an kaa uchimaahkahtahk chiishikuyuu, an ahchaahkw kaa ishi aapatisit e piihchishkuwaat aniyuuh aweyuuh ekaa kaa nanihiihtuwaayich Chishemanituuh.

1 Timothy 6:17

Chinituweyimitin maak Timothy, chechii wiihtamutwaau anichii kaa miisitisiitwaau ekaa chechii chihkaateyimishutwaau aniyuu e miisitisiitwaau kaye ekaa chechii aspeyimututahkwaau aniyuu ekaa kaa cheshtinaateyihtaakuniyich miisitisiiwiniyuu. Chischisuumach uste Chishemanituu chechii aspeyimututuwaatwaau an kaa miyu miitahkw misiwe chekwaayuu chechii miyeyihtamihiikuuhkw.

2 Timothy 4:10

Demas wii, shaash uste uyuu aschiiyuu saachihtaau kaye maak nichii nakatikw, anite Thessalonicahch ekute kaa ituhtet. Crescens maak wii anite Galatiahch ekute kaa ituhtet. Ekw Titus anite Dalmatiahch ekute wiya kaa ituhtet.