Matthew 12:45 - Chishemanituu Utayimuwin: Kaa Uskaach Testament

⁴⁵ Uyuu maak wiyaapahtahk e ishinaakuniyich ekw chestuhtet, niyaanituweyimaat niishwaashch machiahchaahkwa uste e iteyihtaakusiyich e iteyihtaakusit wiya, chechii wiichimikut anite aniyuu naapeu piihch e ihtaayich. Ekw maak an naapeu etituu chika iteyihtaakuhiikuu aniyuu niishwaashch machiahchaahkwa taan kaa iteyihtaakusit niishtam, mikw e chii peyakushiyich. Ekun maak che ispayitwaau anichii anuhchiish awenichii kaa machaatisiitwaau.”

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

⁴⁵ ᐅᔫ ᒫᒃ ᐎᔮᐸᐦᑕᐦᒃ ᐁ ᐃᔑᓈᑯᓂᔨᒡ ᐁᒄ ᒉᔅᑐᐦᑌᑦ, ᓂᔮᓂᑐᐌᔨᒫᑦ ᓃᔣᔥᒡ ᒪᒋᐊᐦᒑᐦᑾᐦ ᐅᔅᑌ ᐁ ᐃᑌᔨᐦᑖᑯᓯᔨᒡ ᐁ ᐃᑌᔨᐦᑖᑯᓯᑦ ᐎᔭ, ᒉᒌ ᐐᒋᒥᑯᑦ ᐊᓂᑌ ᐊᓂᔫ ᓈᐯᐤ ᐲᐦᒡ ᐁ ᐃᐦᑖᔨᒡ᙮ ᐁᒄ ᒫᒃ ᐊᓐ ᓈᐯᐤ ᐁᑎᑑ ᒋᑲ ᐃᑌᔨᐦᑖᑯᐦᐄᑰ ᐊᓂᔫ ᓃᔣᔥᒡ ᒪᒋᐊᐦᒑᐦᑾ ᑖᓐ ᑳ ᐃᑌᔨᐦᑖᑯᓯᑦ ᓃᔥᑕᒻ, ᒥᒄ ᐁ ᒌ ᐯᔭᑯᔑᔨᒡ᙮ ᐁᑯᓐ ᒫᒃ ᒉ ᐃᔅᐸᔨᑣᐤ ᐊᓂᒌ ᐊᓄᐦᒌᔥ ᐊᐌᓂᒌ ᑳ ᒪᒑᑎᓰᑣᐤ᙮

Matthew 12:45 Iomraidhean Croise

Matthew 12:24

Mikw maak iskutak kaa pehtawaatwaau anichii Phariseech aniyuu e itweyich, chii iteuch, “Beelzebul, aniyuu machiahchaahkuch uchimaamuwaauh ekun aniyuu kaa miikut mitewiniyuu chechii wiiwiitishihwaayich machiahchaahkwa.”

Matthew 12:44

ekw e itisut, ‘Kaau nika naanituwaapamaau an naapeu kaa nakatak.’ An maak naapeu mwehch waaskaahiikan ishinaakusuu. Kiipaa kaau e ishi chiiwet an machiahchaahkw e naanituweyihtahk anit kaa uhchi wiiwiit waaskaahiikaniyuu. Iskutak maak kaa piihchet meskahk aniyuu waaskaahiikaniyuu ekaa ihtaanuyich kaye e chii wepahiikaanuyikupane kaye naashch e payehchinaakuniyich.

Matthew 17:21

Ekw maak mikw ayimihaate awen ekut mikw chechii wiiwiyich uyuu kaa iteyihtaakusiyich machiahchaahkwa. Namui miin ihtakuniyuu taan chechii ihtit awen.”

Matthew 23:15

“Chekwaan chika ishi machipayinaawaau chiyawaau wiishuwewin kaa chiskutamaacheyekw ekw maak chiyawaau Phariseech mikw kaa ayimihehkaasuyekw. Misiwe e ispichiskamikaach uu aschii chitituhtenaawaau peyakw awen chechii ihtuutawekw chechii taapwehtaataakw maak chechii ihtuutahk taan e ishi chiskutamaachewekw. Iskutak maak kaa saakutaaskunekw chitihtuutawaawaau uste wii chechii machaatisiit ishpishaat chiyawaau. Niishwaa chitahkuchishtaawaanaawaau taan e iteyihtaakusit chechii uhchi ituhtet machishkutehch.”

Matthew 23:24

Chiyawaau ekaa kaa waapahtahkwaau kaa ishinaakusiyekw, ekaa mitun nisituhtamekw, yaapach e wii chischinuhtahekuch awenichii. Naashch yaakwaau chiwiishi naanaakachihtaanaawaau taan e ishi nihiitaakanuuhkwaau aniyuu wiishuwewin ekaa naashch kaa chisteyihtaakuhkwaau ekw aniyuu kaa chisteyihtaakuhkwaau namui chit ishpish nanaakatuweyihtamihiikunaawaau, muyaam awen naashch yaakwaau kaa ihtit chechii saapupayihaat manichuushiisha mikw maak muush kaa saapuhtuwepayihiikut ekun e ishinaakusiyekw.”

Mark 16:9

Iskutak Jesus kaa wanishkaat nipuwinihch uhchi wiipach e chechishepaayaayich aniyuu niishtam e chiishikaayich miin che pimitaushteyich Mary Magdalene niishtam chii nuukushiishtaweu. Eukw uyuu iskweu kaa wiiwiitishihuumaat niishwaashch machiahchaahkwa e chii piihchishkaakuyich.

Mark 5:9

Ekw Jesus kaa itaat, “Taan e ishinihkaasuyin.” Chii itikuu maak, “Kaa mihchetitwaau nitishinihkaasun, wesh naashch taapwe nimihchetinaan.”

Luke 11:26

Uyuu maak wiyaapahtahk e ishinaakuniyich ekw chestuhtet, niyaanituweyimaat niishwaashch machiahchaahkwa uste e iteyihtaakusiyich e iteyihtaakusit wiya chechii wiichimikut anit aniyuu naapeu piihch e ihtaayich. Ekw maak an naapeu etituu chika iteyihtaakuhiikuu aniyuu niishwaashch machiahchaahkwa taan kaa iteyihtaakuhiikut niishtam, mikw e chii peyakushiyich.”

Ephesians 6:12

Wesh namui muhch iinuuch chimaasihaanuuch. Machiahchaahkuch kaa tipeyihchichetwaau chimaasihaanuuch kaye anichii naashch kaa suuhcheyihtaakusitwaau kaye anichii kaa niikaanishkahkwaau wanitipiskusiiwiniyuu utah aschiihch kaa ihtakuniyich. Chimaasihaanuuch kaye anichii mihchetu machiahchaahkuch anite ishpimihch kaa ihtaatwaau.

Hebrews 10:39

Namayeuch maak chiyaanuu awenich kaa chiiwekaapuutwaau kaye kaa wanisinitwaau. Chitaapwehtenaanuu chiyaanuu kaye chipimaachihunaanuu.