Matthew 12:34 - Chishemanituu Utayimuwin: Kaa Uskaach Testament

³⁴ Taanite chechii uhchi itweyekw chekwaan e miyuuhtaakuhch e machaatisiyekw maak mwehch chinepukuch e iteyihtaakusiyekw. Taan e ishi ayimit awen ekut wehchi chischeyihtaakusit taan e ishitehet.

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

³⁴ ᑖᓂᑌ ᒉᒌ ᐅᐦᒋ ᐃᑗᔦᒄ ᒉᒀᓐ ᐁ ᒥᔫᐦᑖᑯᐦᒡ ᐁ ᒪᒑᑎᓯᔦᒄ ᒫᒃ ᒬᐦᒡ ᒋᓀᐳᑯᒡ ᐁ ᐃᑌᔨᐦᑖᑯᓯᔦᒄ᙮ ᑖᓐ ᐁ ᐃᔑ ᐊᔨᒥᑦ ᐊᐌᓐ ᐁᑯᑦ ᐌᐦᒋ ᒋᔅᒉᔨᐦᑖᑯᓯᑦ ᑖᓐ ᐁ ᐃᔑᑌᐦᐁᑦ᙮

Matthew 12:34 Iomraidhean Croise

Matthew 12:35

Wesh taan e ishi ayaat awen upimaatisiiwinihch chika nuukuniyuu. Wesh e ishi ayimit awen ekut wehchi chischeyihtaakusit taan e ishi tehet.”

Matthew 15:18

Mikw maak aniyuu e ishi pechi wiiwiipayiyich awen utuunich e ayimit, utehiihch uhchipainiyuu aniyuu, eukw maak uyuu kaa ihtuutaakut awen chechii machaatisiit.

Matthew 23:33

“Chiyawaau chinepukuch kaye kaa ukusiitutaataakuch chinepukuch naashch kaa kaschihuuyekw nitamukw e ishi wiyeshimekuch awenichii, taanite chechii uhchi wiihkuchihuyekw ekaa chechii ituhteyekw machishkutehch.”

Matthew 3:7

Iskutak maak John wiyaapamaat mihchetu Phariseeh kaye Sadduceeh e pechi takushiniyich chechii siikahaahtuwaakanuyich, chii iteu, “Muyaam taapwe chinepukuch e iteyihtaakusiyekw. Awen kaa ititaakw chechii ushimututamuwekw Chishemanituu utaahkuiwesuwin.

Luke 3:7

Mihchetu maak iinuuch chii nituwaapameuch John chechii siikahaahtaakutwaau ekw kaa itikutwaau, “Muyaam taapwe chinepukuch e iteyihtaakusiyekw. Chititeyihtenaawaau aa chechii ushimututamuwekw Chishemanituu niishtamihch utaahkuyuwesuwin, e siikahaahtaakuyekw ekaa maak wii kweskaatisiyekw.

Luke 6:45

Wesh awen kaa kuiskutaatisiit, taan e ishi miyu ayaat utehiihch kata chischeyihtaakuniyuu upimaatisiiwinihch, ekw maak awen e machaatisiit, taan e ishi maayaach ayaat utehiihch kata chischeyihtaakuniyuu upimaatisiiwinihch. Wesh e ishi ayimit awen ekut wehchi chischeyihtaakusit taan e ishi tehet.”

John 8:44

Machimanituu eukw wehtaawiyekw, aniyuu e ishi nituweyimitaakw chechii ishi machituutamuwekw eukun mikw waa ihtuutamekw. Muush chii nipahiiweu kaa ishpish ihtakuniyich uyuu aschiiyuu. Namui wiiskaat uhchi nituweyihtam kuiskw chechii ishi wiihtaakuniyich chekwaayuu wesh namui mitun ihtakuniyuu taapwewiniyuu anit e ihtaat. Muush nanatayuu wesh ekun chihchiwe e itaatisiit, eukw maak an taapwe weuhtaawiitutawaat aniyuuh kaa nanatayich.

Ephesians 4:29

Ekaawii nitamukw ayimuwin aapachihtaakw, teyakuch ishi ayimukw aniyuu che miyu wiichihiikutwaau anichii kaa pehtaataakuch awenichii mikw taan e ispayiwaakwenich upimaatisiiwinawaahch.

Ephesians 5:4

Namui kuiskunaakuniyuu Chishemanituu utiiniim chechii wawiinihtaakuniyich utayimuwiniyuu maak chechii chiishkwe ayimiyich maak nitamukw chechii ishi wawiitweyich. Teyakuch muush chipaa nanaaskumeuch Utipeyihchikeuh misiwe chekwaayuu.

James 3:2

Misiwe awen mihchetwaau wanipayuu. An awen ekaa wiiskaat kaa wanipayit taan e itwet namui ihtakuniyuu machaatisiiwiniyuu chechii ishi ataameyihtaakusit, kaye chii ihtuu chechii nanaakaataweyihtahk misiwe taan e ihtit.

1 John 3:10

Awen ekaa kaa kuiskutaatisiit maak ekaa saachihaat wiichishaan, namui utawaashiimitutaakuu Chishemanituuh. Ekut wehchi chischeyimaakanuut awen aweyuu wetawaashiimitutaakut, Chishemanituu maak machimanituu.