Matthew 12:26 - Chishemanituu Utayimuwin: Kaa Uskaach Testament

²⁶ Anichii maak kaa nuushuushkuwaatwaau machimanituu, maasihiitutwaawenich maak, chika wanaachihtaakanuuyuu machimanituu uchisheuchimaawin.

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

²⁶ ᐊᓂᒌ ᒫᒃ ᑳ ᓅᔔᔥᑯᐙᑣᐤ ᒪᒋᒪᓂᑑ, ᒫᓯᐦᐄᑐᑣᐌᓂᒡ ᒫᒃ, ᒋᑲ ᐗᓈᒋᐦᑖᑲᓅᔫ ᒪᒋᒪᓂᑑ ᐅᒋᔐᐅᒋᒫᐎᓐ᙮

Matthew 12:26 Iomraidhean Croise

Matthew 13:19

An maak awen kaa pehtahk aniyuu miywaachimuwiniyuu e aayimuutaakanuyich Chishemanituu uchisheuchimaawiniyuu ekaa maak nesituhtamukwe, muyaam an shuumin anite yaaiskanuu kaa pahchishihk ekun e ishinaakusit, machimanituu meskamikuu taan kaa ishi pehtahk ekw maak namui chii nihtaauchuu anite Chishemanituu ishi e ihtaayich.

Matthew 4:10

Mikw maak Jesus chii nishkweushiheu e itaat, “Chiya machimanituu, maachiih iiches nete. Itashteu Chishemanituu utayimuwinihch, Mikw Utipeyihchikeu Chichishemanituumiwaau nuuchiishtuwaahkw kaye mikw wiya atushkuwaahkw.”

Matthew 9:34

Mikw maak anichii Phariseech chii iteuch, “Aniyuu wesin kaa niikaanishkuwaayich machiahchaahkwa eukw aniyuu kaa miikut suuhkaatisiiwiniyuu chechii wiiwiitishihwaat machiahchaahkwa.”

John 12:31

Anuhchiish utihchipayuu chechii wiyaaskunaakanuutwaau awenich utah aschiihch kaa ihtaatwaau kaye anuhchiish ekw wetihchipayiyich chechii ishpishihaakanuut machimanituu, an kaa tipeyihchet utah aschiihch.

John 14:30

Namui shaash naashch chineush chika chii ayimihiitinaawaau, wesh machimanituu, an kaa tipeyihchiket utah aschiihch shaash pechi takushinuu. Mikw maak namui mitun nika chii uchimaahkahtaakw.

John 16:11

Wanipayuuch taan e ishi kanawaapahtahkwaau Chishemanituu uwiyaaskunichewiniyuu wesh machimanituu shaash chii wiyaaskunikuu Chishemanituuh.”

2 Corinthians 4:4

Namui taapwehtamuch wesh ihtaayuuh aniyuuh kaa machimanituyich kaa uchimaahkahtamiyich uyuu aschiiyuu. Eukunh maak aniyuuh e ihtuutaakutwaau ekaa chechii waapahtahkwaau aniyuu waashtewiniyuu anit chechii uhchi pimaachihutwaau. Namui chii nisituhtamuch aniyuu miywaachimuwiniyuu ati wehchi waapahtiikuyihkw Jesus Christ uchisteyihtaakusuwin. Wesh mwehch e ishi chisteyihtaakusit Chishemanituu ekun mwehch e ishi chisteyihtaakusit Jesus.

Colossians 1:13

Chichii wiihkuchihiikunuu taan aniyuuh kaa ishi tipeyimikuuhk wanitipiskusiiwiniyuu miiskuch aniyuu naashch kaa saachihaat Uukusisa uchimaawiniyuu ekw chechii tipeyimikuuhk.

1 John 5:19

Chichischeyihtenaanuu Chishemanituu e utawaashiimituutaatahkw. Misiwe anichii utah aschiihch kaa ihtaatwaau tipeyimikuuch machimanituu.

Revelation 12:9

Ekw kaa niihchiwepinaakanuut an mista maanichuus kihchikiishikuhch uhchi. Eukw maak an chinepukw weskach anite kaa ihtaat, Machimanituu maak Satan kaa ishinihkaataakanuut. Eukw uu kaa chii wiyeshihaat misiwe aweyuu utah aschiihch. Anite maak aschiihch chii ishuwepinaakanuu kaye misiwe aniyuu utenchilamh.

Revelation 16:10

Ekw an Niyaayinuu kaa ihtaat enchil kaa kutapinahk uwiyaakan anite ishi aniyuu machi awesiisa uchisheuchimaau tehtapuwiniihch. Chii tipischipayuu maak anite an machi awesiis uchimaau utaschiihch. Chii maamaakuhtamuch awenichii uteyiniiwaau e ishpish wiisacheyihtahkwaau

Revelation 9:11

Aniyuuh enchilh kaa uchimaaututamiyich aniyuu kaa mista pukuneyaayich ekun aniyuuh kaa uchimaamitwaau. Hebrew e ishi ayiminaanuyich Abaddon chii ishinihkaasuyuuh. Greek maak e ishi ayiminaanuyich Apollyon chii ishinihkaasuyuuh. Kaa wanaachihiiwet ishi itweshtamuwaataakanuuyuu aniyuu utishinihkaasuwin.