Matthew 11:11 - Chishemanituu Utayimuwin: Kaa Uskaach Testament

¹¹ Chiwiihtamaatinaawaau, tahtu awenichii kaa pimaatisiitwaau namui uste iteyihtaakusuuch taan e iteyihtaakusiyich John siikahaahtaacheu. Yaapach maak an taan maauch nuuhtaash kaa iteyihtaakusit kihchikiishikw chisheuchimaawinihch uste wiya chisteyihtaakusuu ishpishaat Johna.

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

¹¹ ᒋᐐᐦᑕᒫᑎᓈᐙᐤ, ᑕᐦᑐ ᐊᐌᓂᒌ ᑳ ᐱᒫᑎᓰᑣᐤ ᓇᒧᐃ ᐅᔅᑌ ᐃᑌᔨᐦᑖᑯᓲᒡ ᑖᓐ ᐁ ᐃᑌᔨᐦᑖᑯᓯᔨᒡ ᒞᓐ ᓰᑲᐦᐋᐦᑖᒉᐤ᙮ ᔮᐸᒡ ᒫᒃ ᐊᓐ ᑖᓐ ᒫᐅᒡ ᓅᐦᑖᔥ ᑳ ᐃᑌᔨᐦᑖᑯᓯᑦ ᑭᐦᒋᑮᔑᒄ ᒋᔐᐅᒋᒫᐎᓂᐦᒡ ᐅᔅᑌ ᐎᔭ ᒋᔅᑌᔨᐦᑖᑯᓲ ᐃᔥᐱᔖᑦ ᒞᓐ᙮

Matthew 11:11 Iomraidhean Croise

Matthew 11:10

Eukw uu John kaa aayimuumaakanuut anite Chishemanituu utayimuwinihch kaa itashtech, Nika niikaanitishihwaau awen chechii ayeskuwiihkahk aniyuu meskanaayuu anit che pimuhteut.

Matthew 11:12

Kaa ishpish chihchipayihtaat maak John siikahaahtaacheu e kacheskwet, ute maak ishi anuhchiish, muush wii sasuuhcheyimutaakanuu kihchikiishikw chisheuchimaawin, kaye kaa aahkwaateyihtaakusitwaau awenichii naashch suuhk e maasihchetwaau wiyawaau e wii maakunamaasutwaau.

Matthew 3:1

Ekut maak utah mekwaach John siikahaahtaacheu kaa chii ituhtet anite pakwaatiskamikaahch, anite Judea aschiihch itehche, ekw kaa chihchipayihtaat e kacheskwet.

Matthew 3:11

Nipiihch chisiikahaahtaatinaawaau niya e nuukuhch e wii kweskaatisiyekw, mikw maak kutak awen chika takushinuu uste e chisteyihtaakusit ishpishaat niya. Namui maak mechim nitepicheyihtaakusin chechii aapihkunamuch umaschisiniyaapii. Wiya maak chika siikahaahtaakuwaau Kaa payehchisiyich Ahchaahkwa, kaye ishkuteyuu.

Matthew 5:19

Ekw maak awen ekaa nanihiihtahke aniyuu aat ekaa naashch chisteyihtaakuniyich kacheskwewiniyuu, nesht kaye chiskutamuwaate kutak chechii ihtiyich, eukw an maauch namui wiyesh chika uhchi iteyihtaakusuu anite kihchikiishikw chisheuchimaawinihch. Ekw maak awen nanihiihtahke aniyuuh wiishuwewinh kaye ishi chiskutamuwaate kutak aweyuuh uyuu chechii ihtiyich, eukuu che chisteyihtaakusit anite kihchikiishikw chisheuchimaawinihch.

Luke 1:15

Utipeyihchikeu chii wiyaapamikuu an awaash wesh chisteyihtaakuniyuu taan waa itaapachihiikut. Namui nihtaa kata uhchi minihkweu shuuminaapuuyuu kaye ishkutewaapuuyuu. Wesh Kaa payehchisiyich Ahchaahkwa tekash chika pimipayihiikuu aat eshkw mekwaach ukaawii kanuweyimikute uspayaayihch.

Luke 7:28

Jesus maak chii iteu, “Chiwiihtamaatinaawaau, tahtu uchischiwehiichesuuch kaa pimaatisiitwaau namui uste iteyihtaakusuuch taan e iteyihtaakusiyich John siikahaahtaacheu. Yaapach maak an awen maauch nuuhtaash kaa iteyihtaakusit kihchikiishikw chisheuchimaawinihch uste wiya chisteyihtaakusuu ishpishaat John.”

Luke 9:48

“Awen e utinaat peyakw uyuu awaasha nitishinihkaasuwinihch uhchi, mwehch kaye niya e utinit ekun e ishinaakuniyich. An maak awen kaa utinit namayeu niya kaa utinit, aniyuuh kaa pechi itishahuyich eukw aniyuu wetinaat. Wesh an awen maauch nuuhtaash kaa iteyihtaakusit anit e tashiyekw eukun an maauch chesteyihtaakusit.”

John 1:15

John chii wiihtam aweyuu nihaau Jesus e aawiyich. Eyuu maak chii wiihtam e itwet, “Chichischisinaawaau aa kaa aayimuumak awen kaa itweyaan, ‘Chika pechi takushinuu eshkw awen etituu e chisteyihtaakusit ishpishaat niya. Eukw uu Jesus kaa aayimuumak an kaa ihtaat eshkw ekaa uhchi pimaatisiyaan niya.’ ”

John 1:27

Uu maak eshkw che takushihk wiya uste chisteyihtaakusuu ishpish niya, namui waawaach nitepicheyihtaakusin chechii aapihkunamuch umaschisiniyaapiih.”

John 10:41

Mihchetu maak aweyuu chii pechi nituwaapamikuu kaa itweyich, “Namui wiiskaat uhchi maamishkaach ihtuutam John, mikw maak misiwe taapwemakaniyuu taan kaa itaachimaat uyuuh naapeuh.”

John 3:30

Iteyihtaakuniyuu maak wiya etituu chechii ati chisteyimaakanuut ekw niya wetaach ekaa chechii ishpish chisteyimikuyaan.”

John 5:35

Mwehch waashtenamaakan e chiihkaashtuwech ekun kaa ishinaakusit John tepaachimit. Chichii naheyihtenaawaau mikw weipishchiish chechii muuchicheyihtamekw anite uwaashtuwewinihch.

John 7:39

Eukw uyuu kaa itwet Jesus e aayimuumaat Kaa payehchisiyich Ahchaahkwa, aniyuu misiwe awen kaa taapwehtahk che ayaawaat. Anichii kaa taapwehtahkwaau eshkw namui uhchi miyaakanuuch aniyuuh Kaa payehchisiyich Ahchaahkwa wesh eshkw namui uhchi nituwaapameu Jesus uhtaawiimaauh chechii chisteyihtaakuhaakanuut.

1 Corinthians 15:9

Wesh niya maauch namui chekwaan nititeyihtaakusin e tashitwaau misiwe anichii kaa wiyaapamaakanuutwaau apastal chechii itaapachihaakanuutwaau. Namui waawaach nitepicheyihtaakusin apastal chechii ishinihkaatikuyaan wesh nichii nanehkaachihaayuuh Chishemanituu utiiniimh.

1 Corinthians 6:4

Ekw maak taapwe wenituutaaskwe chiichishaan namui chipaa uhchi ituhtahaau wiyaaskunichesuu e ihtaayich chechii wiyaaskunikut. Wesh wiyaaskunichesuuch taapaa ayaauch uchimaawiniyuu anite umaamuuayimihaauh e ihtaayich.

Ephesians 2:3

Ekun maak peyakwaau misiwe kaa ishinaakusiihkw kaye chiyaanuu, mikw taan waa ihtiihkw chichii ihtinaanuu. Chichii ihtuutenaanuu mikw taan e ishi nituweyihtamuumakahkwaau chiyaasinuuh kaye chimituneyihchikanuuh. An maak kaa ishpish chii machaatisiihkw chii iteyihtaakuniyikupane taapwe kaye chiyaanuu chechii waweshihiitahkw Chishemanituu.

Ephesians 3:8

Aat maak niya maauch nuuhtaash e iteyihtaakusiyaan e iteyihtaakusitwaau kaa taapwehtahkwaau, yaapach niya nichii shaweyimikw Chishemanituu e chii miit chechii waawiihtamuumach aniyuuh ekaa Jewa kaa itiskaanesiitwaauh taan e ishpish naaspich weyuutaniyich kaye e ishpish ekaa nihtaa puunipayiyich taan waa ishi shaweyimitahkw Chishemanituu Christ e ihtaayich uhchi.

2 Timothy 1:10

Iskutak maak chipimaachihiiweminuu Jesus Christ kaa pechi nuukuhaakanuut utah aschiihch ekut kaa uhchi chischeyihtamuhk chishewaatisiiwin. Wiya Jesus chii shaakuuchihtaau nipuwiniyuu kaye maak chichii waapahtiikunuu miywaachimuwinihch uhchi e ihtakuhch kaachiche pimaatisiiwin.

Hebrews 11:40

Wesh chii ihtakuniyuu taan kaa ishi wiyeyihtamaatahkw Chishemanituu etituu e miywaayich. Namui uhchi wii miikuuch pitamaa Chishemanituu aniyuu taan kaa itikutwaau che ishi miikutwaau wesh maamuu chichii wii mitunaakuhiikunuu.

1 Peter 1:10

Eukw uyuu pimaachihiikusiiwiniyuu naashch suuhk kaa nituu chischeyihtahkwaau aniyehkaanaanich uchischiwehiichesuuch kaye naashch yaakwaau chii ishi nituu chischeyihtamuch. Chii niikaan aayimuutamuch maak uyuu miiwewiniyuu Chishemanituuh che miikuwekw.