Mark 9:24 - Chishemanituu Utayimuwin: Kaa Uskaach Testament

²⁴ Tiiwehch kaa uhchi aashihkwet an uhtaawiimaau, “Nitaapwehten mikw maak namui naashch nitayaan taapwehtamuwin. Wiichihiih etituu chechii ayaayaan taapwehtamuwin.”

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

²⁴ ᑏᐌᐦᒡ ᑳ ᐅᐦᒋ ᐋᔑᐦᑴᑦ ᐊᓐ ᐅᐦᑖᐐᒫᐤ, ᓂᑖᐺᐦᑌᓐ ᒥᒄ ᒫᒃ ᓇᒧᐃ ᓈᔥᒡ ᓂᑕᔮᓐ ᑖᐺᐦᑕᒧᐎᓐ᙮ ᐐᒋᐦᐄᐦ ᐁᑎᑑ ᒉᒌ ᐊᔮᔮᓐ ᑖᐺᐦᑕᒧᐎᓐ᙮

Mark 9:24 Iomraidhean Croise

Mark 9:23

Chii iteu maak Jesus, “Chekwaan wehchi itweyin chechii wii wiichihiiwaahche. Wesh awen kaa taapwehtahk misiwe taan waa ihtit chika chii ihtuutam.”

Mark 9:25

Jesus maak chii waapameu aniyuu iinuuh kaa pechi maausikukaapuwiitwaauh e ati siihchiskaatuyitwaau ekw kaa chistahamuwaat aniyuu machiahchaahkwa e itaat, “Chiya ahchaahkw ekaa kaa pehtaman neshta ekaa kaa nihtaaweyin, maachiih wiiwiih anit uu naapesh e ihtaat uhchi. Ekaawii miin chika uhchi piihchishkuwaau.”

Luke 17:5

Jesus uchischinuhamuwaakanh chii itikuu, “Utipeyihchikeu, ihtuut maa nitaapwehtamuwinaan etituu chechii suuhcheyihtaakuhch.”

Luke 7:38

Mekwaach maak Jesus e uhpimeshihk anit e miichisutwaau, an iskweu chii niipuu anite itehche Jesus usitiihch, e maatut. Aniyuu maak e uhchikuwaapit chii nipiyuuhtaaweu Jesus usith. Ekw kaa uchihchiihkunapit ustikwaaniyaapii e aapachihtaat e paahkusitenaat. Kaye maak e uchehtamuwaat kaye e tuuminamuwaat aniyuu e wiihchimaakusiyich tuuminikaniyuu.

Luke 7:44

Ekw aniyuu iskweu kaa kanawaapamaat Jesus ekw kaa itaat aniyuu Simon, “Chiwaapamaau aa uu iskweu taan e ihtit. Kaa pechi piihcheyaan utah chiichihch namui mechim kuuhchi pechi miin nipii chechii chishtaapautaayaan nisith. Wiya maak chii chishtaapautaau nisith uhchikuwaapuwinihch uhchi, kaye chii paahkuham nisith ustikwaaniyaapii e aapachihtaat.

ᐊᐸᔅᑕᓚᒡ 10:19

Peter maak eshkw mekwaach chii maamituneyihtam taan chipaa chii ishi wiihtamaachemakaniyich aniyuu kaa waapahtiyaakanuut. Ekw kaa itikut Kaa payehchisiyich Ahchaahkwa, “Nituhta maa, nishtuuch utah naapeuch e pechi naanituweyimiskwaau.

ᐊᐸᔅᑕᓚᒡ 10:31

Ekw kaa iishit, ‘Cornelius, Chishemanituu chii pehtam taan kaa ishi ayimihaayin kaye chii waapahtam taan kaa ishi wiichihiitwaau kutakach awenichii,’ nichii itikw.

2 Corinthians 2:4

Utah kaa masinahamaatakuch mekwaach naashch taapwe nichii mukushkaateyihten. Nichii piikutehen. Mistahii kaye nichii uhchikuwaapin. Taapaa kuuhchi wii misimeyihtamihiitinaawaau an kaa masinahamaatakuch mikw chichii wii chischeyihtamihiitinaawaau taan e ishpish mista saachihiitakuch.

Ephesians 2:8

Chishemanituu sehchei chichii shaweyimikunuu kaa pimaachihiitahkw an e taapwehtamukw uhchi. Namayeu wii chiyaanuu uhchi kaa uhchipayihch chechii pimaachihuyihkw. Chishemanituu uyuu umiiwewin.

Philippians 1:29

Chishemanituu maak chichii wiyeyimukuwaau namui mikw chechii taapweyimekw Christ, chichii wiyeyimikuwaau kaye chechii nanehkaachihiikuyekw Christ uhchi.

2 Thessalonians 1:11

Euk maak uu wehchi muush ayimiheshtamaataahch. Nitutamuwaanaan Chishemanituu chechii tepicheyihtaakusiyekw chechii ishi pimaatisiyekw aniyuu taan kaa ishi nituweyimitaakw chechii ishi pimaatisiiwekw. Nitutamuwaanaan chechii miitaakw suuhkaatisiiwiniyuu chechii ihtuutamekw misiwe e ishi pukuseyimikuyekw chechii ishi miyutuutamekw. Kaye chechii wiichihiitaakw chechii chiistaawekw aniyuuh chekwaayuuh kaa ihtuutamuwekw e taapwehtamekw.

2 Thessalonians 1:3

Niichishaanaanich, iteyihtaakun muush chechii nanaaskumachiht Chishemanituu chiyawaau uhchi wesh etituu chit ati taapweucheyimaawaau Christ kaye maak wetaach etituu chisaachihiitunaawaau.

2 Timothy 1:4

Nichischisin taan kaa ishi uhchikuwaapiyin maahchishtai kaa waapamitaan. Taapwe nipaa miyeyihten miin waapamitaan wesh naashch chiwii waapamitin.

Hebrews 12:17

Chichischeyihtenaawaau maak, paatimaa anite kaau chii nituweyihtam aniyuu taan chipaa ishi aanische shaweyimaakanuu, mikw maak namui uhchi niskumikuu uhtaawii. Namui mitun uhchii wiyesh ihtuu chechii kwestinahk aniyuu taan kaa ihtit aat kaye naashch e chii maatutawaat uhtaawii. Yaakwaamiikw ekaa chechii ispayekw chiyawaau.

Hebrews 12:2

Kaye kanawaapamaataau Jesus, an kaa ihtuutaatahkw chechii taapwehtamuhkw. Wiya chiwiichihiikunuu wetaach chechii suuhchikaapuuyihkw chitaapwehtamuwinaahch paatish tekash chii nanihiiwehiihkwe Chishemanituu. Chii shaapushkam nipuwiniyuu asiteyaahtikuhch kaye namui mechim uhchi aapateyihtamihiikuu aat e chii maayeyimaakanuut kaye e chii nenehkaateyimuhaakanuut wesh mikw aniyuu taan che ishpish muuchicheyihtahk iskutak miyaaupayiche anit e nanehkaateyimut ekun aniyuu kaa maamituneyihtamihiikut. Ekw maak anuhchiish, wiya chuuchisheuchimaaminaanuu anite maak apuu Chishemanituu unihiiwiniihch iitehche.

Hebrews 5:7

Mekwaach utah aschiihch kaa papaamuhtet Jesus mihchetwaau chii ishinaakusuu suuhk e nitutamuwaat aniyuuh kaa chischeyimaat chechii wiichihiikut ekaa chechii nipahaakanuut. Chii pehtaakuu maak wesh chii nanihchiishtuweu.