Mark 11:23 - Chishemanituu Utayimuwin: Kaa Uskaach Testament

²³ Kuiskw chiwiihtamaatinaawaau, awen chechii itashuwaatamukwe uyuu wachiyuu, pihkuchiih ekw anite chihchikamiihch che ishiwepinisuyin, ekaa maak mitun aanuwehtahke chechii ispayiyich uyeyuu, mitun taapwehtahke aniyuu kaa itwet che ispayiyich, ekun che ihtuutamuwaakanuut taan kaa ishi nitaweyihtahk.

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

²³ ᑯᐃᔅᒄ ᒋᐐᐦᑕᒫᑎᓈᐙᐤ, ᐊᐌᓐ ᒉᒌ ᐃᑕᔓᐙᑕᒧᑴ ᐅᔫ ᐗᒋᔫ, ᐱᐦᑯᒌᐦ ᐁᒄ ᐊᓂᑌ ᒋᐦᒋᑲᒦᐦᒡ ᒉ ᐃᔑᐌᐱᓂᓱᔨᓐ, ᐁᑳ ᒫᒃ ᒥᑐᓐ ᐋᓄᐌᐦᑕᐦᑫ ᒉᒌ ᐃᔅᐸᔨᔨᒡ ᐅᔦᔫ, ᒥᑐᓐ ᑖᐺᐦᑕᐦᑫ ᐊᓂᔫ ᑳ ᐃᑗᑦ ᒉ ᐃᔅᐸᔨᔨᒡ, ᐁᑯᓐ ᒉ ᐃᐦᑑᑕᒧᐙᑲᓅᑦ ᑖᓐ ᑳ ᐃᔑ ᓂᑕᐌᔨᐦᑕᐦᒃ᙮

Mark 11:23 Iomraidhean Croise

Matthew 14:13

Iskutak maak Jesus kaa pehtahk aniyuu John e chii nipahaakanuyich chii puusuu utiyuu e peyakushit ekw anite kaa isichimet ekaa mitun ihtaanuyich. Anichii maak iinuuch iskutak chescheyihtahkwaau taanite e ihtaayich chii chistuhteuch anit ihtaawinihch uhchi ekw kaa nituwaapamaatwaau.

Matthew 17:20

Ekw Jesus kaa itaat, “Kiipaa an ekaa ishpishaach chitaapwehtamuwinawaau. Taapwe chititinaawaau aat mikw apishaashiche chitaapwehtamuwin muyaam e ishpish apishiishit shuumin mastart kaa ishinihkaasut ishpishaache, wachii chika chii itashuwaaten, ‘Nete ishi aahchikaapuu.’ Chika pishichihiikuun maak. Mikw chekwaan waa ihtuutaman chika chii ihtuuten ayaayine taapwehtamuwin.

Matthew 21:21

Ekw Jesus kaa itaat, “Chiwiihtamaatinaawaau, ekaa mitun che uhchi aanuwehtamuwekwe mitun che taapwehtamuwekwe, chika chii ihtuutawaawaau kaye chiyawaau taan kaa ihtuutuuk uu misishuuminaahtikw. Namayeu mikw an chekwaan chechii ihtuutamekw kaye chika chii itashuwaaten wachii, ‘Ishiwepinisuh anite chihchikamiihch.’ Chika pishichihiikuun maak.

Luke 17:6

Ekw Utipeyihchikeu kaa itaat, “Aat naashch apishaashiche chitaapwehtamuwinawaau taapishkuuch maauch kaa aapishiishit shuumin kaa ispichishtit ishpishaache, mistikw chika chii itaau, ‘Wiihkuhuuh anit kaa nihtaauchiyin ekw anite che ishi wepinisuyin chihchikamiihch,’ chika pishichihiikw.”

John 14:13

Nika ihtuuten taan e ishi nitutamaayekw nitishinihkaasuwin aapachihtaayekwe, ekw maak che nuukuhch e ishpish chisteyihtaakusit Chishemanituu aniyuu uhchi taan e ishi ihtuutamiyich Ukusisa.

John 15:7

Niya maak e ihtaayaan muush ishi pimaatisiyekwe kaye nititwewinh piihchishkaakuyekwe mikw taan che ishi nitutamaawekwe chekwaan eukun an che ihtuutamaakuyekw.

1 Corinthians 13:2

Kaye maak aat miikuyaan chechii kaschihuyaan e chischiwehiicheyaan, kaye maak aat misiwe chischeyihtamaan niya taan e ishi ekaa chischeyihtahkwaau kutakach awenich, kaye aat miikuyaan misiwe chechii chischeyihtamaan chekwaan ekaa uhchi chischeyihtamihiiwaanuuhch anite utaahch kaye maak aat ayaayaan taapwehtamuwin chechii aahtinamaan wachiih ekaa maak ayaayaan saachihiiwewin yaapach namui mitun chekwaan nipaa uhchi iteyihtaakusin.