Mark 10:43 - Chishemanituu Utayimuwin: Kaa Uskaach Testament

⁴³ Mikw maak ekaawii chika uhchi ishinaakusinaawaau chiyawaau. An awen anit e tashiyekw netaweyihtamukwe chihchiwe chechii iteyihtaakusit ekush chika ihtuutam chechii atushkaataakw.

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

⁴³ ᒥᒄ ᒫᒃ ᐁᑳᐐ ᒋᑲ ᐅᐦᒋ ᐃᔑᓈᑯᓯᓈᐙᐤ ᒋᔭᐙᐤ᙮ ᐊᓐ ᐊᐌᓐ ᐊᓂᑦ ᐁ ᑕᔑᔦᒄ ᓀᑕᐌᔨᐦᑕᒧᑴ ᒋᐦᒋᐌ ᒉᒌ ᐃᑌᔨᐦᑖᑯᓯᑦ ᐁᑯᔥ ᒋᑲ ᐃᐦᑑᑕᒻ ᒉᒌ ᐊᑐᔥᑳᑖᒄ᙮

Mark 10:43 Iomraidhean Croise

Mark 10:42

Ekw Jesus misiwe kaa wiishaamaat kaa itaat, “Anichii kaa uchimaautwaau kaa iteyimaakanuutwaau naashch wii katipeyimeuch aniyuu iinuuh kaa niikaanishkuwaatwaau. Uchii maak kaa uchimaaweyimaakanuutwaau ihtaayuuh uchimaamuwaauh naashch e suuhcheyihtaakusiyich e niikaanishkaacheyich, mitun tekash e wii wiishuwaatikutwaau.

Mark 10:44

Ekw an awen kaa wii niikaanapihiisut eukuu misiwe e tashiyekw che utaapachihaakaniyekw.

Mark 9:35

Chii waweyapuu Jesus, kaa wiishaamaat aniyuu niishushaap uchischinuhamuwaakanh ekw kaa itaat, “An awen netaweyihtamukwe wiya maauch niikaan chechii iteyihtaakusit, maauch aasuk chipaa ishi pachishtinisuu kaye misiwe aweyuu chipaa miyu atushkuweu.”

Luke 14:11

Wesh awen mistahii kaa wii iteyimikusiit Chishemanituu chika tipihteyimuhiikuu. An maak kaa tipihteyimitisut eukw an che chisteyihtaakuhiikut Chishemanituu.”

Luke 18:14

Chiwiihtamaatinaawaau maak, uu naapeu chii chiiweu taapwe e kuiskunaakusit Chishemanituu e kanawaapamikut. Namui wii an Pharisee. An awen mistahii kaa iteyimisut kata tipihteyihtaakuhiikuu Chishemanituu ekw an kaa tipihteyimitisut awen eukw che chisteyihtaakuhaakanuut.”

Luke 22:26

Chiyawaau maak anit e tashiyekw aahchiiuh wesh chipaa iteyihtaakusinaawaau. Awen waa ispeyihtaakusikwe anit e tashiyekw, ekush an awen maauch ekaa uchimaaweyihtaakusit chipaa itahiisuu. Ekw an taan waa niikaanishkaachekwe ekush katawii kuuhpaaneweyihtaakuhiisuu.

Luke 9:48

“Awen e utinaat peyakw uyuu awaasha nitishinihkaasuwinihch uhchi, mwehch kaye niya e utinit ekun e ishinaakuniyich. An maak awen kaa utinit namayeu niya kaa utinit, aniyuuh kaa pechi itishahuyich eukw aniyuu wetinaat. Wesh an awen maauch nuuhtaash kaa iteyihtaakusit anit e tashiyekw eukun an maauch chesteyihtaakusit.”

John 18:36

Ekw Jesus kaa itwet, “Namui utah aschiihch uhchipayuu nuuchimaawin. Utah chii uchiimakanikupane nuuchimaawin anichii nitaapachihaakanich suuhk chipaa maasihtaauch ekaa chechii pachishtinikuyaan anite Jewa iinuuch e ihtaatwaau. Namui utah aschiihch uhchipayuu nuuchimaawin.”

Romans 12:2

Ekaawii nispituwaahkuch taan e ishi pimaatisiitwaau anichii ekaa kaa taapweyimaatwaau Chishemanituuh. Teyakuch pachishtinaakw Chishemanituu aahchiiuh chechii iteyihtaakuhiitaakw e uschihtaat taan e ishi maamituneyihtamuwekw. Ekw maak che chischeyihtamuwekw Chishemanituu utiteyihtamuwin, chika chischeyihtenaawaau chekwaan meywaashiyich kaye chekwaayuu neheyihtamihiikut Chishemanituu, kaye maak aniyuuh chekwaayuuh mitun tekash e kuiskunaakuhkwaauh.

Galatians 5:13

Niichishaanitikw. Chichii wiyeyimikunaawaau chechii wiihkuchihiikuyekw taan e ishi maahchikwaapihkaasuyekw. Ekaawii mikw chika uhtaapachihunaawaau uu e chii wiihkuchihiikuyekw chechii tawiishtamekw chechii machituutamekw. Teyakuch chipaa waawiichihiitunaawaau e saachihiituyekw.