Luke 8:13 - Chishemanituu Utayimuwin: Kaa Uskaach Testament

¹³ Ekw an shuumin anite e asiniyuuniyich kaa pahchishihk mwehch eukw e ishinaakusitwaau awenichii kaa pehtahkwaau Chishemanituu utayimuwiniyuu e taapwehtahkwaau kaye maak naashch e miyeyihtamihiikutwaau. Muyaam maak an nihtaauchihchikanh ekaa yaaich nihtaauchiniyikwaau utipiih eukw e ishinaakusitwaau anichii aat weipishchiish kaa taapwehtahkwaau. Iskutak kakwechihiiwewiniyuu nechiskahkwaau ekut shaash pehchishihkwaau.

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

¹³ ᐁᒄ ᐊᓐ ᔔᒥᓐ ᐊᓂᑌ ᐁ ᐊᓯᓂᔫᓂᔨᒡ ᑳ ᐸᐦᒋᔑᐦᒃ ᒬᐦᒡ ᐁᐅᒄ ᐁ ᐃᔑᓈᑯᓯᑣᐤ ᐊᐌᓂᒌ ᑳ ᐯᐦᑕᐦᒀᐤ ᒋᔐᒪᓂᑑ ᐅᑕᔨᒧᐎᓂᔫ ᐁ ᑖᐺᐦᑕᐦᒀᐤ ᑲᔦ ᒫᒃ ᓈᔥᒡ ᐁ ᒥᔦᔨᐦᑕᒥᐦᐄᑯᑣᐤ᙮ ᒧᔮᒻ ᒫᒃ ᐊᓐ ᓂᐦᑖᐅᒋᐦᒋᑲᓐᐦ ᐁᑳ ᔮᐃᒡ ᓂᐦᑖᐅᒋᓂᔨᒀᐤ ᐅᑎᐲᐦ ᐁᐅᒄ ᐁ ᐃᔑᓈᑯᓯᑣᐤ ᐊᓂᒌ ᐋᑦ ᐌᐃᐱᔥᒌᔥ ᑳ ᑖᐺᐦᑕᐦᒀᐤ᙮ ᐃᔅᑯᑕᒃ ᑲᑴᒋᐦᐄᐌᐎᓂᔫ ᓀᒋᔅᑲᐦᒀᐤ ᐁᑯᑦ ᔖᔥ ᐯᐦᒋᔑᐦᒀᐤ᙮

Luke 8:13 Iomraidhean Croise

Mark 6:20

wesh Herod chii kushteu aniyuu John, e chii chischeyimaat e kuiskutaatisiyich kaye e payehchisiyich. Eukw maak uyuu wehch ekaa uhchi wii pischeyimaat. Chii miyeyimeu e nituhtawaat aat muush e chii mukushkaateyihtamihiikuwaat taan kaa itweyich tahtwaau e nituhtawaat.

Luke 8:12

An shuumin anite yaaiskanuu kaa pahchishihk mwehch eukw e ishinaakusitwaau anichii kaa pehtahkwaau Chishemanituu utayimuwiniyuu. Machimanituu tekushiniyich meskamakutwaau aniyuu Chishemanituu utayimuwiniyuu taan aniyuuh kaa ishi pehtahkwaau e iteyimikutwaau ekaa chechii taapwehtahkwaau kaye ekaa chechii pimaachihutwaau.

Luke 8:14

Ekw maak an kutak shuumin kaa pahchishihk anite e kaasutewaayikwaau mashkushiih e ihtakuniyikwaauh mwehch eukw e ishinaakusitwaau awenichii kaa nituhtamuwaatwaau Chishemanituu utayimuwiniyuu. Mikw maak aniyuu utaapwehtamuwinawaau chek wanaachihtaakanuuyuu wesaa e aayimeyihtamihiikutwaau e ispayiyich upimaatisiiwiniwaahch kaye miisitisiiwiniyuu e maamituneyihtamihiikutwaau, kaye maak mikw aschiiyuu chekwaayuuh e maamituneyihtamihiikutwaau chechii uhchi miyeyihtahkwaau. Ekw maak namui chii ishi nihtaauchuuch taan aniyuuh chipaa ishi nihtaauchuuch.

John 15:2

Misiwe watihkunh niya e ihtaayaan kaa ihtakuhkwaauh ekaa kaa miinisuuhkwaau nuuhtaawii manisham. Ekw aniyuuh watihkunh kaa miinisuuhkwaau misiwe waweshtuutam etituu chechii miinisuuniyikwaau.

John 15:6

Awen ekaa niya e ihtaayaan kaa ishi pimaatisiit wepinaakanuu mwehch taan e ihtuutaakanuuhch watihkun, nipuu maak chek. Anihiih maak watihkun kaa wepinikanuuhkwaau maamuushtinikanuuh ekw mechishtawepinikanuuhkwaau ekw maak e ati ishkwaatekwaau.

John 5:35

Mwehch waashtenamaakan e chiihkaashtuwech ekun kaa ishinaakusit John tepaachimit. Chichii naheyihtenaawaau mikw weipishchiish chechii muuchicheyihtamekw anite uwaashtuwewinihch.

1 Corinthians 13:2

Kaye maak aat miikuyaan chechii kaschihuyaan e chischiwehiicheyaan, kaye maak aat misiwe chischeyihtamaan niya taan e ishi ekaa chischeyihtahkwaau kutakach awenich, kaye aat miikuyaan misiwe chechii chischeyihtamaan chekwaan ekaa uhchi chischeyihtamihiiwaanuuhch anite utaahch kaye maak aat ayaayaan taapwehtamuwin chechii aahtinamaan wachiih ekaa maak ayaayaan saachihiiwewin yaapach namui mitun chekwaan nipaa uhchi iteyihtaakusin.

1 Corinthians 15:2

Eukuu miywaachimuwin Jesus kaa aayimuumaakanuut kaa aayimuutamaan kaa kacheschimitakuch. Eukuu che pimaachihiikuyekw suuhk mamechiminamekwe. Ekaa maak uu ihtiyekwe ekw kiipaa sheshkwaaht e chii taapwehtamekw che ishinaakuhch ekaa pimaachihiikuyekwe.

Galatians 3:1

Chiyawaau kaa taapwehtamekw Galatia aschiihch kaa ihtaayekw nuwach ekaa kaa iteyihtamekw. Awen wesaa kaa ishi wiyeshimitaakw. Naashch yaakwaau chichii wiihtamaatinaawaau Jesus Christ e chii chiistaaskuhwaakanuut ashiteyaahtikuhch.

Galatians 3:4

Chititeyihtenaawaau aa sheshkwaaht e ishinaakuhch misiwe taan kaa ishi nachishkamekw. Naanituu chekwaan chichii iteyihtamihiikunaawaache uyuuh.

Ephesians 3:17

Kaye maak nitayimihaan, Christ chechii ihtaat chipimaatisiiwiniwaahch an uhchi e taapwehtamekw. Kaye maak an e ati yaaichinihtaauchiyekw kaye e ati yaaichikaapuuyekw saachihiiwewinihch ishi, nitayimihaan

Colossians 1:23

Chinituweyihtaakusinaawaau yaaitei chechii kanuweyihtamekw taan e ishi taapwehtamekw uu miywaachimuwin, wesh ekut uu wehchi cheshtinaachikaapuyekw. Ekaawii maak chika uhchi ishinaakusinaawaau chechii ati waanihtaayekw an aspeyimuwin kaa ayaayekw iskunaak kaa pehtamekw miywaachimuwin. Wesh shaash mistahii mishihte chii ituhtataakanuu. Kaye niya Paul niwiichihiiwen e papaamuhtataakanuuhch uu miywaachimuwin.

Colossians 2:7

Pachishtinaahkw chechii ihtuutaataakw kuiskw chechii ishi pimaatisiiwekw kaye chechii miitaakw maskuusiiwiniyuu, muyaam mistikw nitaamihch aschiihch e ishi kutaaupayiyich utapiih chechii suuhchikaapuut ekun chipaa ishinaakusinaawaau. Ekun chipaa wii ishi suuhchikaapuunaawaau taan e ishi taapwehtamekw. Ekw maak wetaach muush che taapweyimekw mwehch kaa ishi chiskutamaakuyekw chechii ihtiyekw. Kaye maak muush chipaa nanaaskumaawaau.

1 Thessalonians 3:5

Eukw maak aniyuu wehchi yaaitei chii itishahuukw Timothy anite e ihtaawekw. Iskutak ekaa kaa chii ihtiyaan ekaa chischeyimitakuch taan e ispayiyekw ekw kaa itishahuuk Timothy anite e ihtaawekw chechii nituu chischeyimitaahch taan e ispayiwekwe e taapweyimekw Christ. Nichii sechisin chechii ihtuutaataakw machimanituu chechii puuniiwekw e taapwehtamuwekw sheshkwaaht chechii ishinaakuhch taan kaa ishi atushkuwachiht Utipeyihchikeu anite e ihtaayekw.

1 Timothy 1:19

Suuhk kanawaach taapwehta kaye suuhk muush kuiskw aihtih ekw maak namui chika uhchi mamishimeyihten ekaa machituutamane. Wesh ihtaauch anichii naashch ekaa papaameyihtamihiikutwaau taan chipaa ishi pimaatisiyuuch ekw maak kaa ati wanaachihtaatwaau utaapwehtamuwinawaau.

Hebrews 10:39

Namayeuch maak chiyaanuu awenich kaa chiiwekaapuutwaau kaye kaa wanisinitwaau. Chitaapwehtenaanuu chiyaanuu kaye chipimaachihunaanuu.

James 2:26

Wesh ekaa ihtaat ahchaahkw miiyuuhch nipiimakan an miiyuu. Ekun mwehch e ishinaakuhch taapwehtamuwin ekaa e asich ihtakuhch miyu atushchewin nipiimakan an taapwehtamuwin.

2 Peter 2:20

Chiishpin kaa wiihkuchihuuwaakwenich awenichii taan e ishi machituutaachemakaniyich uyuu aschiiyuu aniyuu taan e ishi chischeyimaatwaau ekw Jesus Christ e Tipeyichikeyich kaye e Pimaachihiiweyich miin maak kaau e kaahchitinikutwaau kaye e shaakuuchihiikutwaau uyuu chekwaayuu etituu iteyihtaakuniyuu taanit e ihtaatwaau anuhchiish ishpishaat wii taanit kaa pechi ihtaatwaau niishtam.

2 Peter 2:22

Aniyuu maak kaa ispayitwaau eukw uyuu kaa chii iinaanuyich: “Atim kaau naatam upaakumuwin ekw maak kuuhkuush e chii chistaapauyaakanuut, miin tihtipishimuu anite e iipataniyich.”

1 John 2:19

Uchii maak awenichii namui chihchiwe chuuhchi wiicheukunuuch eukw maak uyuu wehchii nakatitahkwaau. Wesh taapwe chii wiicheutahkwaau eshkw chipaa wiicheukunuuch. Aniyuu maak kaa nakatitahkwaau ekut kaa uhchi miyu chischeyihtaakuniyich ekaa chihchiwe uhchi wiicheutahkwaau.

Jude 1:12

Mikw wanaahtaasuuch anit e makushewekw e nuukuhtaayekw e saachihekw Chishemanituu. Namui mitun pimaameyimuuch e mista chiishpuhiisutwaau e wiichimiichisuumitaakuch, mikw wiyawaau e nanaakatuweyimisutwaau. Mwehch kaskawanishkuch e pimaashitwaau ekaa maak mechim nipiyuutwaau ekun e iteyihtaakusitwaau. Mwehch mistikuch ekaa mitun miinishuutwaau aat e takwaatiniyich, mistikuch chichi utapii e chii manishipikuhchipitaakanuutwaau, tekash e nipitwaau, ekun e ishinaakusitwaau.