Luke 7:39 - Chishemanituu Utayimuwin: Kaa Uskaach Testament

³⁹ An maak Pharisee kaa wiishaamaat Jesus, iskutak wiyaapamaat aniyuu iskweu aniyuu e ihtiyich chii iteyimeu, “Chipaa chischeyimeu uyuu iskweu e ishpish machaatisiyich kaa taahtinikut taapwe e uchischiwehiichesuukwe.”

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

³⁹ ᐊᓐ ᒫᒃ ᕓᕆᓰ ᑳ ᐐᔖᒫᑦ ᒌᓴᔅ, ᐃᔅᑯᑕᒃ ᐎᔮᐸᒫᑦ ᐊᓂᔫ ᐃᔅᑴᐤ ᐊᓂᔫ ᐁ ᐃᐦᑎᔨᒡ ᒌ ᐃᑌᔨᒣᐤ, ᒋᐹ ᒋᔅᒉᔨᒣᐤ ᐅᔫ ᐃᔅᑴᐤ ᐁ ᐃᔥᐱᔥ ᒪᒑᑎᓯᔨᒡ ᑳ ᑖᐦᑎᓂᑯᑦ ᑖᐺ ᐁ ᐅᒋᔅᒋᐌᐦᐄᒉᓲᑴ᙮

Luke 7:39 Iomraidhean Croise

Matthew 20:16

Ekw Jesus kaa ati itwet, “Eukw maak che uhchi utaahch ishi pachishtinaakanuutwaau anichii niikaanihch kaa itahiisutwaau ekw anichii maahchishtai kaa ishi pachishtinisutwaau niikaanaanihch chikaa ishi pachishtinaakanuuch.”

Matthew 21:11

Ekw kaa itikutwaau aniyuu iinuuh kaa wiichewaayich Jesus, “Jesus an. Eukun uu uchischiwehiichesuu anite Nazareth, Galilee aschiihch, kaa uhchiit.”

Mark 7:21

Wesh anite utehiihch ekute awen naashch nitamukw chechii iteyihtahk kaye nitamukw chechii ihtit, maak chechii kachemutit, chechii nipahiiwet,

Luke 12:17

Ekw kaa iteyihtahk, ‘Shaash namui nitepishchinitaan taanite misiwe che chiskashtaayaan uyuu kaa nihtaauchihtaayaan nihtaauchihchikan. Ekw kaa maamituneyihtamihiikut taan che ihtit.

Luke 15:2

Phariseech, ekw maak anichii kaa chiskutamaachetwaau wiishuwewiniyuu chii aayimuumeuch Jesus e itwetwaau, “Uu naapeu wiichewaakanitutaweu aniyuu kaa machaatisiyich kaye wiichimiichisuumeu.”

Luke 16:3

An maak uchimaash chii maamituneyihtam, ‘Taan che ihtiyaan maak ekw chechii uhchi pimaachihiisuyaan, e iteyihtahk, shaash nitasaayaaskunikw nuuchimaam. Namui nimiskawiin e muunahiicheyaan chechii itaapatisiyaan kaye nishaakweyimun chechii naanitutamaayaan shuuliyaau.

Luke 18:4

Chineush maak an wiyaaskunichesuu namui uhchi wii naatamuweu aniyuu iskweu. Ekw chek kaa ishi maamituneyihtahk, ‘Namui nanihchiishtuwaau Chishemanituu kaye namui nitaapateyimaauch iinuuch.

Luke 3:8

Chipaa kweskaatisiinaawaau ekw maak che nuukuhch taapwe mitun tekash e nakatamekw chimachaatisiiwinawaauh. Kaye ekaawii iteyihtamukw chechii ushimututamuwekw Chishemanituu utaahkuyuwesuwin mikw aniyaa Abraham e ihtaat e uhchiyekw. Chiwiihtamaatinaawaau, Chishemanituu chika chii ihtuutaweu uyeyuuh asiniih kaa itapiyich chechii uhchi ushihaat Abraham utawaashiimiyuu.

Luke 7:16

Misiwe maak anit kaa tashitwaau awenichii chii sechisuuch ekw kaa chishtaachimaatwaau Chishemanituu e itwetwaau, “Chichii utihtikunuu e chisteyihtaakusit uchischiwehiichesuu. Kaye maak chii itweuch, Chishemanituu pechi wiichiheu utiiniim.”

Luke 7:37

Anit maak aniyuu utenaayuu chii ihtaau iskweu naashch e machaatisiit. Iskutak maak an iskweu piyehtahk Jesus e chii wiishaamaakanuyich anit aniyuuh Pharisee wiichiihch chechii miichisuyich, chii ituhteu anite, e chii ituhtataat e miywaashiyich puutayuu e asiniiyuuniyich, e wiihchimaakusiyich tuuminikaniyuu e piihchishtiniyich anit.

Luke 7:38

Mekwaach maak Jesus e uhpimeshihk anit e miichisutwaau, an iskweu chii niipuu anite itehche Jesus usitiihch, e maatut. Aniyuu maak e uhchikuwaapit chii nipiyuuhtaaweu Jesus usith. Ekw kaa uchihchiihkunapit ustikwaaniyaapii e aapachihtaat e paahkusitenaat. Kaye maak e uchehtamuwaat kaye e tuuminamuwaat aniyuu e wiihchimaakusiyich tuuminikaniyuu.

Luke 7:40

Jesus kaa ayimihiikut e itikut, “Simon, chiwii ititin chekwaan.” Simon kaa itwet, “Chiskutamaachesuu, pechi wiihtamuu chekwaan an.”

John 4:19

Ekw an iskweu kaa itaat, “Ekun e iteyimitaan muyaam uchischiwehiichesuu chiya.

John 7:12

Mihchetu maak aweyuu chii ayimitutaakuu anit kaa ihtaayich. Pasch e itweyich, “Naashch taapwe miyeyihtaakusuu uu naapeu.” Ekw kutak e itweyich, “Namui miyeyihtaakusuu, wiyeshimeu aweyuuh.”

John 9:24

Ekw anichii Jewa iinuuh kaa niikaanishkuwaatwaau miin kaau kaa wiishaamaatwaau aniyuu naapeu ekaa uhchii waapahtamiyich ekw kaa kakwechimaatwaau, “Chishemanituu eukw maamihchim. Nichischeyimaanaan uu naapeu Jesus e machaatisiit.”