Luke 5:8 - Chishemanituu Utayimuwin: Kaa Uskaach Testament

⁸ Iskutak maak Simon Peter wiyaapahtahk e ispayiyich chii uchihchiihkunipayihuu uhchishkuu Jesus e ihtaayich, e itwet, “Nakasi, Utipeyihchikeu, wesh nimachaatisiin.”

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

⁸ ᐃᔅᑯᑕᒃ ᒫᒃ ᓵᐃᒪᓐ ᐲᑕᕐ ᐎᔮᐸᐦᑕᐦᒃ ᐁ ᐃᔅᐸᔨᔨᒡ ᒌ ᐅᒋᐦᒌᐦᑯᓂᐸᔨᐦᐆ ᐅᐦᒋᔥᑰ ᒌᓴᔅ ᐁ ᐃᐦᑖᔨᒡ, ᐁ ᐃᑗᑦ, ᓇᑲᓯ, ᐅᑎᐯᔨᐦᒋᑫᐤ, ᐌᔥ ᓂᒪᒑᑎᓰᓐ᙮

Luke 5:8 Iomraidhean Croise

Matthew 17:6

Iskutak maak anichii chischinuhamuwaakanich piyehtahkwaau aniyuu pehtaakusuwiniyuu, chii sechisuuch. E ishpish sechisitwaau maak chii utahtaamuunipayihuuch anite aschiihch.

Matthew 2:11

Ekw kaa piihchetwaau aniyuu waaskaahiikaniyuu anite kaa ihtaayich Mary, aniyuu maak utawaashiimiyuuh. Iskutak maak wiyaapamaatwaau aniyuu awaasha chii uchihchiihkunipayihuuch e nuuchiishtuwaatwaau. Ekw kaa kuikunahkwaau aniyuuh chekwaayuuh kaawii miyaatwaau aniyuu awaasha, shuuliyaanaapiskwa chii miyeuch, ekw maak aniyuu kaa chii ishkwaasiikanuyich kaa wiihchimaakusiyich kaye kaa shuuliyaauniyich tuuminikaniyuu kaa wiihchimaakusiyich.

Matthew 8:8

Ekw an shimaakanishuuchimaau kaa itaat aniyuu Jesus, “Namui nitepicheyihtaakusin chechii pechi piihcheyin niwaaskaahiikanimihch. Mikw maak itweh chechii miinuwaatisiit nitaapachihaakan ekw maak che miinuwaatisiit aat ekaa takushiniyine.

Luke 5:7

Ekw kaa waashtenamuwaatwaau wiichinuutamesuu, kutachiyuu chiimaaniyuu kaa ihtaayich chechii pechi wiichihiikutwaau, ekw kaa pechi isichimeyich. Taapishkun maak aniyuuh chiimaan chii wii kushaapeuh kaa ishpish saakaschinetwaau namesach.

Luke 5:9

Chii kushkweyihtamihiikuuch Simon kaye aniyuu wiichinuutamesuu aniyuu kaa ishpish chii mistapitahuyaatwaau.

John 11:32

Iskutak maak Mary tekushihk anit Jesus kaa ihtaayich wiyaapamaat maak chii uchihchiihkunapayihuu anite usitiihch, e itaat, “Utipeyihchikeu, shaash chii ihtaauhpane namui chipaa uhchi puunipimaatisiyuu niichishaan.”

1 Corinthians 13:12

Muyaam kaye e kanawaapamuhkw awen anite waapamisunihch, namui chipiyekaschinuwaanuu e ishpish piyekasinuuhkw tipiiwe chischiisikunaahch e kanawaapamuhkw. Ekun maak mwehch e ishi chischeyimahkw Chishemanituu anuhchiish. Namui tekash chichischeyimaanuu. Mikw maak iskutak uhchishkuu waapamahkwe ekw tekash che chischeyimahkw, muyaam chiyaanuu e ishpish tekash chischeyimitahkw.

Revelation 1:17

Iskutak maak wiyaapamak anite usitihch nichiishi pahchishinuwaan muyaam e nipuuch. Unihiiwinitihchii e aapachihtaat nichii pechi taahtinikw ekw kaa iishit, ekaawii kushtaach. Eukw niya niishtam kaa ihtaat kaye maahchishtai che ihtaat.