Luke 21:34 - Chishemanituu Utayimuwin: Kaa Uskaach Testament

³⁴ “Yaakwaamiikw taan e ishi pimaatisiyekw. Ekaawii utamihiisukw pisikw chechii minihkweyekw maak pisikw chechii miichisuyekw maak pisikw chechii aayimeyihtamekw taan e ishi pimaatisiinaanuuhch, wesh eukw e ihtitwaau kutakach awenichii. An ihtiyekwe chika chii ishinaakun sischikuuch chechii takushiniyaan mekwaach anit ekaa iteyihtamekwe. An maak sischikuuch takushiniyaane, muyaam nakwaakan ekaa peshuweyihtahk awesiis che nakwaasut eukun che iteyihtaakuhch.

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

³⁴ ᔮᒀᒦᒄ ᑖᓐ ᐁ ᐃᔑ ᐱᒫᑎᓯᔦᒄ᙮ ᐁᑳᐐ ᐅᑕᒥᐦᐄᓱᒄ ᐱᓯᒄ ᒉᒌ ᒥᓂᐦᑴᔦᒄ ᒫᒃ ᐱᓯᒄ ᒉᒌ ᒦᒋᓱᔦᒄ ᒫᒃ ᐱᓯᒄ ᒉᒌ ᐋᔨᒣᔨᐦᑕᒣᒄ ᑖᓐ ᐁ ᐃᔑ ᐱᒫᑎᓰᓈᓅᐦᒡ, ᐌᔥ ᐁᐅᒄ ᐁ ᐃᐦᑎᑣᐤ ᑯᑕᑲᒡ ᐊᐌᓂᒌ᙮ ᐊᓐ ᐃᐦᑎᔦᑴ ᒋᑲ ᒌ ᐃᔑᓈᑯᓐ ᓯᔅᒋᑰᒡ ᒉᒌ ᑕᑯᔑᓂᔮᓐ ᒣᒀᒡ ᐊᓂᑦ ᐁᑳ ᐃᑌᔨᐦᑕᒣᑴ᙮ ᐊᓐ ᒫᒃ ᓯᔅᒋᑰᒡ ᑕᑯᔑᓂᔮᓀ, ᒧᔮᒻ ᓇᒀᑲᓐ ᐁᑳ ᐯᔓᐌᔨᐦᑕᐦᒃ ᐊᐌᓰᔅ ᒉ ᓇᒀᓱᑦ ᐁᐅᑯᓐ ᒉ ᐃᑌᔨᐦᑖᑯᐦᒡ᙮

Luke 21:34 Iomraidhean Croise

Matthew 13:22

Ekw maak an kutak shuumin kaa pahchishihk anite e ihtakuniyikwaauh kaa kaasutewaaskuhkwaauh niipisiyaahtikw, e ati nihtaauchit maak mwehch eukw e ishinaakusitwaau iinuuch kaa nituhtahkwaau Chishemanituu utayimuwiniyuu. Aniyuu naashch e mukushkaachishtaatwaau aschiiyuu chekwaayuuh kaye naashch mikw e wii ushuuliyaamitwaau e ihtitwaau kaye pishikw e mushtenahkwaau chekwaayuu chechii ayaatwaau eukw uyuu wehchi chek wanaataniyich utaapwehtamuwinawaau. Ekw maak namui chii miinisuuch upimaatisiiwiniwaahch.

Mark 13:9

“Yaakwaamiikw wesh chika ihtaauch anichii che maakunitaakuch ekw anite kaa niikaanishkaacheyich e ihtaayich che ituhtahiitaakuch chechii wiyaaskunikuyekw. Kaye maak anite ayimiheukamikuhch ekute che papasistehukuyekw. Chika ituhtahiikunaawaau peshuch kaye chisheuchimaauch e ihtaatwaau chechii wiyaaskunitaakuch an uhchi e nuushuushkuyekw. Chika nitaweyihtaakusinaawaau kuiskw chechii ishi aayimuumiyekw.

Mark 4:19

mikw maak aniyuu naashch e mukushkaachishtaatwaau aschiiyuu chekwaayuuh kaye naashch mikw e wii ushuuliyaamitwaau e ihtitwaau kaye pishikw e mushtenahkwaau chekwaayuu chechii ayaatwaau eukw uyuu wehchi chek wanaataniyich utaapwehtamuwinawaau. Ekw maak namui chii miinisuuch upimaatisiiwiniwaahch.

Luke 10:41

Utipeyihchikeu chii itikuu, “Martha, Martha naashch e mukushkaateyihtamihiikuyin mihchetu chekwaayuu.

Luke 12:40

Eukw maak uu wehchi ishinaakuhch kaye chiyawaau muush chechii ayeskuwiyekw. Wesh Iinuu Ukusisa kata takushin taanit anit ekaa mitun peshuweyimekwe chechii takushinit.”

Luke 17:3

Yaakwaamiikw ekaa chechii ihtuutawekw awen chechii machituutahk. Chiichishaan wanituutaaske wiihtamuu taan e ishi wanituutaask. Mihchiiwesite maak, che wepeyihtamuut.

Luke 21:35

Misiwe awen utah aschiihch kaa ihtaat ekaa ayeskuwiite chika pisiiwiikuu takushiniyaane. Yaakwaamiikw maak ekaa kaye chiyawaau chechii pisiiwiikuyekw takushiniyaane.

Luke 21:8

Jesus maak chii iteu, “Yaakwaamiikw ekaa awen chechii wiyeshimitaakw. Wesh chika mihchetuuch awenichii e takushihkwaau nitishinihkaasuwiniyuu e aapachihtaatwaau e itwetwaau, Eukw niya Christ. Mihchetu maak aweyuu chika wiyeshimeuch. Kaye maak chika itweuch, shaash peshunaakun che ispayihkwaau uyuu chekwaayuu. Ekaawii maak chika uhchi nuushuushkuwaawaauch uchii.

Luke 8:14

Ekw maak an kutak shuumin kaa pahchishihk anite e kaasutewaayikwaau mashkushiih e ihtakuniyikwaauh mwehch eukw e ishinaakusitwaau awenichii kaa nituhtamuwaatwaau Chishemanituu utayimuwiniyuu. Mikw maak aniyuu utaapwehtamuwinawaau chek wanaachihtaakanuuyuu wesaa e aayimeyihtamihiikutwaau e ispayiyich upimaatisiiwiniwaahch kaye miisitisiiwiniyuu e maamituneyihtamihiikutwaau, kaye maak mikw aschiiyuu chekwaayuuh e maamituneyihtamihiikutwaau chechii uhchi miyeyihtahkwaau. Ekw maak namui chii ishi nihtaauchuuch taan aniyuuh chipaa ishi nihtaauchuuch.

1 Corinthians 5:11

Miin maak peyakwaau nika masinahen cheshtinaash chechii nisituhtamekw awenich kaa aayimuumakwaau. Ekaawii wiichewaakanikw awen e itwet e taapweyimaat Jesus, misiwe nanaahkuu wiinisuwinihch e ishi pimaatisiikwe, e mushtenamaachekwe chekwaayuuh kaye maak e nuuchiishtuwaakwe manituuhkaanh kaye maak nitamukw e itaachimaakwe aweyuuh, maak e wiihchipekwe maak e wiihchi kechemutikwe. Ekaawii mechim wiich miichisumaahk awen uyuu e itaatisiit.

1 Corinthians 6:10

Kaye maak anichii kaa kachemutitwaau, nesht anichii muush kaa mushteneyihtahkwaau chekwaayuuh, anichii kaa wiihchipetwaau, nesht anichii nitamukw kaa itaachimaatwaau kutak aweyuuh, kaye maak kaa chimutitwaau, namui waachi peyakw uchii chika uhchi aanische ayaauch Chishemanituu uchisheuchimaawiniyuu.

Galatians 5:20

Kaye maak manituuhkaanh e nuuchiishtuwaat kaye maamaahtaawaatisiiwiniyuu e mukushkaachishtaat. Uyuu e ishi pimaatisiitwaau awenichii wauhkaateyimituuch, mamachipayihkahtaatuuch, naashch taapwe wiihchi wauhteyimeuch aweyuuh, aahkuyuwesuuch, kaye muush wii naniikaaneyihtaakuhiisuuch. Kakatipaanipayiheuch aweyuuh kaye pahkaanihiisuuch wiyawaau taan waa ihtitwaau chechii ihtitwaau.

Philippians 4:6

Ekaawii chekwaan chika uhchi mukushkaateyihtamihiikunaawaau. Teyakuch misiwe taan che ati ispayiwekwe ayimihaakw, e waawiihtamuwekw Chishemanituu chekwaayuu e ishi nitaweyihtamuwekw. Kaye maak chipaa nanaaskumaawaau.

Hebrews 12:15

Nanaakataweyimitikw ekaa waachi peyakw anit e tashiyekw chechii nuuhtaashkahk Chishemanituu umiiwewiniyuu kaa pimaachihiiwemakaniyich. Kaye yaakwaamiikw ekaa awen anit e tashiyekw muyaam machi watipii chechii ishi nihtaauchit. Wesh ihtaatwaawenich uyuu e ishinaakusitwaau mihchetu aweyuu kata machipayiheuch.

2 Peter 3:10

Mikw maak namui niyaakan chika uhchi muushihtaakanuyuu Utipeyihchikeu uchiishikaam, muyaam e iteyihtaakuhch chimutisk taanit waa piihchech waaskahiikaniyuu e wii kachemutit ekun che iteyihtaakuhch. Anit maak aniyuu Utipeyihchikeu uchiishikaam utihchipayiche uyuuh chiishikw chika paasikunaakun. Naasch taapwe chika chishewepayuu ati paasikunaakuhkwaawenh. Misiwe taan e ishi ihtakuhch chiishikuhch kata atihtiteuh che ishpish mista chishitech. Aschii kaye maak misiwe chekwaan utah kaa ihtakuhch, chika ati mestaahkahteu.

2 Peter 3:14

Ekw maak niichishaanitikw mekwaach uu e ashuwaapahtamekw an e chiishikaach kwaast e ishpish chii ihtiyekw wii payehchi pimaatisiikw kaye ekaawii chekwaan chika uhchi wii ataameyihtaakusinaawaau Chishemanituu ishi e ihtaat. Suuhk kata wii kuiskunaakunh chipimaatisiiwinawaauh ekw maak che ihtakuhch chiyaameyihtamuwin anit mekwesiinuu e ihtaayekw.

Revelation 3:3

Chischisikw maa taan kaa ishi pehtamekw anite pechi kaye taan kaa ishi chiskutamaakuyekw. Nanihiihtamukw kaye ihtuutamukw an kaa ishi chiskutamaakuyekw. Kaye maak kweskaatisiikw, nakatamukw chimachituutamuwinawaauh. Wesh ekaa che uhchi wanishkaawekwe, nika takushin che pechi nituu wiyaaskunitikuch. Namui maak chika uhchi chischeyiminaawaau taaishpish nihaau che takushiniyaan muyaam chimutisk e ishpish ekaa chischeyimaakanuut taaishpish che takushinit.