Luke 20:24 - Chishemanituu Utayimuwin: Kaa Uskaach Testament

²⁴ Pechi waapahtiikw shuuliyaawaapiskw. Awen maak utaashtamuhkw e nuukuniyich anit kaye awen aniyuu utishinihkaasun kaa masinaateyich.” Ekw maak kaa itwetwaau, “Rome chisheuchimaau Caesar aniyuu utaashtamuhkw kaye wiya anit masinaasuu.”

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

²⁴ ᐯᒋ ᐙᐸᐦᑏᒄ ᔔᓕᔮᐙᐱᔅᒄ᙮ ᐊᐌᓐ ᒫᒃ ᐅᑖᔥᑕᒧᐦᒄ ᐁ ᓅᑯᓂᔨᒡ ᐊᓂᑦ ᑲᔦ ᐊᐌᓐ ᐊᓂᔫ ᐅᑎᔑᓂᐦᑳᓱᓐ ᑳ ᒪᓯᓈᑌᔨᒡ᙮ ᐁᒄ ᒫᒃ ᑳ ᐃᑗᑣᐤ, ᕎᒻ ᒋᔐᐅᒋᒫᐤ ᓰᓴᕐ ᐊᓂᔫ ᐅᑖᔥᑕᒧᐦᒄ ᑲᔦ ᐎᔭ ᐊᓂᑦ ᒪᓯᓈᓲ᙮

Luke 20:24 Iomraidhean Croise

Matthew 18:28

“Ekw an aapachihaakan kaa chistuhtet, kaa nachishkawaat wiich aapachihaakan e chii uhaasuumikut apishiish shuuliyaayuu. Ekw kaa maakunaat e wii chiputaaminaat kaa itaat, ‘Maachiih pechi chiiwemii an shuuliyaau taan kaa ishpish uhaasuumiyin.’

Matthew 20:2

Chii iteu kiipaa an uchimaau che chiishiihkuwaat aniyuu kaa utaaskunaat, peyakw chiishikaau maak e ishpish aapatisiyich peyakw shuuliyaanaapiskwa che ishpish chiishiihkawaat. Chii niskumuyuu maak ekw kaa itishahwaat chechii aapatisiyich anite shuuminaahtikw nihtaauchihchikan aschiihch.

Matthew 22:20

Ekw kaa itaat, “Awen maak utaashtamuhkw e nuukuniyich utah kaye awen uyuu utishinihkaasun kaa masinaateyich.”

Mark 12:16

Kaa miyaatwaau peyakw. Ekw kaa itaat, “Awen maak utaashtamuhkw e nuukuniyich utah kaye awen uyuu utishinihkaasun kaa masinaateyich.” Chii iteuch, “Chisheuchimaau Caesar aniyuu utaashtamuhkw kaye wiya anit masinaasuu.”

Luke 2:1

Mekwaach maak Caesar Augustus e chii chisheuchimaaut, chii itashuweu misiwe iinuuh anit Rome aschiihch kaa ihtaayich chechii tipachimaakanuyich kaye chechii masinahwaakanuyich.

Luke 20:22

Ekw maak netuweyimitaahch chechii wiihtamuyaahch, itashteu aa wiishuwewinihch Rome chisheuchimaau chechii miyaakanuut aniyuu shuuliyaayuu kaa chiishiihkamiyich aweyuu.”

Luke 20:23

Jesus maak chii chischeyimeu e wii pishiiwiikut, ekw kaa itaat, “Chekwaan wehchi wii pechi kakwechihiyekw.

Luke 20:25

Jesus chii iteu, “Miyaahkw chisheuchimaau Caesar taan aniyuu wiya tepiyeusiit, kaye maak miyaahkw Chishemanituu taan aniyuu wiya tepiyeusiit.”

Luke 23:2

Ekw nitamukw kaa ishi mamishimaatwaau e itwetwaau, “Uu maa naapeu nimiskawaanaan e machikacheschimaat nitiiniiminaanh, e chistahamuwaat chechii chiishiihkawaayich chisheuchimaau shuuliyaayuu kaye e wiihtamuwaat wiya e aawit Christ, chisheuchimaau e itahiisut.”

Luke 3:1

Aniyuu pepuniyich niyaayinushaap pipunh kaa ishpish chisheuchimaaut Tiberius kaa ishinihkaasut, Pontius Pilate mekwaach chii niikaanishkaacheu anite Judea aschiihch ekw Herod anite Galilee aschiihch kaa niikaanishkaachet ekw wiichishaan Herod, Philip kaa ishinihkaasuyich anite chii niikaanishkaacheyuu Iturea kaye Trachonitis kaa ishinihkaatekwaauh aschii. Ekw Lysanias kaa niikaanishkaachet anite Abilene kaa ishinihkaateyich aschiiyuu.

ᐊᐸᔅᑕᓚᒡ 11:28

Peyakw maak an Agabus e ishinihkaasut, chii pisikuu e miikut Kaa payehchisiyich Ahchaahkwa chechii ishi niikaan wiihtahk che pimipayiyich e kauhkataanuyich misiwe e ispichiskamikaayich aschiiyuu. Ekun maak taapwe kaa ispayiyich mekwaach Claudius kaa chisheuchimaawiyich.

ᐊᐸᔅᑕᓚᒡ 26:32

Ekw Agrippa kaa itaat aniyuu Festus, “Mitun chipaa chii pachishtinaakanuu uu naapeu Paul ekaa uhchi itwekupane chechii itishahwaakanuut anite Caesar e ihtaayich chechii wiyaaskunaakanuut.”

Philippians 4:22

Misiwe anichii kaa taapwehtahkwaau chiwaachiyemikuwaauch, kaye anichii kaa aapatisitwaau chisheuchimaau Caesar e ihtaayich.