Luke 17:3 - Chishemanituu Utayimuwin: Kaa Uskaach Testament

³ Yaakwaamiikw ekaa chechii ihtuutawekw awen chechii machituutahk. Chiichishaan wanituutaaske wiihtamuu taan e ishi wanituutaask. Mihchiiwesite maak, che wepeyihtamuut.

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

³ ᔮᒀᒦᒄ ᐁᑳ ᒉᒌ ᐃᐦᑑᑕᐌᒄ ᐊᐌᓐ ᒉᒌ ᒪᒋᑑᑕᐦᒃ᙮ ᒌᒋᔖᓐ ᐗᓂᑑᑖᔅᑫ ᐐᐦᑕᒨ ᑖᓐ ᐁ ᐃᔑ ᐗᓂᑑᑖᔅᒃ᙮ ᒥᐦᒌᐌᓯᑌ ᒫᒃ, ᒉ ᐌᐯᔨᐦᑕᒨᑦ᙮

Luke 17:3 Iomraidhean Croise

Matthew 18:21

Ekw Peter kaa pechi nituwaapamaat aniyuu Jesus kaa itaat, “Utipeyihchikeu, niichishaan maak wii ekaa puuniite e pechi wanituutuut, taan tahtwaau che wepeyihtamuuk, niishwaashwaau aa.”

Luke 21:34

“Yaakwaamiikw taan e ishi pimaatisiyekw. Ekaawii utamihiisukw pisikw chechii minihkweyekw maak pisikw chechii miichisuyekw maak pisikw chechii aayimeyihtamekw taan e ishi pimaatisiinaanuuhch, wesh eukw e ihtitwaau kutakach awenichii. An ihtiyekwe chika chii ishinaakun sischikuuch chechii takushiniyaan mekwaach anit ekaa iteyihtamekwe. An maak sischikuuch takushiniyaane, muyaam nakwaakan ekaa peshuweyihtahk awesiis che nakwaasut eukun che iteyihtaakuhch.

Ephesians 5:15

Suuhk yaakwaamiikw taan e ishi pimaatisiyekw. Namui chipaa uhchi ishi pimaatisiinaawaau taan e ishi pimaatisiitwaau anichii ekaa kaa ayaatwaau kachehtaaweyihtamuwiniyuu. Awenichii kaa ayaatwaau kachehtaaweyihtamuwiniyuu ekun yaakw chipaa ishi pimaatisiinaawaau.

Hebrews 12:15

Nanaakataweyimitikw ekaa waachi peyakw anit e tashiyekw chechii nuuhtaashkahk Chishemanituu umiiwewiniyuu kaa pimaachihiiwemakaniyich. Kaye yaakwaamiikw ekaa awen anit e tashiyekw muyaam machi watipii chechii ishi nihtaauchit. Wesh ihtaatwaawenich uyuu e ishinaakusitwaau mihchetu aweyuu kata machipayiheuch.

James 5:19

Niichishaanitikw, peyakw anit e tashiyekw chiiwekaapuushtahke taapwewiniyuu, wiichihiikute maak aweyuuh miin chechii taapwehtahk,

2 John 1:8

Yaakwaamiikw maak ekaa chechii wanihtaayekw an tipahamaakusiiwin kaa aapatisiihkahtamekw chechii ayaayekw, taapwe chechii miskamekw misiwe taan e ishi ayeskuushtamaataakw Chishemanituu.