Luke 17:29 - Chishemanituu Utayimuwin: Kaa Uskaach Testament

²⁹ Aniyeyuu e chiishikaayich che nakatahk Lot aniyeyuu utenaayuu Sodom kaa ishinihkaateyich, chii chimuunipahchishtin ishkuteu kaye e ishkuteutwaau asiniich chii paahpahchishinuuch. Ekw maak misiwe awenichii anit aniyuu utenaayuu kaa ihtaatwaau chii nishuuwanaachihiikuuch uyeyuu kaa ispayich.”

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

²⁹ ᐊᓂᔦᔫ ᐁ ᒌᔑᑳᔨᒡ ᒉ ᓇᑲᑕᐦᒃ ᓨᑦ ᐊᓂᔦᔫ ᐅᑌᓈᔫ ᔂᑕᒻ ᑳ ᐃᔑᓂᐦᑳᑌᔨᒡ, ᒌ ᒋᒨᓂᐸᐦᒋᔥᑎᓐ ᐃᔥᑯᑌᐤ ᑲᔦ ᐁ ᐃᔥᑯᑌᐅᑣᐤ ᐊᓯᓃᒡ ᒌ ᐹᐦᐸᐦᒋᔑᓅᒡ᙮ ᐁᒄ ᒫᒃ ᒥᓯᐌ ᐊᐌᓂᒌ ᐊᓂᑦ ᐊᓂᔫ ᐅᑌᓈᔫ ᑳ ᐃᐦᑖᑣᐤ ᒌ ᓂᔔᓈᒋᐦᐄᑰᒡ ᐅᔦᔫ ᑳ ᐃᔅᐸᔨᒡ᙮

Luke 17:29 Iomraidhean Croise

Luke 17:28

Ekun maak taapishkuuch kaa iteyihtaakuniyich kaye eshkw aniyaa Lot e chii pimaatisiit. Misiwe awenichii mikw waa ihtitwaau chii ihtuuch. E miichisutwaau, e minihkwetwaau, e utinaasutwaau, e ataawetwaau, e nihtaauchihchetwaau, eyuu e maanuchetwaau.

Luke 17:30

Ekw Jesus kaa itwet, “Ekun taapishkuuch che itaatisiinaanuuhch an e chiishikaach pechi nuukusite Iinuu Ukusisaan.”

2 Peter 2:6

Chishemanituu kaye chii wanaachihtaau aniyuu ihtaawinh Sodom ekw maak Gomorrah kaa ishinihkaateyikwaauh ishkuteyuu e chii aapachihtaat. Ekut kaa uhchi waapahtiiwet taan che ihtuutawaat aniyuu ekaa mitun kaa aapateyimikut.

Jude 1:7

Chischisiitutawaahkuch kaye anichii iinuuch Sodom kaye Gomorrah ekw maak aniyuuh kutak ihtaawinh waaskaa kaa ihtakuniyikwaauh kaa uhchiitwaau. Mwehch aniyuuh enchilh kaa ihtiyich ekaa uhchi nanihiihtuwaayich Chishemanituu ekun kaa ihtitwaau. Kaye maak misiwe ekaa muyaam iteyihtaakuniyich wiinisuu pimaatisiiwiniyuu chii ihtuutamuch. Tekash chii ishkwaateuh uyuuh ihtaawinh ekw maak niyenehkaateyimuhaakanuutwaau anichii iinuuch anite machi ishkutehch kaachiche kaa ihtakuniyich. Eukw maak wehchi yaakwaamikuyihkw uyuu che ishi waweshihaakanuut awen ekaa mitun kaa wii nanihiihtawaat Chishemanituu.

Revelation 11:8

Aniyuuh maak wiiyuuwaauh ekut anit meskanaahch aniyuu mista utenaayuu taanit kaa nipahaakanuyich kaa chiistaaskuhwaakanuyich aashiteyaahtikuhch utipeyihchikemuwaauh ekut che ihtakuniyikwaauh. Uu maak ihtaawin muyaam taan kaa iteyihtaakuhkwaauh aniyuuh ihtaawinh Sodom ekw maak Egypt kaa ishinihkaatekwaauh ekun kaa iteyihtaakuhkwaauh, naashch chii mishaau anit machaatisiiwin.

Revelation 14:10

kata muushihtaaweu taan e ishi chishuwaahaat Chishemanituuh. Aniyuu maak che ishi muushihtaawaat e chishuwaahaat Chishemanituuh mwehch awen e minihaakanuut shuuminaapuuyuu chika iteyihtaakuniyuu. Uyuu maak uchishuwaasuwin Chishemanituu tekash chiishi kutapinam anit aniyuu minihkwaakaniyuu anit e ishinaakuniyich e ihtakuniyich utaahkuyuwesuwin. Misiwe maak anichii che nuuchiishtuwaakwenich aniyuuh machi awesiisa kaye aniyuuh machi awesiis manituuhkaan kaye che pachishtinisuwaakwenich chechii chiishaawaachihaakanuutwaau uskahtikuwaahch maak utihchiiwaahch chika nanehkaateyimuhaakanuuch ishkuteyuu ekw maak usaawaapisch asiniih kaa wiinimaasuyich e ishkwaaswaakanuyich e aapatisiyich uhchishkuu aniyuuh Maanishchaanisha ekw maak aniyuuh utenchilamiyuuh kaa payehchisiyich e ihtaayich.

Revelation 19:20

Ekw kaa maakunaakanuutwaau an machi awesiis ekw maak an machi uchischiwehiichesuu. Eukw uu machi uchischiwehiichesuu kaa maamishkaach ihtit uhchishkuu aniyuuh machi awesiisa e ihtaayich. Ekut kaa uhchi wiyeshihaat aniyuuh aweyuuh kaa utinamiyich aniyuuh machi awesiisa uchiisaawaachihiiwewiniyuu kaye kaa nuuchiishtuwaayich aniyuu manituuhkaan muyaam aniyuuh machi awesiisa e ishinaakusiyich kaa ishihaakanuyich. Taapishkun an machi awesiis ekw maak an machi uchischiwehiichesuu chichi iiniihch chii ishuwepinaakanuuch anite machishkuteu saakahiikanihch anite e ishkwaateyich e usaawaapahteyich chekwaayuu naashch e wiinimaasteyich.