Luke 16:24 - Chishemanituu Utayimuwin: Kaa Uskaach Testament

²⁴ Chii ishi tepweu maak, ‘Abraham, nuuhtaawiinaan, pechi chistimaacheyim. Pechi itishahuu maa Lazarus chechii taahkaakaminahk mikuchik nipiiyuu chechii pechi taahtinahk niteyiniyuu, chechii uhchi tahchipayihch. Wesh ninanehkaateyimun utah ishkutehch.’ ”

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

²⁴ ᒌ ᐃᔑ ᑌᐺᐤ ᒫᒃ, ᐁᑉᕋᐦᐊᒻ, ᓅᐦᑖᐐᓈᓐ, ᐯᒋ ᒋᔅᑎᒫᒉᔨᒻ᙮ ᐯᒋ ᐃᑎᔕᐦᐆ ᒫ ᓚᓴᕋᔅ ᒉᒌ ᑖᐦᑳᑲᒥᓇᐦᒃ ᒥᑯᒋᒃ ᓂᐲᔫ ᒉᒌ ᐯᒋ ᑖᐦᑎᓇᐦᒃ ᓂᑌᔨᓂᔫ, ᒉᒌ ᐅᐦᒋ ᑕᐦᒋᐸᔨᐦᒡ᙮ ᐌᔥ ᓂᓇᓀᐦᑳᑌᔨᒧᓐ ᐅᑕᐦ ᐃᔥᑯᑌᐦᒡ᙮

Luke 16:24 Iomraidhean Croise

Matthew 25:41

“Ekw che itaat aniyuu unimihchiiwinihch kaa ihtaayich aniyuu kaa machaatisiyich, ‘Aushikw nete chiyawaau Chishemanituu che waweshihiitaakw anite ishi kaachiche machishkutehch aniyuu kaa ishi ayeskuushtamuwaakanuyich machimanituuh ekw maak utaapachihaakaniyuuh.

Matthew 3:9

Kaye ekaawii iteyihtamukw ekaa che uhchi waweshihiitaakw Chishemanituu e wanituutamekw mikw Abraham e ihtaat e uhchiyekw. Chiwiihtamaatinaawaau, Chishemanituu chika chii ihtuutuweu uyeyuu asiniih kaa itapiyich chechii uhchi ushihaat aweyuuh Abraham utawaashiimiyich.

Matthew 5:22

Mikw maak chititinaawaau niya, awen e chishuwaasiistuwaat wiichishaanh chika wiyaaskunaakanuu, kaye awen e aatuweyimaat wiichishaanh chika peshuwaakanuu uhchishkuu aniyuu kaa wiishuwaatamiyich taan che ihtuutawaakanuyich aweyuu, kaye awen kaa itaat wiichishaanh taapwe ekaa chekwaan mitun kaa iteyihtaakusiyin kushpanaateyihtaakuniyuu chechii ishiwepinaakanuut machishkutehch.

Luke 16:30

An maak kaa miisitisiit naapeu chii nishkweushiheu e itaat, ‘Namui kata uhchi taapwehtamuch paatishkaan aweyuuh kaau chii wanishkaayichen nipuwinihch uhchi, chechii nituwaapamikutwaau ati chechii uhchi kweskaatisiitwaau.’

Luke 19:9

Jesus maak chii iteu, “Anuhchiish uu kaa chiishikaach misiwe iinuuch kaa wiichitwaau utah chiichihch pimaachihaakanuuch. Chiya maak Zacchaeus kaye chii kuuhtiskaanesin anite Abraham e ihtaat.

Luke 3:8

Chipaa kweskaatisiinaawaau ekw maak che nuukuhch taapwe mitun tekash e nakatamekw chimachaatisiiwinawaauh. Kaye ekaawii iteyihtamukw chechii ushimututamuwekw Chishemanituu utaahkuyuwesuwin mikw aniyaa Abraham e ihtaat e uhchiyekw. Chiwiihtamaatinaawaau, Chishemanituu chika chii ihtuutaweu uyeyuuh asiniih kaa itapiyich chechii uhchi ushihaat Abraham utawaashiimiyuu.

John 4:10

Chii iteu maak Jesus aniyuuh iskweu, “Chischeyihtamuuhpane chekwaayuu e wii miiwet Chishemanituu kaye chischeyimiyin awen e aawiyaan, chiya chipaa kakwechimin chechii minihiitaan. An maak kaa pimaachihiiwemakahch nipii eukun an chipaa minihiitin.”

John 4:14

Awen maak che minihkwekwe aniyuu nipiiyuu che miyak chechii minihkwet, namui wiiskaat miin chika uhchi paahkutaahtam. Wesh an nipii che miiweyaan kata piihchishkaakuu muyaam e uhchi muuschichuuniyich kata ishinaakuniyuu, eukw maak uu kaa pimaachihiiwemakahch nipii anit chechii uhchi ayaat awen kaachiche pimaatisiiwiniyuu minihkwete.”

John 7:37

An maahchishtai e chiishikaach an kaa makushaanuuhch eukw maauch kaa chisteyihtaakuhch. Eukw maak aniyuu e chiishikaayich Jesus kaa pisikuut e chishewet e itwet, “Awen e nuuhteyaapaakwekwe nika pechi nituwaapamukw ekw maak che minihiik.

Romans 4:12

Kaye maak aniyuuh kaa chischinuwaachishwaakanuyich uhtaawiimaaututaweu, mikw namui uhtaawiimaaututaweu mikw aniyuu e chii chischinuwaachishwaakanuyich. Aniyuu taapwehtamuwinihch e ishi pimaatisiyich mwehch wiya kaa ihtit aniyaanaa kuuhtaawiinuu Abraham eshkw ekaa uhchi chischinuwaachishwaakanuut eukw uyuu wehchi uhtaawiimaaututawaat.

2 Thessalonians 1:8

Ishkuteyuu e chisihkuyepayiyich chika aapachihtaau waweshihaate aniyuu ekaa kaa chischeyimaayich Chishemanituu kaye aniyuuh ekaa kaa nanihiihtamiyich miywaachimuwiniyuu anit yaayimuumaakanuyich Utipeyihchikeu Jesus.

James 2:13

Awen ekaa kaa chistimaacheyimaat kutak aweyuu namui kaye wiya kata uhchi chistimaacheyimaakanuu iskutak wiyaaskunaakanuute. Mikw maak an awen kaa chistimaacheyimaat kutak aweyuuh namui kata uhchi kushtaachuu chechii wiyaaskunaakanuut.

James 3:6

Mwehch ishkuteu kaa iteyihtaakuhch ekun e iteyihtaakuhch miteinii. Misiwe taan e ishi ihtakuhch machaatisiiwin utah aschiihch ekut miteiniihch e ihtakuhch, chiiyuunaahch maak ekute e ihtakuhch. Tekash wiinihiiwemakan taan e ishpishaach miiyuu. Uskach pemaatisiit awen tasine ishkuteu ishinaakuniyuu uteinii piihiim nepit, machishkutehch maak ekute wehchi saskahiikanuyich.

Revelation 19:20

Ekw kaa maakunaakanuutwaau an machi awesiis ekw maak an machi uchischiwehiichesuu. Eukw uu machi uchischiwehiichesuu kaa maamishkaach ihtit uhchishkuu aniyuuh machi awesiisa e ihtaayich. Ekut kaa uhchi wiyeshihaat aniyuuh aweyuuh kaa utinamiyich aniyuuh machi awesiisa uchiisaawaachihiiwewiniyuu kaye kaa nuuchiishtuwaayich aniyuu manituuhkaan muyaam aniyuuh machi awesiisa e ishinaakusiyich kaa ishihaakanuyich. Taapishkun an machi awesiis ekw maak an machi uchischiwehiichesuu chichi iiniihch chii ishuwepinaakanuuch anite machishkuteu saakahiikanihch anite e ishkwaateyich e usaawaapahteyich chekwaayuu naashch e wiinimaasteyich.

Revelation 20:15

An maak awen ekaa kaa masinaateyich utishinihkaasuwin anite masinahiikanihch anit mesinaasuyich aniyuuh aweyuuh che ayaayich kaachiche pimaatisiiwiniyuu machishkuteusaakahiikanihch chii ishuwepinaakanuu.

Revelation 22:1

Ekw uu enchil kaa pechi waapahtiit siipiiyuu. An maak nipiih anit an siipiih ekut wehchi miyakanuut awen kaachiche pimaatisiiwiniyuu. Naashch chii waasheyaakamishuu an nipii mwehch asiniish waasenihtaakanaapiskw e ishpish shaapwaau waaseyaapischisit ekun kaa itaakamihch an nipii. Shiipaa Chishemanituu ekw maak an Maanishchaanish uchisheuchimaau tehtapuwiniwaahch ekute kaa uhtaachuuhch uu siipii.