Luke 16:13 - Chishemanituu Utayimuwin: Kaa Uskaach Testament

¹³ “Namui awen kata chii atushkuweu niishu uchimaau ekaa naheyimituyich, wesh peyakw aniyuu kata uhkaateu, ekw aniyuu kutak kata saachiheu. Aniyuu peyakw suuhk kata atushkuweu, ekw aniyuu kutak namui kata uhchi naheyimeu chechii atushkuwaat. Namui chika chii atushkuwaawaau Chishemanituu muush e maamituneyihtamuwekwe chechii miisitisiyekw.”

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

¹³ ᓇᒧᐃ ᐊᐌᓐ ᑲᑕ ᒌ ᐊᑐᔥᑯᐌᐤ ᓃᔓ ᐅᒋᒫᐤ ᐁᑳ ᓇᐦᐁᔨᒥᑐᔨᒡ, ᐌᔥ ᐯᔭᒄ ᐊᓂᔫ ᑲᑕ ᐅᐦᑳᑌᐤ, ᐁᒄ ᐊᓂᔫ ᑯᑕᒃ ᑲᑕ ᓵᒋᐦᐁᐤ᙮ ᐊᓂᔫ ᐯᔭᒄ ᓲᐦᒃ ᑲᑕ ᐊᑐᔥᑯᐌᐤ, ᐁᒄ ᐊᓂᔫ ᑯᑕᒃ ᓇᒧᐃ ᑲᑕ ᐅᐦᒋ ᓇᐦᐁᔨᒣᐤ ᒉᒌ ᐊᑐᔥᑯᐙᑦ᙮ ᓇᒧᐃ ᒋᑲ ᒌ ᐊᑐᔥᑯᐙᐙᐤ ᒋᔐᒪᓂᑑ ᒨᔥ ᐁ ᒫᒥᑐᓀᔨᐦᑕᒧᐌᑴ ᒉᒌ ᒦᓯᑎᓯᔦᒄ᙮

Luke 16:13 Iomraidhean Croise

Matthew 4:10

Mikw maak Jesus chii nishkweushiheu e itaat, “Chiya machimanituu, maachiih iiches nete. Itashteu Chishemanituu utayimuwinihch, Mikw Utipeyihchikeu Chichishemanituumiwaau nuuchiishtuwaahkw kaye mikw wiya atushkuwaahkw.”

Matthew 6:24

“Namui awen chika chii atushkuweu niishu uchimaau, wesh peyakw aniyuu chika uhkaateu, ekw aniyuu kutak che saachihaat. Aniyuu peyakw suuhk chika atushkuweu, ekw aniyuu kutak namui chika uhchi naheyimeu chechii atushkuwaat. Namui chika chii atushkuweu Chishemanituu eyuu maak suuhk e aapatisit e wii miisitisiit.”

Luke 11:23

Jesus miin chii itweu, “An awen ekaa kaa pechi wiichihiit, ninishkuushitaakw. Awen ekaa kaa wiichihiit e maamuushtinicheuch aschetishihiicheu ishinaakusuu.”

Luke 14:26

“Awen waa nuushuushkuukwe taan e ishi pimaatisiyaan, niya etituu nika saachihiikw e ishpish saachihaat uhtaawii maak ukaawii, wiichiskweu, utawaashiim maak tipiiwe wiichishaan. Niya uste nika saachihiikw ishpishaat wiya e ishpish saachihtaat tipiiwe upimaatisiiwin. Ekaa maak chii ihtite namui nika chii uchischinuhamuwaakanitutuwaau.

Luke 16:12

Kaye maak ekaa taapweucheyimikuyine kuiskw chechii ihtuutamut kutak awen taan e ishi tipiyeusiit, awen maak che taapweuchiyimisk chechii miisk chekwaayuu chiya chechii tipiiweusiyuut.”

Luke 16:9

Ekw Jesus miin kaa ati itaat, “Chiwiihtamaatinaawaau, aapachihtaakw taan e ishi ayaayekw chechii miyutuutamekw ekw maak chechii wiichewaakaniyekw. Iskutak maak puunipimaatisiyekwe ekw maak che piihtakahiikuyekw anite kaachiche che wiichiyekw.

Luke 9:50

Jesus kaa itaat, “Ekaawii chistahamuwaahkw. Wesh an awen ekaa kaa nishkuushtaakuyihkw chiwiichihiikunuu.”

James 4:4

Taapwe nitawiin kaa ihtiyekw. Namui aa chichischeyihtenaawaau awen e saachihtaat taan e itaatisiinaanuyich utah aschiihch uhkaateu Chishemanituu. An awen kaa saachihtaat taan e itaatisiinaanuyich utah aschiihch ihtuutaasuu chechii uhkaataat Chishemanituu.