Luke 16:10 - Chishemanituu Utayimuwin: Kaa Uskaach Testament

¹⁰ Awen kaa taapweucheyihtaakusit kuiskw chechii ishi naanaakachihtaat e apishaashiyich chekwaayuu chika taapweucheyihtaakusuu chechii miyunaanaakachihtaat e mishaayich chekwaayuu. Ekw maak awen ekaa kuiskw ihtuutahke aniyuu e naanaakachihtaat maauch e apishaashiyich chekwaayuu, namui kuiskw chika chii ihtuutam e naanaakachihtaat chekwaayuu e mishaayich.

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

¹⁰ ᐊᐌᓐ ᑳ ᑖᐺᐅᒉᔨᐦᑖᑯᓯᑦ ᑯᐃᔅᒄ ᒉᒌ ᐃᔑ ᓈᓈᑲᒋᐦᑖᑦ ᐁ ᐊᐱᔖᔑᔨᒡ ᒉᒀᔫ ᒋᑲ ᑖᐺᐅᒉᔨᐦᑖᑯᓲ ᒉᒌ ᒥᔪᓈᓈᑲᒋᐦᑖᑦ ᐁ ᒥᔖᔨᒡ ᒉᒀᔫ᙮ ᐁᒄ ᒫᒃ ᐊᐌᓐ ᐁᑳ ᑯᐃᔅᒄ ᐃᐦᑑᑕᐦᑫ ᐊᓂᔫ ᐁ ᓈᓈᑲᒋᐦᑖᑦ ᒫᐅᒡ ᐁ ᐊᐱᔖᔑᔨᒡ ᒉᒀᔫ, ᓇᒧᐃ ᑯᐃᔅᒄ ᒋᑲ ᒌ ᐃᐦᑑᑕᒻ ᐁ ᓈᓈᑲᒋᐦᑖᑦ ᒉᒀᔫ ᐁ ᒥᔖᔨᒡ᙮

Luke 16:10 Iomraidhean Croise

Matthew 24:45

“Aapachihaakan kuiskw kaa ihtuutahk utaapatisuwin kaye kaa iipwaahkaat eukuu che wiyaapamikut uchimaam wiya chechii uchimaahkahtuwaat misiwe aniyuu kutak aapachihaakan kaye chechii naanaakachihtaawaat nihaau chechii ishi ashamaakanuyich iskutak utihchipayihche che ashamaakanuyich.

Matthew 25:21

‘Taapwe chimiyutuuten kaye taapwe chimiywaapatisin,’ chii itikuu aniyuu uchimaam. ‘Kuiskw e chii ishi aapatisiihkahtaman an e apishaashich taan kaa ishi pukuseyimikuyin ekw etituu e mishaakwaau chekwaayuu che pachishtinamaakuyin chechii uchimaahkahtaman. Aashtam pechi piihche, che pechi wiichihiyin taan e ishi miywaatamaan.’

Matthew 25:23

‘Taapwe chimiyutuuten kaye nuwach kaa miywaapatisiyin’ chii itikuu aniyuu uchimaam. ‘Kuiskw e chii ishi aapatisiihkahtaman an e apishaashich taan kaa ishi pukuseyimikuyin, etituu e mishaakwaau chekwaayuu chika pachishtinamaakuun chechii uchimaahkahtaman. Aashtam pechi piihche, che pechi wiichihiyin taan e ishi miywaataman.’

Luke 19:17

‘Chimiyutuuten, chimiywaapatisin,’ chii itikuu uchimaam. ‘E chii nuukuhtaayin e taapweucheyihtaakusiyin kuiskw chechii ishi aapatisiihkahtaman chekwaan e apishaashich miiskuch chika miikuun mitaahtu ihtaawinh chechii niikaanishkaman.’

John 12:6

Namui wii e chistimaacheyimaat aniyuu kaa chistimaatisiyich aniyuu wehchi itwet, wiya chii wii utinimaasuu aniyuu shuuliyaayuu wesh ekun kaa chii ihtit maan aat wiya e chii naanaakachihtaat aniyuu shuuliyaayuu kaa chii miyaakanuyich Jesus ekw maak uchischinuhamuwaakanh.

John 13:2

Mekwaach maak chii utaakushuu miichisuuch Jesus ekw maak uchischinuhamuwaakanh. Peyakw maak an chischinuhamuwaakan Judas kaa ishinihkaasut, Simon Iscariot ukusisa, shaash anite chii ihtuutaakuukupane machimanituu chechii iteyihtahk chechii wiyeshipachishtinaat Jesus aniyuu che tipiskaayich.

John 13:27

Judas kaa utinaat aniyuu aaihkunaau kaa miikut Jesus, ekw tiiwehch kaa ati piihchishkaakut machimanituu. Ekw Jesus kaa itikut, “Chiipiih ihtuut an taan chipaa ihtuuten.”

Hebrews 3:2

Kuiskw chii ihtuutaweu Chishemanituu Jesus aniyuuh kaa wiyaapamikut uyuu chechii itaapatisit. Kuiskw chii ihtuu kaye wiya mwehch Moses taan kaa ishi kuiskw chii atushkuwaayich Chishemanituuh mwehch e wiikaapuuhtaayich Chishemanituu uwaaskaahiikanimiyuu e chii ishinaakusiyich.