Luke 15:24 - Chishemanituu Utayimuwin: Kaa Uskaach Testament

²⁴ Wesh uu nikus mwehch e chii nipit chii ishinaakusuu ekw muyaam miin e pimaatisiit eukw e ishinaakusit, mwehch e chii wanishinit ekw maak miin e miskawaakanuut.’ Ekw maak kaa muuchikahtaatwaau.”

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

²⁴ ᐌᔥ ᐆ ᓂᑯᔅ ᒬᐦᒡ ᐁ ᒌ ᓂᐱᑦ ᒌ ᐃᔑᓈᑯᓲ ᐁᒄ ᒧᔮᒻ ᒦᓐ ᐁ ᐱᒫᑎᓰᑦ ᐁᐅᒄ ᐁ ᐃᔑᓈᑯᓯᑦ, ᒬᐦᒡ ᐁ ᒌ ᐗᓂᔑᓂᑦ ᐁᒄ ᒫᒃ ᒦᓐ ᐁ ᒥᔅᑲᐙᑲᓅᑦ᙮ ᐁᒄ ᒫᒃ ᑳ ᒨᒋᑲᐦᑖᑣᐤ᙮

Luke 15:24 Iomraidhean Croise

Matthew 8:22

Ekw Jesus kaa itaat, “Pechi wiicheuh. Ekush anichii mwehch kaa nipitwaau kaa iteyihtaakusitwaau awenich kata nahiihkuweuch aniyuu utiiniimuwaauh kaa nipiyich.”

Mark 8:22

Iskutak wetihtahkwaau Bethsaida chii ihtaauch awenichii e peshuwaatwaau naapeu ekaa waapahtamiyich. Naashch chii nitaweyimeuch Jesus chechii saaminaayich aniyuuh naapeu.

Luke 10:19

Nituhtamukw maak, chichii miitinaawaau tipeyihchichewin chechii shaakuuchihekw machimanituu, kaye chechii taahtahkushkaatekuch kaa pihchipuwetwaau misichinepukuch, kaye maak kaa pihchipuwetwaau mistahiipihchesuuch. Namui ihtakun chekwaan chechii aahkuhiikuyekw.

Luke 15:23

Kaye che nipahekw an kaa taahchipahaakanuut mistus, che miyuuhkawekw ekw maak che makusheyihkw.

Luke 15:25

“An maak ustesimaau anite nihtaauchihchikan aschiihch mekwaach chii ihtaau. Iskutak kaa peshuwaapahtahk wiichiwaau chii pehtam e matechistuhchikaanuyich kaye e mate niiminaanuyich.

Luke 15:32

Ishinaakun taapwe chechii muuchicheyihtamuhkw wesh chiichishaan mwehch e chii nipit chii ishinaakusuu ekw maak anuhchiish mwehch miin e pimaatisiit ekun e ishinaakusit. Mwehch e chii wanishinit chii ishinaakusuu ekw maak miin e miskawaakanuut ekun e ishinaakusit.’ ”

Luke 15:4

“Ishinaakusit aahch awen mitaahtumitanuu e chii ayaawaat maanishchaanisha, peyakw maak aniyuu wanishiniyich, taan chipaa ihtuu. Namui aa chipaa uhchi nakateu aniyuu peyakushtemitanuu peyakushteu maanishchaanisha chechii nituu naanituwaapamaat aniyuu kaa wanishiniyich, paatish miskawaate.

Luke 19:10

Iinuu Ukusisa chii pechi takushin chechii naanituwaapamaat kaye chechii pimaachihaat aniyuuh iinuuh kaa wanishiniitwaau.”

Luke 9:60

Ekw Jesus kaa itikut, “Anichii mwehch kaa nipitwaau kaa iteyihtaakusitwaau iinuuch ekush kata nahiihkuweuch aniyuu utiiniimuwaau kaa nipiyich. Chiya maak, maachiih che papaamaachimuut Chishemanituu chisheuchimaawin.”

John 11:25

Jesus kaa itaat, “Eukw niya kaa wanishkaanaat aweyuu e chii nipiyich kaye kaa miiwet pimaatisiiwiniyuu. Awen che pechi taapweyimukwe chika pimaatisiyuu aat e chii nipit.

John 5:21

Uhtaawiimaau wanishkaaneu aweyuu nipuwinihch uhchi ekw maak maayaat pimaatisiiwiniyuu, ekun kaye nihaau e ihtit Ukusisimaau, miyeu aweyuu pimaatisiiwiniyuu aniyuu waa miyaat.

Romans 11:15

Mekwaach ekaa kaa piskaatikutwaau Chishemanituuh anichii Jewa kaa itiskaanesitwaau ekut kaa uhchipayiyich misiwe anichii kutakach aahchiiuh kaa itiskaanesitwaau chechii wiichewaakanistamuwaakanuutwaau Chishemanituuh. Iskutak maak kaau utinikutwaawenich Chishemanituuh anichii Jewa kaa itiskaanesitwaau mwehch awenichii e chii nipitwaau kaau maak e pimaatisiitwaau chika ishinaakusuuch.

Romans 12:15

Wiich miywaatamuumaahkuch anichii kaa miywaatahkwaau. Wiich misimeyihtamuumaahkuch anichii kaa misimeyihtahkwaau.

Romans 6:11

Mwehch awenichii e nipitwaau ekaa tipeyimikutwaau machaatisiiwiniyuu ekun chipaa ishi kanawaapamisunaawaau. Chipimaatisiinaawaau ekw chechii naheyihtamihekw Chishemanituu e wiicheumekw Jesus Christ.

Romans 6:13

Ekaawii kaye mitun pachishtinamukw chiiyuuwaauh machihtwaawinihch chechii ishi aapatahkwaau. Chishemanituu teyakuch pachishteyimitisuustawaahkw. Ekw maak che ishinaakusiyekw mwehch awenichii e chii nipitwaau kaau maak e pimaatisiitwaau. Tekash pachishtinaahkw Chishemanituu chechii tipeyihtahk chipimaatisiiwinawaauh. Ekw maak chechii aapachihiitaakw chechii miyutuutamuwekw.

Romans 8:2

Wesh Chishemanituu Utahchaahkwa chitihtuutaakunuu chechii pimaatisiyuuhkw Christ Jesus uhchi. Eukuu kaa aapihkunit taan kaa ishi tipeyimikuch machaatisiiwiniyuu kaye nipuwiniyuu.

1 Corinthians 12:26

Ihtakuhche e ishi aahkusiimakahch an miiyuu, misiwe e ishpishaach miiyuu chika muushihtaachemakan. Kaye peyakw paschesiwin anit miiyuuhch miyuhkaakanuuhche, misiwe e ishpishaach an miiyuu chika miyeyimuumakan.

Ephesians 2:1

Chiyawaau maak e nipiyekw chichii ishinaakusinaawaau eshkw ekaa uhchi pimaachihiitaakw Chishemanituu. Chichii machaatisiinaawaau kaye namui kuuhchi nanihiihtuwaawaau Chishemanituu.

Ephesians 2:5

aat eshkw mekwaach e nipiihkw e chii ishinaakusiihkw ekaa uhchi nanihiihtuuhkw, chichii ihtuutaakunuu chechii wiich pimaatisiimahkw Christ. Chishemanituu chichii pimaachihiikunuu e chii wii shaweyimitahkw aat ekaa uhchi tepicheyihtaakusuuhkw.

Ephesians 5:14

Eukw maak wehch iinaanuuhch maan, “Wanishkaah chiya kaa wiihchihkwaamuyin, wanishkaah anit nipuwinihch uhchi. Ekw maak Christ che miisk waashtewiniyuu.”

Colossians 2:13

Chimachihtwaawinawaauh chichii ihtuutaakunaawaau muyaam e nipiyekw chechii ishinaakusiyekw Chishemanituu ishi e ihtaat, kaye maak eshkw namui kuuhchi ihtuutaakuwaau Chishemanituu chechii utawaashiimitutaataakw taan kaa ihtuutamaataakw Christ uhchi. Anuhchiish maak chichii miikuwaau Chishemanituu e uskaayich pimaatisiiwiniyuu mwehch kaa ishi wanishkaanaat Christ nipuwinihch uhchi. Tekash chichii wepeyihtamaakunuu Chishemanituu chimachihtwaawinuuh.

1 Timothy 5:6

Ekw an iskweu kaa peyakut pisikw maak mikw wiya kaa wii nanihiiwehiisut muyaam e nipit ishinaakusuu aat aniyuu eshkw e pimaatisiit.

Jude 1:12

Mikw wanaahtaasuuch anit e makushewekw e nuukuhtaayekw e saachihekw Chishemanituu. Namui mitun pimaameyimuuch e mista chiishpuhiisutwaau e wiichimiichisuumitaakuch, mikw wiyawaau e nanaakatuweyimisutwaau. Mwehch kaskawanishkuch e pimaashitwaau ekaa maak mechim nipiyuutwaau ekun e iteyihtaakusitwaau. Mwehch mistikuch ekaa mitun miinishuutwaau aat e takwaatiniyich, mistikuch chichi utapii e chii manishipikuhchipitaakanuutwaau, tekash e nipitwaau, ekun e ishinaakusitwaau.

Revelation 3:1

Ekw miin kaa itikuyaan, eukw uyuu itisinahamuu an enchil kaa naanaakachihaat umaamuuayimihaauh anite Sardis kaa ihtaayich. “Eukw uyuu e itwet an kaa tipeyimaat aniyuuh niishwaashch ahchaahkwa kaa atushkuwaayich Chishemanituu, an kaa tahkunaat niishwaashch achahkusha. Chichischeyimitinaawaau misiwe taan e ihtiyekw, iteu. Chichischeyimitinaawaau e iteyimikuyekw taapwe ahchaahkuwinihch e ishi pimaatisiyekw, mikw maak chinipinaawaau.