Luke 12:37 - Chishemanituu Utayimuwin: Kaa Uskaach Testament

³⁷ Kata shaweyihtaakusuuch maak anichii aapachihaakanich miskaakutwaawenich aniyuu uchimaamuwaauh e chii ayeskuwiishtawaatwaau. Chiwiihtamaatinaawaau maak, an uchimaau kata ayeskuwiyuu wiya kweschiipan chechii ihtuutamuwaat taan kaa ishi ihtuutamaakut ekw maak che wiishaamaat chechii miichisuyich, mechim wiya chika wiishtuweu.

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

³⁷ ᑲᑕ ᔕᐌᔨᐦᑖᑯᓲᒡ ᒫᒃ ᐊᓂᒌ ᐋᐸᒋᐦᐋᑲᓂᒡ ᒥᔅᑳᑯᑣᐌᓂᒡ ᐊᓂᔫ ᐅᒋᒫᒧᐙᐤᐦ ᐁ ᒌ ᐊᔦᔅᑯᐐᔥᑕᐙᑣᐤ᙮ ᒋᐐᐦᑕᒫᑎᓈᐙᐤ ᒫᒃ, ᐊᓐ ᐅᒋᒫᐤ ᑲᑕ ᐊᔦᔅᑯᐎᔫ ᐎᔭ ᑴᔅᒌᐸᓐ ᒉᒌ ᐃᐦᑑᑕᒧᐙᑦ ᑖᓐ ᑳ ᐃᔑ ᐃᐦᑑᑕᒫᑯᑦ ᐁᒄ ᒫᒃ ᒉ ᐐᔖᒫᑦ ᒉᒌ ᒦᒋᓱᔨᒡ, ᒣᒋᒻ ᐎᔭ ᒋᑲ ᐐᔥᑐᐌᐤ᙮

Luke 12:37 Iomraidhean Croise

Matthew 24:42

Yaakwaamiikw maak wesh namui chichischeyihtenaawaau taaishpish che takushihk Chitipeyihchikemuwaau.

Luke 12:36

Muyaam aapachihaakanich chipaa ishinaakusinaawaau e ashuwaapamaatwaau uchimaamuwaauh chechii pechi chiiweyich e chii naachimakusheyich e niipuunaanuyich. Takushiniyichen tiiwehch chika aapahamuweuch.

Luke 12:43

Kata shaweyimaakanuu an aapachihaakan miskuwaakanuute kuiskw e ihtuutahk aniyuu utaapatisuwin iskutak takushiniyichen uchimaam.

Luke 17:8

Namui, chika itikuu, ‘Pechi wiishtuu ekw maak chiishkwaa miichisuyaane, ekw chiya che miichisuyin.’

Luke 21:36

Yaakwaamiikw. Ekaawii puuniikw e ayimihaayekw e nitutamaayekw chechii yaaichikaapuyekw kaye chechii shaapushkamekw misiwe taan che ispayihch. Kaye maak ekaa chechii aatuweyimitaakw Iinuu Ukusisa iskutak uhchishkuukaapuushtawekwe.” Eukw maak uyuu kaa ishi wiihtamuwaat Jesus aniyuu uchischinuhamuwaakan.

Luke 22:27

Wesh an kaa apit anit miichisuunaahtikuhch uste ispeyihtaakusuu iteyimaakanuu ishpishaat an kaa aapachihaakanuut. Niya maak nichii papaaihtaan utah e ihtaayekw muyaam taapwe aapachihaakan e chii papaaishinaakusiyaan.”

John 12:26

An maak awen niya kaa atushkuut nika pechi nuushuushkaakw. Ekw maak che ihtaat nitaapachihaakan taanite che ati aihtaauch. Kata chisteyimikuu Nuuhtaawiih an awen che atushkuukwe.”

1 Corinthians 2:9

Wesh itashteu Chishemanituu utayimuwinihch, Namui awen uhchi waapahtam kaye namui awen uhchi pehtam nesht namui awen uhchi chischeyihtam taan kaa ishi ayeskuushtamuwaat Chishemanituuh aniyuuh kaa saachihiikut.

Philippians 1:21

Niya kiipaa che ishpish pimaatisiiwaane muush nika papaawiichewaau Christ. Nipahiikuyaane maak taapwe kata ihtakun che ishi miyu miskamaan.

Philippians 1:23

Taapishkun nimushteneyihten aniyuuh. Naashch taapwe niwii nakaten uu aschii, Jesus Christ e ihtaat chechii ihtaayaan. Eukw uu uste meywaashich.

2 Peter 1:11

Ekut kaye chechii uhchi mikw ishi piihtakahiikuyekw Chitipeyihchikemanuu kaye Chipimaachihiiweminuu Jesus Christ uchimaawinihch, aniyuu kaachiche che ihtakuniyich.

2 Peter 3:14

Ekw maak niichishaanitikw mekwaach uu e ashuwaapahtamekw an e chiishikaach kwaast e ishpish chii ihtiyekw wii payehchi pimaatisiikw kaye ekaawii chekwaan chika uhchi wii ataameyihtaakusinaawaau Chishemanituu ishi e ihtaat. Suuhk kata wii kuiskunaakunh chipimaatisiiwinawaauh ekw maak che ihtakuhch chiyaameyihtamuwin anit mekwesiinuu e ihtaayekw.

Revelation 14:13

Miin chekwaan kaa ispayihch. Nichii pehtawaau awen kihchikiishikuhch e uhchi ayimit. Mwaau kaa itwet, “Masinaha uu. Ute ishi niishtamihch shaweyihtaakusuuch anichii che nipitwaau eshkw e wiichewaatwaau Jesus.” Ekw Kaa payehchisiit Ahchaahkw kaa itwet, “Ehe, taapwe shaweyihtaakusuuch. Chii aayimihuch e nuushuushkuwaatwaau Jesus ekw maak ekw che ayiwepitwaau. Taan e ishi maamuu kanawaapahtaakanuyich kaa ishi pechi aapachihiikutwaau Chishemanituu kata wiicheukuuch.”

Revelation 16:15

Utipeyihchikeu maak iteu, “Muyaam chimutisk e iteyihtaakuniyich e takushihk ekun che iteyihtaakuhch niya takushiniyaane. Chika shaweyihtaakusuu maak an awen ekaa che kauhkusit mekwaach e ashuwaapit kaye che ayeskuushtaakwe uchekwaanimh mikw chechii ishi pushchishkahk ekw maak namui chika uhchi musheshkateu wiiwiite chechii pimaameyimut mushe anite e waapamaakanuut.”

Revelation 3:21

An awen che shaakuuchihtaakwe taan che ishi kakwechihiikut machi chekwaayuu nika miyaau chechii wiitapimit nichisheuchimaau tehtapuwinihch. Mwehch niya e chii shaakuuchihtaayaan misiwe machi chekwaan Nuuhtaawii nichii miikw chechii wiitapamak uchisheuchimaau tehtapuwinihch.”

Revelation 7:17

Wesh an Maanishchaanish tetaauch anit e ihtakuniyich aniyuu chisheuchimaau tehtapuwiniyuu eukuu Maanishchaanishuiinuu che miyu kanuweyimaat uyuuh. Kaye chika ituhtaheu anit e ihtakuniyich e muuschichuuniyich pimaatisiyuu nipiiyuu. Ekw maak Chishemanituu che kaasiihamuwaat uschiishikuyuuh misiwe aniyuuh kaa uhchihkuwaapiitwaauh.”