Luke 11:2 - Chishemanituu Utayimuwin: Kaa Uskaach Testament

² Jesus chii iteu, “Maau che ishi ayimihaayekw, ‘Nuuhtaawiinaan, kihchikiishikuhch kaa ihtaayin, nitayimihaanaan chitishinihkaasuwin e payehchisiimakahch chechii chisteyihtaakuhtaakanuuhch. Chuuchimaawin katawii utihchipayuu. Chititeyihtamuwin katawii ihtuutaakanuu utah aschiihch, taapishkuuch kihchikiishikuhch.

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

² ᒌᓴᔅ ᒌ ᐃᑌᐤ, ᒫᐤ ᒉ ᐃᔑ ᐊᔨᒥᐦᐋᔦᒄ, ᓅᐦᑖᐐᓈᓐ, ᑭᐦᒋᑮᔑᑯᐦᒡ ᑳ ᐃᐦᑖᔨᓐ, ᓂᑕᔨᒥᐦᐋᓈᓐ ᒋᑎᔑᓂᐦᑳᓱᐎᓐ ᐁ ᐸᔦᐦᒋᓰᒪᑲᐦᒡ ᒉᒌ ᒋᔅᑌᔨᐦᑖᑯᐦᑖᑲᓅᐦᒡ᙮ ᒎᒋᒫᐎᓐ ᑲᑕᐐ ᐅᑎᐦᒋᐸᔫ᙮ ᒋᑎᑌᔨᐦᑕᒧᐎᓐ ᑲᑕᐐ ᐃᐦᑑᑖᑲᓅ ᐅᑕᐦ ᐊᔅᒌᐦᒡ, ᑖᐱᔥᑰᒡ ᑭᐦᒋᑮᔑᑯᐦᒡ᙮

Luke 11:2 Iomraidhean Croise

Matthew 10:32

“Awen wiihtamuwaate kutak aweyuu e taapweyimit, kaye niya nika wiihtamuwaayuuh Nuuhtaawii kihchikiishikuhch kaa ihtaayich e chischeyimak.

Matthew 3:2

E itwet, “Kweskaatisiikw, wesh shaash peshunaakun an kihchikiishikw chisheuchimaawin.”

Matthew 5:16

Ekun maak mwehch chipaa ishi waashtenamaakuuch awenichii chiwaashtewinawaayuu anite chipimaatisiiwiniwaahch kaa ihtakuhch, chechii waapahtahkwaau aniyuu e ishi miyutuutamekw ekw maak che maamihchimaatwaau Kuuhtaawaau kihchikiishikuhch kaa ihtaayich.”

Luke 11:1

Peyakwaau iskutak Jesus kaa chiish ayimihaat, peyakw aniyuu uchischinuhamuwaakanh chii itikuu, “Utipeyihchikeu, pechi chiskutamuunaan maa kaye niyaan taan che ishi ayimihaayaahch mwehch John kaa ihtuutawaat uchischinuhamuwaakan.”

Romans 1:7

Ekun maak wehchi masinahamaatakuch misiwe chiyawaau Rome kaa ihtaayekw, chiyawaau Chishemanituu kaa saachihiitaakw kaye kaa wiyaapamitaakw chechii tipiiweusiitutaataakw. Chishemanituu Kuuhtaawiinuu ekw maak chitipeyihchikeminuu Jesus Christ chika shaweyimikuwaauch kaye chika miikuwaauch chiyaameyihtamuwiniyuu.

Romans 8:15

Wesh taapaa chitihtuutaakuwaau an Ahchaahkw Chishemanituu kaa miitaakw kaau chechii tipeyimikuwekw sechisuwiniyuu. Uu Ahchaahkw uhchi ekut wehchi ishihiitahkw Chishemanituu chechii utawaashiimitutaatahkw kaye maak chechii itahkw “Paapaa, Nuuhtaawii.”

1 Corinthians 1:3

Nitayimihaan Chishemanituu Kuuhtaawiinuu ekw maak chitipeyihchikeminuu Jesus Christ chechii miitaakw shaweyihchichewiniyuu kaye chiyaameyihtamuwiniyuu.

2 Corinthians 1:2

Chishemanituu Kuuhtaawiinuu kaye maak Jesus Christ Chitipeyihchikeminuu chika shaweyimikuwaauch kaye chika miikuwaauch chiyaameyihtamuwiniyuu.

Galatians 1:4

Jesus tekash chii pachishteyimisuu chechii nipahaakanuut chechii wiihkuchihiitahkw taan e ishi tipeyimikuuhkw machaatisiiwiniyuu anuhchiish taan e ishi ihtakuniyich utah aschiihch. Eukw uyuu kaa ishi nituweyihtamiyich Kuuhtaawinuuh Chishemanituuh chechii ihtit.

Ephesians 1:2

Chitayimiheshtamaatinaawaau chechii shaweyimitaakuch Chishemanituu Kuuhtaawiinuu ekw maak Utipeyihchikeu Jesus Christ kaye chechii miitaakuch chiyaameyihtamuwiniyuu.

Philippians 1:2

Nipukuseyimaanaanich Chishemanituu Kuuhtaawiinuu kaye Utipeyihchikeu Jesus Christ chechii miyutuutaataakuch kaye chechii miitaakuch chiyaameyihtamuwiniyuu.

Philippians 4:20

Kaachiche kata maamihchimaakanuu Chishemanituu Kuuhtaawiinuu. Amen.

Colossians 1:2

Chiichishaanuu Timothy ihtaau kaye wiya utah mekwaach e masinahamaatakuch. Nitutamuwaanaan Chishemanituu Kuuhtaawiinuu chechii miyutuutamaataakw kaye chechii miitaakw chiyaameyihtamuwiniyuu.

1 Thessalonians 1:1

Niyaan Paul, Silas, ekw maak Timothy, chimasinahamaatinaan chiyawaau umaamuuayimihaauch anite Thessalonica kaa ihtaayekw Chishemanituu Uhtaawiimaau ekw maak Utipeyihchikeu Jesus Christ kaa tipiweusiitutaataakw. Chitayimiheshtamaatinaan Chishemanituu chechii chishewaach miyutuutaataakw kaye chechii miitaakw chiyaameyihtamuwiniyuu.

1 Thessalonians 1:3

Nichischisinaan e ayimihiichiht Chishemanituu taan e ishi miyu atushkaatuyekw e taapweyimekw Utipeyihchikeu. Nichischisinaan taan e ishi miywaapatisiyekw e saachihekw Jesus. Nichischisinaan kaye taan e ishi suuhchikaapuuyekw e aspeyimututawekw Chitipeyihchikeminuu Jesus Christ.

2 Thessalonians 2:16

Chishemanituu Kuuhtaawiinuu neshta Chitipeyihchikeminuu Jesus Christ chisaachihiikunuuch kaye chichii miikunuuch kaachiche kaachiichihiiwewiniyuu kaye aspeyimuwiniyuu shaweyihchichewinihch uhchi.

Revelation 11:15

Ekw miin kutak enchil kaa puutaatahk upuutaachikan. Eukw uu niishwaashch kaa ihtaat enchil. Nichii pehtawaauch maak awenichii e chishewetwaau, anite kihchikiishikuhch e ayimitwaau e itwetwaau, “Ekw wetinamaasut Chitipeyihchikeminuu kaye aniyuuh kaa pechi itishahwaat chechii uchimaautwaau utah aschiihch. Wiya maak Utipeyihchikeu chika uchimaau kaachiche kaye kaachiche.”

Revelation 15:4

Utipeyihchikeu, awen ekaa che nanihchiishtaask kaye ekaa che chishtaatutahk chitishinihkaasuwiniyuu. Wesh mikw chiya chipayehchisiin. Misiwe awenichii e itiskaanesitwaau chika pechi nuuchiishtaakuch wesh chichii waapahtiiwen e ishpish kuiskw ihtiyin.” Eukw uyuu kaa itahamaasutwaau e nikamutwaau.

Revelation 19:6

Ekw kaa pehtuukwaau e mihchetuwetahkwaau awenichii muyaam nipii e chisheweyaachuuhch kaye muyaam nimischuuch e pehtaakusitwaau e itihtaakusitwaau. Chii iteuch, “Hallelujah, Utipeyihchikeu Chishemanituu maauch kaa suuhkaatisiit wiya tepeyihchicheu.

Revelation 20:4

Ekw miin kutach chekwaan kaa waapahtiikuyaan. Chisheuchimaau tehtapuwinh nichii waapahten. Chii ihtaauch maak anichii kaa apitwaau aniyuuh chisheuchimaau tehtapuwinh. Chii miiyaakanuuch uchii chechii wiyaaskunichetwaau. Ekw kaa waapamakwaau anichii ahchaahkuch kaa chimikwekuhwaakanuwaakupanenich aniyuu uhchi e chii tipaachimaatwaau Jesus taan kaa ihtiyich kaye maak e chii wawiihtamuwaatwaau Chishemanituuh utayimuwiniyuu. Namui uhchi nuuchiishtuwewaakupanenich wiyawaau aniyuuh machi aweshiisa maak aniyuuh manituuhkaan mwehch an machi awesiis e ishinaakusit kaa ishihaakanuyich. Namui kaye uhchi ayaaweuch aniyuu uchischinuwaachihchikaniyuu uskahtikuwaahch maak unihiiwinitihchiiwaahch. Kaau chii pimaatisiyuuch uchii ekw kaa tehtapitwaau aniyuuh chisheuchimaau tehtapuwinh. Chii wiich chisheuchimaaumeuch maak Jesus peyakwaau chishemitaahtumitanuu pipun ishpish.