Luke 10:22 - Chishemanituu Utayimuwin: Kaa Uskaach Testament

²² Ekw Jesus iskutak kaa chiishi ayimihaat kaa itaat aniyuu anit kaa ihtaayitwaauh, “Nuuhtaawii misiwe chekwaayuu nichii miikw chechii naanaakatuweyihtamaan. Wesh namui awen chischeyimeu aweyuu Ukusisimaau, mikw Uhtaawiimaau chischeyimeu. Kaye maak namui awen chischeyimeu aweyuu Uhtaawiimaau, mikw Ukusisimaau, kaye mikw wiya Ukusisimaau chika wiyaapameu aweyuuh aniyuuh chechii chischeyimaayich Uhtaawiimaau.”

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

²² ᐁᒄ ᒌᓴᔅ ᐃᔅᑯᑕᒃ ᑳ ᒌᔑ ᐊᔨᒥᐦᐋᑦ ᑳ ᐃᑖᑦ ᐊᓂᔫ ᐊᓂᑦ ᑳ ᐃᐦᑖᔨᑣᐤᐦ, ᓅᐦᑖᐐ ᒥᓯᐌ ᒉᒀᔫ ᓂᒌ ᒦᒄ ᒉᒌ ᓈᓈᑲᑐᐌᔨᐦᑕᒫᓐ᙮ ᐌᔥ ᓇᒧᐃ ᐊᐌᓐ ᒋᔅᒉᔨᒣᐤ ᐊᐌᔫ ᐅᑯᓯᓯᒫᐤ, ᒥᒄ ᐅᐦᑖᐐᒫᐤ ᒋᔅᒉᔨᒣᐤ᙮ ᑲᔦ ᒫᒃ ᓇᒧᐃ ᐊᐌᓐ ᒋᔅᒉᔨᒣᐤ ᐊᐌᔫ ᐅᐦᑖᐐᒫᐤ, ᒥᒄ ᐅᑯᓯᓯᒫᐤ, ᑲᔦ ᒥᒄ ᐎᔭ ᐅᑯᓯᓯᒫᐤ ᒋᑲ ᐎᔮᐸᒣᐤ ᐊᐌᔫᐦ ᐊᓂᔫᐦ ᒉᒌ ᒋᔅᒉᔨᒫᔨᒡ ᐅᐦᑖᐐᒫᐤ᙮

Luke 10:22 Iomraidhean Croise

Matthew 11:25

Ekut maak Jesus kaa ayimihaat e itwet, “Nuuhtaawii, chinanaaskumitin e chii waapahtiitwaau anichii awenichii ekaa uhchi chiskutamuwaakanuutwaau aniyuuh chekwaayuuh kaa kaatuutwaau kaa kachehtaaweyihtahkwaau.

Matthew 11:27

Ekw Jesus iskutak kaa chiish ayimihaat chii iteu, “Nuuhtaawii misiwe chekwaayuu nichii miikw chechii nanaakatuweyihtamuch. Wesh namui awen chischeyimeu aweyuu aniyuu Ukusisimaau, mikw Uhtaawiimaau chischeyimeu. Kaye maak namui awen chischeyimeu aweyuu Uhtaawiimaau, mikw Ukusisimaau chischeyimeu, kaye mikw wiya Ukusisimaau chika wiyaapameu aweyuuh aniyuuh chechii chischeyimaayich Uhtaawiimaau.”

Matthew 28:18

Ekw kaa naatikutwaau Jesus kaa itikutwaau, “Nichii miikuun niya tekash chechii uchimaahkahtamaan kihchikiishikw nesht aschii.

John 1:18

Namui wiiskaat awen uhchi waapameu Chishemanituu, mikw aniyuu kaa peyakushiyich Ukusisa kaa saachihaat chii ihtuutaakuu chechii chischeyimaakanuut.

John 10:15

mwehch e ishi chischeyimit Uhtaawiimaau kaye maak niya e ishi chischeyimak. Mitun maak nititeyihtamihiikuwaan chechii pachishtinisuuch chechii nipahiikuuch wiyawaau uhchi anichii nimaanishchaanishimach.

John 13:3

Jesus chii chischeyihtam Uhtaawiimaau e chii miikut suuhkaatisiiwiniyuu misiwe chekwaayuu chechii ihtuutahk, kaye chii chischeyihtam Chishemanituu e ihtaayich e uhchiit kaye miin kaau anite Chishemanituu e ihtaayich che ituhtet.

John 17:10

Misiwe uchii kaa tipiyeusiyin kaye niya nitipiyeusiin. Misiwe anichii kaa tipiyeusiyaan kaye chiya chitipiyeusiin. Nichii chisteyihtaakuhiikuun maak wiyawaau uhchi.

John 17:2

Wesh chichii miyaau tipeyihchichewiniyuu misiwe aweyuu chechii tipeyimaat. Ekw maak kaachiche pimaatisiiwiniyuu chechii miyaat misiwe aniyuuh aweyuuh kaa miyat.

John 17:26

Nichii ihtuutawaauch chechii chischeyimiskwaau kaye maak namui nika uhchi puuniiwaan aniyuu e ihtuutuukwaau. Ekw maak an taan e ishpish saachihiyin kaye wiyawaau chechii piihchishkaakutwaau. Ekw maak kaye niya che piihchishkuukwaau.”

John 17:5

Nuuhtaawii, chisteyihtaakuhiih mwehch an kaa ishpish chisteyihtaakusiyaan eshkw e chii ihtaayaan anite e ihtaayin, eshkw ekaa uhchi ushihtaayin uu aschii.”

John 3:35

Uhtaawiimaau saachiheu Ukusisimaau. Chii miyeu misiwe chekwaayuu chechii wiishuwaatamiyich.

1 Corinthians 15:24

Ekw maak Christ che wanaachihtaat misiwe uchimaawiniyuu, misiwe tipeyihchichewiniyuu kaye suuhkaatisiiwiniyuu. Ekw maak che iskwaapayihch aschii. Iskutak maak uu chii ispayihche ekw Christ che miyaat Chishemanituuh Uhtaawiimaauh chisheuchimaawiniyuu.

2 Corinthians 4:6

Itashteu Chishemanituu utayimuwinihch e chii itwet Chishemanituu, “Chika waashteu anite uhchi wanitipiskusiiwinihch.” Eukw uu yaapach Chishemanituu kaa ihtuutahk chechii waashteyich chitehiinaahch. Ekut maak wehchi kaschihupayihch chechii wiichihiihkwaau kutakach awenichii chechii waapahtahkwaau uyuu waashtewiniyuu. Uu maak waashtewin eukw aniyuu Chishemanituu uchisteyihtaakusuwin. Jesus Christ maak e ihtaat ekut wehchi nuukuniyich aniyuu uchisteyihtaakusuwin.

Ephesians 1:21

Wiya Christ uste iteyihtaakuniyuu utipeyichichewin ishpishaat aniyuuh kaa uchimaawiyich, kaa tipeyihchicheyich, kaa suuhkaatisiyich, kaye kaa niikaanipiyich. Wiya uste iteyihtaakuniyuu utishinihkaasuwin e iteyihtaakuniyich kutak awen utishinihkaasuwin anuhchiish kaye anite niishtamihch.

Hebrews 2:8

Chichii miyaau chechii uchimaahkahtahk misiwe chekwaayuu. Euk uu e itashtech Chishemanituu utayimuwinihch. Chichii wiihtamaakunuu maak Chishemanituu utayimuwinihch misiwe chekwaayuu e chii miitahkw chechii uchimaahkahtamuhkw. Namui ihtakun chekwaan ekaa chechii uchimaahkahtamuhkw. Anuhchiish maak eshkw namui chiwaapahtenaanuu misiwe chekwaan chechii uchimaahkahtamuhkw chiyaanuu kaa iiniiwiihkw utah aschiihch.

1 John 5:20

Chichischeyihtenaanuu Chishemanituu Ukusisa e chii pechi takushiniyich utah aschiihch, chechii chiskutamaatahkw chechii chischeyimahkw aniyuu chihchiwe Chishemanituwiyich. Chiwiichewaanuu an taapwe Cheshemanituut e wiicheumahk Ukusisa Jesus Christ. Eukw uu taapwe Cheshemanituut, an kaa miiwet kaachiche pimaatisiiwiniyuu.

2 John 1:9

An awen ayiwaak kaa ishi chiskutamaachet taan e ishi Chiskutamaacheyich Christ kaye ekaa kaa nanihiihtuwaat taan kaa ishi chiskutamaacheyich namui ayaaweu Chishemanituuh. Ekw an awen muush yaakwaau kaa naanaakachihtaat taan e ishi Chiskutamaacheyich Christ taapishkun Uhtaawiimaau ekw maak Ukusisimaau wiicheweu.