Luke 10:20 - Chishemanituu Utayimuwin: Kaa Uskaach Testament

²⁰ Ekaawii miyeyihtamukw mikw e chii shaakuuchihekuch machiahchaahkuch, uste miyeyihtamukw chitishinihkaasuwinaawaauh e masinaatekwaau kihchikiishikuhch.”

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

²⁰ ᐁᑳᐐ ᒥᔦᔨᐦᑕᒧᒄ ᒥᒄ ᐁ ᒌ ᔖᑰᒋᐦᐁᑯᒡ ᒪᒋᐊᐦᒑᐦᑯᒡ, ᐅᔅᑌ ᒥᔦᔨᐦᑕᒧᒄ ᒋᑎᔑᓂᐦᑳᓱᐎᓈᐙᐤᐦ ᐁ ᒪᓯᓈᑌᒀᐤ ᑭᐦᒋᑮᔑᑯᐦᒡ᙮

Luke 10:20 Iomraidhean Croise

Matthew 10:1

Jesus chii wiishaameu kaa niishushaapuyich uchischinuhamuwaakanh ekw kaa miyaat tipeyihchichewiniyuu chechii wiiwiitishihwaayich machiahchaahkwa, eyuu maak chechii miinuwaachihaayich aniyuu aweyuu nanaahkuu kaa itaaspineyitwaauh kaye kaa aahkusiitwaauh.

Matthew 26:24

Kata nipahaakanuu Iinuu Ukusisa aniyuu nihaau taan kaa ishi pechi masinahiikanuyich masinahiikanihch anite utaahch. Mikw maak taapwe kata aahkwaach machipayuu an awen che wiyeshapachistinaat Iinuu Ukusisa. Uste chipaa miywaayikupane an awen ekaa mechim uhchi pimaatisiikupane.”

Matthew 27:5

Ekw Judas anite napachistakuhch kaa ishi wepinaat aniyuuh shuuliyaawaapiskwa anite ayimiheukamikuhch. Chii ati wiiwiyuu maak ekw kaa nituu akuwiisut.

Philippians 4:3

Niwiichewaakan muush kuiskw kaa chii ihtiyin e wiich aapatisiimitaan chipukuseyimitin chechii wiichihiitwaau uchii iskweuch chechii puuniitwaau e machipayitwaau. Wesh taapishkun chii mista aapatisuuch e wiichihiitwaau e waawiihtamuch miywaachimuwiniyuu. Kaye Clement ekw maak anichii kutakach kaa wiich aapatisiimakwaau, utishinihkaasuwinawaau kaa masinaateyikwaauh Chishemanituu upimaatisiiwin masinahiikanihch chechii ayaatwaau kaachiche pimaatisiiwiniyuu nichii wiichihiikuuch.

Hebrews 12:23

ekute maak e ihtaayich misiwe Chishemanituu uniishtamuushaan aniyuu mesinaasuyich anite kihchikiishikuhch. Chipechi naataawaau Chishemanituu an misiwe aweyuu kaa wiyaaskunaat. Ekut kaye utah e ihtaayich utahchaahkuwaau anichii ukuiskutaatisiiuch mitun kaa tepi kuiskunaakuhaakanuutwaau.

Revelation 13:8

Ekw maak misiwe awen aschiihch kaa ihtaat chika nuuchiishtuweu aniyuu machi awesiisa. Mikw anichii pimaatisiyuu masinahiikanihch kaa masinaateyikwaau utishinihkaasuwinawaau, aniyuu masinahiikaniyuu taanit kaa masinaasutwaau awenichii eshkw ekaa uhchi usihtaakanuuhch aschii, eukunich anichii namui uhchi nuuchiishtuweuch aniyuu machi awesiisa. Uu maak masinahiikan an Maanishchaanish kaa nipahaakanuut tipeyihtam.

Revelation 17:8

An machi awesiis kaa waapamit chii pimaatisiyuu peyakwaau mikw maak namui shaash pimaatisiyuu. Anite aniyuu kaa mista pukuneyaayich chika uhchi nuukuhiisuu ekw maak che nishuuwanaachihaakanuut. Anichii maak awenichii utah aschiihch kaa pimaatisiitwaau ekaa kaa masinaateyikwaau utishinihkaasuwinawaauh anite masinahiikanihch anit kaa masinahwaakanuyich aweyuuh che ayaayich kaachiche pimaatisiiwiniyuu eshkw ekaa kaa uhchi ihtakuniyich uyuu aschiiyuu chika miskaasinaweuch waapamaatwaawenich aniyuuh machi aweshiisa. Wesh chii pimaatisiyuuh mikw maak namui shaash pimaatisiyuuh. Kaau maak chika uhchi nuukusiyuu e pimaatisiyich.

Revelation 20:12

Nichii waapamaauch maak misiwe anichii awenichii kaa nipuwaakupanenich. Misiwe kaa chisteyihtaakusitwaau kaye anichii ekaa kaa chisteyihtaakusitwaau nichii waapamaauch. Chii uhchishkuukaapushtamuch aniyuu chisheuchimaau tehtapuwiniyuu. Chii ihtakun maak masinahiikanh e aapahiikanuuhkwaauh. Miin maak kutach masinahiikan chii aapahiikanuu. Uu maak masinahiikan ekut mesinaasutwaau anichii awenichii che ayaatwaau kaachiche pimaatisiiwiniyuu. Anichii maak kaa nipitwaau chii wiyaaskunaakanuuch mikw taan kaa ihtiwaakupanenich. Misiwe taan kaa ihtitwaau chii masinaateyuu anit aniyuuh masinahiikanh.

Revelation 20:15

An maak awen ekaa kaa masinaateyich utishinihkaasuwin anite masinahiikanihch anit mesinaasuyich aniyuuh aweyuuh che ayaayich kaachiche pimaatisiiwiniyuu machishkuteusaakahiikanihch chii ishuwepinaakanuu.

Revelation 21:27

Namui chika uhchi pachishtinikanuu chekwaan e maayaatahch chechii ihtakuhch anit an ihtaawin. Namui kaye chika chii piihcheu an awen nitawiin kaa ihtit maak kaa wiich nanatayit. Mikw anichii kaa masinaateyikwaau utishinihkaasuwinawaau anite aniyuuh Maanishchaanish upimaatisiyuu masinahiikaniihch chika chii piihcheuch aniyuu ihtaawiniyuu.

Revelation 3:5

Chika waapaaspisuuch anichii che shaakuuchihtaawaakwenich taan che ishi kakwechihiikutwaau machi chekwaayuu. Namui nika uhchi kaasiisinahamuwaan utishinihkaasuwinawaauh anite masinahiikanihch taanit mesinaasuyich aweyuuh che ayaayich kaachiche pimaatisiiwiniyuu. Nika wiihtamuwaan anite Nuuhtaawii kaye enchil e ihtaayich niya e ihtaauch e ishi tipeyihtaakusitwaau.”