Luke 10:2 - Chishemanituu Utayimuwin: Kaa Uskaach Testament

² Chii iteu maak, “Mihchen nihtaauchihchikanh shaash e ishinaakuhkwaauh chechii maamuushtinikanuuhkwaauh mikw maak namui mihchetuuch kaa aapatisitwaau chechii maamuushtinahkwaau. Chipaa ayimihaawaau Utipeyihchikeu, an kaa tipiyeusiit misiwe chekwaayuu e nihtaauchiniyich, chechii itishahwaat mihchetu aweyuu che maamuushtinamiyich aniyuu nihtaauchihchikanh.

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

² ᒌ ᐃᑌᐤ ᒫᒃ, ᒥᐦᒉᓐ ᓂᐦᑖᐅᒋᐦᒋᑲᓐᐦ ᔖᔥ ᐁ ᐃᔑᓈᑯᐦᒀᐤᐦ ᒉᒌ ᒫᒨᔥᑎᓂᑲᓅᐦᒀᐤᐦ ᒥᒄ ᒫᒃ ᓇᒧᐃ ᒥᐦᒉᑑᒡ ᑳ ᐋᐸᑎᓯᑣᐤ ᒉᒌ ᒫᒨᔥᑎᓇᐦᒀᐤ᙮ ᒋᐹ ᐊᔨᒥᐦᐋᐙᐤ ᐅᑎᐯᔨᐦᒋᑫᐤ, ᐊᓐ ᑳ ᑎᐱᔦᐅᓰᑦ ᒥᓯᐌ ᒉᒀᔫ ᐁ ᓂᐦᑖᐅᒋᓂᔨᒡ, ᒉᒌ ᐃᑎᔕᐦᐙᑦ ᒥᐦᒉᑐ ᐊᐌᔫ ᒉ ᒫᒨᔥᑎᓇᒥᔨᒡ ᐊᓂᔫ ᓂᐦᑖᐅᒋᐦᒋᑲᓐᐦ᙮

Luke 10:2 Iomraidhean Croise

Matthew 20:1

“Maau e ishinaakuhch kihchikiishikw chisheuchimaawin. Chii ihtaau peyakwaau uchimaau e tipiyeusiit shuuminaahtikw nihtaauchihchikan aschiiyuu. Peyakwaau maak wiipach e chechishepaayaayich chii wiiwiyuu e nituu naanituweyimaat aweyuuh chechii utaaskunaat, chechii aapatisiyich anite ushuuminaahtikw nihtaauchihchikan aschiihch.

Mark 13:34

Ekun mwehch e ishinaakuhch naapeu waahiyuu e wii ispayit. Iskutak che nakatahk wiich utaapachihaakanh miyeu che uchimaawiyich mekwaach ekaa ihtaate. Misiwe paahpeyakw wiihtamuweu che itaapatisiyich. Kaye aniyuuh kaa kanuushkuwaahtaweyich itashumeu yaakwaau chechii naanaakachihtaayich ishkwaahtemiyuu.

Mark 16:15

Ekw kaa itaat, “Maachiikw misiwe e ispichiskamikaach uu aschii che kacheskweyekw e waawiihtamekw uu miywaachimuwin misiwe awen chechii pehtahk.

Mark 16:20

Ekw maak chischinuhamuwaakanich misiwe chii aituhteuch e kacheskwetwaau. Utipeyihchikeuh chii wiichihiikuuch kaye chii waapahtiiweyuu e taapwemakaniyich taan e ishi kacheskwetwaau aniyuu uhchi nanaahkuu maamishkaach waapahtiiwewinh e chii ihtuutahkwaau. Amen.

Luke 9:1

Jesus chii maausikw wiishaameu kaa niishushaapuyich uchischinuhamuwaakanh. Kaa miyaat suuhkaatisiiwiniyuu kaye tipeyihchichewiniyuu chechii wiiwiitishihwaayich machiahchaahkwa kaye chechii miinuwaachihaayich nanaahkuu e itaaspineyitwaauh aweyuu.

ᐊᐸᔅᑕᓚᒡ 11:19

Iskutak maak kaa nipahaakanuut Stephen, chii nanehkaachihaakanuuch anichii kaa taapwehtahkwaau, misiwe maak nanaahkuu chii itishimuuch. Pasch maak waahyuu chii ituhteuch muyaam anite aschiihch Phoenicia kaye Cyprus kaa ishinihkaateyikwaauh ekw maak anite ihtaawinihch Antioch, mikw maak aniyuu Jewa iinuuh chii waawiihtamuweuch miywaachimuwiniyuu.

ᐊᐸᔅᑕᓚᒡ 13:2

Mekwaach maak anit ekaa miichisutwaau mikw e maamuu ayimiheshtawaatwaau Chishemanituu, ekut kaa ayimihiikutwaau Kaa payehchisiyich Ahchaahkwa e itikutwaau, “Pechi tipaanihaahkuch Barnabas ekw maak Saul wesh nichii wiyeyimaauch chechii ihtuutamuutwaau aapatisuwiniyuu.”

ᐊᐸᔅᑕᓚᒡ 13:4

Kaa payehchisiit Ahchaahkw maak e chii chihchitishahukutwaau Barnabas ekw maak Saul anite ihtaawiniyuu Seleucia kaa ishinihkaateyich ekute anite kaa uhchi puusitwaau anite ministikuhch Cyprus kaa ishinihkaateyich ekute kaa isichimetwaau.

ᐊᐸᔅᑕᓚᒡ 20:28

Suuhk maak naanaakatuweyimisukw kaye suuhk wii miyu kanuweyimaahkuch aniyuuh Kaa payehchisiit Ahchaahkw kaa miitaakw chechii naanaakachihiimekw. Yaakwaau ishi kanuweyimaahkuch umaamuuayimihaauch, wesh Chishemanituu wiya chii tipahahweu uyuuh iskutak Ukusisa kaa pachishtinaat chechii nipahaakanuyich.

ᐊᐸᔅᑕᓚᒡ 22:21

Ekw kaa iishit Utipeyihchikeu, ‘Maachiih yaapach wesh waahyuu chika itishahuutin anite anichii ekaa Jewa kaa itiskaanesitwaau e ihtaatwaau.’ ”

ᐊᐸᔅᑕᓚᒡ 8:4

Anichii maak kaa taapwehtahkwaau kaa ushimutwaau Jerusalemihch, misiwe chii papaaituhteuch e waawiihtahkwaau miywaachimuwiniyuu.

1 Corinthians 12:28

Ihtaayuu maak umaamuuayimihaauh Chishemanituu e chii wiyaapamaat taan che itaapatisiyich. Aniyuuh niishtam kaa wiyaapamaat eukw uyuuh apastalh ekw miin uchischiwehiichesuuh, ekw miin chiskutamaachesuuh, kaye aweyuuh maamishkaach chekwaayuu che ihtuutamiyich. Chii wiyaapameu kaye aweyuu che miinuwaachihiiweyich, kaye aniyuuh nanaahkuu che ishi wiichihaayich aweyuuh. Chii wiyaapameu kaye aweyuuh e waawiipayihtaayich chekwaayuu che itaapatisiyich, kaye aweyuuh che kweschayimiyich.

1 Corinthians 15:10

Mikw maak Chishemanituu sehchei e miyutuutamuwaat aweyuuh ekut wehchi ishinaakusiyaan taan e ishinaakusiyaan anuhchiish. Namui maak sheshkwaaht aniyuu kaa ishi sehchei miyutuutamuut. Niya maak wii, etituu suuhk nichii aapatisin ishpishaat misiwe e tashitwaau anichii kutakach apastalach. Namayeu maak niya tipiiwe kaa ihtiyaan. Chishemanituu wiya sehchei e chii miyutuutamut wehchi ihtuutamaan uu kaa ishi aayimuutamaan.

2 Corinthians 6:1

An maak e maamuu atushkuwachiht Chishemanituu Chinitutamaatinaan ekaa chechii ishinaakusiyekw ekaa e aapateyihtamekw taan e ishi chishewaatutaataakw Chishemanituu.

Philippians 2:21

Misiwe kutakach awenichii mikw wiyawaau nanaakatuweyimisuuch, namui aapateyihtamihiikuuch chechii waawiihtahkwaau miywaachimuwiniyuu.

Philippians 2:25

Nititeyihten kaau chechii chiiwetishahuuk chiichishaanuu Epaphroditus anite e ihtaawekw. Wesh suuhk nichii wiichihiikw e waawiihtamaan miywaachimuwin. Chiyawaau chichii pechi itishahwaawaau chechii pechi waawiichihiit.

Philippians 2:30

Namui uhchi puuniyuu e atuskuwaat Jesus aat e chii kushpanaataniyich upimaatisiiwin e chii peshuwaapahtahk nipuwiniyuu. Eukw uyuu kaa ihtit e pechi wiichihiit ekaa uhchi ihtaayekw chiyawaau chechii pechi wiichihiyekw.

Colossians 1:29

Chechii ihtuutamaan maak uu nuuskawiin taan e ishpish suuhk atushcheyaan. Aniyuu suuhcheyihtaakusuwiniyuu e ishi miit Christ nuuhtaapachihuun. Mitun maak wesh nuukuniyuu aniyuu suuhcheyihtaakusuwiniyuu mekwaach anit e atushcheuch.

Colossians 4:12

Miin kutak awen e ihtaayekw e uhchiit chiwaachiyemikuwaau eukw uu Epaphras. Kaye wiya atushkuweu Christ Jesus. Muush suuhk chitayimiheshtamaakuwaau e nitutamuwaat Chishemanituuh chechii yaaichikaapuuhiitaakw tekash e nanihiihtamuwekw utiteyihtamuwiniyuu mwehch e ihtitwaau anichii kaa chiishi nihtaauchitwaau kaye tekash kaa taapweyimaatwaau Jesus.

1 Thessalonians 2:9

Niichishaanitikw, cheshtinaash chichischisinaawaache taan kaa ishpish mistaapatisiyaahch anit e ihtaayekw. Nichii aapatisinaan e chiishikaach kaye e tipiskaach niyaan chechii pimipayihiisuyaahch ekaa chechii kusikushkaakuyekw e iteyihtamekw chechii pechi pimipayihiyaahch mekwaach e waawiihtamaataahch Chishemanituu umiywaachimuwin.

1 Thessalonians 5:12

Niichishaanitikw, chipukuseyimitinaan chechii chisteyimekuch anichii kaa niikaanishkaataakuch. Wesh Utipeyihchikeuh chii wiyaapamikuuch chechii chistunihtahiitaakuch kaye chechii chiskutamaataakuch Chishemanituu e ihtaayich chechii ishi pimaatisiiwekw.

2 Thessalonians 3:1

Euk uu maahchishtai waa ititakuch, niichishaanitikw, pechi ayimiheshtamuunaan ekaa chechii chipihchitaakanuyich Utipeyihchikeu umiywaachimuwin. Ayimihaakw chechii mishihtepayiyich muyaam chiyawaau anite e ihtaayekw kaa ishi mishihtepayiyich.

1 Timothy 4:10

Eukw maak wehchi suuhk yaapach iteyihtamihiikuyihkw uu taan e itaapatisiihkw aat e aayimuhuyihkw wesh chitaspeyimututawaanuu Chishemanituu kaa pimaatisiit, an kaa nituweyimaat misiwe aweyuu chechii pimaachihuyich kaye kaa pimaachihaat misiwe aniyuu kaa taapweyimikut.

2 Timothy 4:5

Mikw maak suuhk nanaakataweyimisuu chiya, kuiskw chechii ishi maamituneyihtaman taan mikw che ispayuwane. Siipiiwesiistah taan che ishi nanehkaachihiikuwane. Suuhk wiichihiich kutakach e waawiihtamuutwaau miywaachimuwiniyuu. Kaye maak mitun tekash ihtuut misiwe aniyuu taan kaa wii itaapachihiisk Chishemanituu.

Philemon 1:1

Niya Paul kaa masinahiicheyaan. Chiichishaanuu Timothy kaye ihtaau utah. Chipahutuukamikuhch nitihtaan anuhchiish an uhchi e atushkuuk Jesus Christ. Chiya niwiichewaakanaan Philemon kaa masinahamaataan kaye chiya kaa atushkuwat Jesus mwehch niyaan e ishi atushkuwachiht.

Hebrews 3:6

Aniyuu maak Chishemanituuh e Ukusitutaakut Jesus, kuiskw ishi atushkuweu Chishemanituu e niikaanishkuumaat utiiniimiyuuh. Christ eukw Chishemanituu Uukusisa. Chiyaanuu maak chika utiiniimitutaakanuu Chishemanituu, chiishpin suuhchiteheyihkwe taapwehtamuwinihch kaye suuhk mamechiminamuhkwe taan e ishi aspeyimuyihkw.

Revelation 2:1

Eukw uu itasinahamuu an enchil kaa naanaakachihaat umaamuuayimihaauh anite Ephesus kaa ihtaayich, “Eukw uyuu e itwet an kaa tahkunaat niishwaashch achahkusha unihiiwinitihchiihch, an kaa papaamuhtet anite niishwaashch kaa ushaaushuuliyaanaapiskuniyikwaau waashtenamaakanaahtikw e ihtakuniyikwaauh.