Luke 1:7 - Chishemanituu Utayimuwin: Kaa Uskaach Testament

⁷ Namui maak uhchi ayaaweuch awaasha wesh Elizabeth namui uhchii ayaaweu awaasha, kaye maak shaash taapishkun chii chisheiniyuuch.

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

⁷ ᓇᒧᐃ ᒫᒃ ᐅᐦᒋ ᐊᔮᐌᐅᒡ ᐊᐙᔕ ᐌᔥ ᐁᓕᓴᐯᑦ ᓇᒧᐃ ᐅᐦᒌ ᐊᔮᐌᐤ ᐊᐙᔕ, ᑲᔦ ᒫᒃ ᔖᔥ ᑖᐱᔥᑯᓐ ᒌ ᒋᔐᐃᓂᔫᒡ᙮

Luke 1:7 Iomraidhean Croise

Luke 1:5

Mekwaach Herod kaa chisheuchimaaut anite Judea aschiihch, chii ihtaau Jewa ayimiheuchimaau Zechariah e chii ishinihkaasut. Aniyaa Abijah kaa ishinihkaasuyich ayimiheuchimaau e ihtaayich ekute kaa uhchiyit Zechariah. Chii pechi maamiiskuchishkaatuuch ayimiheuchimaauch anichii Abijah e ihtaayich kaa uhchiitwaau. Wiichiskweu maak Elizabeth chii ishinihkaasuyuuh. Uu maak Elizabeth anite Aaron kaa ishinihkaasuyich ayimiheuchimaauh e ihtaayich chii uhchi aanische pimaatisiikupane.

Luke 1:6

Zechariah ekw maak Elizabeth chii kuiskutaatisiyuuch. Tekash chii nanihiihtamuweuch Utipeyihchikeu ukacheskwewiniyuuh kaye utitishuwewiniyuuh. Kaye naashch chii naheyihtamiheuch Chishemanituu aniyuu taan kaa ishi pimaatisiitwaau.

Luke 1:8

Anichii maak ayimiheuchimaauch maamiiskuch chii aapatisuuch anite chisheayimiheukamikuhch. Peyakwaau maak mekwaach anit e chii utihchipayiyich wiya Zechariah kweschiipan chechii aapatisit anite chisheayimiheukamikuhch.

Romans 4:19

Shaash maak chekaat chii mitaahtumitanuupunesuu Abraham uyuu kaa itaakanuut che ihtuutamuwaakanuut. Yaapach maak peyakun chii ishpish taapweyimeu Chishemanituuh. Kaa ishpish chii suuhchipayiyich e taapweyimaat namui mitun uhchi aanuwehtam che utawaashiimitwaau aat e chii chischeyimisut ekaa shaash chechii uhtaawimaaut kaye aniyuuh wiich chisheishkwesha e chii chischeyimaat cheshtinaash shaash ekaa chechii utawaashiimiyich.

Hebrews 11:11

Kaye Sarah nitaayimuumaau. Abraham chii wiichiskweu aniyuu Sarah. Kaye wiya maak Sarah chii taapweyimeu Chishemanituu. Namui wiishkaat uhchii ayaaweu awaasha kaye shaash chii miyaaskam aniyuu e ispihtisiinaanuyich chechii ayaawaakanuyich awaasha. Mikw maak yaapach chii ayaaweu awaasha aniyuu uhchi e chii taapwehtawaat Chishemanituu chechii ihtuutamaakut taan kaa itweyich cheshtinaash che ihtuutamaakut.