John 4:6 - Chishemanituu Utayimuwin: Kaa Uskaach Testament

⁶ Chii ihtakun anit uhtahiipaan, Jacob uhtahiipaan chii ishinihkaateu. Naashch maak chii ayeskuhteu Jesus, kaa ati waweyapit peshuch anit uhtahiipaanihch. Wiyesh chii aapihtaachiishikaayiche.

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

⁶ ᒌ ᐃᐦᑕᑯᓐ ᐊᓂᑦ ᐅᐦᑕᐦᐄᐹᓐ, ᒉᑲᑉ ᐅᐦᑕᐦᐄᐹᓐ ᒌ ᐃᔑᓂᐦᑳᑌᐤ᙮ ᓈᔥᒡ ᒫᒃ ᒌ ᐊᔦᔅᑯᐦᑌᐤ ᒌᓴᔅ, ᑳ ᐊᑎ ᐗᐌᔭᐱᑦ ᐯᔓᒡ ᐊᓂᑦ ᐅᐦᑕᐦᐄᐹᓂᐦᒡ᙮ ᐎᔦᔥ ᒌ ᐋᐱᐦᑖᒌᔑᑳᔨᒉ᙮

John 4:6 Iomraidhean Croise

Matthew 27:45

Kaa aapihtaachiishikaach maak ekut mitun e kaschitipiskaach kaa ishinaakuhch misiwe e ishpishaach anit an aschii. Nishtu tipahiikan ekun kaa ishinaakuhch.

Matthew 4:2

Iskutak maak nemitanuu chiishikaauh kaye nemitanuu tipiskaauh anit kaa ihtaat ekaa miichisut Jesus, chii siiweyuu.

Matthew 8:24

Chek sischikuuch kaa mistachiishtiniyich anit saakahiikanihch, chii kushtaatikuniyuu maak chechii kushaapeyaahaniyich aniyuu uchiimaanuwaau. Chii nipaau maak wiya Jesus.

Luke 2:7

Nipeukamikw maak mitun chii saakaschinaanuuyuuh ekw anite uhkaanikamikuhch kaa ihtaatwaau. ekute anite kaa pimaatisiyich aniyuu uniishtamuushaan Mary, e chii naapeshiiwiyich. Kaa wiiskweyechinaat machunishihch ekw kaa pimishimaat anit uhkaanich kaa chii uhchi miichisutwaau.

Luke 9:58

Ekw Jesus kaa itaat, “Mahcheshuuch ihtakuniyuu uwaatakuwaauh, piyeshiishach kaye ihtakuniyuu uwachishtunawaauh, mikw maak Iinuu Ukusisa, namui ayaayuuh taanit chechii waweyishiniyiyich chechii ayuwepiyich.”

John 11:9

Ekw Jesus kaa nishkweushihaat e itaat, “Niishushaap tipahiikanh ihtakun peyakwaau e chiishikaach. Awen pimuhtete e chiishikaayich namui chika uhchi pahchishinuu wesh waapahtam aniyuu waashtewiniyuu utah aschiihch kaa ihtakuniyich.

John 4:12

Weskach anite utaahch chitaanische waahkumaakanuu Jacob chichii miikunuu uyuu uhtahiipaaniyuu. Chii minihkweu uyuu nipiiyuu kaye ukusisa ekw maak umaanishchaanishimh ekut kaa uhchi minihkweyich. Uste aa chiya chititeyimisun ishpish wii aniyaa chitaanische waahkumaakanuu Jacob.”

John 4:5

Iskutak maak anite Samaria aschiihch e ihtaat, chii utihtam ihtaawiniyuu Sychar e ishinihkaateyich. Peshuch maak utah uyuu ihtaawiniyuu ekut kaa ihtakuniyich aniyuu nihtaauchihchikan aschiiyuu aniyaa Jacob kaa miyaat ukusisa Joseph.

John 4:7

Naanaacheshiish maak, iskweu, Samaria aschiihch e uhchiit chii pechi kwaapicheu. Jesus kaa itaat aniyuu iskweu, “Pechi miih maa nipiih chechii minihkweyaan.”

2 Corinthians 8:9

Chichischeyimaawaau taan kaa ishi miyutuutamaachet Chitipeyihchikeminuu Jesus Christ. Chii weyuutisiyuu yaapach maak chii ihtuutaasuu chechii chistimaatisiit chiyaanuu uhchi. Chii nakatam wiya misiwe uweyuutisiiwin.

Hebrews 2:17

Eukw aniyuu wehchi tekash iiniihch chii ishihaakanuut. Chii nituweyihtaakusuu wiichishaan chechii nispituwaat anit chechii uhchi chisheayimiheuchimaaut Chishemanituu e atushkuwaat, ekw maak chechii wepeyihtamuwaakanuyich aweyuuh umachihtwaawiniyuuh.

Hebrews 4:15

Wesh an chichisheayimiheuchimaaminuu chichistimaacheyimikunuu. Tekash chichischeyimikunuu ekaa mitun suuhchikaapuuhkw iskutak e kakwechihiikuuhkw chechii machituutamuhkw. Wesh kaye wiya chii kakwechihaakanuu chechii machituutahkw muyaam chiyaanuu e ihtuutaakuyihkw, mikw maak namui uhchi machituutam wiya.