John 17:3 - Chishemanituu Utayimuwin: Kaa Uskaach Testament

³ Maaute maak chechii uhchi ayaat awen kaachiche pimaatisiiwiniyuu, chischeyimiske chiya mikw e peyakushiyin e Chishemanituwiyin, kaye maak Jesus Christ chischeyimaate, aniyuu kaa pechi itishahumat.

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

³ ᒫᐅᑌ ᒫᒃ ᒉᒌ ᐅᐦᒋ ᐊᔮᑦ ᐊᐌᓐ ᑳᒋᒉ ᐱᒫᑎᓰᐎᓂᔫ, ᒋᔅᒉᔨᒥᔅᑫ ᒋᔭ ᒥᒄ ᐁ ᐯᔭᑯᔑᔨᓐ ᐁ ᒋᔐᒪᓂᑐᐎᔨᓐ, ᑲᔦ ᒫᒃ ᒌᓴᔅ ᙭ ᒋᔅᒉᔨᒫᑌ, ᐊᓂᔫ ᑳ ᐯᒋ ᐃᑎᔕᐦᐅᒪᑦ᙮

John 17:3 Iomraidhean Croise

Mark 9:37

“Awen e utinaat peyakw awaasha nitishinihkaasuwinihch uhchi, mwehch kaye niya e utinit ekun e ishinaakuniyich. An maak awen kaa utinit namayeu niya kaa utinit, aniyuuh kaa pechi itishahuyich eukw aniyuu wetinaat.”

Luke 9:48

“Awen e utinaat peyakw uyuu awaasha nitishinihkaasuwinihch uhchi, mwehch kaye niya e utinit ekun e ishinaakuniyich. An maak awen kaa utinit namayeu niya kaa utinit, aniyuuh kaa pechi itishahuyich eukw aniyuu wetinaat. Wesh an awen maauch nuuhtaash kaa iteyihtaakusit anit e tashiyekw eukun an maauch chesteyihtaakusit.”

John 10:36

Niya maak, Uhtaawiimaau nichii wiyeyimikw kaye nichii pechi itishahuukw utah aschiihch. Taanite chechii uhchi itweyekw e paashtaamuyaan e itweyaan, eukw niya Chishemanituu Ukusisa.

John 11:42

Nichischeyihten muush e pechi nituhtuyin, mikw maak nititwen uu chechii taapwehtahkwaau uchii iinuuch chii e chii pechi itishahuyin.”

John 14:26

Aniyuu Kaa payehchisiyich Ahchaahkwa Nuuhtaawii che pechi itishahamaataakw nitishinihkaasuwinihch uhchi ekun an misiwe chekwaayuu che chiskutamaataakw kaye chika chischisuumikuwaau misiwe chekwaayuu kaa ishi wiihtamaatakuch.”

John 17:18

Niya ekw e itishahukwaau utah aschiihch mwehch chii kaa ishi pechi itishahuyin utah aschiihch.

John 17:21

Kamaa ishinaakusiwaakupanenich uchii chechii peyakutwaau. Nuuhtaawii, chinitutamaatin chechii piihchishkaatahkwaau mwehch chiya e ishi piihchishkuwiyin kaye maak chechii uhchi taapwehtahkwaau awenich utah aschiihch kaa ihtaatwaau taapwe chiya e chii pechi itishahuyin.

John 17:23

Niya e piihchishkuukwaau ekw maak chiya e pechi piihchishkuwiyin ekut chechii uhchi tekash peyakutwaau. Ekut maak chechii uhchi taapwehtahkwaau awenichii utah aschiihch kaa ihtaatwaau chiya taapwe e chii pechi itishahuyin kaye maak taapwe e saachihiitwaau mwehch niya e ishpish saachihiyin.”

John 17:25

Nuuhtaawii, chiya muush kaa kuiskw ihtiyin, namui chichischeyimakuch anichii awenich ekaa kaa aapateyimiskwaau utah aschiihch, niya maak wii chichischeyimitin. Uchii maak kaye kaa pechi miyin chischeyihtamuch taapwe chiya e chii pechi itishahuyin.

John 17:8

Nichii wiihtamuwaauch taan kaa ishi miyin chechii wiihtamuukwaau. Chii utinamuch maak taan kaa ishi wiihtamuukwaau. Chischeyihtamuch taapwe chiya e chii pechi itishahuyin taapwehtamuch kaye uyuu.”

John 3:17

Wesh Chishemanituu chii pechi itishahweu Ukusisa utah aschiihch chechii pimaachihaayich aweyuuh namui wii chechii pechi nishuuwanaachimaayich.

John 3:34

An kaa pechi itishahukut Chishemanituu iteu taan e ishi miikut Chishemanituuh chechii itwet kaye mitun tekash piihchishkaakuu Chishemanituu Utahchaahkuyuuh.

John 5:44

Taanite chechii uhchi taapwehtamekw mikw naapeu e wii nanihiiwehekw ekaa wii nanihiiwehekw Chishemanituu.

John 6:57

Nuuhtaawii an kaa miiwet pimaatisiiwiniyuu nichii pechi itishahuukw kaye nimiikw pimaatisiiwiniyuu. Ekun maak mwehch kaye wiya an awen kaa miichit niyaasiyuu, nika miyaau chechii pimaatisiit.

John 7:29

Mikw maak nichischeyimaau niya wesh wiya e ihtaat nuuhchiiwaan kaye wiya nichii pechi itishahuukw.”

John 8:19

Ekw kaa itaatwaau, “Taanite e ihtaat kuuhtaawii.” Jesus kaa ishi nishkweushihaat, “Namui taapwe chichischeyiminaawaau kaye Nuuhtaawii namui chichischeyimaawaau. Wesh chischeyimiyekw Nuuhtaawii kaye chipaa chischeyimaawaau.”

1 Corinthians 15:34

Wii waashkameyihtamukw maa. Ekun ekw ishpish machituutamukw. Chipaa pimaamishiinaawaau e ititakuch pasch anit e tashiyekw ekaa chischeyimekw Chishemanituu.

1 Corinthians 8:4

Ekw maak waa aayimuutamaan e miichinaanuuhch miichim manituuhkaanich e chii pachishtinamuwaakanuutwaau. Chiwaapamaanuuch manituuhkaanich mikw maak chichischeyihtenaanuu ekaa mitun wiyesh iteyihtaakusitwaau. Kaye maak chichischeyihtenaanuu ekaa ihtaat kutak awen e Chishemanituut, mikw Chishemanituu.

2 Corinthians 4:6

Itashteu Chishemanituu utayimuwinihch e chii itwet Chishemanituu, “Chika waashteu anite uhchi wanitipiskusiiwinihch.” Eukw uu yaapach Chishemanituu kaa ihtuutahk chechii waashteyich chitehiinaahch. Ekut maak wehchi kaschihupayihch chechii wiichihiihkwaau kutakach awenichii chechii waapahtahkwaau uyuu waashtewiniyuu. Uu maak waashtewin eukw aniyuu Chishemanituu uchisteyihtaakusuwin. Jesus Christ maak e ihtaat ekut wehchi nuukuniyich aniyuu uchisteyihtaakusuwin.

Philippians 3:10

Nichii pachishteyihtamihiikuun misiwe uyuuh chekwaayuu tekash chechii chischeyimak Christ, chechii chischeyihtamuch nipimaatisiiwinihch aniyuu suuhkaatisiiwiniyuu kaa wanishkaanikut kaa nipit, chechii nanehkaateyimuyaan kaye niya taan kaa ishi nanehkaateyimut wii. Kaye chechii pachishteyimisuyaan kaye niya chechii nipiyaan mwehch wiya kaa ishi pachishteyimisut.

Philippians 3:8

Namui maak mikw aniyuuh chekwaayuuh kaa aayimuutamaan nuuhchi wepinen. Misiwe kutach chekwaan namui mitun nitaapateyihtamihiikun e ishpish etituu iteyihtaakuhch e chischeyimak Christ Jesus taapwe e Utipeyihchikemiyaan. Wiya uhchi eukuu wehchii pachishteyihtamihiikuyaan misiwe uyuuh chekwaayuu, wepinaasun nititeyihtamihiikun uyuuh chekwaayuuh, wiya chechii wiicheuk,

1 Thessalonians 1:9

Taanite mikw kaa ati ituhteyaahch aayimuutamuch awenichii e chii pehtahkwaau taan kaa ishi miyukuuyaahch chiyawaau Thessalonica kaa uhchiyekw kaa nituwaapamitaahch. Aayimuutamuch kaye taan kaa ishi puuniiwekw e nuuchiishtuwekw manituuhkaanh chechii chihchi nanihiihtuumekw kaye chechii atushkuumekw aniyuuh taapwe Cheshemanituyich kaye taapwe pemaatisiyich,

2 Thessalonians 1:8

Ishkuteyuu e chisihkuyepayiyich chika aapachihtaau waweshihaate aniyuu ekaa kaa chischeyimaayich Chishemanituu kaye aniyuuh ekaa kaa nanihiihtamiyich miywaachimuwiniyuu anit yaayimuumaakanuyich Utipeyihchikeu Jesus.

Hebrews 3:1

Niichishaanitikw kaa payehchisiyekw, kaye chiyawaau Chishemanituu kaa tepwaatitaakw. Maamituneyimaahkw maa Jesus, eukw uuyuu Chishemanituu utitishihwaakanh. Kaye eukw uu wechisheayimiheuchimaamiihkw. Chiwiichihiikunuu tekash chechii taapwehtamukw kaye chechii wiihtamuhkw taan e ishi taapwehtamukw.

2 Peter 1:2

Shaweyihchichewin kaye chiyaameyihtamuwin chika wii ayahchihtamaakunaawaau an uhchi e chischeyimekw Chishemanituu kaye Jesus Chitipeyihchikeminuu.

2 Peter 1:3

Chichischeyimaanuu ekw Jesus Christ chipimaatisiiwinaahch, an awen kaa tepwaatitahkw chechii chischeyihtamihiitahkw wiya tipiiwe uchisteyihtaakusuwin kaye uchishemanituuwaatisiiwin. Ekut maak uu uhchi, uyuu e chischeyimakw Jesus, Chishemanituu wiya usuukaatisiiwinihch uhchi shaash misiwe chichii miikunuu taan e ishi nitaweyihtaakuniyich chipimaatisiiwinaahch taapwe wiya e ihtaat chechii ishi pimaatisiyuuhkw.

2 Peter 1:8

Eukw maak uyuu chekwaayuu wetaach chipaa weyuuch ayaanaawaau chipimaatisiiwiniwaahch. Wesh chiishpin taapwe weyuuch ayaayekwe chika ihtuutaakunaawaau taapwe chechii weyuuch atuskuwekw Chitipeyihchikeminuu Jesus Christ aniyuu taan e ishi chischeyimekw chipimaatisiiwiniwaahch. Kaye naashch taapwe chika miyu atuskawaawaau.

1 John 1:2

Muush Uhtaawiimaauh e ihtaayich chii ihtaau. Chii nuukuhtaakanuuyuu upimaatisiiwin. Nichii waapahtamuwaanaan. Ekw maak tepaatutamuwachiht, e aayimuutamaataahch kaachiche pimaatisiiwin.

1 John 1:3

An kaa waapamachiht kaye kaa pehtawachiht e ayimit chiwii aayimuutamaatinaan kaye chiyawaau chechii chischeyimekw mwehch niyaan e ishi chischeyimachiht. Ekw maak chechii ishi wiichewiyaahch e ishi wiichewachiht Uhtaawiimaau ekw maak Ukusisa Jesus Christ.

1 John 2:23

Wesh awen kaa aatuweyimaat Ukusiisimaau aatuweyimeu kaye Uhtaawimaau. Ekw maak an awen kaa itwet e taapweyimaat Ukusisimaau taapweyimeu kaye Uhtaawiimaauh.

1 John 4:6

Chiyaanuu wii Chishemanituu chichii pimaachihiikunuu. An awen kaa chischeyimaat e iteyihtaakusiyich Chishemanituuh chinituhtaakunuu taan e iteuhkw. Ekw an awen ekaa kaa chischeyimaat Chishemanituu namui chinituhtaakunuu. Ekut wehchi chischeyimahkw taapwewin Ahchaahkw kaye maak kaa wiyeshimuwet ahchaahkw.

1 John 5:20

Chichischeyihtenaanuu Chishemanituu Ukusisa e chii pechi takushiniyich utah aschiihch, chechii chiskutamaatahkw chechii chischeyimahkw aniyuu chihchiwe Chishemanituwiyich. Chiwiichewaanuu an taapwe Cheshemanituut e wiicheumahk Ukusisa Jesus Christ. Eukw uu taapwe Cheshemanituut, an kaa miiwet kaachiche pimaatisiiwiniyuu.